ಮೊಗವೀರ ಅಸೋಸಿಯೇಷನ್ ಕುವೈತ್ ದ ವರ್ಷೊದ ಮಹಾಸಭೆ: ಪೊಸ ಗುರ್ಕಾರ್ಲು ಆದ್ ಕವಿತಾ ಕಿದಿಯೂರು ಆಯ್ಕೆ

ಕುವೈತ್ ಮೊಗವೀರ ಅಸೋಸಿಯೇಷನ್ 2025ನೇ ಸಾಲ್ ದ ವರ್ಷೊದ ಮಹಾಸಭೆನ್ (AGM) ಡಿ.26 ಕ್ಕ್ ನಡತ್ಂಡ್.

ಈ ಲೇಸ್ ದ ಸುರುಟು ನಿರೂಪಕಿ ರಂಜಿತಾ ಪಂಡರಿ ಕಾಂಚನ್ ಮೇರ್ ಮಾತ ಸದಸ್ಯೆರೆನ್ ಮೋಕೆನ್ ಎದ್ಕೊನಿಯೆರ್. ಶ್ರೀ ಪಂಡರಿ ಕಾಂಚನ ಮೆರೆನ ದೇವೆರೆನ ಸುಗಿಪು ದೊಟ್ಟು ಸಭೆ ಸುರು ಆಂಡ್. ಬೊಕ್ಕ ಆಡಳಿತ ಮಂಡಳಿದ ಪದುಕೆರೆನ್ ಚಾವಡಿಗ್ ಲೆತ್ತಿ ಬೊಕ್ಕ ಬಿನ್ನೆರ್ ತುಡರ್ ಅರ್ಲಾದ್ ಲೇಸ್ ದ ಉದಿಪನ ಮಲ್ತೆರ್.

ಈ ಪೊರ್ತುಡು ರಮೇಶ್ ಕಿದಿಯೂರ್, ಗೋಪಾಲ್ ಸುವರ್ಣ, ಡಾಕ್ಟರ್ ವಿಕ್ಯಾತ್ತ್, ಜಯ ಕೋಟ್ಯಾನ್, ಪೂನಮ್ ಮೆಂಡನ್ , ಕವಿತಾ ಕಿದಿಯೂರ್ ಇತ್ತೆರ್.

ಅಂಚೆನೆ ಸಂಸ್ಥೆದ ಪ್ರಧಾನ ಕಾರ್ಯಂತೆರ್ ಸ್ಮಿತಾ ಲಕ್ಷ್ಮೀಶ್ ಮೇರ್ ಕರಿನ ವರ್ಷೊದ ವರದಿನ್ ಓದಿಯೆರ್. ಪಣವುದ ಪಾಲವೆರ್ ಸುಧಾಕರ್ ಪುತ್ರನ ಮೇರ್ ಸಂಘದ ಆರ್ಥಿಕ ಸ್ಥಿತಿಗತಿದ ವಿವರದ ವರದಿನ್ ಓದಿಯೆರ್. ಬೊಕ್ಕ ಸಾರ್ವಜನಿಕೆರೆನ ಪ್ರಶ್ನೋತ್ತರದಾ ಅವಧಿಡ್ ಸದಸ್ಯೆರೆನ‌ ಸಂಶಯಲೆಗ್ ಸರಿಯಾಯಿನ ಮಾಹಿತಿನ್ ಕೊರಿಯೆರ್.

ನಿರ್ಗಮಿತ ಗುರ್ಕಾರ್ಲು ಪೂನಂ ಮೆಂಡನ್ ಮೇರ್ ಪಾತೆರ್ದ್, ತನ್ನ ಅವಧಿಡ್ ಸಹಕಾರ ಮಲ್ತಿನ ಮಾತೆರೆಗ್ಲ ಸೊಲ್ಮೆ ಸಂದಾಯೆರ್. ಬೊಕ್ಕ ‌ತನ್ನ ಆಡಳಿತ ಅವಧಿಡ್ ನಡತಿನ ನಡತಿನ ಎಡ್ಡೆ- ಆಳ್ ಇಚಾರನ್ ನೆಂಪು ಮಲ್ತೊಂದು, ಸಂಘದ ಅಭಿವೃದ್ಧಿದ ಬಗೆಟ್ ಪಾತೆರಿಯೆರ್.

ಸಂಸ್ಥಾಪಕ ಗುರ್ಕಾರ್ಲು ರಮೇಶ್ ಕಿದಿಯೂರ್ ಮೇರ್ ಸಂಘದ ಬುಲೆಚ್ಚಿಲ್ ದ ಬಗೆಟ್ಟ್ ಎಡ್ಡೆಪ್ಪು ಬಯಕಿಯೆರ್.

ಚುನಾವಣಾಧಿಕಾರಿ ಜಯ ಕೋಟ್ಯಾನ್ ಮೇರ್ 2026ನೇ ಸಾಲ್ ದ ಪೊಸ ಆಡಳಿತ ಸಮಿತಿನ್ ಅಧಿಕೃತವಾದ್ ಘೋಷನೆ ಮಲ್ತ್ ದ್, ಪರಿಚಯ ಮಲ್ತೆರ್. ಗುರ್ಕಾರ್ಲು ಆದ್ ಕವಿತಾ ಕಿದಿಯೂರ್, ಒತ್ತುಗುರ್ಕಾರ್ಲು ಆದ್ ಅಮೃತ್ ಕಾಂಚನ್, ಪ್ರಧಾನ ಕಾರ್ಯಂತೆರ್ ಆದ್ ಸ್ಮಿತಾ ಲಕ್ಷ್ಮೀಶ್, ಪಣವುದ ಪಾಲವೆರ್ ಆದ್ ಪ್ರಶಾಂತ್ ಕುಂದರ್, ಸಾಂಸ್ಕೃತಿಕ ಕಾರ್ಯಂತೆರ್ ಆದ್ ಪುಂಡರಿ ಕಾಂಚನ್, ಸಾರ್ವಜನಿಕ ಸಂಪರ್ಕ ಅಧಿಕಾರಿಯಾದ್ ಸುಧಾಕರ್ ಪುತ್ರನ್, ಕ್ರೀಡಾ ಕಾರ್ಯಂತೆರ್ ಆದ್ ಲೋಹಿತ್ ಜಿ ಕರ್ಕೇರ ಆಯ್ಕೆ ಆಯೆರ್.

ಪೊಸ ಸಮಿತಿದ ಸದಸ್ಯೆರ್ ಸಂಘದ ನನದ ಯೋಜನೆಲೆನ ಬಗ್ಗೆ ತನ್ನ ಅನಿಸಿಕೆನ್ ಪಂಡೆರ್. ಲೇಸ್ ಡ್ ನಿರ್ಗಮಿತ ಗೌರವಾಧ್ಯಕ್ಷೆರಾಯಿನ ಪೂನಮ್ ಮೆಂಡನ್ ಮೆರೆಗ್ ನೆಂಪುದ ಕಾಣಿಕೆನ್ ಕೊರ್ದು ಮಾನಾದಿಗೆ ಮಲ್ತೆರ್. ಅಂಚೆನೆ ಲಕ್ಷ್ಮಣ್ ಚಂದ್ರಪ್ಪ ಮೆರೆಗ್ ನಿರ್ಗಮಿತ ಸದಸ್ಯೆರೆನ ಲೆಕ್ಕೊಡು ಸ್ಮರಣಿಕೆ ಕೊರ್ದು ಮಾನಾದಿಗೆ ಮಲ್ತೆರ್.
ಪೊಸ ವರ್ಷೊದ ಆಚರಣೆದ ಲೆಕ್ಕೊಡು ಕೇಕ್ ಕಟ್ಟ್ ಮಲ್ತೆರ್. ಪುರಂದರ್ ಮಂಚಿ ಬೊಕ್ಕ ಪುಂಡರೀಕ ಕಾಂಚನ್ ಮೊಕುಲು ಬೇತೆ ಬೇತೆ ಸ್ಪರ್ಧೆನ್ ನಡಪಾಯೆರ್. ಬೇಬಿ ಅಶ್ವಿತಾ ಬೊಕ್ಕ ಬೇಬಿ ಧನಿಕಾ ಮೊಕ್ಲೆನ ನೃತ್ಯ ಪ್ರದರ್ಶನ ಬೊಕ್ಕ ಸುದೇಶ್ ಪುತ್ರನ್, ಸುರೇಶ್ ಸಾಲಿಯಾನ್ ಬೊಕ್ಕ ಪುರಂದರ್ ಮಂಚಿ ಮೊಕ್ಲೆರ್ದ್ ಗಾಯನ ಸುಧೆ ಲೇಸ್ ನಡತ್ಂಡ್.
ಈ ಪೊರ್ತುಡು ಸುರೇಶ್ ಸಾಲಿಯಾನ್ ಮೆರೆನ ಮಗೆ ಯುವ ಗಾಯಕೆ ಮೌರ್ಯ ಸೂರ್ಯ ಮೆರೆನ ಪೊಸ ಪದ್ಯ ಬುಡುಗಡೆ ಆಂಡ್.
ಅಂಚೆನೆ ಸೀನಿಯರ್ ಚೇಂಬರ್ ಇಂಟರ್ ನ್ಯಾಷನಲ್ ಬಂಟಕಲ್ ಸನ್ ಶೈನ್ ಉಂದೆತ ಗುರ್ಕಾರ್ಲು ಆಯಿನ ರಮೇಶ್ ಬಂಟಕಲ್ ಮೆರೆಗ್ ಶಿವಮೊಗ್ಗಡ್ ನಡತಿನ ಸಮ್ಮೇಳನಡ್ ಬೆಸ್ಟ್ ಪ್ರೆಸಿಡೆಂಟ್ ಅವಾರ್ಡ್ ಕೊರ್ದು ಮಾನಾದಿಗೆ ಮಲ್ದೆರ್ ಪಂದ್ ತೆರಿಪಾಯೆರೆ ಕುಸಿ ಆಪುಂಡು ಪಂದ್ ಬಂಟಕಲ್ ದ ಗುರ್ಕಾರ್ಲು ಬೊಕ್ಕ ಮಾತಾ ಪದುಕೆರ್ ಪಂಡೆರ್.

ಸಂಘದ ಈ ವರ್ಷೊದ ಸಮಾಜ ಸೇವೆ ಬೊಕ್ಕ ಕಲ್ಯಾಣ ಯೋಜನೆಲು:

ಸದಸ್ಯೆರಾಯಿನ ದಿವಂಗ ಮನೋಜ್ ಕುಮಾರ್ ಮೆರೆನ ಕುಟುಂಬಗ್ 5 ಲಕ್ಷ ರೂ. ಸಹಾಯಧನ, ಕ್ಯಾನ್ಸರ್ ಚಿಕಿತ್ಸೆಗಾದ್ ರಾಜೇಶ್ ಮೆರೆಗ್ 1,28,000 ರೂ. ಸಕಾಯ, ಮೆರಿಟ್ ವಿದ್ಯಾರ್ಥಿಲೆಗ್ ಒಟ್ಟು 30,000 ರೂ. ವಿದ್ಯಾರ್ಥಿವೇತನ.

ನನಲ ಮುಂದುವರಿಯೆರೆ ಇಪ್ಪುನ ಯೋಜನೆಲು:

*ಸದಸ್ಯೆರೆನ ಮರಣದ ಪೊರ್ತುಡು 1 ಲಕ್ಷ ರೂ. ಮರಣದ ಧನಸಕಾಯ, ಗಂಭೀರ ಅನಾರೋಗ್ಯಗ್ 25,000 ರೂ. ಸಹಾಯಧನ ಬೊಕ್ಕ ಸದಸ್ಯೆರೆನ ಜೋಕ್ಲೆನ ವಿದ್ಯಾಭ್ಯಾಸಗ್ (10 ಬೊಕ್ಕ 12ನೇ ಕ್ಲಾಸ್) ವಿದ್ಯಾರ್ಥಿವೇತನ ಯೋಜನೆಲು ಮುಂದುವರಿಯೆರೆ ಉಂಡು ಪಂದ್ ಸಂಘ ತೆರಿಪಾದ್ಂಡ್.

ಪ್ರಧಾನ ಕಾರ್ಯಂತೆರ್ ಸ್ಮಿತಾ ಮೇರ್ ಲೇಸ್ ಗ್ ಸಹಕಾರ ಮಲ್ತಿನ ಮಾತೆರೆಗ್ಲ‌ ಸೊಲ್ಮೆ ಸಂದಾಯೆರ್. ಅಕೇರಿಡ್ ಮಾತೆರ್ಲಾ ಸೇರ್ದ್ ಫೋಟೋ ದೆತ್ತೆರ್. ಬೊಕ್ಕ ಶಾಹಿ ತಂದೂರಿ ರೆಸ್ಟೋರೆಂಟ್ ದ ಮುತಾಲಿಕೆಡ್ ವನಸ್ ದ ವ್ಯವಸ್ಥೆ ಇತ್ತ್ಂಡ್.