ಕ್ಯಾಲಿಫೋರ್ನಿಯಾ: ಅಮೆರಿಕದ ಪುಗರ್ತೆದ ಗೋಲ್ಡನ್ ಗ್ಲೋಬ್ ಪ್ರಶಸ್ತಿ ಆರ್ ಆರ್ ಆರ್ ಪಿಕ್ಚರ್ ದ ನಾಟು ನಾಟು ಪದ್ಯಗ್ ತಿಕ್ ದ್ಂಡ್.
ಈ ಪ್ರಶಸ್ತಿನ್ ಕ್ಯಾಲಿಫೋರ್ನಿಯಾದ ಬೆವರ್ಲಿ ಹಿಲ್ಸ್ ಡ್ ನಡತಿನ ಲೇಸ್ ಡ್ ಪ್ರದಾನ ಮಲ್ತೆರ್. ಪುಗರ್ತೆದ ನಿರ್ದೇಶಕೆರ್ ರಾಜಮೌಳಿ ಈ ಪಿಕ್ಚರ್ ದ ನಿರ್ದೇಶಕೆರಾತೆರ್. ಎಂ ಎಂ ಕೀರವಾಣಿ ಸಂಗೀತ ಕೊರ್ತೆರ್. ಜೂನಿಯರ್ ಎನ್ ಟಿ ಆರ್ ಬೊಕ್ಕ ರಾಮ ಚರಣ್ ನಾಟು ನಾಟು ಪದ್ಯಗ್ ನಲಿತ್ ದೆರ್.
ಒಡಿಪು: ಕಿದಿಯೂರು ಶ್ರೀ ಬಾಲಾಂಜನೇಯ ಪೂಜಾ ಮಂದಿರಡ್ 54 ನೇ ವರ್ಷದ ಉಚ್ಚಯ ಜ.28 ರ್ದ್ 30 ಮುಟ್ಟ ನಡಪರೆ ಉಂಡು.
ಜ.28 ಸನಿಯಾರ ಪ್ರಾರ್ತನೆ, ಪುಣ್ಯಾಹ, ತೋರಣ ಮೂರ್ತ, ಗಣಯಾಗ, 25 ಕಲಶ ಪ್ರತಿಷ್ಠೆ, ಪ್ರಧಾನ ಹೋಮ, ಆಶ್ಲೇಷಾ ಬಲಿ ನಡಪುಂಡು. ಜ.29 ಐತಾರ ಮಹಾಮಂಗಳ, ಸಾರ್ವಜನಿಕ ರಂಗಪೂಜೆ, ದೀಪಾರಾಧನೆ, ಪ್ರಸಾದ ಕೊರಿಯೆರೆ ಉಂಡು. ಬೊಕ್ಕ ಸಾಂಸ್ಕೃತಿಕ ಲೇಸ್ ನಡಪುಂಡು. ಆಯಿರ್ದ್ ಪೊಸ ವೇದಿಕೆದ ಉದಿಪನ ಆದ್ ಸಾಕ್ಷಿ ಕಲಾವಿದೆರ್ ಬೆಳಪು ಮೊಕ್ಲೆರ್ದ್ ಕಾಮಿಡಿ 20-20 ನಡಪರೆ ಉಂಡು. ಜ.30 ಸೋಮಾರ ಕೈತಲ್ ದಕ್ಲೆರ್ದ್ ಸಾಂಸ್ಕೃತಿಕ ಲೇಸ್ ಆದ್, ಕಾಪು ರಂಗತರಂಗ ಕಲಾವಿದೆರೆರ್ದ್ ಬುಡೆದಿ ತುಳು ನಾಟಕ ನಡಪರೆ ಉಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಡೆಲ್ಲಿ: ಪೊಣ್ಣು ಒರ್ತಿ ಮದಿಮೆರ್ದ್ ದುಂಬೇ ಪೆದಿನ ಬಾಲೆನ್ ತನ್ನ ಅಪಾರ್ಟ್ ಮೆಂಟ್ ದ ಪಾಯಿಕಾನೆದ ಕಂಡಿರ್ದ್ ಪಿದಯಿ ದಕ್ಕಿನ ಘಟನೆ ಡೆಲ್ಲಿಡ್ ನಡತ್ಂಡ್.
ಅವೆನ್ ನಾಡ್ ಪತಿನ ಪೊಲೀಸೆರ್ ಆ ಪೊಣ್ಣನ್ ವೈದ್ಯಕೀಯ ಪರೀಕ್ಷೆಗ್ ಆಸ್ಪತ್ರೆಗ್ ಸೇರ್ಸಾದೆರ್.
ಗುರುಪುರ : ಕರಿನ 12 ವರ್ಷಡ್ ತುಳುನಾಡ ಸಂಸ್ಕೃತಿದ ಪಡಿಯಚ್ಚಿಡ್ ಗುತ್ತು-ಇಲ್ಲದ ಗೌರವೊನು ಒರಿಪಾವೊಂದು ಬತ್ತಿನ ಗತ್ತ್ ದ ಗುತ್ತೇ ಗುರುಪುರ ಗೋಳಿದಡಿ ಗುತ್ತು.
ಗುರುಪುರ ಫಲ್ಗುಣಿ ತುದೆತ ಬರಿಟ್ಟ್ ಇಪ್ಪುನ ಸಂಸ್ಕೃತಿದ ನಿಲೆ ಆಯಿನ ಗೋಳಿದಡಿ ಗುತ್ತು 2009 ಟ್ ಪುನರ್ ನಿರ್ಮಾಣ ಆಂಡ್. 2010ಟ್ ಗುತ್ತುದ ಇಲ್ಲದ ದುರ್ಗಾಪ್ರಸಾದ ಶೆಟ್ಟಿ ಮೇರ್ `ಶ್ರೀ ವರ್ಧಮಾನ’ ಪನ್ಪುನ ಬಿರ್ದ್ ದೊಟ್ಟಿಗೆ ಗುತ್ತುದ ಇಲ್ಲದ ಗಡಿಪಟ್ಟ ಸ್ವೀಕಾರ ಮಲ್ತೆರ್.
ಚಿಕ್ಕಮಗಳೂರುದ ವೇದವಿಜ್ಞಾನ ಮಂದಿರದ ಬ್ರಹ್ಮಋಷಿ ಕೆ.ಎಸ್ ನಿತ್ಯಾನಂದ ಮೇರ್ ಮುಲ್ಪದ ಇಡೇ ಮುಟ್ಟದ ಮಾತ ಶಿಷ್ಟ ಬೊಕ್ಕ ವಿಶಿಷ್ಟ ಪರಂಪರೆದ ಪಿರವುದ ಶಕ್ತಿ ಬೊಕ್ಕ ಮಾರ್ಗದರ್ಶಕೆರಾತೆರ್.ಗೋಳಿದಡಿ ಗುತ್ತುದ ಇಲ್ಲಡ್ ಶ್ರೀ ವೈದ್ಯನಾಥ (ಶ್ರೀ ಮುಂಡಿತ್ತಾಯ), ಐನ್ ದೈವೊಲು ಉಂಡು. ಕಷ್ಟ ಪಂದ್ ಬತ್ತಿನಕ್ಲೆಗ್ ಪರಿಹಾರ ಮಲ್ತಿನ ಸಾನಿಧ್ಯ ಆದುಂಡು. ಎಂಕ್ಲೆನ ಮಾತ ಸತ್ಕಾರ್ಯಗ್ ದೈವೊದ ಕೃಪೆನೇ ಕಾರಣ ಪನ್ಪುನ ದುರ್ಗಾಪ್ರಸಾದ ವರ್ಧಮಾನ ಶೆಟ್ಟಿ ಬೊಕ್ಕ ಅರೆನ ಬೊಡೆದಿ, ಜೋಕುಲು, ಪಂಡಿ ಪಾತೆರದಲೆಕ್ಕನೇ ನಡತ್ ತೊಜಪಾವುನ ವಿಶಿಷ್ಟ ವ್ಯಕ್ತಿತ್ವದಕುಲು.
ಶ್ರೀ ವರ್ಧಮಾನೆರ್ ಗಡಿಪಟ್ಟ ಸ್ವೀಕಾರ ಮಲ್ತ್ ದ್ 12 ವರ್ಷ ಆಂಡ್. ಈ ದಿಟ್ಟಿಡ್ ಈ ವರ್ಷ ಜ. 17 ರ್ದ್ 19 ಮುಟ್ಟ ಗೋಳಿದಡಿ ಗುತ್ತುದ ಇಲ್ಲಡ್ ಗಡಿಪಟ್ಟ ಸ್ವೀಕಾರ ಮಲ್ಪುನ 12ನೇ ವರ್ಷದ ಗೌಜಿ ನಡಪರೆ ಉಂಡು. ಕರಿನ 12 ವರ್ಷಲೆನ ಅವಧಿಡ್ ಮುಲ್ಪ ನಡತಿನ ಪ್ರತಿಯೊಂಜಿ ಕಜ್ಜೊಲ ಕೆ.ಎಸ್ ನಿತ್ಯಾನಂದ ಮೆರೆನ ಮಾರ್ಗದರ್ಶನದ ಅಂಚನೆ ನಡತ್ಂಡ್. ಈ ಸರ್ತಿಲ, 12ನೇ ವರ್ಷದ ಪರ್ವೋಚ್ಚಯ, ಗಡಿಪಟ್ಟ ಸ್ವೀಕಾರ ಮಲ್ಪುನ ಗೌಜಿಲ ಅರೆನ ನಿರ್ದೇಶನದಂಚನೆ ನಡಪರೆ ಉಂಡು.
ಪ್ರತಿಷ್ಠಿತ 95ನೇ ಆಸ್ಕರ್ ಅಕಾಡೆಮಿ ಪ್ರಶಸ್ತಿದ ಎಡ್ಡೆ ಪಿಚ್ಚರ್ ವಿಭಾಗಡ್ ಕಿಚ್ಚ ಸುದೀಪ್ ನಟನೆದ “ವಿಕ್ರಾಂತ್ ರೋಣ” ಪಿಚ್ಚರ್ ನಾಮಿನೇಶನ್ ಆತ್ಂಡ್.
ಕಾಂತಾರ ಬೊಕ್ಕ ವಿಕ್ರಾಂತ್ ರೋಣ ರಡ್ಡ್ ಪಿಚ್ಚರ್ಲು ಈ ಸರ್ತಿ ಆಸ್ಕರ್ ಪ್ರಶಸ್ತಿಗ್ ನಾಮಿನೇಶನ್ ಆತ್ಂಡ್.
ದಕ್ಷಿಣ ಕನ್ನಡ ಜಿಲ್ಲೆದ ಬಂಟ್ವಾಳ ತಾಲೂಕ್ದ ಕನ್ಯಾನ ಗ್ರಾಮದ ಗೌರಿನಿಲಯದ 48 ವರ್ಷದ ವಾಸುದೇವ ನಾಯಕ್ ಮೆರೆಗ್ ತಿಗಲೆಗ್ ಸಂಬಂಧ ಪಟ್ಟಿನ ಸಮಸ್ಯೆ ಇತ್ತ್ಂಡ್. ಕರಿನ ನ.18 ರ್ದ್ ಖಾಸಗಿ ಆಸ್ಪತ್ರೆಡ್ ಚಿಕಿತ್ಸೆ ಸುರು ಆದಿತ್ತ್ಂಡ್.
ಶಸ್ತ್ರಚಿಕಿತ್ಸೆ ಆಯಿಬೊಕ್ಕ ಮೆರೆಗ್ ಪಾತೆರ್ರ ಆವೊಂದಿಜ್ಜಾಂಡ್. ನನ ವಾಸುದೇವ ಮೇರೆಗ್ ಪಾತೆರಿಯರೆ ಆಪುಜಿ ಪಂದ್ ವೈದ್ಯೆರ್ ಪಂಡ್ದಿತ್ತೆರ್. ಉಂದೆರ್ದ್ ಪೋಡಿಗೆಡ್ ಇಲ್ಲದಕುಲು ಬೊಲ್ತೇರ್ ತಾಲೂಕ್ದ ಬೆಳಾಲುಡ್ ಇಪ್ಪುನ ಅರಿಕೋಡಿ ಶ್ರೀ ಚಾಮುಂಡೇಶ್ವರಿ ದೇವಲ್ಯಗ್ ಪರಕೆ ಪನ್ಪೆರ್. ವಾಸುದೇವ ಮೇರ್ ಪಾತೆರ್ಂಡ ವಜ್ರದ ಮೂಂಕುತಿ ಕೊರ್ಪ ಪಂದ್. ಪರಕೆ ಪಂಡಿನ ಒಂಜೇ ವಾರಡೇ ವಾಸುದೇವ ಮೇರ್ ಪಾತೆರ್ದೆರ್. ಇಂಚಾದ್ ಮನದಾನಿಯೇ ದೇವಿನ ಸನ್ನಿಧಿಗ್ ಬತ್ತ್ದ್ ವಜ್ರದ ಮೂಂಕುತಿ ಕೊರ್ದು ಪರಕೆ ಸಂದಾದೆರ್.
ಒಮಾನ್ : ಬ್ಯಾಡ್ಮಿಂಟನ್ ಗೊಬ್ಬೊಂದಿಪ್ಪುನ ಪೊರ್ತುಡು ಭಾರತದ ಒರಿ ಆಟಗಾರಗ್ ತಿಗಲೆ ಬೇನೆ ಆದ್ ತಿರ್ತ್ ಬೂರ್ದ್ ತೀರ್ ಪೋಯಿನ ಘಟನೆ ಮಸ್ಕತ್ಡ್ ನಡತ್ಂಡ್.
ಬ್ಯಾಡ್ಮಿಂಟನ್ ಕೋರ್ಟುಡು ನಾಲ್ ಜನ ಗೊಬ್ಬೊಂದಿತ್ತೆರ್. ಅಪಗ ಒರಾನೆ ಒರಿ ತಿರ್ತ್ ಬೂರ್ದೆರ್. ಬೊಕ್ಕ ಆರ್ ತೀರ್ ಪೋತೆರ್.
ಬೆಂಗ್ಲೂರು: ಇಲ್ಲದಕುಲು ತಾಂಕಿನ ನಾಯಿನ್ ಇಲ್ಲದ ಸದಸ್ಯೆರ್ಲೆಕ್ಕ್ ತೂಪೆರ್. ಕರಿನ ಡಿಸೆಂಬರ್ 7ತ್ತ ಕಾಂಡೆ ಅರುಣ್ ಬೊಕ್ಕ ಡೀನಾ ದಂಪತಿಲು ಮೋಕೆಡ್ ತಾಂಕೊಂದಿತ್ತಿನ “ಲುಕಾ” ಪುದರ್ದ ನಾಯಿನ್ ಕಳೆಯೊಂದೆರ್.
ಪೊಲೀಸ್ ಠಾಣೆಡ್ ದೂರ್ ಕೊರ್ಂಡಲ ಒವ್ವೆ ರೀತಿದ ಪ್ರಯೋಜನ ಆತಿಜಿ. ಇಂಚಾದ್ ಈ ನಾಯಿನ್ ನಾಡ್ ಪತ್ತ್ಂಡ 10 ಸಾರ ಇನಾಮು ಕೊರ್ಪ ಪಂದ್ ಅಕುಲು ಘೋಷಣೆ ಮಲ್ತ್ದೆರ್.
ಕುಡ್ಲ: ಕೋಡಿಕಲ್ ಶ್ರೀ ನಾಗಬ್ರಹ್ಮ ಧರ್ಮದೈವಲೆನ ಸೇವಾ ಸಮಿತಿ ಮುತಾಲಿಕೆಡ್ ನಾಗಬ್ರಹ್ಮ ಸನ್ನಿಧಿಡ್ ಬೇತೆ ಬೇತೆ ರೀತಿದ ಸೇವೆಲು ಜ.13-ಜ.22 ಮುಟ್ಟ ನಡಪರೆ ಉಂಡು.
ಜ.13 ಕ್ಕ್ ಸುಕ್ರಾರ 6 ಗಂಟೆಗ್ ನಾಗಬ್ರಹ್ಮ ಸನ್ನಿಧಿಡ್ ಚೌತಿಪರ್ಬ, ರಾತ್ರೆ 8 ಗಂಟೆಗ್ ಬಂಗಾಡಿಡ್ ಧೂಮಾವತಿ ಬಂಟ ದೈವಲೆಗ್ ಚೌತಿ ಪರ್ಬ ನಡತ್ತ್ದ್, ರಾತ್ರೆ 12 ಗಂಟೆಗ್ ಕಲ ಏರುನವು ನಡಪರೆ ಉಂಡು. ಜ.14 ಕ್ಕ್ ನಾಗಬ್ರಹ್ಮರೆಗ್ ತಂಬಿಲ ಸೇವೆ, ಜ.15 ಕ್ಕ್ ಭಂಡಾರ ಏರ್ದ್ ರಾತ್ರೆ 8 ಗಂಟೆಗ್ ಬಂಗಾಡಿತ್ತಾಯ ದೈವದ ಚಪ್ಪರ ಬಲಿ ಸೇವೆ ನಡಪರೆ ಉಂಡು.
ಜ.16 ಕ್ಕ್ ಸೋಮಾರ ರಾತ್ರೆ 9 ಗಂಟೆಗ್ ಧೂಮಾವತಿ ಬಂಟ ದೈವಲೆನ ಚಪ್ಪರ ಬಲಿ ಸೇವೆ, ಜ.21 ಕ್ಕ್ ಕೋರ್ದಬ್ಬು ತನ್ನಿಮಾನಿಗ ದೈವದ ಕೋಲ, ಅಂಚನೆ ಜ. 22 ಕ್ಕ್ ಗುಳಿಗ ಪಂಜುರ್ಲಿ ಕೋಲ ಬೊಕ್ಕ ರಾಹು ಗುಳಿಗ ಕೋಲ ನಡಪರೆ ಉಂಡು.
ಮುಲ್ಕಿ : ಮುಲ್ಕಿ ಪೇಂಟೆದ ವ್ಯಾಪ್ತಿಡ್ ಸುಮಾರ್ 10 ಕೋಟಿ ರೂ.ಕರ್ಚಿಡ್ ತಹಸೀಲ್ದಾರ್ ಕಚೇರಿ, ಕಂದಾಯ ಇಲಾಖೆ ಕಟ್ವಾನೊದ ಬೇಲೆ ಬಿರ್ಸ್ಡ್ ನಡತೊಂದು ಇತ್ತ್ದ್, ಎಪ್ರಿಲ್ಡ್ ಉದಿಪನ ಆಯರೆ ಉಂಡು. ನಗರ ವ್ಯಾಪ್ತಿ ಒಂಜೆಟ್ಟ್ 12.61 ಕೋಟಿ ರೂ. ಮುಟ್ಟದ ಬೇಲೆ ನಡತೊಂದು ಇತ್ತ್ದ್ ದುಂಬುದ ದಿನಟ್ಟ್ ಕೋರ್ಟು, ಪ್ರವಾಸಿ ಮಂದಿರ, ಅಗ್ನಿಶಾಮಕ ದಳತ್ತ ಕಟ್ವಾನ, ಬಸ್ ನಿಲ್ದಾಣ, ತಾ.ಪಂ. ಕಟ್ವಾನ ನಿರ್ಮಾಣ ಮಲ್ತ್ದ್ ಮೂಲ್ಕಿನ್ ಮಾದರಿ ನಗರವಾದ್ ಮಲ್ಪರೆ ಉಂಡು ಪಂದ್ ಮುಲ್ಕಿ ಬೆದ್ರ ಶಾಸಕೆರ್ ಪಂಡೆರ್.
ಮೂಲ್ಕಿ ನಗರ ಪಂಚಾಯತ್ ವ್ಯಾಪ್ತಿಡ್ ಸರ್ಕಾರದ ಅನುದಾನಡ್ ಲೋಕೋಪಯೋಗಿ ಇಲಾಖೆರ್ದ್ ಆಯರೆ ಇಪ್ಪುನ 320 ಲಕ್ಷ ರೂ. ಕರ್ಚಿದ ಬೇತೆ ಬೇತೆ ರೀತಿದ ಕಾಮಗಾರಿಲೆಗ್ ಜ.11 ಸೋಮಾರ ಚಾಲನೆ ಕೊರ್ದು ಆರ್ ಪಾತೆರಿಯೆರ್. ಬಿಜಾಪುರ ಕಾಲೋನಿನ್ ಅಭಿವೃದ್ಧಿ ಮಲ್ಪುನ ಉದ್ದೇಶಡ್ 6 ಕೋಟಿ ರೂಪಾಯಿದ ಮಾಸ್ಟರ್ ಪ್ಲ್ಯಾನ್ ತಯಾರ್ ಆತ್ಂಡ್ ಪಂದ್ ಕೋಟ್ಯಾನ್ ಪಂಡೆರ್.
ನಗರ ಪಂಚಾಯತ್ ಅಧ್ಯಕ್ಷೆರ್ ಸುಭಾಷ್ ಶೆಟ್ಟಿ ಲೇಸ್ದ ಅಧ್ಯಕ್ಷತೆ ವಹಿಸ್ ದಿತ್ತೆರ್. ಈ ಪೊರ್ತುಡು ಉಪಾಧ್ಯಕ್ಷೆರ್ ಸತೀಶ್ ಅಂಚನ್, ಮಾಜಿ ಅಧ್ಯಕ್ಷೆರ್ ಸುನಿಲ್ ಆಳ್ವ, ಮುಖ್ಯಾಧಿಕಾರಿ ಪಿ.ಚಂದ್ರ ಪೂಜಾರಿ, ವಿಪಕ್ಷ ನಾಯಕಿ ವಿಮಲಾ ಪೂಜಾರಿ, ಸದಸ್ಯೆರ್ ಆಯಿನ ಪುತ್ತುಬಾವ, ಹರ್ಷ ರಾಜ ಶೆಟ್ಟಿ, ಮಂಜುನಾಥ ಕಂಬಾರ, ವಂದನಾ ಕಾಮತ್, ಶಾಂತಾ ಕಿರೋ ಡಿಯನ್, ದಯಾವತಿ ಅಂಚನ್, ರಾಧಿಕ ಕೋಟ್ಯಾನ್, ಈರಣ್ಣ ಅರಳಗುಂಡಿ, ನರಸಿಂಹ ಪೂಜಾರಿ ಲೇಸ್ಡ್ ಪಾಲ್ ಪಡೆದಿತ್ತೆರ್. ಸದಸ್ಯೆರ್ ಶೈಲೇಶ್ ಕುಮಾರ್ ಬತ್ತಿನ ಬಿನ್ನೆರೆನ್ ಎದ್ಕೊಂದು ಸೊಲ್ಮೆ ಸಂದೈತ ಮಲ್ತೆರ್.
