March 2023

Road construction under the leadership of the founder president of DK district Dalit Seva Samiti (R) Vittal ದ ಕ. ಜಿಲ್ಲಾ ದಲಿತ್ ಸೇವಾ ಸಮಿತಿ (ರಿ.)ವಿಟ್ಲ ನೆತ್ತ ಸ್ಥಾಪಕಾಧ್ಯಕ್ಷೆರೆನ ಮುತಾಲಿಕೆಡ್ ಮಾರ್ಗ ನಿರ್ಮಾಣ

ದ ಕ. ಜಿಲ್ಲಾ ದಲಿತ್ ಸೇವಾ ಸಮಿತಿ (ರಿ.) ವಿಟ್ಲ ಸ್ಥಾಪಕಾಧ್ಯಕ್ಷೆರ್ ಬಿ. ಕೆ. ಸೇಸಪ್ಪ ಬೆದ್ರಕಾಡು ಮೆರೆನ ಮುತಾಲಿಕೆಡ್ ಮಾ.25 ಕ್ಕ್ ಕೇಪು ಗ್ರಾಮದ ಅಜ್ಜಿನಡ್ಕಡ್ ಪೊಸ ಮಾರ್ಗದ ನಿರ್ಮಾಣ ಮಲ್ದೆರ್.

ಅಜ್ಜಿನಡ್ಕದ ವಿಶೇಷಚೇತನೆರ್ ಕೃಷ್ಣಪ್ಪ ನಲಿಕೆ ಬೊಕ್ಕ ಕೊರಗ ಸಮುದಾಯದ ಮೂಜಿ ಕುಟುಂಬದಕುಲು ಸುಮಾರ್ ವರ್ಷೊರ್ದಿಂಚ ಮಾರ್ಗ ವಂಚಿತರಾದಿತ್ತ್ಂಡ್. ‌ನೆತ್ತ ಬಗೆಟ್ ಸಂಘಟನೆ ಕೇಪು ಗ್ರಾಮ ಪಂಚಾಯತ್ ಬೊಕ್ಕ ಕಂದಾಯ ಇಲಾಖೆ, ಪುತ್ತೂರ್ ದ ಮಾಜಿ ಶಾಸಕಿ ಬೊಕ್ಕ ಇತ್ತೆದ ಶಾಸಕೆರೆಗ್ ಬಿನ್ನಾಪು ಪತ್ರ ಕೊರ್ದು, ಪೊರ್ಂಬಾಟನ್ ಮಲ್ತ್ ದ್ ಇತ್ತೆರ್. ಆಂಡಲ ಮಾರ್ಗದ ಸಂಪರ್ಕ ಒದಗಿಸಾದಿಜೆರ್. ವೋಟುನ್ ಪಡೆಯಿನೇ ಬುಡುಂಡ ಸುಮಾರ್ ,ಸಭೆಟ್ಟ್ ಇಸಯ ತೆರಿಪಾಂಡಲ ನ್ಯಾಯ ತಿಕಿಜಿ. ನೇರ್ದಾವೆರ ಬೇಜಾರ್ ಆಯಿನ ಸಂಘಟನೆ ಬೊಕ್ಕ ಕುಟುಂಬದಕುಲು ಸೇರ್ದ್ ಬರ್ಸದ ನೀರ್ ಪೋಪಿನ ಚರಂಡಿನ್ ತಲಾ ಪತ್ತ್ ಅಡಿ ಅಗೆಲ ಮಲ್ತ್ ದ್ ಮಾರ್ಗವಾದ್ ಬದಲ್ ಮಲ್ತೆರ್. ಬೊಕ್ಕ ರಸ್ತೆ ಸಂಪರ್ಕ ಮಲ್ತೆರ್. ಈ ಪೊರ್ತುಡು ಜಿಲ್ಲಾಧ್ಯಕ್ಷೆರ್ ಚಂದ್ರಶೇಖರ್ ಯು.ವಿಟ್ಲ, ಗಣೇಶ್ ಸೀಗೆಬಲ್ಲೆ, ಈಶ್ವರ್ ಬೊಳ್ಮಾರ್ ಮಾರ್ಗ ನಿರ್ಮಾಣದ ಬೇಲೆಗ್ ಕೈ ಜೋಡಿಸಾಯೆರ್.

May 3 rd-6 th: Punar pratistan, Kalashabisheka and Nema rituals at Arantabettu guttu for Shri Ullaya, Kanteri Jumadi, Parivara Daiva ಮೇ 3-6: ಅರಂತಬೆಟ್ಟುಗುತ್ತು ಶ್ರೀ ಉಳ್ಳಾಯ, ಕಾಂತೇರಿ ಜುಮಾದಿ, ಪರಿವಾರ ದೈವೊಲೆನ ಪುನರ್ ಪ್ರತಿಷ್ಠೆ, ಕಲಶಾಭಿಷೇಕ, ಧರ್ಮ ದೈವೊಲೆನ ನೇಮ

ಸುರತ್ಕಲ್: ಅರಂತಬೆಟ್ಟು ಶ್ರೀ ಉಳ್ಳಾಯ, ಕಾಂತೇರಿ ಜುಮಾದಿ, ಪರಿವಾರ ದೈವೊಲೆನ ಪುನರ್ ಪ್ರತಿಷ್ಠೆ, ಕಲಶಾಭಿಷೇಕ ಬೊಕ್ಕ ಧರ್ಮದೈವೊಲೆನ ನೇಮ ಬೊಕ್ಕ ಅರಂತಬೆಟ್ಟುಗುತ್ತು ಧರ್ಮ ಚಾವಡಿದ ಇಲ್ಲ್ ಒಕ್ಕೆಲ್ ಲೇಸ್ ಮೇ 3-6 ಮುಟ್ಟ ನಡಪರೆ ಉಂಡು.

ಸುರತ್ಕಲ್ ಮಧುಸೂಧನ ಮಯ್ಯ ಮೆರೆನ ಉಪಸ್ಥಿತಿಡ್, ಧಾರ್ಮಿಕ ವಿಧಿ ವಿಧಾನದೊಟ್ಟಿಗೆ ಲೇಸ್ ನಡಪರೆ ಉಂಡು. ಈ ಲೇಸ್ ದ ಬಗೆಟ್ ಅಟ್ಟಣೆದ ಸಭೆ ಮುರಾನಿ ಅರಂತಬೆಟ್ಟು ಗುತ್ತುಡ್ ನಡತ್ಂಡ್. ಈ ಸಭೆಟ್ಟ್ ಲೆಪ್ಪೋಲೆನ್ ಬುಡುಗಡೆ ಮಲ್ತೆರ್. ಬೊಕ್ಕ ಸಮಿತಿದ ಅಧ್ಯಕ್ಷೆರ್ ಬಾಲಕೃಷ್ಣ ಶೆಟ್ಟಿ ಪಾತೆರ್ದ್, ಕರಿನ 80 ವರ್ಷೊರಗದಿಂಚಿ ಅಜೀರ್ಣಾವಸ್ಥೆಡ್ ಉಪ್ಪುನ ಅರಂತಬೆಟ್ಟು ಉಳ್ಳಾಯ ಬೊಕ್ಕ ಪರಿವಾರ ದೈವೊಲೆನ ದೇವಲ್ಯ ಕುಟುಂಬದಕ್ಲೆನ ಬೊಕ್ಕ ಊರುದಕಲೆನ ಸಹಕಾರದೊಟ್ಟಿಗೆ ಜೀರ್ಣೋದ್ಧಾರ ಆದ್, ಪುನರ್ ಪ್ರತಿಷ್ಠೆ, ಕಲಶಾಭಿಷೇಕ ಬೊಕ್ಕ ಇಲ್ಲ್ ಒಕ್ಕೆಲ್ ಗ್ ದಿನ ನಿಗಂಟ್ ಆಂಡ್. ನೆಕ್ಕ್ ಮಾತೆರೆನ್ಲಾ ಸಹಕಾರ ಬೊಡು ಪಂದ್ ಪಂಡೆರ್. ಈ ಪೊರ್ತುಡು ಕುಟುಂಬಿಕೆರಾಯಿನ ದಿಲ್ ರಾಜ್ ಆಳ್ವ, ಮುದ್ದಣ್ಣ ಶೆಟ್ಟಿ, ಕೋಶಾಧಿಕಾರಿ ನವೀನ್ ಶೆಟ್ಟಿ, ಕಾರ್ಯದರ್ಶಿ ಚಿತ್ರಾ ಶೆಟ್ಟಿ, ರಾಜೇಶ್ ಶೆಟ್ಟಿ ಇತ್ತೆರ್.

ಸಭೆಟ್ಟ್ ಬಾಲಕೃಷ್ಣ ಶೆಟ್ಟಿ ಅಂಗಡಿಗುತ್ತು, ರಮಾನಾಥ ರೈ, ಡಾ. ಎಸ್.ರಾಮಕೃಷ್ಣ ಶರ್ಮಾ, ಸತ್ಯಜಿತ್ ಸುರತ್ಕಲ್, ಭುಜಂಗ ಶೆಟ್ಟಿ, ಪ್ರಶಾಂತ್ ಶೆಟ್ಟಿ, ಕಾರ್ಪೋರೇಟರ್ ಶ್ವೇತಾ ಪೂಜಾರಿ, ಲೋಕಯ್ಯ ಶೆಟ್ಟಿ ಮುಂಚೂರ್, ಸತೀಶ್ ಮುಂಚೂರ್, ಪುಷ್ಪರಾಜ್ ಶೆಟ್ಟಿ ಕುಡುಂಬೂರ್, ಜಗನ್ನಾಥ ಶೆಟ್ಟಿ ಬಾಳ ಸಲಹೆ ಸೂಚನೆ ಕೊರಿಯೆರ್.

ಲೇಸ್ ದ ಪೊಲಬು
ಮೇ 3 ಬುಧಾರ ಬೊಲ್ಪುಗು ನಾಗದೇವೆರೆಗ್ ಪವಮಾನ ಹೋಮ, 25 ಕಲಶ, ತಂಬಿಲ, ಆಶ್ಲೇಷಾ ಪೂಜೆ, ಮಹಾಪೂಜೆ, ಮಧ್ಯಾಹ್ನ ಅನ್ನಸಂತರ್ಪಣೆ, ಬಯ್ಯಗ್ ಶಿಲ್ಪಿಲೆರ್ದ್ ಆಲಯ ಪರಿಗ್ರಹ, ಸ್ವಸ್ತಿ ಪುಣ್ಯಾಹ, ಪ್ರಸಾದ ಶುದ್ಧಿ, ರಾಕ್ಷೋಘ್ನ ಹೋಮ, ವಾಸ್ತುಹೋಮ, ವಾಸ್ತು ಪೂಜೆ, ದಿಕ್ಪಾಲಕ ಬಲಿ ನಡಪರೆ ಉಂಡು.

ಮೇ 4 ಬೊಲ್ಪುಗು ಗಣಹೋಮ, ವೆಂಕಟರಮಣ ದೇವೆರೆಗ್ ಮುಡಿಪು ಕಟ್ಟಿಯೆರೆ, ಗೃಹಪ್ರವೇಶ, ದೈವೊಲೆನ ಪ್ರತಿಷ್ಠೆ, ದರ್ಶನ, ನವಗ್ರಹ ಶಾಂತಿ ಹೋಮ, ಶ್ರೀ ಸತ್ಯನಾರಾಯಣ ಪೂಜೆ, ಮಧ್ಯಾಹ್ನ ಅನ್ನ ಸಂತರ್ಪಣೆ, ಬಯ್ಯಗ್ ದೈವೊಲೆನ ಕಲಶ ಪ್ರತಿಷ್ಠೆ, ಸುದರ್ಶನ ಹೋಮ, ಅಧಿವಾಸ ಹೋಮ, ರಾತ್ರೆ ಅನ್ನಸಂತರ್ಪಣೆ ನಡಪರೆ ಉಂಡು.

ಮೇ 5 ಬೊಲ್ಪುಗು ಗಣಹೋಮ, ದೈವೊಲೆಗ್ ಕಲಶಾಭಿಷೇಕ, ಪರ್ವಸೇವೆ, ಶ್ರೀ ಉಳ್ಳಾಯ ದೈವಗ್ ನೇಮ, ಒಡಿಯೂರು ಕ್ಷೇತ್ರದ ಗುರುದೇವಾನಂದ ಸ್ವಾಮೀಜಿ ಶ್ರೀ ಕ್ಷೇತ್ರಗ್ ಬತ್ತ್ ದ್ ಆಶೀರ್ವಚನ ಕೊರಿಯೆರೆ ಉಲ್ಲೆರ್. ಮಧ್ಯಾಹ್ನ ಅನ್ನಸಂತರ್ಪಣೆ, ಬಯ್ಯಗ್ ಮೈಸಂದಾಯ ದೈವೊಗ್ ನೇಮ, ರಾತ್ರೆ ಅನ್ನಸಂತರ್ಪಣೆ, ಕಾಂತೇರಿ ಜುಮಾದಿ, ಬಂಟ, ಸರಳ ಜುಮಾದಿ ಬಂಟ ಬೊಕ್ಕ ಪಿಲಿಚಾಮುಂಡಿ ದೈವೊಲೆನ ನೇಮ ನಡಪರೆ ಉಂಡು.

ಮೇ 6 ಸನಿಯಾರ ಬಯ್ಯಗ್ ಜಾಗೆದ ಪಂಜುರ್ಲಿ ಬೊಕ್ಕ ಕಲ್ಲುರ್ಟಿ ಪಂಜುರ್ಲಿ ದೈವೊಲೆನ ನೇಮ, ರಾತ್ರೆ ಅನ್ನಸಂತರ್ಪಣೆ ನಡಪರೆ ಉಂಡು.

”ತುಳು ಭಾಷೆದ ಪರ ಇತ್ತಿನಕಲೆಗ್ ಈ ಸಲ ತುಳುವೆರ್ ಓಟು ಕೊರೊಡು”- ವಸಂತ ಶೆಟ್ಟಿ ಬೆಳ್ಳಾರೆ ಲೆಪ್ಪು

”ಕರ್ನಾಟಕ ರಾಜ್ಯೋಡು ತುಳು ಬಾಸೆಗ್ ರಾಜ್ಯ ಬಾಸೆದ ಮಾನಾದಿಗೆ ಕೊರಿಯೆರೆ ಸ್ವರ ದೆರ್ಪುನಕಲೆಗ್ ಪಕ್ಷ ಬೇಧ ಜಾತಿ ತೂವಂದೆ ಈ ಸಲತ ಓಟು ಕೊರ್ದು ಬೆರಿ ಬಲ ಕೊರೊಡು, ಉಂದೆಕ್ಕಾದ್ ಮಾತಾ ತುಳುವೆರೆನ ಮನಸ್ ಗೆಂದ್ಯರೆ ಇಲ್ಲ ಇಲ್ಲಗ್ ಪೋದು ಪ್ರಚಾರ ಮಲ್ಪುನ ಅಭಿಯಾನ ಸುರು ಮಲ್ಪೊ ಡು” ಪಂಡುದ್ ದಿಲ್ಲಿದ ತುಳು ಸಿರಿ ಸಂಘದ ಗುರ್ಕಾರೆ ವಸಂತ ಶೆಟ್ಟಿ ಬೆಳ್ಳಾರೆ ಮೇರ್ ಮಾತಾ ತುಳುವೆರೆಗ್ ಲೆಪ್ಪು ಕೊರ್ದು ಪಾಕ ಕಾಲೊದಿಂಚಿ ನೆಗರೊಂದುಪ್ಪುನ ರಾಜ್ಯ ಬಾಸೆದ ತುಳುವೆರೆನ ಉಡಲ್ದ ಆಸೆಗ್ ಪೊಸ ರಾಜಕೀಯ ನಡೆತ ಮುಂದಲೆದ ನುಡಿ ಬರೆಯೆರ್ .

ತುಳು ಬಾಸೆದ ಒರಿಪುಗಾದ್ ತುಳುವೆರೆನ ಇನಿ ಮುಟ್ಟದ ಪೊರಂಬಾಟ ಒವ್ವುಲಾ ಎನ್ನಿಲಕ್ಕ ನಡಪಂದಿನೈಟ್ ತುಳುವೆರ್ ಇನಿ ತಾದಿ ತೊಜಾಂದೆ ಈ ರಾಜಕೀಯ ನಿರ್ಧಾರ ದೆತೊನುನ ಪರಿಸ್ಥಿತಿ ಉಂಡಾಂಡ್ . ಈ ನಿಲೆಟ್ ತುಳುವೆರ್ ಮಾತಾ ಇಲ್ಲ ಇಲ್ಲಗ್ ಪೋದು ತುಳುವೆರೆಗ್ ತೆರಿಪಾವೊಡು , ರಾಜಕೀಯ ಕಾರ್ಯಕ್ರಮ ನಡಪನಗ ಜನ ನಾಯಕೆರೆಡ ಒತ್ತಾಯ ಮಲ್ತು ಘೋಷಣೆ ಮುಕಾಂತ್ರ , ಪ್ರಣಾಳಿಕೆಡ್ ಬರೆಪಾವುನ ಮುಕಾಂತ್ರ ಯೇರ್ ತುಳು ಬಾಷೆಗ್ ಮಾನ್ಯತೆ ಕೊರ್ಪಾವೆ ಪಂಡುದ್ ವಾಗ್ದಾನ ಮಲ್ಪುವೆರಾ ಅಕಲ ಬೆರಿಕುಂತುದು ಅಕಲು ಗೆಂದೆರೆ ತುಳು ಸಂಘ ಸಂಸ್ಥೆಲು ಪಕ್ಷ ತೂವಂದೆ ಬೇಲೆ ಮಲ್ಪೊಡು ಪಂಡುದ್ ಆರ್ ಲೆಪ್ಪು ಕೊರಿಯೆರ್ .

”ಈ ಸಲ ಎನ್ನ ಓಟು ತುಳು ಬಾಸೆಗ್” ಪಂಡುದ್ ಮನಸ್ಸ್ ನಿಗಂಟ್ ಮಲ್ತುದು ಇಲ್ಲಗ್ ಓಟು ಕೇನೆರೆ ಬತ್ತಿನಕಲೆಡ ”ಎನ್ನ ಅಪ್ಪೆ ಬಾಸೆ ತುಳುಕ್ಕು ನಿಕಲೆನ ಯೋಜನೆ ದಾದ ?” ಪಂಡುದ್ ಕೇನೊಡು , ಅಕಲೆಡ ಚುನಾವಣೆ ಪ್ರಣಾಲಿಕೆಡ್ , ವೇದಿಕೆಡ್ ತುಳುಕು ಮಾನಾದಿಗೆ ಕೊರ್ಪಾವೆ ಪಂಡುದ್ ಸಾರ್ವಜನಿಕ ಘೋಷಣೆ ಮಲ್ಪಾವೊಡು. ತುಳು ಪರ ಇತ್ತಿನಕಲೆಗ್ ಓಟು ಪಾಡುಲಕ್ಕ ಪ್ರಚಾರ ಮಲ್ಪಾವೊಡು , ಪರ ಊರುಡು ಇತ್ತಿನಕುಲು ಇಲ್ಲದಕಲೆಗ್ ಈ ವಿಚಾರ ತೆರಿಪಾವೊಡು ಇಂಚಾಂಡ ಮಾತ್ರ ತುಳು ಬಾಸೆದ ರಾಜಕೀಯ ಒತ್ತಡ ಸಾಧ್ಯ ಆಪುಂಡು ಪಂಡುದ್ ವಸಂತ ಶೆಟ್ರು ಸಂಘ ಸಂಸ್ಥೆದ ಗುರ್ಕಾರ್ಲೆಗ್ ಅರಿಕೆ ಮಲ್ತೆರ್ .

ತುಳುತ ಹಿರಿಯೆರೆನ್ , ಸಾಹಿತೆಲೆನ್ , ಕಲಾವಿದೆರೆನ್ ಮಾತಾ ಒಟ್ಟು ಪಾಡೊಂದು ಒಂಜಿ ಸಸೂತ್ರ ನಿರ್ಣಯ ಮಲ್ತುದು ಈ ಪೊರಂಬಾಟದ ತೂ ಯಾಪೊಗುಲಾ ಮಾಜಂದಿಲಕ್ಕ , ತಾದಿ ತಪ್ಪಂದಿಲಕ್ಕ ಕ್ರಮ ಬದ್ಧವಾದ್ ನಿರಂತರ ನಡತೊಂದು ಉಪ್ಪೆರೆಗ್ ರೂಪು ರೇಷೆ , ಯೋಚನೆ ಮಲ್ತುದು ಕಡೆಮುಟ್ಟ ಕೋಡಿ ಎತ್ತಾವೊಡು. ಬೆರಿ ಸಾಯ ಉಂತುನ ಮಾತಾ ತುಳು ಕನ್ನಡದ ರಾಜಕೀಯ ನಾಯಕೆರೆನ ಪರವಾದ್ ಪ್ರಚಾರ ಮಲ್ತುದು ಅಕಲೆನ್ ಗೆಂದಾವೊಡು . ಸಾಮಾಜಿಕ ಜಾಲ ತಾಣ , ಟ್ವಿಟ್ಟರ್ ಮುಕಾಂತ್ರ ಈ ಅಭಿಯಾನದ ಸ್ವರ ಪ್ರಪಂಚದ ಮಾತಾ ಕಡೆಕ್ಕ್ ಕೇಣುಲಕ್ಕ ಮಲ್ಪಾದ್ ತುಳು ಬಾಸೆ ಒಂಜಿ ರಾಜಕೀಯ ಶಕ್ತಿ ಪನ್ಪಿನವೇನ್ ಅಕಲೆಗ್ ತೆರಿಪಾ ಕೊರೊಡು.

ಕೇಂದ್ರ ಸರಕಾರದ ವ್ಯಾಪ್ತಿಡ್ ಅಪಗನೆ ಬೋಡಾಯಿನಾತ್ ಪ್ರಯತ್ನ ನಡತ್ತಿನಾಂಡಲಾ ಅವು ಪ್ರಯೋಜನೊಗು ಬೂರ್ದಿಜಿ . ರಾಜ್ಯ ಬಾಸೆ ಆಂಡ ಎಡ್ಮನೆ ಪರಿಚ್ಚೇದೊಗು ಸೇರುನ ನಮ್ಮ ಸಾದಿ ಸುಲಭ ಆಪುಂಡು. ನಮ್ಮ ಸ್ವರ ಈ ಸರ್ತಿ ಒಂಜೇ ದಿಕ್ಕ್ ಡ್ ಒಟ್ಟಾದ್ ಕಡಲ್ ಅರೆಬಾಯಿ ಕೊರಿಲಕ್ಕ ಕೇನೊಡು. ಐಕಾದ್ ಪ್ರತಿ ತುಳುವೆಲಾ ಇನಿದಿಂಚೆ ಎಚ್ಚರಾದ್ ಉಂದು ನಮ್ಮ ಅಕೇರಿದ ಸಾದಿ ಪನ್ಪಿಲೆಕ್ಕ ಪುಣೆವೊಡು, ಯಾನ್ ಯಾಪ ಮುಟ್ಟಲಾ ಈ ವಿಚಾರೊಡು ದುಂಬು ಉಂತರೆ ತಯಾರಾದುಲ್ಲೆ ಪಂಡುದ್ ಆರ್ ತುಳು ಅಭಿಮಾನಿಲೆಗ್ ಭರವಸೆದ ಲೆಪ್ಪು ಕೊರಿಯೆರ್ .

ಡಿಜಿಟಲ್ ಮೀಡಿಯಾಡ್ ತುಳುವರ್ಲ್ಡ್ ನೆಟ್ವರ್ಕ್ ದ ಗುರ್ಕಾರ್ಲು ಡಾ. ರಾಜೇಶ್ ಆಳ್ವೆರ್ ಈ ಕಾರ್ಯಕ್ರಮ ಆಯೋಜನೆ ಮಲ್ತು ನಿರೂಪಣೆ ಮಲ್ತೆರ್ . ಊರು ಪರಊರುದ, ಪರ ದೇಶದ ಮಾತಾ ತುಳು ಅಭಿಮಾನಿ ಸಂಘಟನೆದ ಗುರ್ಕಾರ್ಲು ಪಾಲ್ ಪಡೆದ್ ತನ್ಕುಲೆನ ಸಕಾಯ , ಬೆರಿಬಲ ಕೊರ್ಪ ಪಂಡುದ್ ವಾಕ್ದಾನ ಮಲ್ತೆರ್.

Indian Olympics National games – Pranamya Agali selected for Yoga competition ಇಂಡಿಯನ್ ಒಲಂಪಿಕ್ಸ್ ನ್ಯಾಷನಲ್ ಗೇಮ್ಸ್ ಯೋಗ ಪಂತೊಗು ಪ್ರಣಮ್ಯ ಅಗಳಿ ಆಯ್ಕೆ

ಕಾಣಿಯೂರ್: ನ್ಯಾಷನಲ್ ಯೋಗ ಸ್ಪೋರ್ಟ್ಸ್ ಫೆಡರೇಷನ್ ರಾಜಸ್ಥಾನದ ಜೋಧ್ ಪುರಡ್ ಮಾ.18 ರ್ದ್ 23 ಮುಟ್ಟ ನಡತಿನ ಯೋಗ ಪಂತೊಡು ಯೋಗ ಸಾಧಕಿ ಪ್ರಣಮ್ಯ ಅಗಳಿ 2ನೇ ಸರ್ತಿ ನ್ಯಾಷನಲ್ ಗೇಮ್ಸ್ ಇಂಡಿಯನ್ ಒಲಂಪಿಕ್ಸ್ ಯೋಗ ಪಂತೊಗು ಆಯ್ಕೆ ಆತೆರ್.

ಯೋಗ ಸಾಧಕೆರಾಯಿನ ಅಗಳಿ ಚಂದ್ರಹಾಸ್ ಬೊಕ್ಕ ಹೇಮಾ ಚಂದ್ರಹಾಸ್ ಮೆರೆನ ಮಗಲ್ ಆಯಿನ ಮೇರ್ ಪುತ್ತೂರ್ ಅಕ್ಷಯ ಕಾಲೇಜ್ ದ ಕಲ್ಪಾರ್ಥಿ ಆದುಲ್ಲೆರ್.‌ ಅತ್ತಂದೆ ಮೇರ್ ಯೋಗಡ್ ಸುಮಾರ್ ಸರ್ತಿ ರಾಷ್ಟ್ರ ಬೊಕ್ಕ ಅಂತಾರಾಷ್ಟ್ರೀಯ ಪ್ರಶಸ್ತಿಲೆನ್ ಪಡೆತೆರ್.

Indian Olympics National games – Pranamya Agali selected for Yoga competition

Kaniyoor: At the Yoga meet conducted at National Yoga Sports federation, Jodhpur, Rajasthan ; from March 17 th – 23rd Pranamya Agali has been selected for the second time for the National games Indian Olympics yoga compititions.

Pranamya Agali is a yoga expert and the daughter of Chandrahas and Hema. She is the student of Akshaya college , Puttur. She has been a winner in Yoga compititions at the national and international level.