February 2023

Feb 4-5: Hosabettu Sri Kordabbu Kallata Nema ಫೆ.4-5: ಹೊಸಬೆಟ್ಟು ಶ್ರೀ ಕೋರ್ದಬ್ಬು ಕಲತ್ತ ನೇಮ

ಕುಳಾಯಿ: ಹೊಸಬೆಟ್ಟುದ ಶ್ರೀ ಕ್ಷೇತ್ರ ಕೋರ್ದಬ್ಬು ಕಲತ ನೇಮ ಫೆ.4 ಬೊಕ್ಕ 5 ಕ್ ನಡಪರೆ ಉಂಡು.

ಫೆ.4 ಸನಿಯಾರ ಕಂಬೆರ್ಲ ದರ್ಶನ, ಕೊಡಿಯಡಿ ಮೂರ್ತ, ಅನ್ನಸಂತರ್ಪಣೆ ನಡಪರೆ ಉಂಡು. ಬೊಕ್ಕ ಭಂಡಾರ ಏರುಂಡು. ಅವೆರ್ದ್ ಬೊಕ್ಕ ಶ್ರೀ ಕೋರ್ದಬ್ಬು, ತನ್ನಿಮಾನಿಗ ದೈವೊಲೆನ ನೇಮ ನಡಪರೆ ಉಂಡು. ಫೆ.5 ಐತಾರ ಶ್ರೀ ರಾಹು ಗುಳಿಗ ದೈವೊದ ನೇಮ, ಬೊಕ್ಕ ಶ್ರೀ ಧೂಮಾವತಿ, ಬಂಟ ದೈವೊಲೆನ ನೇಮ ನಡಪರೆ ಉಂಡು. ಈ ಮಾತ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಸಿರಿಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಹೊಸಬೆಟ್ಟು ಶ್ರೀ ಕ್ಷೇತ್ರ ಕಲತ್ತ ಅಧ್ಯಕ್ಷೆರ್, ಸದಸ್ಯೆರ್, ಮಹಿಳಾ ಸಮಿತಿ ಬೊಕ್ಕ ಕುಳಾಯಿ ಹೊಸಬೆಟ್ಟು ಶ್ರೀ ಕ್ಷೇತ್ರ ಕಲತ್ತ ಗುರಿಕಾರೆರ್ ಬೊಕ್ಕ ಪತ್ತ್ ಸಮಸ್ತೆರ್ ಲೆಪ್ಪೋಲೆಡ್ ತೆರಿಪಾದೆರ್.

Bunts Sports meet on February 12 th ಫೆ.12: ಬಂಟರ ಕ್ರೀಡಾ ಉಚ್ಚಯ

ಬಂಟರ ಕ್ರೀಡಾ ಉಚ್ಚಯ ಫೆ.12 ಕ್ಕ್ ನಡಪರೆ ಉಂಡು.

ಈ ಕ್ರೀಡಾ ಉಚ್ಚಯಗ್ ಮಹಾರಾಷ್ಟ್ರ ಘನ ಸರಕಾರದ ಮುಖ್ಯಮಂತ್ರಿ ಏಕನಾಥ್ ಶಿಂಧೆ ಮೆರೆನ್ ಬೊಂಬೈ ಬಂಟರ ಸಂಘದ ಕ್ರೀಡಾ ಸಮಿತಿ ಕಾರ್ಯಾಧ್ಯಕ್ಷೆರ್ ಗಿರೀಶ್ ಶೆಟ್ಟಿ ತೆಳ್ಳಾರ್, ಬೊರಿವಿಲಿ ಶಿಕ್ಷಣ ಸಮಿತಿದ ಕಾರ್ಯಾಧ್ಯಕ್ಷೆರ್ ಡಾ.ಪಿ.ವಿ. ಶೆಟ್ಟಿ, ಬೊಕ್ಕ ಛತ್ರಪತಿ ಶಿವಾಜಿ ಮಹಾರಾಜ್ ಪ್ರಶಸ್ತಿ ಪುರಸ್ಕೃತೆರ್ ಜಯ ಶೆಟ್ಟಿ ಮೊಕುಲು ಭೇಟಿ ಆದ್ ಆಹ್ವಾನ ಮಲ್ತೆರ್. ಲೇಸ್ ಗ್ ಮುಖ್ಯಮಂತ್ರಿಲು ಬರ್ಪೆರ್ ಪಂದ್ ಭರವಸೆ ಕೊರಿಯೆರ್.

Bunts Sports meet on February 12 th

The Bunts Sports meet will be held on the 12 th of February.An invitation for the same was extended to the honourable CM of Maharashtra Eknath Shinde by the sports secretary of Bunts association, Mumbai Girish Shetty Tellar, president of Borivali education association Dr P V Shetty and Chhatrapati Shivaji Maharaj awardee Jaya
Shetty.

An employee jumps into the hot oil at the bakery and committed suicide ಬೇಕರಿದ ಎಣ್ಣೆದ ಬಾಣಲೆಗ್ ಲಾಗಿದ್ ಜೂವ ಕಳೆವೊಂಡಿನ ಬೇಲೆದಾರ್

ಬಜ್ಪೆ ಪೊಲೀಸ್ ಠಾಣೆ ವ್ಯಾಪ್ತಿದ ಅಡ್ಡೂರುಡು ಉಪ್ಪುನ ಬೇಕರಿಡ್ ಬೇಲೆ ಮಲ್ತೊಂದು ಇತ್ತಿನಾರ್ ತೆನಸ್ ತಯಾರ್ ಮಲ್ಪುನ ಎಣ್ಣೆದ ಬಾಣಲೆಗ್ ಲಾಗಿದ್ ಜೂವ ಕಳೆವೊನ್ನ ಘಟನೆ ನಡದ್ಂಡ್.

ಪೊಳಲಿ ನಿವಾಸಿ ಪುರಂದರ(50) ತೀರ್ ಪೋಯಿನಾರ್ ಪಂದ್ ತೆರಿದ್ ಬೈದ್ಂಡ್. ಮೆರೆನ್ ಕುಡ್ಲದ ವೆನ್ಲಾಕ್ ಆಸ್ಪತ್ರೆಗ್ ದಾಖಲ್ ಮಲ್ದಿತ್ತೆರ್. ಆಂಡ ಚಿಕಿತ್ಸೆ ಫಲಕಾರಿ ಅವಂದೆ ತೀರ್ ಪೋಯೆರ್ ಪಂದ್ ತೆರಿದ್ ಬೈದ್ಂಡ್. ಮೆರೆಗ್ ಬೊಡೆದಿ ಬೊಕ್ಕ ರಡ್ಡ್ ಜೋಕುಲು ಉಲ್ಲೆರ್.

Mangalore: Murder in the heart of the city-employee at a jewellery store murdered ಕುಡ್ಲ: ಬಂಗಾರ್ದ ಅಂಗಡಿಡ್ ಬಿಸತ್ತಿ ಪಾಡ್ದ್ ಕೊಲೆ

ಕುಡ್ಲ ಪೇಂಟೆದ ಹಂಪನಕಟ್ಟೆ ಮಿಲಾಗ್ರಿಸ್ ದ ಕೈತಲ್ ಇಪ್ಪುನ ಜ್ಯುವೆಲ್ಲರಿ ಅಂಗಡಿಡ್ ಒರಿಯನ್ ಬಿಸತ್ತಿ ಪಾಡ್ದ್ ಕೆರಿನ ಘಟನೆ ಶುಕ್ರಾರ ನಡತ್ಂಡ್.

ಅತ್ತಾವರದ ನಿವಾಸಿ ರಾಘವ (50) ಕೊಲೆ ಆಯಿನಾರ್ . ಬಂಗಾರ್ದ ಅಂಗಡಿರ್ದ್ ಒರಿ ಮೋನೆಗ್ ಮುಸುಕು ಪಾಡ್ದ್ ಪಿದಯಿ ಬರ್ಪುನ ದೃಶ್ಯ ಸಿಸಿ ಕೆಮರಾಡ್ ದಾಖಲ್ ಆತ್ಂಡ್. ಈ ಘಟನೆದ ಪೊರ್ತುಡು ಅಂಗಡಿಡ್ ರಾಘವ ಒರಿಯೇ ಇತ್ತೆರ್ ಪಂದ್ ತೆರಿದ್ ಬೈದ್ಂಡ್. ಪೆಟ್ಟಾಯಿನ ಮೆರೆನ್ ಆಸ್ಪತ್ರೆಗ್ ದಾಖಲ್ ಮಲ್ದೆರ್. ಆಂಡ ಚಿಕಿತ್ಸೆ ಫಲಕಾರಿ ಅವಂದೆ ತೀರ್ ಪೋಯೆರ್. ಜಾಗೆಗ್ ಡಿಸಿಪಿ ಅಂಶುಕುಮಾರ್ ಭೇಟಿ ಕೊರ್ದು ಪರಿಶೀಲನೆ ಮಲ್ತ್ ದೆರ್.

Mangalore: Murder in the heart of the city-employee at a jewellery store murdered

An employee at a jewellery store Raghava(50) was murdered inside the shop in the heart of the city at Hampankatta.
A masked person coming out of the store has been caught on CCTV. The employee who was alone in the store at the time of the incident was seriously injured and died at the hospital.
DCP Ansukumar came and inspected the spot.

Rotary club honours Achievers in Sullia ಸುಳ್ಯದ ಪುಗರ್ತೆದ ರೋಟರಿ ಕ್ಲಬ್ ವತಿರ್ದ್ ಸಾಧಕೆರೆಗ್ ತಮ್ಮನ

ಸುಳ್ಯದ ಪುಗರ್ತೆದ ರೋಟರಿ ಕ್ಲಬ್ ವತಿರ್ದ್ ಸಾಧಕೆರೆಗ್ ತಮ್ಮನ ಲೇಸ್ ನಡತ್ಂಡ್.

ಎಡ್ಡೆ ಸಮಾಜ ನಿರ್ಮಾಣಗ್ ಬೆನೊಂದು ಬತ್ತಿನ ರೋಟರಿ ನೆತ್ತ ‘ಜಿಲ್ಲಾ ಗವರ್ನರ್’ ಮೆರೆನ ಅಧಿಕೃತ ಸುಳ್ಯ ಭೇಟಿದ ಪೊರ್ತುಡು ಮೆಚ್ಚುಗೆ ತಿಕ್ಂಡ್. ಸಮಾಜದ ಹಿತದೃಷ್ಟಿರ್ದ್ ನನತ್ ಕಜ್ಜ ಮಲ್ಪೊಡು ಪನ್ಪುನ ಜಬದಾರಿ ಬೊಕ್ಕ ಪ್ರೇರಣೆದ ಹಂಬಲ ನನತ್ ಎಚ್ಚ ಆತ್ಂಡ್. ರೋಟರಿ ಜಿಲ್ಲಾ ಗವರ್ನರ್ ಪ್ರಕಾಶ್ ಕಾರಂತ್, ಸುಳ್ಯ ರೋಟರಿ ಕ್ಲಬ್ ಅಧ್ಯಕ್ಷೆರ್ ಚಂದ್ರಶೇಖರ ಪೆರಾಲು ಬೊಕ್ಕ ಸರ್ವ ಸದಸ್ಯರೆಗ್ ಬೇತೆ ಬೇತೆ ಸಾಧಕೆರೆನೊಟ್ಟಿಗೆ ಕುಲ್ಲೆರೆ ಎಲ್ಯ ಅವಕಾಶ ಕೊರ್ನೆಕ್ಕ್ ಸೊಲ್ಮೆ ಸಂದಾಯೆರ್. ಅತ್ತಂದೆ ಇಂಗ್ಲಿಷ್ ಓದುನಕ್ಲೆಗ್ ಸುಳ್ಯದ ದಾಖಲೆ ಇಪ್ಪುನ ಇತಿಹಾಸನ್ ತೂಪಾವುನ ‘ರಿಕಾಲಿಂಗ್ ಅಮರ‌ ಸುಳ್ಯ’ ಬುಕ್ ಗ್, ಮಹತ್ವದ ಚರಿತ್ರೆಡ್ ‘ಸ್ವಾತಂತ್ರ್ಯಕ್ಕಾದ್ ರಹಸ್ಯ ಸಭೆ’ ನಡತಿನ ಫೆಬ್ರವರಿ ತಿಂಗೊಲ್ಡೇ ಇತ್ತೆದ ಸುಳ್ಯ ಪರಿಸರದ ಪ್ರಮುಖೆರೆನ ಪಾಲ್ವಿಕೆಡ್ ಬೇತೆ ಬೇತೆ ಕ್ಷೇತ್ರಲೆನ ಸುಳ್ಯದ ಸಾಧಕೆರೆನೊಟ್ಟಿಗೆ ಸುಳ್ಯಡೇ ಮೋಕೆ ತಿಕ್ಕಿನವು ಕುಸಿತ ಸಂಗತಿ ಪಂದ್ ಪಂಡೆರ್.

ವರದಿ: ಅನಿಂದಿತ್ ಗೌಡ ಕೊಚ್ಚಿ

Rotary club honours Achievers in Sullia

The rotary club of Sullia honoured achievers in different fields to commemorate the district governor Prakash Karant’s visit to Sullia.The president of the rotary club of Sullia Chandrashekhar Peralu and members had arranged the program recalling the first freedom fighter of the region Amar Sullia had arranged a secret meeting to plan for the freedom struggle in the month of February as chronologised in the book Recalling Amar Sullia.

Virar: Meera Dahanu Bunts Association-Hold discussion on a sports meet ವಿರಾರ್ : ಮೀರಾ-ದಹನೂ ಬಂಟ್ಸ್ ನೆತ್ತ ಸುರುತ ವರ್ಷದ ಕ್ರೀಡಾ ಉಚ್ಚಯದ ಸಮಾಲೋಚನಾ ಸಭೆ

ವಿರಾರ್: ಮೀರಾ ದಹನೂ ಬಂಟ್ಸ್ ಸಂಘಟನೆದ ಸುರುತ ವರ್ಷದ ಕ್ರೀಡಾ ಉಚ್ಚಯ ಮಲ್ಪುನ ಬಗೆಟ್ಟ್ ಸಮಾಲೋಚನಾ ಸಭೆ ಡಾ| ವಿರಾರ್ ಶಂಕರ್ ಶೆಟ್ಟಿ ಮೆರೆನ ಗುರ್ಕಾರ್ಮೆಡ್ ವಿರಾರ್ ಶ್ರೇಯಾ ಹೊಟೇಲ್ ದ ಚಾವಡಿಡ್ ನಡತ್ಂಡ್.

ಈ ಕ್ರೀಡಾ ಉಚ್ಚಯನ್ ಫೆ.18 ಸನಿಯಾರ ವಿರಾರ್ ದ ವಿವಾ ಕಾಲೇಜ್ ಗ್ರೌಂಡ್ ಬೊಲ್ಪುಗು 7 ಗಂಟೆರ್ದ್ ಬಯ್ಯಗ್ 7 ಗಂಟೆ ಮುಟ್ಟ ಮಲ್ಪುನು ಪಂದ್ ಸಭೆಟ್ ನಿರ್ಣಯ ಆಂಡ್. ಬೊಕ್ಕ ಮೀರಾರೋಡ್ ರ್ದ್ ದಹನೂ ಮುಟ್ಟ ಮಾತ ವಲಯದ ಪದಾಧಿಕಾರಿಲು ಬೇತೆ ಬೇತೆ ಕ್ರೀಡಾ ಚಟುವಟಿಕೆಲೆನ ಬಗೆಟ್ ಚರ್ಚೆ ಮಲ್ತೆರ್. ಬೊಕ್ಕ ಗುರ್ಕಾರ್ಮೆನ್ ಒಯಿಸ್ ದಿತ್ತಿನ ವಿರಾರ್ ಶಂಕರ್ ಶೆಟ್ರ್ ಪಾತೆರ್ದ್, ಉಂದುವೇ ಸುರುತ ಸರ್ತಿ ನಮ ಅಟ್ಟನೆ ಮಲ್ತಿನ ಕ್ರೀಡಾ ಉಚ್ಚಯಡ್ ಬೊಂಬೈ ಪೇಂಟೆದ ಪಿದಯಿ ವಲಯಡ್ ಇಪ್ಪುನ ನಮ್ಮ ಸಮಾಜದ ಕ್ರೀಡಾ ಪ್ರತಿಭೆಲೆನ್ ಗುರುತಿಸಾವರೆ ಆಪುಂಡು. ಯೋಗ್ಯ ಕ್ರೀಡಾ ಪಟುಲೆಗ್ ಪ್ರಾದೇಶಿಕ, ರಾಜ್ಯ ಬೊಕ್ಕ ರಾಷ್ಟ್ರ ಮಟ್ಟಡ್ ಪ್ರೋತ್ಸಾಹ ಮಲ್ಪುನ ಧರ್ಮಾರ್ಥ ವೇದಿಕೆನ್ ಕೊರೊಡು. ಅತ್ತಂದೆ ಆಸಕ್ತಿ ಇಪ್ಪುನ ಕ್ರೀಡಾ ಪಟುಕದಕುಲೆಗ್ ಕ್ರೀಡೆಡ್ ಪಾಲ್ ಪಡೆಪುನ ಕ್ರೀಡಾ ಪ್ರಚೋದನೆದ ಗೇನನ್ ಕೊರೊಡು ಪಂದ್ ಪಂಡೆರ್. ಸಂಸ್ಥೆದ ಅಧ್ಯಕ್ಷೆರ್ ಪ್ರಕಾಶ್ ಹೆಗ್ಡೆ ಪಾತೆರ್ದ್, ಉಂದುವೇ ಸುರುತ ಸರ್ತಿ ನಡಪರೆ ಇಪ್ಪುನ ನಮ್ಮ ಸಂಸ್ಥೆದ ಕ್ರೀಡಾ ಉಚ್ಚಯ ಸಮರ್ಪಕ ರೀತಿಡ್ ಪಾಲ್ ಪಡೆಪುನ ಕ್ರೀಡಾಳುಲೆಗ್, ಕ್ರೀಡಾಭಿಮಾನಿಲೆಗ್ ಯೋಗ್ಯ ನೆಲೆತ ವೇದಿಕೆ ಆದಿಪ್ಪೊಡು ಪಂದ್ ಪಂಡೆರ್.

ಈ ಪೊರ್ತುಡು ಸಂಘದ ಗೌರವ ಪ್ರಧಾನ ಕಾರ್ಯದರ್ಶಿ ಸುಕೇಶ್ ವಿ. ರೈ, ಕ್ರೀಡಾ ಕಾರ್ಯಾಧ್ಯಕ್ಷೆರ್ ಮುಕೇಶ್ ಜೆ. ಶೆಟ್ಟಿ ಇತ್ತ್ ದ್ ಸುಮಾರ್ ಸಲಹೆ ಸೂಚನೆನ್ ಕೊರಿಯೆರ್. ಸಂಸ್ಥೆದ ಸಂಚಾಲಕೆರ್ ವಸಾಯಿ ನಾಗರಾಜ್ ಶೆಟ್ಟಿ ಪಾತೆರ್ದ್, ಕ್ರೀಡಾ ಉಚ್ಚಯದ ಪೊರ್ತುಡು ಕ್ರೀಡಾಪಟುಲೆಗ್, ಕ್ರೀಡಾಭಿಮಾನಿಲೆಗ್, ಬಿನ್ನೆರೆಗ್ ಇಪ್ಪುನ ಸಮರ್ಪಕ ವ್ಯವಸ್ಥೆದ ಬಗ್ಗೆ ಪಂಡೆರ್. ಬೊಕ್ಕ ಸಭೆಟ್ ವಸಾಯಿ ಅಶೋಕ್ ಶೆಟ್ಟಿ, ಮೀರಾರೋಡ್ ದ ಹರೀಶ್ ರೈ, ವಸಾಯಿ ನವೀನ್ ಶೆಟ್ಟಿ, ಉಮೇಶ್ ಶೆಟ್ಟಿ ಬೆಳ್ಳಂಪಳ್ಳಿ, ಸಂಸ್ಥೆದ ಮಹಿಳಾ ವಿಭಾಗದ ಕಾರ್ಯಾಧ್ಯಕ್ಷೆರ್ ಸುಜಾತ ಜಿ. ಶೆಟ್ಟಿ ಕ್ರೀಡಾ ಉಚ್ಚಯದ ಬಗೆಟ್ ನಮ ಮಾತ ಸಂಘಟಿತೆರಾದ್ ಉಮೇದ್ ಡ್ ಕ್ರೀಡಾ ನಿಯಮಾವಳಿನ್ ಪಾಲಿಸಾವೊಡು ಪಂದ್ ಪಂಡೆರ್. ಅಂಚನೆ ಆನಿ ಬೊಲ್ಪುಗು 7 ಗಂಟೆಗ್ ತುಡರ್ ಅರ್ಲಾದ್, ಪಥಸಂಚಲನದೊಟ್ಟಿಗೆ ಕ್ರೀಡಾ ಉಚ್ಚಯ ಸುರು ಆಪುಂಡು. ಬಯ್ಯಗ್ 6 ಗಂಟೆಗ್ ಮುಗಿತಲದ ಲೇಸ್ ಡ್ ಗಣ್ಯೆರ್ ಪಾಲ್ ಪಡೆದ್ ಇನಾಮು ಪಟ್ಟರೆ ಉಲ್ಲೆರ್. ಅನಿ ಬೇತೆ ಬೇತೆ ಪಂತೊಲು ನಡಪರೆ ಉಂಡು. 7 ವರ್ಷದ ಆಣ್ ಬೊಕ್ಕ ಪೊಣ್ಣು ಜೋಕುಲೆಗ್ ಲಿಂಬೆ ಚಮಚ 50 ಮೀಟರ್ ಬಲಿಪುನ ಪಂತೊ‌, 8 ರ್ದ್ 12 ವರ್ಷ ಮುಟ್ಟದಕಲೆಗ್ ಲಿಂಬೆನ್ ಚಮಚದ 100ಮೀ. ಬಲಿಪುನ ಪಂತೊ‌, 13 ರ್ದ್ 20 ವರ್ಷ ಮುಟ್ಟದಕಲೆಗ್ 100ಮೀ. ಬೊಕ್ಕ 200 ಮೀ. ಬಲಿಪುನ ಪಂತೊ‌. 21 ರ್ದ್ 35 ವರ್ಷ ಮುಟ್ಟದಕ್ಲೆಗ್ 100, 200, 400 ಮೀ. ಬಲಿಪೆರೆ ಬೊಕ್ಕ ಶಾಟ್ ಪುಟ್ ಪಂತೊ. 36 ರ್ದ್ 45 ವರ್ಷ ಮುಟ್ಟದಕ್ಲೆಗ್ 100, 200, 400 ಮೀ. ಬಲಿಪರೆ ಬೊಕ್ಕ ಶಾಟ್ ಪುಟ್ ಪಂತೊ. 46 ರ್ದ್ 55 ವರ್ಷ ಮುಟ್ಟದಕ್ಲೆಗ್ 100, 200, ಮೀ. ಬಲಿಪರೆ ಬೊಕ್ಕ ಶಾಟ್ ಪುಟ್ ಪಂತೊ. 56 ವರ್ಷ ಮಿತ್ತ್ ದಕ್ಲೆಗ್ 400 ಮೀ. ಬಲಿಪರೆ ಬೊಕ್ಕ ಶಾಟ್ ಪುಟ್ ಪಂತೊಲು ನಡಪರೆ ಉಂಡು. ಬೊಕ್ಕ ಕೂಟದ ಪಂತೊಲಾದ್ 400 ಮೀ. ದ ರಿಲೇ ಅಂಜೋವ್ ಬೊಕ್ಕ ಪೊಂಜೋವ್ ನಕ್ಲೆಗ್, ತ್ರೋ ಬಾಲ್ 9 ಜನತ ಪೊಂಜೋವ್ ನಕ್ಲೆಗ್, ಬಲ್ಲ್ ಒಯಿಪೆರೆ 9 ಜನತ ಅಂಜೋವ್ ಬೊಕ್ಕ ಪೊಂಜೋವ್ ನಕ್ಲೆಗ್ ನಡಪರೆ ಉಂಡು. ಬೊಕ್ಕ ಪೊಂಜೋವ್ ನಕ್ಲೆಗ್ 50 ಲೀ.ದ ಬಾಲ್ದಿಗ್ ನೀರ್ ದೀಜಾವುನ ಪಂತೊ, ಕಂಡನಿ ಬುಡೆದಿಗ್ 3 ಕಾರ್ ಡ್ ಬಲಿಪುನ ಪಂತೊ. ಬಾಕ್ಸ್ ಕ್ರಿಕೆಟ್ 5 ಆಂಜೋವ್ ಬೊಕ್ಕ 3 ಪೊಂಜೋವ್ ಸೇರ್ದ್ ಗೊಬ್ಬುನ ಪಂತೊ ನಡಪರೆ ಉಂಡು. ಈ ಪಂತೊಲು ಬಂಟ ಬಾಂಧವೆರೆಗ್ ಮಾತ್ರ ಸೀಮಿತ ಆತ್ಂಡ್. ಈ ಬಗೆಟ್ ಎಚ್ಚದ ಮಾಹಿತಿಗಾದ್ ಆಸಕ್ತಿ ಇಪ್ಪುನ ಕ್ರೀಡಾಳುಲು ಬೊಕ್ಕ ಕೂಟದಕುಲು ಆಯಾ ವಲಯದ ಆಯಾ ಸಂಸ್ಥೆದ ಮೇಲ್ವಿಚಾರಕೆರೆಡ ಕೇನ್ದ್ ತೆರಿವೊನೊಲಿ ಪಂದ್ ಸಂಸ್ಥೆದ ಆಡಳಿತ ಸಮಿತಿದ ಪತ್ರಿಕಾ ಪ್ರಕಟನೆಡ್ ತೆರಿಪಾದೆರ್.

Virar: Meera Dahanu Bunts Association-Hold discussion on a sports meet

Virar: A meeting was held by the Mira Dahanu association to discuss about conducting a sports meet under the auspices of the association. The meeting was presided by Dr Virar Shankar Shetty.

The sports meet has been planned for the 18 th of February. Office bearers of different associations held discussions on the conduct of sports and other activities for the day .
The sports meet to be conducted for the first time intends to bring out and encourage new talents said president of the association Prakash Hegde .
More information on the meet was brought out in an press annoucement by the samithi .

Bullet Train in India by 2026- Minister for Railways Ashwini Vaishnav 2026 ಟ್ ಬರ್ಪುಂಡು ಬುಲೆಟ್ ರೈಲ್: ರೈಲ್ವೆ ಸಚಿವೆರ್ ಅಶ್ವಿನಿ ವೈಷ್ಣವ್

ರೈಲ್ವೆಗ್ ಬಜೆಟ್ 2.40 ಲಕ್ಷ ಕೋಟಿ ರೂ. ಅನುದಾನ ಬತ್ತಿನೆಕ್ಕ್ ರೈಲ್ವೆ ಸಚಿವೆರ್ ಅಶ್ವಿನಿ ವೈಷ್ಣವ್ ಮೇರ್ ಪಿಎಂಗ್ ಸೊಲ್ಮೆ ಸಂದಾದೆರ್.

ಅತ್ತಂದೆ ಪೊಸ ತಂತ್ರಜ್ಞಾನದ ರೈಲ್ ಲಾಯಿನ ವಂದೇ ಭಾರತ್, ವಂದೇ ಮೆಟ್ರೋ ಬೊಕ್ಕ ಹೈಡ್ರೋಜನ್ ರೈಲ್ ಲು ಆಯಿನಾತ್ ಬೇಗಡೇ ಬರ್ಪುಂಡು ಪಂದ್ ಭರವಸೆ ಕೊರ್ತೆರ್. ಅಂಚನೆ ಆಗಸ್ಟ್‌ 2026ತ ಪೊರ್ತುಡು ಬುಲೆಟ್ ರೈಲ್ ಲು ಟ್ರ್ಯಾಕ್ ಗ್ ಜಪ್ಪುವ ಪಂದ್ ಪಂಡೆರ್.

Bullet Train in India by 2026- Minister for Railways Ashwini Vaishnav

The minister for Railways Ashwini tanked the prime minister Narendra Modi for the 2.40lakh crore rupees aid to the railways.She also assured that special trains like the Vandey Mataram express, Vandey Metro Hydrogen trains will be introduced as soon as possible.The bullet train will also be on the tracks by 2026 August she said.

7.26 lakhs worth gold ornaments stolen ಮದಿಮೆಗ್ ಪಂದ್ ಕನತಿನ 7.26 ಲಕ್ಷ ರೂ. ಬಿಲೆತ್ತ ಬಂಗಾರ್ ಮಾಯ್ಕ!

ಬ್ರಹ್ಮಾವರ: ಮದಿಮೆಗ್ ಪಂದ್ ಬ್ಯಾಂಕ್ ಲಾಕರ್ ರ್ದ್ ಕನತಿನ 180.5 ಗ್ರಾಂ ತೂಕದ 7.26 ಲಕ್ಷ ರೂ. ಬಿಲೆತ್ತ ಬಂಗಾರ್ ನ್ ಕಲ್ವೆರ್ ಕಂಡಿನ ಘಟನೆ ಬ್ರಹ್ಮಾವರಡ್ ನಡತ್ಂಡ್.

ಅಫ್ರಿನ್‌ ಬಾನು ಮೇರ್ ಹೊನ್ನಾಳದ ಅಪ್ಪೆ ಇಲ್ಲದ ಕೈತಲ್ ಸಂಬಂಧದಕ್ಲೆನ ಇಲ್ಲಲ್ ಮದಿಮೆ ಮುಗಿತ್ ದ್ ಇಲ್ಲಗ್ ಬನ್ನಗ ಬಂಗಾರ್ ಇತ್ತಿನ ಬ್ಯಾಗ್ ನ್ ಕಾರ್ ಡ್ ದೀತೆರ್. ಬೊಕ್ಕ ಅಪ್ಪೆನ ಇಲ್ಲಡ್ ಚಾ ಪರ್ದ್ 15 ನಿಮಿಷಡ್ ಪಿರ ಬೈದೆರ್.

ಇಲ್ಲಲ್ ಬತ್ತ್ ದ್ ತೂನಗ ಬಂಗಾರ್ ಕಂಡ್ ದ್ ಪೋಯಿನವು ತೆರಿದ್ ಬೈದ್ಂಡ್. ಈ ಬಗೆಟ್ ಬ್ರಹ್ಮಾವರ ಠಾಣೆಡ್ ದೂರು ದಾಖಲ್ ಆತ್ಂಡ್.

7.26 lakhs worth gold ornaments stolen

Brahmavara: Gold ornaments worth 7.26 lakhs went missing from the car.Afreen Banu attended a wedding and later kept the ornaments in her car while visiting someone else.When she returned home the ornaments were missing.
A case has been registered with the Brahmavara police.

Feb.6-11 : Sri Sahasra Nrasimha Yaga at Kinnigoli ಫೆ.6-11 : ಕಿನ್ನಿಗೋಳಿಡ್ ಶ್ರೀ ಸಹಸ್ರ ನೃಸಿಂಹ ಯಾಗ

ಕಿನ್ನಿಗೋಳಿ : ಜಗತ್ತ್ ಡೇ ಸುರೂತ್ತ ಸರ್ತಿ 32000 ಕೋಟಿ ಜಪಾನುಷ್ಠಾನ ಮಲ್ಪುನ, ಅತಿ ವಿಶಿಷ್ಟವಾಯಿನ ಶ್ರೀ ಸಹಸ್ರ ನೃಸಿಂಹ ಯಾಗ ಫೆ.6 ಸೋಮಾರರ್ದ್ ಫೆ.11 ಸನಿಯಾರ ಮುಟ್ಟ ಕಿನ್ನಿಗೋಳಿ ಶ್ರೀ ಮಹಮ್ಮಾಯಿ ಕಟ್ಟೆದ ಶ್ರೀ ಶಾರದಾ ಮಂಟಪಡ್ ನಡಪರೆ ಉಂಡು.

ಈ ವಿಷಯೊನು ಯಾಗದ ಅಧ್ಯಕ್ಷೆರ್ ಸುಬ್ರಹ್ಮಣ್ಯ ಶೆಣೈ ಮೇರ್ ಯಾಗ ಮಂಟಪಡ್ ಗುರುವಾರ ನಡತಿನ ಸುದ್ದಿಗೋಷ್ಠಿಡ್ ತೆರಿಪಾಯೆರ್. ಒಂಜಿ ವರ್ಷದ ಪಿರವುಡು ಶತಚಂಡಿಕಾ ಯಾಗ ಮಲ್ಪುನಗ ಶ್ರೀ ಸಹಸ್ರ ನೃಸಿಂಹ ದೇವೆರ್ನ ಯಾಗ ಮಲ್ಪರೆ ಸಂಕಲ್ಪ ಆತ್ಂಡ್. ಅಂಚಾದ್ ಈ ಆಜಿ ದಿನಲ ವೇದಮೂರ್ತಿ ಸುಧೀರ್ ಭಟ್ ಮುತಾಲಿಕೆಡ್ ವೇ.ಮೂ.ಕಾಶೀನಾಥ ಆಚಾರ್ಯ ಮೆರೆನ ಮಾರ್ಗದರ್ಶನೊಡು ದಿನೊಕ್ಕು 50 ಜನತ್ತಂಚ 300 ಋತ್ವಿಜೆರೆರ್ದ್ ಯಾಗದ ಕುಂಡೊಡು ಯಾಗ ನಡಪರೆ ಉಂಡು ಪಂದ್ ಆರ್ ತೆರಿಪಾಯೆರ್.

ಬೊಲ್ಪುಗು 5 ಗಂಟೆರ್ದ್ ಮಧ್ಯಾಹ್ನ 1 ಗಂಟೆ ಮುಟ್ಟ ಯಾಗ ನಡಪರೆ ಉಂಡು. ಫೆ.10 ಕ್ಕ್ ಬಯ್ಯ 6 ಗಂಟೆಗ್ ಧರ್ಮ ಸಭೆ ನಡಪರೆ ಉಂಡು. ಫೆ.4 ಕ್ಕ್ ಬಯ್ಯಗ್ ಉಗ್ರಾಣ ಮೂರ್ತ, ಫೆ. 5 ಕಾಂಡೆ ಮಹಾ ಪ್ರಾರ್ತನೆ. ಅಷ್ಟೋತ್ತರ ನಾರೀಕೇಳ ಗಣ ಹೋಮ, ಬಯ್ಯಡ್ ದೇವೆರ್ನ ಪೇಂಟೆ ಮೆರವಣಿಗೆ,ವಿಷ್ಣು ನೃಸಿಂಹ ಕಲಶ ಪ್ರತಿಷ್ಠೆ ನಡಪರೆ ಉಂಡು. ಫೆ.6 ಕಾಂಡೆ ಸಹಸ್ರ ನೃಸಿಂಹ ಯಾಗ ಸುರು. ಫೆ.11 ಕ್ಕ್ ಪೂರ್ಣಾಹುತಿ ಆವರೆ ಉಂಡು ಪಂಡೆರ್.
ಶ್ರೀ ಸಹಸ್ರ ನೃಸಿಂಹ ಯಾಗ ಸಮಿತಿ, ಕಿನ್ನಿಗೋಳಿ ನೆತ್ತ ಕಾರ್ಯಾಧ್ಯಕ್ಷೆರ್ ದೇವಿಪ್ರಸಾದ್ ಶೆಟ್ಟಿ ಕೊಡೆತ್ತೂರು ಹೊಸಮನೆ ಮೇರ್ ಪಾತೆರ್ದ್, ಸಮಿತಿದ ಗುರ್ಕಾರ್ಲು, ಶಾಸಕೆರ್ ಉಮಾನಾಥ್ ಕೋಟ್ಯಾನ್ ಮೆರೆನ ಮಾರ್ಗದರ್ಶನೊಡು ಯಾಗದ ತಯಾರಿ ಪೂರ ಆತ್ಂಡ್. ಯಾಗ ಮಂಟಪ, ಪಾರ್ಕಿಂಗ್ ವ್ಯವಸ್ಥೆ ಬೊಕ್ಕ ಅನ್ನಛತ್ರದ ವ್ಯವಸ್ಥೆ ಆತ್ಂಡ್.ಪ್ರಚಾರಾರ್ಥವಾದ್ ತುಳುನಾಡ್ ಇಡೀಕ್ಕ ರಥಯಾತ್ರೆ ಮಲ್ದ್ಂಡ್. ಯಾಗದ ಪೊರ್ತುಡು ಪ್ರತಿದಿನಲ 5 ಸಾರ ಭಕ್ತೆರ್ ಅಂಚೆನೆ ಫೆ.11ಸನಿಯಾರ ಯಾಗದ ಪೂರ್ಣಾಹುತಿದಾನಿ 15-20 ಸಾರ ಭಕ್ತೆರ್ ಬರ್ಪಿನ ಅಂದಾಜಿ ಉಂಡು ಪಂಡೆರ್.
ಸಾಂಸ್ಕೃತಿಕ ವೇದಿಕೆಡ್ ಮಧ್ಯಾಹ್ನ 2 ಗಂಟೆರ್ದ್ ಭಕ್ತಿ ರಸ ಮಂಜರಿ, ಗಿಟಾರ್ ವಾದನ, ಯಕ್ಷಗಾನ, ಭರತನಾಟ್ಯ, ತುಳು ನಾಟಕ, ಭಜನಾ ಸಂಗಮ, ಯಕ್ಷಗಾನ ತಾಳಮದ್ದಳೆ ಇಂಚಿನ ಕಾರ್ಯಕ್ರಮ ನಡಪರೆ ಉಂಡು ಪಂದ್ ತೆರಿಪಾಯೆರ್. ಸುದ್ದಿಗೋಷ್ಠಿಡ್ ಸಮಿತಿದ ಪ್ರಧಾನ ಕಾರ್ಯದರ್ಶಿ ಪ್ರತೀಕ್ ಶೆಟ್ಟಿ, ಪ್ರಧಾನ ಸಂಚಾಲಕೆರ್ ಪ್ರೇಮರಾಜ್ ಶೆಟ್ಟಿ, ರಾಜೇಶ್ ಕುಲಾಲ್, ಧನಂಜಯ ಶೆಟ್ಟಿಗಾರ್, ದಿನೇಶ್ ಆಚಾರ್ಯ, ಪ್ರಕಾಶ್ ಆಚಾರ್ಯ ಇತ್ತೆರ್.