November 2022

ಡಿ.8: ಪಾಲಡ್ಕ ಕೇಪುಲ್ ಇಲ್ಲಡ್ ಕಟೀಲ್ ಮೇಳದ ಶ್ರೀ ದೇವಿ ಮಹಾತ್ಮೆ ಯಕ್ಷಗಾನ

ಕಟೀಲ್ ಶ್ರೀ ದುರ್ಗಾಪರಮೇಶ್ವರಿ ಪ್ರಸಾದಿತ ದಶಾವತಾರ ಯಕ್ಷಗಾನ ಮಂಡಳಿರ್ದ್ ಶ್ರೀ ದೇವಿ ಮಹಾತ್ಮೆ ಯಕ್ಷಗಾನ ಬಯಲಾಟ ಡಿ.8 ಗುರುವಾರದಾನಿ ರಾತ್ರೆ 8 ಗಂಟೆಗ್ ಪಾಲಡ್ಕ ಗ್ರಾಮದ ಕೇಪುಲ್ (ನ್ಯೂ ದರ್ಖಾಸ್) ಇಲ್ಲಲ್ ಪಾಡಿನ ರಂಗಮಂಟಪಡ್ ನಡಪರೆ ಉಂಡು.

ಈ ಲೇಸ್ ಗ್ ನಿಕುಲು ಮಾತ ಬತ್ ದ್, ಶ್ರೀ ದೇವೆರೆನ ಪ್ರಸಾದ ದೆತೊಂದು, ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ಕೇಪುಲ್ ಇಲ್ಲ್ ಪಾಲಡ್ಕದ ವಸಂತಿ ಬೊಕ್ಕ ದಿನೇಶ ಸಾಲ್ಯಾನ್, ಬೊಕ್ಕ ರಕ್ಷಿತಾ ಲೆಪ್ಪೋಲೆಡ್ ತೆರಿಪಾದೆರ್.

ನ.27: ಪಾಲಡ್ಕ ಪೊಸಲಾಯಿ ಇಲ್ಲಡ್ ಕಟೀಲ್ ಮೇಳದ ಶ್ರೀ ದೇವಿ ಮಹಾತ್ಮೆ ಯಕ್ಷಗಾನ

ಕಟೀಲ್ ಶ್ರೀ ದುರ್ಗಾಪರಮೇಶ್ವರಿ ಪ್ರಸಾದಿತ ದಶಾವತಾರ ಯಕ್ಷಗಾನ ಮಂಡಳಿರ್ದ್ ಶ್ರೀ ದೇವಿ ಮಹಾತ್ಮೆ ಯಕ್ಷಗಾನ ಬಯಲಾಟ ನ.27 ಐತಾರದಾನಿ ರಾತ್ರೆ 8 ಗಂಟೆಗ್ ಪಾಲಡ್ಕ ಗ್ರಾಮದ ಪೊಸಲಾಯಿ ಇಲ್ಲ್ ಬಾಕಿಮಾರ್ ಕಂಡಡ್ ಪಾಡಿನ ರಂಗಮಂಟಪಡ್ ನಡಪರೆ ಉಂಡು.

ಈ ಲೇಸ್ ಗ್ ನಿಕುಲು ಮಾತ ಬತ್ ದ್, ಶ್ರೀ ದೇವೆರೆನ ಪ್ರಸಾದ ದೆತೊಂದು, ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ಪೊಸಲಾಯಿ ಇಲ್ಲ್ ಪಾಲಡ್ಕದ ಸುಶೀಲಾ ಪೂಜಾರಿ ಬೊಕ್ಕ ಜೋಕುಲು ಲೆಪ್ಪೋಲೆಡ್ ತೆರಿಪಾದೆರ್.

ಬ್ರಹ್ಮ ಶ್ರೀ ನಾರಾಯಣ ಗುರು ಸೇವಾ ಸಂಘ (ರಿ)ಕಡಂದಲೆ-ಪಾಲಡ್ಕ ಮಹಿಳಾ ಘಟಕದ ಪದಾಧಿಕಾರಿಲೆನ ಪದಗ್ರಹಣ ಲೇಸ್

ಬ್ರಹ್ಮ ಶ್ರೀ ನಾರಾಯಣ ಗುರು ಸೇವಾ ಸಂಘ (ರಿ)ಕಡಂದಲೆ-ಪಾಲಡ್ಕ ಮಹಿಳಾ ಘಟಕದ ಅಧ್ಯಕ್ಷೆರೆನ ಬೊಕ್ಕ ಉಪಾಧ್ಯಕ್ಷೆರೆನ, ಸದಸ್ಯರೆನ ಪದಾಧಿಕಾರಿಲೆನ ಪದಗ್ರಹಣ ಲೇಸ್ ಇಂಚೊಗು ಬಿಲ್ಲವ ಸಂಘದ ವಠಾರಡ್ ನಡತ್ಂಡ್.

ಅಧ್ಯಕ್ಷೆರಾದ್ ಸೌಮ್ಯ ಗಣೇಶ್ ಕೋಟ್ಯಾನ್, ಉಪಾಧ್ಯಕ್ಷೆರಾದ್ ಲೀಲಾ ಆನಂದ್, ಕಾರ್ಯದರ್ಶಿ ಆದ್, ಪೂಜಾ ಉದಯ್, ಜೊತೆ ಕಾರ್ಯದರ್ಶಿ ಯಾದ್ ಜ್ಯೋತಿ ಸೀತಾರಾಮ್, ಕೋಶಾಧಿಕಾರಿಯಾದ್ ಶರ್ಮಿಳಾ ಕೇಶವ್ ಆಯ್ಕೆ ಆತೆರ್. ಸಂಘದ ಉಪಾಧ್ಯೆಕ್ಷೆರ್ ಲೀಲಾಧರ್ ಪೂಜಾರಿ ದೀಪ ಅರ್ಲಾಯೆರ್. ಅಜಯ್ ಪ್ರಾರ್ತನೆ ಮಲ್ತೆರ್. ವಸಂತಿ ಜಗದೀಶ್ ನಿರೂಪಣೆನ್ ಮಲ್ತೆರ್. ಪದಾಧಿಕಾರಿಲೆನ ಪರಿಚಯನ್ ಪಾವನ ಸಂತೋಷ್ ತೆರಿಪಾಯೆರ್.

ಈ ಪೊರ್ತುಡು ಪದ್ಮನಾಭ ಅಮೀನ್ ಬೊಕ್ಕ ನಾರಾಯಣ ಪೂಜಾರಿ ಕೊರಂಗಲು, ಗೌರವ ಸಲಹೆಗಾರೆರ್ ಬಿಲ್ಲವ ಸಂಘ ಬೊಕ್ಕ ಜಗದೀಶ್ ಕಲ್ಲೋಟ್ಟು ಸದಸ್ಯೆರ್, ಬಿಲ್ಲವ ಸಂಘ ಭಜನಾ ಮಂಡಳಿದ ಅಧ್ಯಕ್ಷೆರ್ ಶಿವರಾಮ್ ಇತ್ತೆರ್.

ಗೆಜ್ಜೆಗಿರಿ ಕ್ಷೇತ್ರೊಡು ಮೆನ್ಕೊಂದುಂಡು ಅಪ್ಪೆ ದೇಯಿ ಬೈದೆತಿ ಸಮಾಧಿ

ಅಪ್ಪೆ ಆದಿ ಧೂಮಾವತಿ ಬೊಕ್ಕ ದೇಯಿ ಬೈದೆತಿನ ಪುದರ್ ಡ್ ಪೊಸ ಯಕ್ಷಗಾನ ಮೇಳ ಪಿದಾಡುನ ಈ ಪೊರ್ತುಡು ಕ್ಷೇತ್ರೊಗು ಪೊಸ ಕಳೆ ಬೈದ್ಂಡ್. ಜನಕ್ಲೆಡ ಭಕ್ತಿ ಭಾವ ನನಾತ್ ಉರ್ಕರೊಂದುಂಡು. ಭಾರಿ ಸಂಖ್ಯೆಡ್ ಭಕ್ತೆರ್ ಕ್ಷೇತ್ರೊಗು ಬರೊಂದುಲ್ಲೆರ್. ದೇಯಿ ಬೈದ್ಯೆತಿ ಸಮಾಧಿಲ ಸೇರ್ದ್ ಇಡೀ ಗೆಜ್ಜೆಗಿರಿ ನಂದನ ಬಿತ್ತ್ ಲ್ ಬಣ್ಣ ಬಣ್ಣದ ವಿದ್ಯುತ್ ಬೊಲ್ಪುಲೆರ್ದ್ ಮಿನ್ಕೊಂದುಂಡು.

ಗೆಜ್ಜೆಗಿರಿಟ್ ಇಪ್ಪುನ ದೇಯಿ ಬೈದ್ಯೆತಿ ಸಮಾಧಿಗ್ 450 ವರ್ಷದ ಇತಿಹಾಸ ಉಂಡು. ಪಡುಮಲೆತ್ತ ಅರಸು ಬಳ್ಳಾಲೆರೆನ ಕಾರ್ ಗ್ ಮರ್ದ್ ಕೊರಿಯರೆ ಪಂದ್ ಗೆಜ್ಜೆಗಿರಿತ್ತ ಇಲ್ಲರ್ದ್ ಪೋಯಿನ ಬಂಜಿನಾರ್ ದೇಯಿ ಬೈದ್ಯೆತಿ ನಾಟಿ ವೈದ್ಯದ ಮುಖೇನ ಬಳ್ಳಾಲ್ರೆನ ಕಾರ್ ಗುಣಮಲ್ತ್ ದ್ ಜೂವ ಒರಿಪಾವೆರ್. ಅರಸುಲು ಗುಣಮುಖ ಆಯಿನ ಬೊಕ್ಕ ದೇಯಿ ಬೈದ್ಯೆತಿ ತನ್ನ ಇಲ್ಲಗ್ ಪಿರ ಪಿದಾಡಿನ ಪೊರ್ತುಡು ಪೆದ್ದುನ ಬಂಜಿ ಬೇನೆ ಬತ್ತಿನ ಕಾರಣ ಬಳ್ಳಾಲೆರೇ ದುಂಬು ಉಂತುದು ಬೇಲೆದಕ್ಲೆಡ ಪೆದ್ಪಾವುನ ವ್ಯವಸ್ಥೆ ಮಲ್ಪುವೆರ್. ಅಮರ್ ಜೋಕುಲೆಗ್ ಜನ್ಮ ಕೊರ್ನ ಬೊಕ್ಕ 16ನೇ ದಿನನೇ ದೇಯಿ ಬೈದ್ಯೆತಿ ಬೂಡುದ ಕೈತಲ್ ದ ಕೆರೆಟ್ಟ್ ಬೂರ್ದು ಆಕಸ್ಮಿಕವಾದ್ ತೀರ್ ಪೋಪೆರ್. ಇಸಯ ತೆರಿದ್ ಅಣ್ಣೆ ಸಾಯನ ಬೈದ್ಯೆರ್ ಮೆಗ್ದಿನ ಸರೀರೊನು ಗೆಜ್ಜೆಗಿರಿತ್ತ ಇಲ್ಲಗ್ ಕನತ್ ದ್ ಮಣ್ಣ್ ಮಲ್ಪುವೆರ್. ಒಂತೆ ಸಮಯೊರ್ದು ಬೊಕ್ಕ ಅಮರ್ ಜೋಕುಲೆನ್ ಲ( ಕೋಟಿ ಚೆನ್ನಯೆರ್) ಕುಡ ಇಲ್ಲಗ್ ಕನತ್ ದ್ ತಾಂಕ್ ವೆರ್. ಅಪ್ಪೆ ಬೊಕ್ಕ ಮಾಮುನ ಇಲ್ಲ್ ಆಯಿನ ಗೆಜ್ಜೆಗಿರಿಟ್ ಜೋಕುಲು ಬುಲೆದ್ ಮಲ್ಲ ಆಯೆರ್. ಅವ್ವೇ ಇಲ್ಲ್ ಅಕ್ಲೆನ ಪಾಲ್ ಗ್ ಸ್ವಂತ ಇಲ್ಲ್ ಕುಟುಂಬದ ಇಲ್ಲ್ ಆದ್ ಉಂಡು.