September 2022

ಕ್ರೆಡಿಟ್ ಬೊಕ್ಕ ಡೆಬಿಟ್ ಕಾರ್ಡ್ ಗಲಸುನಕ್ಲೆಗ್ ಅಕ್ಟೋಬರ್ 1 ತಾರೀಕ್ ರ್ದ್ ಪೊಸ ರೂಲ್ಸು

ಬೊಂಬಾಯಿ: ಅಕ್ಟೋಬರ್ 1 ತಾರೀಕ್ ರ್ದ್ ಬೊಕ್ಕ ಕ್ರೆಡಿಟ್ ಬೊಕ್ಕ ಡೆಬಿಟ್ ಕಾರ್ಡ್ ಗ್ ಪೊಸ ರೂಲ್ಸು ಸುರುವಾಪುಂಡು. ಗಿರಾಕಿಲು ಇತ್ತೆ ಎಚ್ಚ ಎಚ್ಚ ಡೆಬಿಟ್ ಕಾರ್ಡ್ ಅತ್ತಂಡ ಕ್ರೆಡಿಟ್ ಕಾರ್ಡ್ ಬಳಕೆ ಮಲ್ತೊಂದುಲ್ಲೆರ್. ಆಂಡ ಕಾರ್ಡ್ ಗಲಸುನಕ್ಲೆಗ್ ಪೊಸ ಆದೇಶನ್ ಆರ್‌ಬಿಐ ಕೊರ್ತ್ಂಡ್. ಅಕ್ಟೋಬರ್ 1 ಜೆಡ್ದ್ ಕಾರ್ಡ್ ನಿಯಮಡ್ ಭಾರೀ ಬದಲಾವಣೆ ಆಯರೆ ಉಂಡು.

ಅಕ್ಟೋಬರ್ 1 ಜೆಡ್ದ್ ಬ್ಯಾಕಿಂಗ್ ಕ್ಷೇತ್ರದ ನಿಯಮಡ್ ಬದಲಾವಣೆ ಆಯರೆ ಉಂಡು. ಕಾರ್ಡ್-ಆನ್-ಫೈಲ್ ಟೋಕನೈಸೇಶನ್ (ಸಿಒಎಫ್ ಕಾರ್ಡ್ ಟೋಕನೈಸೇಶನ್) ನಿಯಮನ್ 1ನೇ ತಾರೀಕ್ ರ್ದ್ ಕನಯರೆ ಉಂಡು ಪಂದ್ ರಿಸರ್ವ್ ಬ್ಯಾಂಕ್ ತೆರಿಪಾದ್ಂಡ್. ಟೋಕನೈಸೇಶನ್ ವ್ಯವಸ್ಥೆ ಬದಲ್ ಆಯಿಬೊಕ್ಕ ಕಾರ್ಡ್ ಬಳಕೆ ಮಲ್ಪುನಕ್ಲೆಗ್ ಎಚ್ಚದ ಸೌಲಭ್ಯ ಬೊಕ್ಕ ಭದ್ರತೆ ತಿಕ್ಕರೆ ಉಂಡು ಪಂದ್ ಭಾರತೀಯ ರಿಸರ್ವ್ ಬ್ಯಾಂಕ್ ಮಾಹಿತಿ ಕೊರ್ತ್ಂಡು.

ಆರ್‌ಬಿಐ ಮಾಹಿತಿದ ಪ್ರಕಾರ ಕ್ರೆಡಿಟ್ ಬೊಕ್ಕ ಡೆಬಿಟ್ ಕಾರ್ಡ್ ಮುಖೇನ ಪಾವತಿನ್ ದುಂಬುರ್ದುಲ ಎಚ್ಚ ಸುರುಕ್ಷಿತವಾದ್ ಮಲ್ಪುನವ್ ಪೊಸ ನಿಯಮದ ಉದ್ದೇಶವಾತ್ಂಡ್. ಕರಿನ ಕೆಲ ದಿನ ರ್ದ್, ಕ್ರೆಡಿಟ್-ಡೆಬಿಟ್ ಕಾರ್ಡ್‌ಲೆನ ವಂಚನೆದ ಬಗೆಟ್ ಮಸ್ತ್ ದೂರು ಬರೊಂದುಂಡು. ಪೊಸ ನಿಯಮ ಜಾರಿ ಆಯಿಬೊಕ್ಕ ಗ್ರಾಹಕೆರ್ ಆನ್‌ಲೈನ್, ಪಾಯಿಂಟ್ ಆಫ್ ಸೇಲ್(ಪಿಒಎಸ್) ಅತ್ತಂಡ ಡೆಬಿಟ್ ಅತ್ತಂಡ ಕ್ರೆಡಿಟ್ ಕಾರ್ಡ್‌ದೊಟ್ಟುಗ್ ಅಪ್ಲಿಕೇಶನ್ ವೈವಾಟ್ ಮಲ್ಪುವೆರ್.

ಪೊಸ ಟೋಕನ್ ವ್ಯವಸ್ಥೆದ ಅಡಿಟ್ಟ್ ಡೆಬಿಟ್ ಬೊಕ್ಕ ಕ್ರೆಡಿಟ್ ಕಾರ್ಡ್‌ಲೆನ ಸಂಪೂರ್ಣ ಡೇಟಾನ್ ಟೋಕನ್ ಆದ್ ಪರಿವರ್ತನೆ ಮಲ್ಪುವೆರ್. ಕಾರ್ಡ್ ಗಲಸುನಕುಲು ಕಾರ್ಡ್‌ನ್ ಟೋಕನೈಸ್ ಮಲ್ಪರೆ ಒವ್ವೆ ಕಾಸ್ ಕಟ್ಟೊಡ್ಂದು ಇಜ್ಜಿ. ನಿಕ್ಲೆನ ಕಾರ್ಡ್‌ನ್ ಟೋಕನ್ ಆದ್ ಪರಿವರ್ತನೆ ಮಲ್ತ್ಂಡ, ನಿಕ್ಲೆನ ಕಾರ್ಡ್ ಮಾಹಿತಿ ಒವ್ವೆ ಶಾಪಿಂಗ್ ವೆಬ್‌ಸೈಟ್ ಅತ್ತಂಡ ಇ-ಕಾಮರ್ಸ್ ವೆಬ್‌ಸೈಟ್‌ಡ್ ಟೋಕನ್ ಆದ್ ಒರಿಪಾವೊಲಿ.

16 ನಂಬರ್ ?
ಗ್ರಾಹಕೆರ್ ಕಾರ್ಡ್ ಗಲಸ್‌ದ್ ಸೊತ್ತು ಖರೀದಿ ಮಲ್ಪರೆ ಸುರು ಮಲ್ತಿ ಬೊಕ್ಕ, ಬೇರದಕುಲು ಟೋಕನೈಸೇಶನ್ ಸುರು ಮಲ್ಪುವೆರ್. ಬೊಕ್ಕ ಕಾರ್ಡ್ ನ್ ಟೋಕನೈಸ್ ಮಲ್ಪರೆ ಒಪ್ಪಿಗೆ ಕೇನುವೆರ್. ಒಪ್ಪಿಗೆ ದೆತೊನಿ ಬೊಕ್ಕ ವ್ಯಾಪಾರಿ ಕಾರ್ಡ್ ನೆಟ್ವರ್ಕ್ಗ್ ಬಿನ್ನಾಪು ಕಡಪುಡ್ವೆರ್.

16 ನಂಬರ್ ದ ಕಾರ್ಡ್ ಸಂಖ್ಯೆನ್ ಕಾರ್ಡ್ ನೆಟ್‌ವರ್ಕ್‌ರ್ದ್ ರಚನೆ ಮಲ್ತಿನ ಟೋಕನ್‌ದೊಟ್ಟುಗು ಬದಲ್ ಮಲ್ಪುವೆರ್. ಬೊಕ್ಕ ಚಿಲ್ಲರೆ ವ್ಯಾಪಾರಿಗ್ ಪಿರ ಕಡಪುಡ್ವೆರ್. ನನ ದುಂಬುದ ವೈವಾಟ್ ಗಾದ್ ಚಿಲ್ಲರೆ ವ್ಯಾಪಾರಿರ್ದ್ ಈ ಟೋಕನ್ ನ್ ಫೈಲ್‌ಡ್ ದೀಪೆರ್. ಅಕುಲು ಇತ್ತೆ ತನ್ನ ಸಿವಿವಿ ಬೊಕ್ಕ ಒಟಿಪಿ ಪಾಡ್ಯರೆ ಪಿರವುದಲಕನೇ ಪಾಡೊಡು.

ರಿಸಲ್ಟ್ ದಾದ?

ವೈವಾಟ್ ಮಲ್ಪುನಗ ನಿಜವಾಯಿನ ಕಾರ್ಡ್ ವಿವರೊನು ವ್ಯಾಪಾರಿನೊಟ್ಟುಗ್ ಪಟ್ಟುನ ಕಾರಣ ಟೋಕನೈಸ್ ಮಲ್ತಿನ ಕಾರ್ಡ್ ವಹಿವಾಟುನ್ ಎಚ್ಚ ಸುರಕ್ಷಿತ ಪಂದ್ ಗಣನೆಗ್ ದೆತೊನುವೆರ್. ಕಾರ್ಡ್-ಆನ್-ಫೈಲ್ ಟೋಕನೈಸೇಶನ್ ಮಾನದಂಡ ಜಾರಿಗ್ ಬತ್ತಿ ಬೊಕ್ಕ ಪ್ಲ್ಯಾಟ್‌ಫಾರ್ಮ್‌ಲು ಶಾಪರ್‌ನ ಕಾರ್ಡ್ ದ ಸೂಕ್ಷ್ಮ ವಿವರನ್ ಒವ್ವೆ ರೂಪಡ್ ಸಂಗ್ರಹಣೆ ಮಲ್ಪರೆ ಸಾಧ್ಯ ಆಪುಜಿ.