April 2021

ಇನಿರ್ದ್ ಬ್ಯಾಂಕ್‌ದ ವ್ಯವಹಾರದ ಪೊರ್ತುಡು ಬದಲಾವಣೆ: ಅಗತ್ಯ ಸೇವೆಲು ಮಧ್ಯಾಹ್ನ ಮುಟ ಮಾತ್ರ ಲಭ್ಯ

ಕುಡ್ಲ, ಎಪ್ರಿಲ್ 22: ಕೊರೊನ ಸೋಂಕು ಜಾಸ್ತಿ ಆವೊಂದು ಉಪ್ಪುನ ನೆಲೆಟ್ಟ್ ರಾಜ್ಯ ಸರ್ಕಾರ ಪೋಸ್ಕ್ ಮಾರ್ಗಸೂಚಿ ಜಾರಿ ಮಲ್ದಿನ ಬೆರಿಟ್ಟೆ ಬ್ಯಾಂಕ್ ವ್ಯವಹಾರದ ಪೊರ್ತುಡುಲ ಬದಲಾವಣೆ ಮಲ್ದೆರ್.

ಈ ಬಗ್ಗೆ ಎಸ್ಎಲ್‌ಬಿಸಿ ಮನವಿದ ಪ್ರಕಾರ ಲೀಡ್ ಬ್ಯಾಂಕ್ ಮಾರ್ಗಸೂಚಿನ್ ಬುಡುಗಡೆ ಮಲ್ದೆರ್ ನೆತ್ತ ಪ್ರಕಾರ ಬ್ಯಾಂಕ್ ವ್ಯವಹಾರನ್ ಕಾಂಡೆ 10 ಗಂಟೆರ್ದ್ ಮಧ್ಯಾಹ್ನ 2 ಗಂಟೆ ಮುಟ ಅಂಚನೇ ಬೇಲೆದ ಪೊರ್ತುನು ಕಾಂಡೆ 10 ಗಂಟೆರ್ದ್ 4 ಗಂಟೆ ಮುಟ ಮಲ್ಪೋಲಿ.

ಎ.22ರ್ದ್ ಮೇ.31ಮುಟ ಜಾರಿಡ್ ಉಪ್ಪುಂಡು . ಬ್ಯಾಂಕ್ ಸಿಬ್ಬಂದಿಲೆನ ಹಿತದೃಷ್ಟಿರ್ದ್ ಶೇ.50 ದಾತ್ ಸಿಬ್ಬಂದಿಲು ಬದಲಿ ದಿನತ ಪ್ರಕಾರ ಬೇಲೆ ಮಲ್ಪರೆ ಅವಕಾಶ ಕೊರ್ತೆರ್. ಪಣವುದ ವ್ಯವಹಾರ, ಚೆಕ್ ಕ್ಲಿಯರಿಂಗ್ ಸೇವೆ ಅಂಚನೇ ಕಾಸ್ ಪಾವತಿ ಮಲ್ಪುನoಚಿನ ಕನಿಷ್ಟ ಸೇವೆಗ್ ಮಾತ್ರ ಮಾತ್ರ ಮೇ.31ಮುಟ ಅವಕಾಶ ಉಂಡು.

ಡಾ.ಟಿಎಂಎ ಪೈ ಇಂಟರ್‌ನ್ಯಾಷನಲ್ ಕನೆವನ್ಶನ್ ಸೆಂಟರ್‌ಡ್ ಬೃಹತ್ ಮಾರಾಟ

ಕುಡ್ಲ , ಎ.22: ಭಾರತದ ಪ್ರಮುಖ ಮಾಲ್‌ ಬೊಕ್ಕ ಶೋರೂಂಲೆರ್ದ್ ಸಂಗ್ರಹ ಮಲ್ತಿನ ಅಂಗಿ ಕುಂಟುದ ಬೃಹತ್ ಮಾರಾಟನ್ ಪೇಂಟೆದ ಡಾ.ಟಿಎಂಎ ಪೈ ಇಂಟರ್‌ನ್ಯಾಷನಲ್ ಕನೆವನ್ಶನ್ ಸೆಂಟರ್‌ಡ್ ಅಟ್ಟನೆ ಮಲ್ದೆರ್, ಕೋವಿಡ್ ಮಾರ್ಗಸೂಚಿದ ಪ್ರಕಾರ ಸುರಕ್ಷಿತ ಅಂತರದೊಟ್ಟುಗು ಮಾರಾಟ ಮಲ್ಪುನ ನೆಲೆಟ್ಟ್ ಎ.23 ಮುಟ ದುಂಬು ಕೊಂತೆರ್ .

ಕಟೀಲು ಶ್ರೀ ದುರ್ಗಾಪರಮೇಶ್ವರೀ ಪ್ರಸಾದಿತ ದಶಾವತಾರ ಯಕ್ಷಗಾನ ಮಂಡಳಿ ಯಕ್ಷಗಾನ ರದ್ದು

ಕುಡ್ಲ, ಎಪ್ರಿಲ್ 22: ಕರ್ನಾಟಕ ಸರ್ಕಾರದ ಆದೇಶದ ಪ್ರಕಾರ , ಕೋವಿಡ್ ನಿಯಂತ್ರಣಗಾದ್ ಕಟೀಲು ದ ಆಜಿ ಮೇಳದಲಾ ಪ್ರದರ್ಶನನ್ ತಾರೀಖ್ 22.04.2021 ರ್ದ್ 04.05.2021 ಮುಟ ರದ್ದು ಮಲ್ದೆರ್ . ಕಟೀಲು ಶ್ರೀ ದುರ್ಗಾಪರಮೇಶ್ವರೀ ಅಮ್ಮನವರ ಭಕ್ತಾಭಿಮಾನಿಲು ಅಂಚನೇ ಶ್ರೀ ಕಟೀಲು ಮೇಳದ ಮಾತಾ ಸೇವಾದಾರೆರ್ ಸಾಕಾರ ಕೊರೊಡು ಪಂದ್ ಶ್ರೀ ಕ್ಷೇತ್ರ ಕಟೀಲುದ ಆಡಳಿತ ಮಂಡಳಿ ಅಂಚನೇ ಆಜಿ ಮೇಳದ ಸಂಚಾಲಕೆರ್ ಈ ಮುಖೇನ ಬಿನ್ನಾಪು ಮಲ್ದೆರ್.