ಬೊಲ್ತೆರ್ ಸುದ್ದಿ | Belthangady News

ಧರ್ಮಸ್ಥಳರ್ದ್ ಕೊಯಮುತ್ತೂರುಗು ಕೆ.ಎಸ್.ಆರ್.ಟಿ.ಸಿ. ವೋಲ್ವೊ ಬಸ್ ಸುರು

Sep 29, 2022

ಉಜಿರೆ: ಕೆ.ಎಸ್.ಆರ್.ಟಿ.ಸಿ. ಮುತಾಲಿಕೆಡ್ ಕೊಯಮುತ್ತೂರು – ಧರ್ಮಸ್ಥಳ ನಡುಟ್ಟು ಮೋಲ್ವೊ ಬಸ್ ಸೇವೆ ಸುರು ಆತ್ಂಡ್. ಪೊಸ ಬಸ್ ಸೇವೆಗ್ ಧರ್ಮಸ್ಥಳ ಧರ್ಮಾಧಿಕಾರಿ ಡಿ.ವೀರೇಂದ್ರ ಹೆಗ್ಗಡೆರ್ ಚಾಲನೆ ಕೊರ್ದು ಎಡ್ಡೆಪ್ಪು ಬಯಕ್ಯೆರ್.

ಪ್ರತಿ ದಿನಲ ಮಧ್ಯಾಹ್ನ 3.30 ಗಂಟೆಗ್ ಕೊಯಂಬತ್ತೂರುರ್ದು ಪಿದಡುನ ವೋಲ್ವೊ ಬಸ್ ರಾತ್ರೆ 9 ಗಂಟೆಗ್ ಮೈಸೂರುಗು ಬರ್ಪುಂಡು. ಮೈಸೂರುರ್ದ್ ರಾತ್ರೆ 10.15 ಗಂಟೆಗ್ ಪಿದಡುನ ಬಸ್ ಕಾಂಡೆ 4 ಗಂಟೆಗ್ ಸುಬ್ರಹ್ಮಣ್ಯಗ್ ಬತ್ತ್ ದ್ ಅಲ್ಪ ರ್ದ್ ಕಾಂಡೆ 5 ಗಂಟೆಗ್ ಧರ್ಮಸ್ಥಳಗ್ ಬರ್ಪುಂಡು ಪಂದ್ ಕೆ.ಎಸ್.ಆರ್.ಟಿ. ಸಿ. ಪ್ರಕಟಣೆಡ್ ತೆರಿಪಾದ್ಂಡ್.

ಗಾಡಿ ತಾಂಟುನೆನ್ ತಪ್ಪಾಯರೆ ಪೋದು ಇಲ್ಲಗ್ ಗುದ್ದಿನ ಲಾರಿ

Sep 27, 2022

ಬೊಲ್ತೇರ್: ನಿಡಿಗಲ್ ಕೈತಲ್ ರಾಷ್ಟ್ರೀಯ ಮಾರ್ಗಡ್ ಗಾಡಿ ತಾಂಟುನೆನ್ ತಪ್ಪಾಯರೆ ಪೋದು ಲಾರಿಯೊಂಜಿ ಮಾರ್ಗದ ಬರಿಟ್ ಇಪ್ಪುನ ಇಲ್ಲಗ್ ಗುದ್ದ್‌ದಿನ ಘಟನೆ ಅಂಗಾರೆದಾನಿ ನಡತ್ಂಡ್.

ಬಿರ್ಸ್‌ಡ್ ಬತ್ತಿನ ಬಸ್ ಲಾರಿನ್ ಓವರ್ ಟೇಕ್ ಮಲ್ತ್‌ದ್ಂಡ್. ಈ ಪೊರ್ತುಡು ಆಪುನ ಅಪಘಾತ ತಪ್ಪಾಯರೆ ಲಾರಿ ಡ್ರೈವರ್ ಗಾಡಿನ್ ಮಾರ್ಗದ ಬರಿಕ್ಕ್ ಕನತೆರ್. ಮರತ್ತ ತುಂಡು ಇತ್ತಿನ ಲಾರಿ ನಿಯಂತ್ರಣ ತತ್ತ್‌ದ್ ಮಾರ್ಗದ ಬರಿಟ್ ಇತ್ತಿನ ಪರ ಇಲ್ಲಗ್ ಪೊಗ್ಗ್‌ದ್ಂಡ್. ಘಟನೆಡ್ ಏರೆಗ್ಲಾ ತೊಂದರೆ ಆತಿಜಿ.

ಸೆ.26 ತಾರೀಕ್ ರ್ದ್ ಕುಡ್ಲ ದಸರಾ ಸುರು ಜನಾರ್ದನ ಪೂಜಾರ್ಲೆರ್ದ್ ಉದಿಪನ

Sep 24, 2022

ಕುಡ್ಲ : ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರಡ್ ನಡಪುನ ಮಂಗಳೂರು ದಸರಾ ಉಚ್ಚಯ ಸೆ.26 ತಾರೀಕ್ ರ್ದ್ ಅ. 6 ತಾರೀಕ್ ಮುಟ್ಟ ಪ್ರತಿದಿನ ಲ ಬೇತೆಬೇತೆ ಧಾರ್ಮಿಕ, ಸಾಂಸ್ಕೃತಿಕ ಕಾರ್ಯಕ್ರಮದ ಒಟ್ಟುಗು ಭಾರಿ ಗೌಜಿಡ್ ನಡಪರೆ ಉಂಡು ಪಂದ್ ಕ್ಷೇತ್ರಾಡಳಿತ ಸಮಿತಿದ ಗುರ್ಕಾರ್ಲು ಎಚ್.ಎಸ್. ಸಾಯಿರಾಮ್ ತೆರಿಪಾಯೆರ್.

ಆರ್ ಕುದ್ರೋಳಿ ಕ್ಷೇತ್ರದ ಜಯ ಸುವರ್ಣ ಸಭಾಂಗಣಡ್ ಸನಿಯಾರ ನಡತಿನ ಸುದ್ದಿಗೋಷ್ಠಿಡ್ ಈ ವಿಷಯ ಪಂಡೆರ್.

ಸೆ.26 ಕಾಂಡೆ 9.30 ಗಂಟೆಗ್ ಗುರು ಪ್ರಾರ್ಥನೆ, ಕಲಶ ಪ್ರತಿಷ್ಠೆ ಇಂಚಿನ ವಿಧಿಕುಲು ನಡತಿ ಬೊಕ್ಕ ಶ್ರೀ ಶಾರದೆ , ಗಣಪತಿ ಬೊಕ್ಕ ನವದುರ್ಗೆಯೆರೆನ ಮೂರ್ತಿ ಪ್ರತಿಷ್ಠೆ ಆವರೆ ಉಂಡು. ಸೆ.27 ಕಾಂಡೆ ದುರ್ಗಾಹೋಮ ,ಸೆ.30 ಲಲಿತಾ ಪಂಚೆಮಿದಾನಿ ಭಗವತಿ ದುರ್ಗಾ ಹೋಮ, ಸಾಮೂಹಿಕ ಚಂಡಿಕಾಯಾಗ, ಅಕ್ಟೋಬರ್ 1 ಕಾಂಡೆ ಕುಮಾರಿ ದುರ್ಗಾ ಹೋಮ, ಅ.2 ಕಾಂಡೆ೬ ಮಹಿಷ ಮರ್ದಿನಿ ದುರ್ಗಾ ಹೋಮ, ಅ.3 ಚಂಡಿಕಾ ಹೋಮ, ಪಗೆಲ್ ಉಚ್ಚಯ, ದುರ್ಗಾಷ್ಟಮಿ, ಅ.4 ಸರಸ್ವತಿ ದುರ್ಗಾ ಹೋಮ, 100 ಬೊಂಡಾಭಿಷೇಕ, ಶಿವ ಪೂಜೆ , ಅನ್ನಸಂತರ್ಪಣೆ ಸೇವೆ ನಡಪರೆ ಉಂಡು ಪಂಡೆರ್.

ಕ್ಷೇತ್ರಾಭಿವೃದ್ಧಿ ಸಮಿತಿದ ಅಧ್ಯಕ್ಷೆರ್ ದೇವೇಂದ್ರ ಪೂಜಾರಿ ಮೇರ್ ಪಾತೆರ್ದ್, ಅ.5 ಕ್ಕ್ ಶ್ರೀ ಕ್ಷೇತ್ರದ ಅಭಿವೃದ್ಧಿದ ರೂವಾರಿ ಜನಾರ್ದನ ಪೂಜಾರಿ ಮೆರೆನ ಮುತಾಲಿಕೆಡ್ ಶೋಭಾಯಾತ್ರೆ ಭಾರಿ ವೈಭೋಗಡ್ ನಡಪರೆ ಉಂಡು. ಸೆ.26 ಕ್ಕ್ ದಸರಾ ಉದಿಪನೊಗು ಜನಾರ್ದನ ಪೂಜಾರ್ಲೆನ್ ಬಿನ್ನಾಪು ಮಲ್ದ. ಆರ್ ಕಾಂಡೆ 11.45 ಕ್ಕ್ ಉದಿಪನ ಮಲ್ಪರೆ ಉಲ್ಲೆರ್ ಪಂಡೆರ್.

ಕ್ಷೇತ್ರಾಡಳಿತ ಸಮಿತಿದ ಕೋಶಾಧಿಕಾರಿ ಪದ್ಮರಾಜ್ ಆರ್. ಪಾತೆರ್ದ್, ಮಂಗಳೂರು ದಸರಾಗ್ ಈ ಸರ್ತಿ ನಿರೀಕ್ಷೆರ್ದ್ ಲ ಹೆಚ್ಚಿನ ಸಂಖ್ಯೆಡ್ ಭಕ್ತೆರ್ ಬರ್ರೆ ಉಲ್ಲೆರ್. ಪಾರ್ಕಿಂಗ್ ಗ್ ಕೆಲವು ಕಡೆಟ್ಟ್ ವ್ಯವಸ್ಥೆ ಮಲ್ತ್ ದ. ಭಕ್ತೆರೆಗ್ ಅನಾನುಕೂಲ ಆವಂದಿಲೆಕ ತೂಪಿನವು ನಮ್ಮ ಕರ್ತವ್ಯ ಪಂದ್ ಪಂಡೆರ್.

ಅ.5 ಶೋಭಾಯಾತ್ರೆ
ಅ.5 ಕಾಂಡೆ ವಾಗೀಶ್ವರಿ ದುರ್ಗಾಹೋಮ, ಶಿವ ಪೂಜೆ ಬಯ್ಯಡ್ 4 ಗಂಟೆಗ್ ಶ್ರೀ ಶಾರದಾ ದೇವಿ ಬೊಕ್ಕ ನವದುರ್ಗೆಯೆರ್ನ ಮೂರ್ತಿಲೆನ ಶೋಭಾಯಾತ್ರೆ ನಡಪರೆ ಉಂಡು. ಅ.6 ಕಾಂಡೆ ಪೂಜೆ ಬಲಿ, ಮಂಟಪ ಬಲಿ ಮಂಟಪ ಪೂಜೆ ಆದ್ ವಿಸರ್ಜನೆ ನಡಪರೆ ಉಂಡು.ಭಕ್ತೆರೆನ ಅನುಕೂಲೊಗು ಬೋಡಾದ್ ಈ ಸರ್ತಿ ನವದುರ್ಗೆಯೆರ್ ಬೊಕ್ಕ ಶ್ರೀ ಶಾರದಾ ದೇವಿನ ಮೂರ್ತಿಲೆನ ಮೆರವಣಿಗೆ ಎದುರುಡು ಪೋವರೆ ಉಂಡು. ಕಲಾತಂಡೊಲು, ಪಿಲಿ ವೇಷ ಬೊಕ್ಕ ವೇಷಭೂಷಣಲೆನ ಟ್ಯಾಬ್ಪೊ ಪಿರವುಡು ಪೋವರೆ ಉಂಡು ಪಂದ್ ಕ್ಷೇತ್ರಾಭಿವೃದ್ಧಿ ಸಮಿತಿದ ಸದಸ್ಯೆರ್ ಹರಿಕೃಷ್ಣ ಬಂಟ್ವಾಳ ತೆರಿಪಾಯೆರ್.

ಸುದ್ದಿಗೋಷ್ಠಿಡ್ ಕ್ಷೇತ್ರಾಡಳಿತ ಸಮಿತಿದ ಉಪಾಧ್ಯಕ್ಷೆರ್ ಊರ್ಮಿಳಾ ರಮೇಶ್, ಕಾರ್ಯದರ್ಶಿ ಬಿ.ಮಾಧವ ಸುವರ್ಣ, ಟ್ರಸ್ಟಿಲಾಯಿನ ರವಿಶಂಕರ್ ಮಿಜಾರ್, ಕೆ.ಮಹೇಶ್ಚಂದ್ರ, ಎಂ.ಶೇಖರ ಪೂಜಾರಿ, ಸಂತೋಷ್ ಕುಮಾರ್ ಜೆ., ಜಗದೀಪ್ ಡಿ.ಸುವರ್ಣ, ಅಭಿವೃದ್ಧಿ ಸಮಿತಿದ ಕೋ ಚೇರ್ಮನ್ ಡಾ.ಅನಸೂಯಾ ಬಿ.ಟಿ.ಸಾಲ್ಯಾನ್, ಉಪಾಧ್ಯಕ್ಷೆರ್ ಡಾ.ಬಿ.ಜಿ.ಸುವರ್ಣ, ಸದಸ್ಯೆರಾಯಿನ ಕೆ.ಚಿತ್ತರಂಜನ್ ಗರೋಡಿ, ರಾಮನಾಥ್ ಕಾರಂದೂರು, ಕಿಶೋರ್ ದಂಡಕೇರಿ, ಜತಿನ್ ಅತ್ತಾವರ, ಗೌರವಿ ಪಿ.ಕೆ., ಲೀಲಾಕ್ಷ ಕರ್ಕೇರ ಮೊಕುಲು ಮಾತ ಇತ್ತೆರ್.

ಧರ್ಮಸ್ಥಳಡ್ ಭಜನಾ ತರಬೇತಿ ಕಮ್ಮಟಗ್ ಮುಗಿತಲದ ಚುಕ್ಕಿ

Sep 23, 2022

ಧರ್ಮಸ್ಥಳ: 24ನೇ ವರ್ಷದ ಭಜನೋತ್ಸವ ಅಂಚನೆ ಭಜನಾ ತರಬೇತಿ ಕಮ್ಮಟದ ಮುಗಿತಲದ ಲೇಸ್ ಸೆ.23 ಕ್ಕ್ ಶ್ರೀ ಕ್ಷೇತ್ರ ಧರ್ಮಸ್ಥಳದ ಅಮೃತವರ್ಷಿಣಿ ಸಭಾಭವನಡ್ ನಡತ್oಡ್.

ಒಡಿಪು ಪೇಜಾವರ ಶ್ರೀ ಅಧೋಕ್ಷಜ ಮಠದ ಶ್ರೀ ಶ್ರೀ ವಿಶ್ವಪ್ರಸನ್ನ ತೀರ್ಥ ಸ್ವಾಮೀಜಿ ಪಾತೆರ್ದ್, ಭಜನೆ ಮಲ್ಪುನೆಡ್ದಾವರ ನಮ್ಮ ಸಂಸ್ಕಾರ ಒರಿಯೊಂದುಂಡು. ದುಂಬುದ ಕಾಲೊಗ್ ಮಲ್ಲ ಮಲ್ಲ ಉದ್ಯಮಿಲು ಪೊರ್ತು ದೀವೊಂದು ಭಜನೆ ಮಲ್ತೊಂದು ಇತ್ತೆರ್. ಜೋಕುಲೆಡ ಮೊಬೈಲ್ ಗಳಸುನ ಅಭ್ಯಾಸನ್ ಬುಡ್ಪಾವೊಡು. ಜೋಕುಲು ತನ್ನ ಪೊಪ್ಪ ಅಮ್ಮ, ಪೆರಿಯಕ್ಲೆನ್ ತೂದ್ ಸಂಸ್ಕಾರನ್ ಕಲ್ಪುವೆರ್. ಟಿವಿ ಮಾಧ್ಯಮರ್ದ್ ಧಾರವಾಹಿಲೆಡ್ದ್ ದೂರ ಇಪ್ಪೊಡು ಪಂದ್ ಆಶೀರ್ವಚನ ಮಲ್ತೆರ್.

ಲೇಸ್ ದ ಅಧ್ಯಕ್ಷತೆನ್ ಶ್ರೀ ಕ್ಷೇತ್ರ ಧರ್ಮಸ್ಥಳದ ಧರ್ಮಾಧಿಕಾರಿ ಡಾ| ಡಿ ವೀರೇಂದ್ರ ಹೆಗ್ಗಡೆರ್ ವಹಿಸ್ ದಿತ್ತೆರ್.

ವೇದಿಕೆಡ್ ಶ್ರೀ ಧಾಮ ಮಾಣಿಲದ ಮಾಣಿಲ ಸೇವಾ ಪ್ರತಿಷ್ಠಾನದ ಶ್ರೀ ಮೋಹನದಾಸ ಪರಮಹಂಸ ಸ್ವಾಮೀಜಿ, ಬೆಂಗ್ಲೂರ್ ಚಲನಚಿತ್ರ ಸಂಗೀತ ನಿರ್ದೇಶಕೆರ್ ವಿ. ಶ್ರೀಧರ್ ಸಂಭ್ರಮ್, ಇಸ್ಕಾನ್ ದ ಶ್ರೀರಾಮಚರಣದಾಸ ಸ್ವಾಮಿಲು ಪಾಲ್ ಪಡೆದಿತ್ತೆರ್.

ಮಾನಾದಿಗೆದ ಲೇಸ್:
ಈ ಪೊರ್ತುಡು ಭಜನಾ ಪರಿಷತ್ ದ ಸಾಧಕರೆಗ್ ವಿಮಾ ವಿಭಾಗದ ಪ್ರಾದೇಶಿಕ ನಿರ್ದೇಶಕೆರ್ ಪುರುಷೋತ್ತಮ ಮೇರ್ ಮಾನಾದಿಗೆ ಮಲ್ತೆರ್ ಅಂಚನೆ ಪೇಜಾವರ ಶ್ರೀಲೆಗ್ ಕ್ಷೇತ್ರದ ವತಿರ್ದ್ ಗೌರವಾರ್ಪನೆನ್ ಮಲ್ತೆರ್. ವಾಸುರೆಡ್ಡಿ ಬೊಕ್ಕ ಇಲ್ಲದಕುಲು ಬೆಂಗ್ಲೂರು ಅಂಚನೆ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಭಜನಾ ಪರಿಷತ್ ಮುತಾಲಿಕೆಡ್ ಡಾ| ಡಿ ವೀರೇಂದ್ರ ಹೆಗ್ಗಡೆರೆಗ್ ಬೊಕ್ಕ ಮಾತೃಶ್ರೀ ಡಾ|| ಹೇಮಾವತಿ ವೀ.ಹೆಗ್ಗಡೆ ಮೇರೆಗ್ ಮಾನಾದಿಗೆ ಮಲ್ತೆರ್.

ಲೇಸ್ ಡ್ ಮಾತೃಶ್ರೀ ಡಾ|| ಹೇಮಾವತಿ ಮೆರೆನ ಪರಿಕಲ್ಪನೆಡ್ ವಿದೂಷಿ ಕು| ಚೈತ್ರ ಬೊಕ್ಕ ಕೂಟದಕ್ಲೆಲೆರ್ದ್ ಕುಣಿತ ಭಜನೆದ ಲೇಸ್ ನಡತ್oಡ್.

ಭಜನಾ ಪರಿಷತ್ ದ ಅಧ್ಯಕ್ಷೆರ್ ಬಾಲಕೃಷ್ಣ ಪಂಜ, ಪ್ರದೀಪ್ ಕುಮಾರ್ ಕಲ್ಕೂರ ಲೇಸ್ ಡ್ ಪಾಲ್ ಪಡೆದ್ ಇತ್ತೆರ್. 84 ತಾಲೂಕ್ ರ್ದ್ 183 ಭಜನಾ ಮಂಡಳಿದ 320 ಶಿಬಿರಾರ್ಥಿಲು ತರಬೇತಿ ಕಮ್ಮಟಡ್ ಪಾಲ್ ಪಡೆದ್ ಇತ್ತೆರ್.

ಶ್ರೀ.ಧ.ಮಂ ಭಜನಾ ಕಮ್ಮಟದ ಸಂಚಾಲಕೆರ್ ಸುಬ್ರಹ್ಮಣ್ಯ ಪ್ರಸಾದ್ ಎದ್ಕೊನಿಯೆರ್. ಭಜನಾ ತರಬೇತಿ ಕಮ್ಮಟದ ಕೋಶಾಧಿಕಾರಿ ಧರ್ಣಪ್ಪ ಡಿ ಬತ್ತಿನ ಬಿನ್ನೆರೆಗ್ ಸೊಲ್ಮೆ ಸಂದೈತ ಮಲ್ತೆರ್. ಶ್ರೀನಿವಾಸ್ ರಾವ್ ಬೊಕ್ಕ ದಿನರಾಜ್ ಶೆಟ್ಟಿ ಲೇಸ್ ಸುದಾರಿಕೆ ಮಲ್ತೆರ್.

ಉಡುಪಿದ ಸುದ್ದಿ | Udupi News ಊರ್ದ ಸುದ್ದಿ Regional News ಕಾರ್ಲದ ಸುದ್ದಿ Karkala News ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಬೊಲ್ತೆರ್ ಸುದ್ದಿ | Belthangady News ರಪಕ್ಕ ಸುದ್ದಿ Flash News

ಸೆ.24 : ಕುಡ್ಲ ಡ್ ಶ್ರೀ ರಾಮಕೃಷ್ಣ ವಿದ್ಯಾರ್ಥಿನಿ ಭವನದ ಅಮೃತ ಉಚ್ಚಯದ ಉದಿಪನ ಸಮಾರಂಭ

Sep 23, 2022

ಕುಡ್ಲ: ಶ್ರೀ ರಾಮಕೃಷ್ಣ ವಿದ್ಯಾರ್ಥಿನಿ ಭವನದ ಅಮೃತ ಉಚ್ಚಯದ ಉದಿಪನದ ಲೇಸ್ ತೇದಿ ಸೆ.24ದಾನಿ ಸನಿವಾರ ಬೊಲ್ಪುಗು 10 ಗಂಟೆಗ್ ಬಂಟರ ಯಾನೆ ನಾಡವರ ಮಾತೃ ಸಂಘ(ರಿ.) ಕುಡ್ಲದ ಬಂಟ್ಸ್ ಹಾಸ್ಟೆಲ್ ದ ಜಾಲ್ ಡ್ ನಡಪರೆ ಉಂಡು. ಅಂಚನೆ ಸಾಂಸ್ಕೃತಿಕ ಕಾರ್ಯಕ್ರಮಲ ನಡಪುಂಡು. ಈ ಕಾರ್ಯಕ್ರಮಗ್ ಮಾತೆರ್ಲ ಬರೊಡು ಪಂದ್ ಮಾಲಾಡಿ ಅಜಿತ್ ಕುಮಾರ್ ರೈ ಕೊಡಿಯಲ್ ಗುತ್ತು , ಶಾಲಿನಿ ಶೆಟ್ಟಿ, ಬೊಕ್ಕ ವೀಣಾ ಟಿ.ಶೆಟ್ಟಿ ಲೆಪ್ಪೋಲೆಡ್ ತೆರಿಪಾದೆರ್.

ಧರ್ಮಸ್ಥಳ: ಭಜನಾ ತರಬೇತಿ ಕಮ್ಮಟಡ್ ಉಪನ್ಯಾಸ ಕೊರಿನ ಮಾತೃಶ್ರೀ ಡಾ. ಹೇಮಾವತಿ ವಿ. ಹೆಗ್ಗಡೆರ್

Sep 23, 2022

ಧರ್ಮಸ್ಥಳ: ಜೋಕುಲೆಗ್ ಎಲ್ಯ ಪ್ರಾಯೊಡೇ ಭಜನೆದ ಸಂಸ್ಕಾರನ್ ಕೊರೊಡ್. ಪಿರಾಕ್ ಡ್ ಸಾದಿಡ್ ಲ ಭಜನಾ ಕಾರ್ಯಕ್ರಮ ನಡತ್ತೊಂದು ಇತ್ತ್ಂಡ್. ಪೆರಿಯಕುಲು, ಜೋಕುಲು ಮಾತೆರ್ಲಾ ಭಜನೆಗ್ ಕುಲ್ಲೊಂದಿತ್ತೆರ್. ಶ್ಲೋಕನ್ ಲ ಕಲ್ಪಾದ್ ಕೊರೊಡ್ ಪಂದ್ ಡಾ. ಹೇಮಾವತಿ ವಿ. ಹೆಗ್ಗಡೆರ್ ಪಂಡೆರ್.

ಧರ್ಮಸ್ಥಳದ ಅಮೃತವರ್ಷಿಣಿಡ್ ಅಟ್ಟನೆ ಮಲ್ತಿನ ಭಜನಾ ತರಭೇತಿ ಕಮ್ಮಟಡ್ ಉಪನ್ಯಾಸ ಕೊರಿನ ಮಾತೃಶ್ರೀ ಡಾ. ಹೇಮಾವತಿ ಹೆಗ್ಗಡೆರ್ ಪಾತೆರ್ದ್, ಜೋಕುಲೆಡ ಮೊಬೈಲ್ ಗಳಸುನ ಅಭ್ಯಾಸನ್ ಬುಡ್ಪಾವೊಡ್. ಜೋಕುಲು ತನ್ನ ಪೊಪ್ಪ ಅಮ್ಮ, ಪೆರಿಯಕ್ಲೆನ್ ತೂದ್ ಸಂಸ್ಕಾರನ್ ಕಲ್ಪುವೆರ್. ಟಿವಿ ಮಾಧ್ಯಮರ್ದ್ ಧಾರವಾಹಿಲೆಡ್ದ್ ದೂರ ಇಪ್ಪೊಡ್. ಇಲ್ಲಡ್ ಪೊಪ್ಪ ಅಮ್ಮನ್ ತುವೊನುನ ಸಂಸ್ಕಾರನ್ ಬುಲೆಪಾವೊಡ್ ಪಂದ್ ಪಂಡೆರ್.

ಈ ಪೊರ್ತುಡು ಭಜನಾ ಕಮ್ಮಟ ಲೇಸ್ ಡ್ ಮಸ್ತ್ ಜನ ಭಜನಾ ಕಾರ್ಯಕ್ರಮ ಕೊರ್ಪುನಕುಲು ಇತ್ತೆರ್.

ಸೆ.24 : ಅಖಿಲ ಕರ್ನಾಟಕ ರಾಜ ಕೇಸರಿ ಟ್ರಸ್ಟ್(ರಿ) ದಶಮಾನೋತ್ಸವ ನೆಂಪುದ ಲೇಸ್

Sep 23, 2022

ಬೊಲ್ತೇರ್ ತಾಲೂಕ್ ದ ಅಖಿಲ ಕರ್ನಾಟಕ ರಾಜ ಕೇಸರಿ ಟ್ರಸ್ಟ್(ರಿ) ಉಂದೆತ್ತ ದಶಮಾನೋತ್ಸವದ ನೆಂಪುಗಾದ್ ರಾಜ ಕೇಸರಿ ಸಂಘಟನೆದ ಸಂಸ್ಥಾಪಕೆರ್ ದೀಪಕ್ ಜಿ. ಬೊಲ್ತೇರ್ ಮೆರೆನ 525 ನೇ ಸೇವಾ ಯೋಜನೆದ ಲೆಕ್ಕೊಡು 34ನೇ ಇಲ್ಲ್ ಕೊರ್ಪುನ ಲೇಸ್, ವೀಲ್ ಚಯರ್ ಬೊಕ್ಕ ಟೈಲರಿಂಗ್ ಮಿಷನ್ ಕೊರ್ಪುನ ಲೇಸ್ ಸೆ.24 ತಾರೀಕ್ ಸನಿವಾರ ಬಯ್ಯಗ್ 5.30ಕ್ಕ್ ಮಂಜುನಾಥ ಕಲಾಭವನ ಸಂತೆಕಟ್ಟೆಡ್ ನಡಪರೆ ಉಂಡು.

ಅಮ್ಟೂರ್ ಶ್ರೀ ಕ್ಷೇತ್ರ ಮಂತ್ರದೇವತೆ ಸಾನಿಧ್ಯ ಕಟ್ಟೆಮಾರ್ ದ ಆಡಳಿತ ಮುಖ್ಯಸ್ಥೆರ್ ಮನೋಜ್ ಕಟ್ಟೆಮಾರ್ ಮೆರೆನ ಅಶೀರ್ವಾದೊಡು ಬೊಕ್ಕ ಪರಮಪೂಜ್ಯ ವಿನಯ ಗುರೂಜಿ ಗೌರಿಗದ್ದೆ ಮೆರೆನ ಉಪಸ್ಥಿತಿಡ್ ಈ ಲೇಸ್ ನಡಪೆರೆ ಇತ್ತ್‌ದ್ ಮಾತೆರ್ಲಾ ಈ ಕಾರ್ಯಕ್ರಮಗ್ ಬರೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ಉಡುಪಿದ ಸುದ್ದಿ | Udupi News ಕಾರ್ಲದ ಸುದ್ದಿ Karkala News ಕಾಸ್ರೋಡ್ ಸುದ್ದಿ | Kasargod News ಪುತ್ತೂರ್ದ ಸುದ್ದಿ | Puttur News ಬೊಲ್ತೆರ್ ಸುದ್ದಿ | Belthangady News

ಸೆ. 24 ಕ್ಕ್ ಡಾ| ಎಂ.ಎನ್ ರಾಜೇಂದ್ರ ಕುಮಾರ್ ಮೆರೆಗ್ ಅಭಿನಂದನೆ ಲೇಸ್

Sep 23, 2022

ಕುಡ್ಲ: ಡಾ.ಎಂ.ಎನ್. ರಾಜೇಂದ್ರ ಕುಮಾರ್ ಮೇರ್ ಕರ್ನಾಟಕ ರಾಜ್ಯ ಸಹಕಾರ ಮಾರಾಟ ಮಹಾಮಂಡಳ ನಿ. ಬೆಂಗ್ಲೂರ್ ಉಂದೆತ್ತ ಅಧ್ಯಕ್ಷೆರಾದ್, ರಡ್ಡನೆ ಸರ್ತಿ ಆಯ್ಕೆಯಾತಿನವ್ ತುಳುನಾಡ್ ಗ್ ಪರ್ಮೆದ ಸಂಗತಿ. ಅರೆನ ಈ ಸಾಧನೆನ್ ಗುರ್ತಿಸಾದ್ ಜಿಲ್ಲೆದ ಸಹಕಾರಿಲು, ಅಭಿನಂದನೆ ಮಲ್ಪುನ ಬಗೆಟ್ ಸೆ. 24 ಕ್ಕ್ ದಕ್ಷಿಣ ಕನ್ನಡ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್‌ಡ್ ಮಧ್ಯಾಹ್ನ 12 ಗಂಟೆಗ್ ಅಭಿನಂದನಾ ಕಾರ್ಯಕ್ರಮ ನಡಪರೆ ಉಂಡು. ಧರ್ಮಸ್ಥಳದ ಧರ್ಮಾಧಿಕಾರಿ ಡಾ| ಡಿ. ವೀರೇಂದ್ರ ಹೆಗ್ಗಡೆರೆನ ಅಧ್ಯಕ್ಷತೆಡ್ ಈ ಲೇಸ್ ನಡಪರೆ ಉಂಡು ಪಂದ್ ಅಭಿನಂದನಾ ಸಮಿತಿದ ಅಧ್ಯಕ್ಷೆರ್ ಶಶಿ ಕುಮಾರ್ ರೈ ಬಾಳ್ಕೊಟ್ಟು ಸುದ್ದಿ ಗೋಷ್ಠಿಡ್ ತೆರಿಪಾಯೆರ್.

ಕರ್ನಾಟಕ ರಾಜ್ಯ ಸಹಕಾರ ಮಾರಾಟ ಮಹಾಮಂಡಳ ನಿ., ಬೆಂಗ್ಲೂರ್ ಉಂದೆತ್ತ ಇತಿಹಾಸಡ್ 1945 ನೆಡ್ದ್ ಬೊಕ್ಕ ತುಳುನಾಡ್ ನ್ ಪ್ರತಿನಿಧಿಸಾಯಿನ ಸುರುತ್ತ ಅಧ್ಯಕ್ಷೆರಾದ್ 2017ಟ್ ಆಯ್ಕೆ ಆದಿತ್ತ್ ದ್ ಡಾ. ಎಂ.ಎನ್. ರಾಜೇಂದ್ರ ಕುಮಾರ್, ಇತ್ತೆ ರಡ್ಡನೇ ಸರ್ತಿ ಈ ಪ್ರತಿಷ್ಠಿತ ಸಂಸ್ಥೆದ ಅಧ್ಯಕ್ಷೆರಾದ್ ಆಯ್ಕೆ ಆತಿನ ಮುಖೇನ ಪರಪೋಕ್ ನ್ ನಿರ್ಮಿಸಾದೆರ್ ಪಂದ್ ಪಂಡೆರ್.

ಈ ಲೇಸ್ ದ ಅಧ್ಯಕ್ಷತೆನ್ ಶ್ರೀ ಕ್ಷೇತ್ರ ಧರ್ಮಸ್ಥಳದ ಧರ್ಮಾಧಿಕಾರಿಲು, ರಾಜ್ಯಸಭಾ ಸದಸ್ಯೆರ್ ರಾಜರ್ಷಿ ಡಾ.ಡಿ. ವೀರೇಂದ್ರ ಹೆಗ್ಗಡೆರ್ ವಹಿಸೊನ್ಯರ ಉಲ್ಲೆರ್. ಲೇಸ್ ಡ್ ‘ಜಾಗತಿಕ ಬಂಟರ ಒಕ್ಕೂಟ ಲಿ. ಕುಡ್ಲ ಉಂದೆತ್ತ ಅಧ್ಯಕ್ಷೆರ್ ಐಕಳ ಹರೀಶ್ ಶೆಟ್ಟಿ ಮೇರ್ ಆಭಿನಂದನಾ ಭಾಷಣ ಮಲ್ಪರೆ ಉಲ್ಲೆರ್. ಕುಡ್ಲ ದಕ್ಷಿಣ ವಿಧಾನಸಭಾ ಕ್ಷೇತ್ರದ ಶಾಸಕೆರ್ ಡಿ.ವೇದವ್ಯಾಸ ಕಾಮತ್ ಎಡ್ಡೆಪ್ಪುನು ಬಯಕ್ಯೆರ ಉಲ್ಲೆರ್. ಮಲ್ಲ ಬಿನ್ನೆರಾದ್ ಅದಾನಿ ಗ್ರೂಪ್‌ದ ಸೌತ್ ಇಂಡಿಯಾ ಅದ್ಯಕ್ಷೆರ್ ಕಿಶೋರ್ ಆಳ್ವ ಅಂಚನೆ ಕರ್ನಾಟಕ ರಾಜ್ಯ ಸಹಕಾರ ಮಾರಾಟ ಮಹಾಮಂಡಳದ ನಿರ್ದೇಶಕೆರ್ ಐಕಳಬಾವ ದೇವಿಪ್ರಸಾದ್ ಶೆಟ್ಟಿ ಬೆಳಪು ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಶಶಿ ಕುಮಾರ್ ತೆರಿಪಾಯೆರ್.

ಎದ್ಕೊನುನ ಲೇಸ್
ಡಾ| ಎಂ.ಎನ್. ರಾಜೇಂದ್ರ ಕುಮಾರ್ ಮೇರ್ ಕರ್ನಾಟಕ ರಾಜ್ಯ ಸಹಕಾರ ಮಾರಾಟ ಮಹಾಮಂಡಳದ ಅಧ್ಯಕ್ಷೆರಾದ್ ಅಧಿಕಾರ ಸ್ವೀಕಾರ ಮಲ್ತಿ ಬೊಕ್ಕ ಕುಡ್ಲಗ್ ಸೆ.24 ಕ್ಕ್ ಕಾಂಡೆ 10.30ಗ್ ಬರೊಂದಿಪ್ಪುನ ಪೊರ್ತುಡು ಮೇರೆನ್ ಜಿಲ್ಲೆದ ಸಮಸ್ತ ಸಹಕಾರಿಲು ಕುಡ್ಲ ವಿಮಾನ ನಿಲ್ದಾಣಡ್ ಎದ್ಕೊನ್ಯರೆ ಉಂಡು ಪಂದ್ ಐಕಳಬಾವ ದೇವಿಪ್ರಸಾದ್ ಶೆಟ್ಟಿ ಬೆಳಪು ತೆರಿಪಾಯೆರ್.

ಸುದ್ದಿಗೋಷ್ಟಿಡ್ ಅಭಿನಂದನಾ ಸಮಿತಿದ ಕಾರ್ಯಾಧ್ಯಕ್ಷೆರ್ ಭಾಸ್ಕರ ಎಸ್ ಕೊಟ್ಯಾನ್, ಪ್ರಧಾನ ಕಾರ್ಯದರ್ಶಿ ರಾಜು ಪೂಜಾರಿ ಅಂಚನೆ ಬ್ಯಾಂಕ್ ದ ನಿರ್ದೇಶಕೆರ್ ಜಯರಾಮ ರೈ, ವಿನಯ ಕುಮಾರ್ ಸೂರಿಂಜೆ, ವಾದಿರಾಜ ಶೆಟ್ಟಿ, ಜಯರಾಜ ರೈ, ಸದಾಶಿವ ಉಳ್ಳಾಲ, ಸ್ಕ್ಯಾಡ್ಸ್ ಅಧ್ಯಕ್ಷೆರ್ ರವೀಂದ್ರ ಕಂಬಳಿ, ಎಸ್ ಸಿ ಡಿ ಸಿ ಸಿ ಬ್ಯಾಂಕ್ ದ ವ್ಯವಸ್ಥಾಪಕ ನಿರ್ದೇಶಕೆರ್ ಗೋಪಾಲ ಕೃಷ್ಣ ಭಟ್ ಇತ್ತೆರ್.

ಉಜಿರೆ: ಆಸಿಗೆದ ಅಂಗಡಿಡ್ ತೂ

Sep 20, 2022

ಉಜಿರೆ: ಪರ್‍ತಿದ ಆಸಿಗೆದ ಅಂಗಡಿದ ಮಿತ್ತ್ ಶಾರ್ಟ್ ಸರ್ಕ್ಯೂಟ್ ರ್‍ದಾವರ ತೂ ಪೊತ್ತಿನ ಘಟನೆ ಬೊಲ್ತೇರ್ ತಾಲೂಕ್‌ದ ಉಜಿರೆ ಶ್ರೀ ಜನಾರ್ಧನ ದೇವಲ್ಯದ ದ್ವಾರದ ಕೈತಲ್ ಇನಿ ನಡತ್ಂಡ್.

ಅಯಿತ್ತ ಬರಿಟ್ಟೆ ಇಪ್ಪುನ ಅಂಗಡಿಗ್‌ಲ ತೂ ಪತ್ ದ್ಂಡ್. ಈ ಘಟನೆಡ್ದಾವರ ಟ್ರಾಫಿಕ್ ಜಾಮ್‌ಲ ಆತ್ಂಡ್. ಜನಕುಲು ನೀರ್ ಪಾಡ್ದ್ ತೂ ತೆಕ್ಕಾಯರೆ ಪ್ರಯತ್ನ ಮಲ್ತ್‌ದೆರ್.

ಅಂಚನೆ ಅಗ್ನಿಶಾಮಕ ದಳತ್ತಕುಲು ಜಾಗೆಗ್ ಬತ್ತ್‌ದ್ ತೂ ತೆಕ್ಕಾದೆರ್. ಘಟನೆ ಆಯಿನ ಜಾಗೆಗ್ ಪೊಲೀಸೆರ್, ಪಿಡಿಓ ನಕುಲು ಬತ್ತ್‌ದ್ ಪರಿಶೀಲನೆ ಮಲ್ತ್‌ದೆರ್.

ಧರ್ಮಸ್ಥಳ : ಭಜನಾ ಕಮ್ಮಟಡ್ ಭಜನೆ ಕಲ್ಪಾವುನ ಕಜ್ಜಕೊಟ್ಯ

Sep 19, 2022

ಶ್ರೀ ಕ್ಷೇತ್ರ ಧರ್ಮಸ್ಥಳದ ಧರ್ಮಾಧಿಕಾರಿಲಾಯಿನ ಡಾ|| ಡಿ ವೀರೇಂದ್ರ ಹೆಗ್ಗೆಡೆ ಮೆರೆನ ಮಾರ್ಗದರ್ಶನಡ್ ಸೆ. 16ರ್ದ್ 24ನೇ ವರ್ಸೊದ ಭಜನಾ ಕಮ್ಮಟ ಕಲ್ಪಾವುನ ಮಹೋತ್ಸವ ಸಭಾ ಭವನಡ್ ನಡತೊಂದುಂಡು.

ಈ ವರ್ಷ 173 ಭಜನಾ ಮಂಡಳಿರ್ದ್ 322 ಕಲ್ಪಾರ್ತಿಲು ಭಜನೆಡ್ ಪಾಲ್ ಪಡೆಯೊಂದುಲ್ಲೆರ್. ವಿಸೇಸವಾದ್ 138 ಪೊಂಜೋವು ಕಲ್ಪಾರ್ತಿಲು ಪಾಲ್ ಪಡೆತೆರ್. ಇನಿ ಭಜನಾ ಕಮ್ಮಟದ ಮೂಜನೇ ದಿನೊ ಸುರುತ್ತ ಸರ್ತಿ ಭಜನಾ ತರಬೇತಿಡ್ ಡೋಲಕ್, ಕೀ ಬೋರ್ಡ್‌ಲೆನ್ ಗಲಸ್ ದೆರ್.