Sun. Nov 22nd, 2026

ಕಾರ್ಲದ ಸುದ್ದಿ Karkala News

ಕುಡ್ಲ ನಗರ ಪೊಲೀಸ್ ಕಮಿಷನರೇಟ್ ವ್ಯಾಪ್ತಿಡ್ ಸೆ.144 ಜಾರಿ

ಕುಡ್ಲ , ಎ.22: ಕೊರೋನ ಸೋಂಕು ಪರಡುನೆನ್ ಉಂತಾವುನ ಸಲುವಾದ್ ಅಂಚನೇ ಸಾರ್ವಜನಿಕೆರ್ನ ಆರೋಗ್ಯದ ಹಿತದೃಷ್ಟಿರ್ದ್ ರಾಜ್ಯ ಸರಕಾರ ಕೊರಿನ ಆದೇಶಗ್ ಪೂರಕವಾದ್ ಕುಡ್ಲ ನಗರ ಪೊಲೀಸ್ ಕಮಿಷನರೇಟ್ ವ್ಯಾಪ್ತಿಡ್ ಸೆ.144 ಜಾರಿ ಮಲ್ಪೊಡು ಪಂದ್ ಪೊಲೀಸ್ ಕಮಿಷನರ್ ಶಶಿಕುಮಾರ್ ಆದೇಶ ಕೊರ್ತೆರ್ .

ಎ.21ರ್ದ್ ರಾತ್ರಿ 9 ಗಂಟೆರ್ದ್ ಮೇ 4 ಮುಟ ಪಂಡ ನನ ದುಂಬುದ ರಡ್ಡ್ ವಾರ ಪ್ರತಿ ದಿನ ರಾತ್ರಿ 9 ಗಂಟೆರ್ದ್ ಕಾಂಡೆ 6ಗಂಟೆ ಮುಟ ರಾತ್ರಿ ನಿಷೇಧಾಜ್ಞೆನ್ ಅಂಚನೇ ಪ್ರತಿ ಶುಕ್ರವಾರ ರಾತ್ರಿ 9 ಗಂಟೆರ್ದ್ ಸೋಮವಾರ ಕಾಂಡೆ 6 ಗಂಟೆ ವಾರಂತ್ಯದ ಸಂಪೂರ್ಣ ನಿಷೇಧಾಜ್ಞೆ ಪಾಡ್ದೆರ್ .

ಮೀರಾ ರೋಡ್ ಶ್ರೀ ಶನೀಶ್ವರ ಮಂದಿರಡ್ ವಿಶೇಷ ಪೂಜೆ

ಮುಂಬಯಿ, ಎಪ್ರಿಲ್ 22:ಮೀರಾ ರೋಡ್ ಶ್ರೀ ಶನೀಶ್ವರ ಮಂದಿರಡ್ ಶನಿವಾರದ ಶನೀಶ್ವರ ಗ್ರಂಥ ಪಾರಾಯಣ ಬೊಕ್ಕ ಶ್ರೀ ಶನೀಶ್ವರ ಭಜನಾ ಸಮಿತಿದಕ್ಲೆನ ಭಜನೆ ಬೊಕ್ಕ ವಿಶೇಷ ಪೂಜೆಡ್ ಪಾಲ್ ಪಡೆಯಿನ ಪುಗಾರ್ತೆದ ಪ್ರವಚನಕಾರೆರಾಯಿನ ಭಗ್ವತ್ಚಾರ್ಯ ದಿಲೀಪ್ ಮಿಶ್ರಮೆರೆನ್ ಮಂದಿರದ ವತಿರ್ದ್ ಗೌರವ ಗುರ್ಕಾರ್ಲಾಯಿನ ವಿನೋದ್ ವಾಘಷಿ ಮೇರ್ ಧಾರ್ಮಿಕ ಗೌರವಾರ್ಪಣೆನ್ ಮಲ್ತೆರ್.

ಈ ಪೊರ್ತುಡು ಪುಟ್ಟು ಪರ್ಬನ್ ಮಂದಿರಡ್ ಆಚರಣೆ ಮಲ್ತಿನ ಸಮಿತಿದ ಸಕ್ರಿಯ ಕಾರ್ಯಕರ್ತೆ ಕುಮಾರಿ ಪ್ರಜ್ಞಾ ಡಿ. ಶೆಟ್ಟಿಗಾರ್ ಮೆರೆಗ್ ಮಾನಾದಿಗೆ ಮಲ್ತೆರ್.ಈ ಧಾರ್ಮಿಕ ಲೇಸ್ ಡ್ ಒತ್ತುಗುರ್ಕಾರ್ಲಾಯಿನ ಗುಣಕಾಂತ್ ಶೆಟ್ಟಿ ಕರ್ಜೆ, ಕೋಶಾಧಿಕಾರಿ ಅಚ್ಚುತಾ ಕೋಟ್ಯಾನ್ ‌, ಪೂಜಾ ಸಮಿತಿದ ಭುವಜಿ ನಾರಾಯಣ ಶೆಟ್ಟಿ,ಜತೆ ಕೋಶಾಧಿಕಾರಿ ಜಯಕರ್ ಶೆಟ್ಟಿ. ಮುದ್ರಾಡಿ,ಉಷಾ ದಿನೇಶ್ ಶೆಟ್ಟಿ ಗಾರ್, ಶಕುಂತಲಾ ಶೆಟ್ಟಿ, ಕಸ್ತೂರಿ ಶೆಟ್ಟಿ, ವಿನಯ ಹರೀಶ್ ಶೆಟ್ಟಿ,ಕಾವ್ಯ ಶೆಟ್ಟಿಗಾರ್, ಜಯೇಶ್ ಸುವರ್ಣ,ಶ್ರೇಯಶ್ ಬೊಕ್ಕ ಅರ್ಚಕೆರಾಯಿನ ನಿರಾವ್ ಪಾಲ್ ಪಡೆದಿತ್ತೆರ್.ಕಾರ್ಕಳ ಸದಾನಂದ್ ಪೂಜಾರಿ ಲೇಸ್ ದ ನಿರೂಪಣೆ ಬೊಕ್ಕ ಸೊಲ್ಮೆ ಸಂದೈತ ಮಲ್ತೆರ್.

ಅಮೆರಿಕೊಡು ತುಳುವೆರ್ನ ಕೂಟ “ಆಟ’ ಉದಿಪನ : ಬಿಸು ಪರ್ಬದಾನಿ ಬೆಳಗ್ಂಡ್ “ಅಖಿಲ ಅಮೆರಿಕದ ತುಳುವೆರೆ ಅಂಗಣ’

ಫ್ಲೋರಿಡಾ(ಅಮೆರಿಕ): “ಅಮೆರಿಕನ್ ಡ್ರೀಮ್’ ಪನ್ಪಿನ “ಕನ’ ಒಂಜೆನ್ ಉಡಲ್ಡ್ ದಿಂಜಾವೊಂದು ಬತ್ತ್‌ದ್, ಬಡಕಾಯಿದ ಅಮೆರಿಕೊಡು ಅಂಚೆನೇ ಕೆನಡಾ ದೇಶೊಲೆಡ್ ಬೇತೆ ಬೇತೆ ಕಡೆಟ್ ಉಪ್ಪುನಂಚಿನ ತುಳು ಬಾಂಧವೆರ್, ಏಪ್ರಿಲ್ ೧೪ ಬುಧಾರ ತುಳುನಾಡ್ದ ಪೊಸ ವರ್ಸದ ಬಿಸು ಪರ್ಬದಾನಿ, ಆಲ್ ಅಮೆರಿಕ ತುಳು ಅಸೋಸಿಯೇಶನ್(ಆಟ) ಪನ್ಪಿನ ಸಂಘಟನೆದ ಉದಿಪನ ಲೇಸ್ಅಂತರ್ಜಾಲೊಡು ನಡತ್ಂಡ್.

 

ಅಮೆರಿಕೊಡು ನಿಲೆ ಊರ್‍ದಿನ ದುಂಬುದ ಪೀಳಿಗೆಗ್ಲ ತುಳು ಬಾಸೆ, ಸಂಸ್ಕೃತಿ ಅಂಚೆನೆ ಪರಂಪರೆದ ಪೊಲಬು, ಅಭಿಮಾನನ್ ಒರಿಪಾದ್ ಬುಲೆಪಾವುನಂಚಿನ ಎಡ್ಡೆ ಉದ್ದೇಶೊಡು ಉದಿತಿನ ಸಂಘಟನೆನೇ “ಅಖಿಲ ಅಮೆರಿಕಾದ ತುಳುವೆರೆ ಅಂಗಣ’.ಕೋವಿಡ್ ಕಾರಣೊಡು ಝೂಮ್‌ಡ್ ವರ್ಚುವಲ್ ಆದ್ ನಡತಿನಂಚಿನ ಈ ಲೇಸ್‌ಡ್ ಸಂಘದ ಸಂಸ್ಥಾಪನಾ ಕಾಲಾದಿಗ್ (ರಡ್ಡ್ ವರ್ಸ) ನೇಮಕ ಆಯಿನ ಕಾರ್ಯಕಾರಿ ಸಮಿತಿದ ಪದುಕೆರ್, ಅಂಚೆನೆ ಅಕ್ಲೆನ ಕುಟುಮದಕುಲು ಅತ್ತಾಂದೆ ನಿರ್ದೇಶಕ ಮಂಡೊಳಿದ ಸದಸ್ಯೆರ್, ಪ್ರಾದೇಶಿಕ ರಾಯಭಾರಿನಕುಲು, ಸಲಹಾ ಸಮಿತಿದ ಸದಸ್ಯೆರ್ ಮಾತ ಅಕಲ್ನಕ್ಲೆನ ಇಲ್ಲದ ಚಾವಡಿರ್ದೇ ದೇವೆರೆಗ್ ತುಡರ್ ಅರ್‍ಲಾದ್ ತುಳು ಬಾಸೆ, ಸಂಸ್ಕೃತಿನ್ ಬುಲೆಪಾವುನಂಚಿನ ಎಡ್ಡೆ ಉದ್ದೇಶೊನ್ ದೀವೊಂದಿನ “ಆಟ’ದ ಉದಿಪನೆಗ್ ಸಾಕ್ಷಿ ಆಯೆರ್.ಪೊಸ ಕೂಟದ ಪದಾಧಿಕಾರಿನಕುಲು ಇಂಚ ಉಲ್ಲೆರ್.ಆಟ ಸಂಘಟನೆದ ಸುರುತ್ತ ರಡ್ಡ್ ವರ್ಸೊದ ಅವಧಿಗ್ ಗುರ್ಕಾರೆರಾದ್ ಭಾಸ್ಕರ್ ಶೇರಿಗಾರ್(ಬೋಸ್ಟನ್), ಒತ್ತು ಗುರ್ಕಾರೆರಾದ್ ಶಿರೀಶ್ ಶೆಟ್ಟಿ (ಅಟ್ಲಾಂಟ), ಕಾರ್ಯಂತೆರ್ ಆದ್ ಪ್ರಕಾಶ್ ಉಡುಪ (ಆಸ್ಟಿನ್), ಒತ್ತು ಕಾರ್ಯಂತೆರ್ ಆದ್ ಪೂಜಾ ಶೆಟ್ಟಿ (ಬೋಸ್ಟನ್), ಪಣವುದ ಗುರ್ಕಾರೆರಾದ್ ಸುಭಾಷ್ ಶೆಟ್ಟಿ (ಕ್ಯಾಲಿಫೋರ್ನಿಯ), ಒತ್ತು ಪಣವುದ ಗುರ್ಕಾರೆರಾದ್ ಫೆಡ್ರಿಕ್ ಫೆರ್ನಾಂಡಿಸ್ (ಬೋಸ್ಟನ್), ಅಂಚೆನೆ ನಿರ್ದೇಶಕ ಮಂಡೊಳಿದ ಗುರ್ಕಾರೆರಾದ್ ಶ್ರೀಧರ್ ಆಳ್ವ (ಕ್ಯಾಲಿಫೋರ್ನಿಯ) ಆಯ್ಕೆ ಆಯೆರ್.
ನಿರ್ದೇಶಕ ಮಂಡೊಳಿದ ಸದಸ್ಯೆರಾದ್ ಅಜಿತ್ ಭಾಸ್ಕರ ಶೆಟ್ಟಿ (ನ್ಯೂಯಾರ್ಕ್), ಡಾ. ಕೆ.ಪಿ.ಮೋಹನ್ ಚಂದ್ರ (ಕ್ಯಾಲಿಫೋರ್ನಿಯ), ಪ್ರಶಾಂತ್ ಕುಮಾರ್ (ಮಿಚಿಗನ್), ಪ್ರೀತಿ ಶೆಟ್ಟಿ (ಮಿನಿಯಪೊಲಿಸ್), ಡಾ. ರಾತ್ನಾಕರ ಶೇರಿಗಾರ್(ವರ್ಜೀನಿಯ), ಶ್ರೀವತ್ಸ ಬಲ್ಲಾಳ್(ಫಿಲಡೆಲ್ಫಿಯಾ), ಡಾ.ಸುಧಾಕರ್ ರಾವ್(ಬೋಸ್ಟನ್), ಅಂಚೆನೆ ಉಮೇಶ್ ಅಸೈಗೋಳಿ(ನಾರ್ತ್ ಕರೋಲಿನಾ) ಮೊಕುಲು ಈ ಸಂಘಟನೆದ ಬುಲೆಚ್ಚಿಲ್‌ಗ್ ಸೇವೆ ಮಲ್ಪರೆ ಉಲ್ಲೆರ್.ಸಲಹಾ ಸಮಿತಿ ಸದಸ್ಯೆರಾದ್ ಡಾ.ಭೀಮ್ ಭಟ್ (ಫಿಲಡೆಲ್ಫಿಯಾ), ಡಾ. ಗುರುಪ್ರಸಾದ್(ಫ್ಲೋರಿಡಾ), ಶ್ರೀಶ ಜಯಸೀತಾರಾಮ್ (ಚಿಕಾಗೊ), ಶ್ರೀವತ್ಸ ಜೋಶಿ(ವರ್ಜೀನಿಯಾ) ಬೊಕ್ಕ ಸುಧೀರ್ ಪ್ರಭು(ಬೋಸ್ಟನ್). ಪ್ರಾದೇಶಿಕ ರಾಯಭಾರಿ ಆದ್ ಅನಿತಾ ನಾಯಕ್, ಅಖಿಲ್ ಡಿಸೋಜಾ, ಕುಮಾರ್ ಶೆಟ್ಟಿ, ಪವಿತ್ರ ಶೆಟ್ಟಿ, ಪ್ರಜ್ವಲ್ ಶೆಟ್ಟಿ, ಪ್ರಸನ್ನ ಲಕ್ಷ್ಮಣ್, ರಿತೇಶ್ ಶೆಟ್ಟಿ, ಸಂತೋಷ್ ಶೆಟ್ಟಿ, ಶ್ರೀವಲ್ಲಿ ರೈ, ಸಿದ್ಧಾರ್ಥ ಶೆಟ್ಟಿ ಬೊಕ್ಕ ಉಮಾಶಂಕರ್ ಕಡಂಬಾರ್ ನೇಮಕ ಆತೆರ್.
ಇಡೀ ಲೋಕೊನೆ ಕಷ್ಟೊಡು ಉಪ್ಪುನಂಚಿನ ಈ ಸಮಯೊಡು ಒಂಜಿ ಬಾಸೆ, ಸಂಸ್ಕೃತಿದ ಭೌಗೋಳಿಕ ಮೂಲದ ಜನೊಕ್ಲೆನ್ ಪೂರ ಒಟ್ಟು ಮಲ್ತ್‌ದ್ ಒಂಜಾದ್ ತುಳುನಾಡ್ದ ಪೆರ್ಮೆನ್ ಒರಿಪಾವರೆ ದೂರದ ಊರಾಯಿನ ಅಮೆರಿಕೊಡು ಕೆಲಸ ಮಲ್ಪರೆ ದುಂಬು ಬತ್ತಿನ ಗುರ್ಕಾರೆ ಭಾಸ್ಕರ್ ಶೇರಿಗಾರ್ ಮೆರೆನ ದೂರದರ್ಶಿತ್ವ, ಬೊಕ್ಕ ಕಲ್ಪನೆನೇ ಆಟದ ಉದಿಪನೆಗ್ ಕಾರಣ.ಉಂದೆಕ್ಕ್ ಕಾರ್ಯಕಾರಿ ಸಮಿತಿದ ನಿರ್ದೇಶಕ ಮಂಡೊಳಿದ, ಪ್ರಾದೇಶಿಕ ರಾಯಭಾರಿನಕ್ಲೆನ, ಸಲಹಾ ಸಮಿತಿದ ಸದಸ್ಯೆರೆನ ಬೆರಿಸಾಯ, ಸಹಕಾರ ಉಂಡು. ಅಮೆರಿಕೊಡು, ಅತ್ತ್ಂಡ ಪರ ಊರುಡ್ ಪುಟ್ಟುದ್ ಬುಲೆಪುನ, ತುಳು ಅಪ್ಪೆ ಜೋಕುಲೆಗ್ ಆಯಿನಾತ್ ತುಳು ಬಾಸೆಡೆ ಪಾತೆರಿಯರೆ ಉಮೇದು ಕೊರ್ಪುನ ಮೂಲ ಉದ್ದೇಸೊನು ದೀವೊಂದು, ತುಳು ಸಂಸ್ಕೃತಿ ಬೊಕ್ಕ ಓದುನ ಬರೆಪಿನ ಆಸಕ್ತಿ
ಬುಲೆಪಾವುನ ವಿಚಾರೊಡು ಮಸ್ತ್ ಕಜ್ಜೊಲೆನ್ ಮಲ್ಪುನ ಉದ್ದೇಶೊನ್ ಸಂಘದ ಸದಸ್ಯೆರ್ ಪಾಡೊಂದೆರ್ ಪನ್ಪಿನವು ಉದಿಪನದ ಬಯ್ಯದ “ಪಟ್ಟಾಂಗ’ದ ಪೊರ್ತುಡು ಗೊತ್ತಾಂಡ್. ಬರ್ಪುನ ದಿನಕಲೆಡ್ ಅಮೆರಿಕದೊರ್ಮೆ ಉಪ್ಪುನ ತುಳು ಮೂಲದಕ್ಲೆನ್ “ಆಟ’ ಸಂಸ್ಥೆದ ಸದಸ್ಯತ್ವ ದೆತೊನಿಯರೆ ಪ್ರೋತ್ಸಾಹ ಮಲ್ತ್‌ದ್ ಸಂಘದ ಮೂಲ ಉದ್ದೇಶೊನು ನೆರವೇರಿಸಾವುನಂಚಿ ಗಮನ ಕೊರಿಯರೆ ನಿರ್ದಾರ ಮಲ್ತ್ಂಡ್.

ವರದಿ: ಶ್ರೀವಲ್ಲಿ ರೈ, ಫ್ಲೋರಿಡಾ, ಯುಎಸ್‌ಎ

ರಾಜ್ಯ ಸರ್ಕಾರರ್ದ್ ಮದಿಮೆಗ್ ಪೊಸ ಕೋವಿಡ್ ಮಾರ್ಗಸೂಚಿ ಪ್ರಕಟ

ಕುಡ್ಲ, ಎಪ್ರಿಲ್ 21 :ಕುಡ್ಲಡ್ ದ.ಕ ಜಿಲ್ಲಾಧಿಕಾರಿ ಡಾ.ಕೆ.ವಿ.ರಾಜೇಂದ್ರ ಬೊಕ್ಕ ಕಮಿಷನರ್ ಶಶಿಕುಮಾರ್ ಜಂಟಿ ಸುದ್ದಿಗೋಷ್ಠಿ ನಡಪಾಯೆರ್ ಈ ಬಗ್ಗೆ ಮಾಹಿತಿಲಾ ಕೊರಿಯೆರ್ .

ವೀಕೆಂಡ್ ಕರ್ಪ್ಯೂ ಪೊರ್ತುಡು ನಿಗದಿಯಾಯಿನ ಮದಿಮೆ ಮಲ್ಪರೆ ಅನುಮತಿ ಉಂಡು.ಆಂಡ ಕಾಲಿ 50 ಜನಕುಲು ಮಾತ್ರ ಪಾಲ್ ಪಡೆಯರೆ ಅವಕಾಶ ನೆಕ್ಕದ್ ಮದಿಮೆದ ಇಲ್ಲದಕುಲು ಸುರುಕ್ಕೆ 50 ಜನಕ್ಲೆನ ಪಟ್ಟಿ ತಯಾರ್ ಮಲ್ತ್ ದ್ ಆ ಪಟ್ಟಿನ್ ಕೈತಲ್ ದ ಆಡಳಿತಗ್ ತೋಜಾದ್ ಅನುಮತಿ ದೆತೊನೊಡು .

ಐರ್ದ್ ಬೊಕ್ಕ ಆ 50 ಜನಕ್ಲೆನ ಅನುಮತಿ ಪಡೆಯಿನ ಪತ್ರ ಬೊಕ್ಕ ಮದಿಮೆದ ಕಾಕಜಿ ಅಂಚನೇ ಮದಿಮೆಗ್ ಪೋಪಿನಕ್ಲೆನ ಐಡಿ ಕಾರ್ಡ್ ಕಡ್ಡಾಯವಾದ್ ಉಪ್ಪೊಡು , ಈ ಮೂಜಿ ದಾಖಲೆನ್ ವಾಟ್ಸ್ ಅಪ್ ಮುಖೇನ ಪೊಲೀಸ್ ದಕ್ಲೆಗ್ ತೋಜಾದ್ ಪ್ರಯಾಣ ಮಲ್ಪೋಲಿ. ಆಂಡ ಮದಿಮೆದ ಕಾಕಜಿದ ನೈಜ ಪ್ರತಿ ಪ್ರಯಾಣದ ಪೊರ್ತುಡು ಕೈಟ್ ಉಪ್ಪೊಡು.ಮದಿಮೆಗ್ ಪೋಪಿನ ಗಾಡಿಡ್ ಏಳೆರ್ದ್ ಜನಕ್ಲೆನ್ ಅವಕಾಶ ಇಜ್ಜಿ. ಇತ್ತೇ ಮಲ್ದಿನ ನಿಯಮದ ಪ್ರಕಾರ ದೇವಸ್ಥಾನಡ್ ಮದಿಮೆಗ್ ಅನುಮತಿ ಕೊರ್ತೆರ್ . ದೇವಸ್ಥಾನಡ್ ಮದಿಮೆ ನಡಪುನಾನ್ಡ 50 ಜನಕ್ಲೆಗ್ ಮಾತ್ರ ಅವಕಾಶ. ಮದಿಮೆ ಫೋಟೋಗ್ರಾಫರ್ಸ್, ಅರ್ಚಕೆರ್ ಮಾತಾ ಈ 50 ಜನತ ಲಿಸ್ಟ್ ಡೇ ಬರ್ಪೆರ್.

ದೇವಸ್ಥಾನದ ಧಾರ್ಮಿಕ ಕಾರ್ಯಲೆನ್ ಅರ್ಚಕೆರ್ ಮಾತ್ರ ಮಲ್ಪೊಡು . ಆಂಡ ಒವ್ವೆ ಸಾರ್ವಜನಿಕೆರ್ ಈ ಆಚರಣೆಡ್ ಪಾಲ್ ಪಡೆಯರೆ ಅವಕಾಶ ಇಜ್ಜಿ . ಈ ಆದೇಶ ಇನಿರ್ದೇ ಜಿಲ್ಲೆದ ದೇವಸ್ಥಾನಡ್ ಜಾರಿಗ್ ಬರ್ರೆ ಉಂಡು.

ಸುಳ್ಯ ತಾಲೂಕು 2ನೇ ತುಳು ಸಾಹಿತ್ಯ ಸಮ್ಮೇಳನ ಬೊಕ್ಕ ಕೃಷಿ ಮೇಳ

ಸುಳ್ಯ, ಎಪ್ರಿಲ್ 21: ಸುಳ್ಯ ತಾಲೂಕು ೨ನೇ ತುಳು ಸಾಹಿತ್ಯ ಸಮ್ಮೇಳನ ಬೊಕ್ಕ ಕೃಷಿ ಮೇಳ ಎ. ೧೯ ತಾರೀಖ್ ಗ್ ಕಳಂಜ ಬಾಳಿಲ ಪ್ರಾ.ಕೃ.ಪ.ಸ.ಸಂಘ ಕೋಟೆಮುಂಡುಗಾರ್ದ ಬಜನಿ ದಿ| ರಾಮಯ್ಯ ರೈ ಸಭಾಂಗಣಡ್ ದಿ. ಕೋಟೆ ವಸಂತಕುಮಾರ್ ಮತ್ತರ್ಮೆಡ್ ನಡತುಂಡು ಅಂಚನೇ ಅವ್ವೆ ದಿನ ಬೈಯ್ಯ ಮುಗಿತಲದ ಲೇಸ್ ಲ ನಡತ್oಡ್.

ಒಡಿಯೂರು ಸಂಸ್ಥಾನದ ಶ್ರೀ ಶ್ರೀ ಗುರುದೇವಾನಂದ ಸ್ವಾಮೀಜಿ ಆಶೀವರ್ಚನ ಕೊರಿಯೆರ್ . ಲೇಸ್ ದ ಗುರ್ಕಾರ್ಮೆನ್ ನಿಂತಿಕಲ್ಲು ಕೆ.ಎಸ್.ಜಿ.ಪಿ.ಯು.ಕಾಲೇಜ್ ದ ಪ್ರಾoಶುಪಾಲೆರಾಯಿನ ಸದಾನಂದ ರೈ ಕೂವೆಂಜ ವಯಿಸ್ದಿತ್ತೆರ್. ಸಭೆತ ಗುರ್ಕಾರ್ಮೆನ್ ಒಡಿಯೂರು ಶ್ರೀಲೆನ ಷಷ್ಟ್ಯಬ್ದ ಸಮತಿದ ಗುರ್ಕಾರ್ಲಾಯಿನ ವಿಶ್ವನಾಥ ರೈ ಕಳಂಜ, ಕುಕ್ಕೆಶ್ರೀ ಸುಬ್ರಹ್ಮಣ್ಯ ದೇವಸ್ಥಾನದ ಮಾಜಿ ಗುರ್ಕಾರ್ಲಾಯಿನ ನಿತ್ಯಾನಂದ ಮುಂಡೋಡಿ, ತುಳು ಸಮ್ಮೇಳನ ಸಮಿತಿದ ಗುರ್ಕಾರ್ಲಾಯಿನ ಸುಭಾಶ್ಚಂದ್ರ ರೈ, ಕಳಂಜ ಬಾಳಿಲ ಪ್ರಾ.ಕೃ.ಪ.ಸ.ಸಂಘದ ಗುರ್ಕಾರ್ಲಾಯಿನ ಕೂಸಪ್ಪ ಗೌಡ, ಜೈ ಗುರುದೇವ ಸೇವಾ ಬಳಗ ಸುಳ್ಯ ನೆತ್ತ ಗುರ್ಕಾರ್ಲಾಯಿನ ರಾಧಾಕೃಷ್ಣ ಪಕಳ, ಪತಂಜಲಿ ಯೋಗ ಸಮಿತಿ ಕುಡ್ಲ ನೆತ್ತ ಯೋಗ ಶಿಕ್ಷಕಿ ಸರಸ್ವತಿ, ಸಮಿತಿದ ಖಜಾಂಜಿ ಕರುಣಾಕರ ಪುಷರಾಜ್ ಗಾಂಬೀರ್ ಪಾಲ್ ಪಡೆದಿತ್ತೆರ್.
ಗೀತಾ ಬೊಕ್ಕ ಪ್ರೇಮಾವತಿ ಪ್ರಾರ್ಥನೆ ಮಲ್ತೆರ್ . ಕೂಸಪ್ಪ ಗೌಡ ಎದುಕೊಂಡೆರ್ . ಭಾಸ್ಕರ ಶೇಣಿ ಸೊಲ್ಮೆ ಸಂದೈತ ಮಲ್ತೆರ್ . ಪ್ರದೀಪ್ ಕುಮಾರ್ ಪನ್ನೆ ಲೇಸ್ ನಡಪಾದ್ ಕೊರಿಯೆರ್..

ಸಮ್ಮೇಳನಡ್ ೧೬ ಜನ ಬೇತೆ ಬೇತೆ ಕ್ಷೇತ್ರದ ಸಾಧಕೆರೆಗ್ ಮನಾದಿಗೆ ಮಲ್ತೆರ್. ಕೃಷಿ ಕ್ಷೇತ್ರಡ್ ವೆಂಕಟ್ರಮಣ ಭಟ್ ಪವನ ಮುಂಡುಗಾರು, ಯಕ್ಷಗಾನಡ್ ಕೋಡ ಗಣಪತಿ ಭಟ್, ಹೈನುಗಾರಿಕೆಡ್ ಕೆದ್ದ ನಾರಾಯಣ ಭಟ್, ಶಿಕ್ಷಣ ಕ್ಷೇತ್ರಡ್ ಎಂ.ಪಿ.ಶಿವಮ್ಮ ಪುರುಷೋತ್ತಮ ಗೌಡ ಮಡ್ತಿಲ, ಸೌಟ್ ಗೈಡ್ ಡ್ ಬಾಪೂ ಸಾಹೇಬ್ ಸುಳ್ಯ ಭೂತಾರಾಧನೆಡ್ ಜಯರಾಮ ಅಜಿಲ, ಧಾರ್ಮಿಕ ಕ್ಷೇತ್ರಡ್ ಧರ್ಮಪಾಲ ಶೇಣಿ, ತುಳು ಲಿಪಿ ಪ್ರಚಾರ ಜಗದೀಶ್ ಗೌಡ ಕಲ್ಕಳ, ಸಹಕಾರ ಕ್ಷೇತ್ರಡ್ ಗುರುಪ್ರಸಾದ್ ರೈ ಮೊರಂಗಲ್ಲು, ವೈದ್ಯಕೀಯ ಕ್ಷೇತ್ರಡ್ ಡಾ.ರಘುರಾಮ ಮಾಣಿಬೆಟ್ಟು, ದೇಶಸೇವೆಗಾದ್ ಸುರೇಶ್ ಬಿ. ಅಗಲ್ಪಾಡಿ, ಲಲಿತ ಕಲೆಡ್ ವಾಸುದೇವ ರೈ ಬೆಳ್ಳಾರೆ, ಸಮಾಜ ಸೇವೆಗಾದ್ ಕೇಶವ ದೀಕ್ಷಿತ್ ಕೋಟೆಮುಂಡುಗಾರು,ನಾಟಿವೈದ್ಯರಾದ್ ಗಂಗಾಧರ ಆಚಾರ ಮುಂಡುಗಾರು ಬೊಕ್ಕ ಸಂಘಟನೆಡ್ ಸುಳ್ಯದ ಶಾರದಾಂಬಾ ಸೇವಾ ಸಮಿತಿಗ್ ಮಾನದಿಗೆ ಮಲ್ತೆರ್ .

ಒಡಿಯೂರು ಶ್ರೀಲೆನ ಷಷ್ಟ್ಯಬ್ದ ಸಂಭ್ರಮ ತುಳು ತಾಲೂಕು ಸಮಿತಿ, ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ, ತುಡರ್ ತುಳು ಕೂಟ ಸುಳ್ಯ, ಕಳಂಜ ಬಾಳಿಲ ಸಹಕಾರಿ ಸಂಘ, ಜ್ಞಾನವಾಹಿನಿ ಪ್ರಾದೇಶಿಕ ಸಮಿತಿ ಸುಳ್ಯ ಮೆಕ್ಲೆನ ಒಟ್ಟು ಸೇರಿಗೆಡ್ ಈ ಲೇಸ್ ನಡತ್oಡ್.

ಮಠಂತಬೆಟ್ಟು ಶ್ರೀ ಮಹಿಷಮರ್ದಿನಿ ದೇವಸ್ಥಾನದ ಬ್ರಹ್ಮಕಲಶೋತ್ಸವ ರದ್ದು

ಪುತ್ತೂರು, ಎಪ್ರಿಲ್ 21: ಕೋವಿಡ್-19 ಕಾರಣರ್ದಾವರ ಎ.24ರ್ದ್30 ತಾರೀಖ್ ಮುಟ ನಡಪರೆ ಇತ್ತಿನ ಮಠಂತಬೆಟ್ಟು ಶ್ರೀ ಮಹಿಷಮರ್ದಿನಿ ದೇವಸ್ಥಾನದ ಬ್ರಹ್ಮಕಲಶೋತ್ಸವನ್ ದುಂಬು ಪಾಡ್ದೆರ್ ಪಂದ್ ಬ್ರಹ್ಮಕಲಶೋತ್ಸ ಸಮಿತಿದ ಗುರ್ಕಾರ್ಲಾಯಿನ ಅಶೋಕ್ ಕುಮಾರ್ ರೈ ತೆರಿಪಾದೆರ್.

ಅಧಿಕಾರಿಲು , ಸಮಿತಿದಕುಲು ಭಕ್ತಾಧಿಲು, ಅಂಚನೇ ಹಿತ ಚಿಂತಕೆರ್ ಕೊರಿನ ಸಲಹೆದ ಮಿತ್ತ್ ಬ್ರಹ್ಮಕಲಶದ ಪೊರ್ತುಡುಮಾತಾ ಊರುದಕುಲು ಈ ಲೇಸ್ ಡ್ ಪಾಲ್ ಪಡೆಯೋಡು ಪನ್ಪಿ ನೆಲೆಟ್ಟ್ ಬೈದಿನ ಸೀಕ್ ರ್ದ್ ಮಾತೆರೆಗ್ಲಾ ಬೇಗ ಮುಕ್ತಿ ತಿಕ್ಕೊಡು ಮಂದಿನ ದಿನಗಳಲ್ಲಿ ಪಂದ್ ನನ ಬರ್ಪಿ ಸಲ ಬಾರಿ ಗೌಜಿ ಡ್ ಲೇಸ್ ನಡಪಾವೊಲಿ ಪಂದ್ ಅಶೋಕ್ ರೈ ಕೋಡಿಂಬಾಡಿ ತೆರಿಪಾಯೆರ್ .

ಕುಡ್ಲ ವಿಶ್ವವಿದ್ಯಾನಿಲಯದ ಪರೀಕ್ಷೆ ರದ್ದು

ಕುಡ್ಲ, ಎಪ್ರಿಲ್ 21: : ರಾಜ್ಯಡ್ ಜಾಸ್ತಿ ಆವೊಂದು ಉಪ್ಪುನ ಕೋವಿಡ್ ಪ್ರಕರಣದ ನೆಲೆಟ್ಟ್ ರಾಜ್ಯ ಸರಕಾರ ಜಾರಿ ಮಲ್ತಿನ ನಿಯಮದ ನೆಲೆಟ್ಟ್ ಇನಿರ್ದ್ ನಡಪೋಡಿತ್ತಿನ ಕುಡ್ಲ ವಿಶ್ವವಿದ್ಯಾನಿಲಯದ ಪರೀಕ್ಷೆಲೆನ್ ದುಂಬು ಮಲ್ಪೊಡು ಪಂದ್ ವಿಶ್ವವಿದ್ಯಾನಿಲಯ ಆದೇಶ ಕೊರ್ತೆರ್ .ಇತ್ತೇ ರಡ್ಡ್ ಪರೀಕ್ಷೆ ದುಂಬು ಪೋತುಂಡು ಇನಿರ್ದ್ ನಡಪೋಡಿತ್ತಿನ ಪರೀಕ್ಷೆನ್ ಲಾ ರದ್ದು ಮಲ್ದೆರ್ .ನನ ದುಂಬುದ ದಿನಟ್ ಪರೀಕ್ಷಾ ತಾರೀಖ್ ನ್ ನಿಗದಿ ಮಲ್ಪುವೆರ್ ಪಂದ್ ವಿಶ್ವವಿದ್ಯಾನಿಲಯದ ಅಧಿಕಾರಿಲು ತೆರಿಪಾದೆರ್.

ಮಲ್ಲಿಗೆ ಬೆಳೆಗಾರೆರ್ನ ಒಕ್ಕೂಟದ ಮಲ್ಲಿಗೆ ಕಟ್ಟೆದ ಉದಿಪನದ ಲೇಸ್

ಕೋಟೇಶ್ವರ, ಎ.21: 5-10 ಸೆಂಟ್ಸ್‌ದಾತ್ ಚೂರ್ ಜಾಗೆ ಇತ್ತುಂಡಲ ವೈಜ್ಞಾನಿಕವಾದ್ ಕಮ್ಮಿ ಖರ್ಚ್ ಡ್ ಮಲ್ಲಿಗೆ ಪೂ ಮಾತ್ರ ಅತ್ತoದೆ, ದೈಕ್ಲೆನ್ಲ ಬುಲೆಪಾದ್ ವಾರಗ್ ಸಾರ ರೂಪಾಯಿ ಬೆನೊಲಿ ಪಂದ್ ಉಡುಪಿ ಜಿಲ್ಲಾ ಕೃಷಿಕ ಸಂಘದ ಗುರ್ಕಾರ್ಲಾಯಿನ ರಾಮಕೃಷ್ಣ ಶರ್ಮ ಬಂಟಕಲ್ಲು ಪಂಡೆರ್ . ಕುಂಭಾಶಿ ಪಣ್‌ಹತ್ವಾರಬೆಟ್ಟುದ ಕೃಷಿಕೆ ಪ್ರೇಮ ಪೂಜಾರಿ ಮೆರ್ನ ಇಲ್ಲದ ಜಾಲ್ ಡ್ ಐತಾರ ಮಲ್ಲಿಗೆ ಬೆಳೆಗಾರೆರ್ನ ಒಕ್ಕೂಟದ ಮಲ್ಲಿಗೆ ಕಟ್ಟೆದ ಉದಿಪನದ ಲೇಸ್ ಡ್ ಮಾರ್ಗದರ್ಶಕೆರಾದ್ ಪಾತೆರಿಯೆರ್.

ಕೃಷಿಕ ಶ್ರೀಧರ ದೇವಾಡಿಗ ಮೇರ್ ಮಲ್ಲಿಗೆ ಕಟ್ಟೆನ್ ಉದಿಪನ ಮಲ್ತೆರ್. ನಿವೃತ್ತ ತೋಟಗಾರಿಕಾ ಇಲಾಖೆ ಅಧಿಕಾರಿ ಕುಚೇಲಯ್ಯ ಲೇಸ್ ದ ಗುರ್ಕಾರ್ಮೆ ವಹಿಸಿದಿತ್ತೆರ್. ಕುಂದಾಪುರ ಮಹಿಳಾ ಸಾಂತ್ವನ ಸಹಾಯವಾಣಿ ಗುರ್ಕಾರ್ಲಾಯಿನ ರಾಧಾದಾಸ್, ಜಿಲ್ಲಾ ಕೃಷಿಕ ಸಂಘ ಕುಂದಾಪುರ ವಲಯದ ರೋನಾಲ್ಡ್ ಡಿಸೋಜಾ ಆನಗಳ್ಳಿ, ಚಂದ್ರ ಪೂಜಾರಿ ಬಾಳೆಬೈಲು, ಸಂಯೋಜಕ ರಮೇಶ್ ಪೂಜಾರಿ ಕ್ಯಾಸನಮಕ್ಕಿ ಪಾಲ್ ಪಡೆದಿತ್ತೆರ್ .

ಬ್ರಹ್ಮ ಶ್ರೀ ನಾರಾಯಣ ಗುರು ಸೇವಾ ಸಂಘ (ರಿ) ಗ್ರಾಮಚಾವಡಿ‌ದ ವಾರ್ಷಿಕ ಮಹಾಸಭೆ

ಕೊಣಾಜೆ: ಬ್ರಹ್ಮ ಶ್ರೀ ನಾರಾಯಣ ಗುರು ಸೇವಾ ಸಂಘ (ರಿ) ಗ್ರಾಮಚಾವಡಿ‌ ನೆತ್ತ ವಾರ್ಷಿಕ ಮಹಾಸಭೆ ಮಂದಿರದ ಸಭಾಂಗಣಡ್ ವಿಜಯ ಕುಮಾರ್ ಪಾವೂರು ಮೆರ್ನ ಗುರ್ಕಾರ್ಮೆಡ್ ನಡತುಂಡು.

ಸಭೆಟ್ ಗ್ರಾಮದ ವರದಿ ಮಂಡನೆರ್ದ್ ಬೊಕ್ಕ 2021-22ನೇ ಸಾಲ್ ಗ್ ಪೊಸ ಪದಾದಿಕಾರಿಲೆನ ಆಯ್ಕೆ ನಡತುಂಡು .ಸಂಘದ ಪೊಸ ಗುರ್ಕಾರ್ಲಾದ್ ಚಂದ್ರಹಾಸ್ ಅಮಿನ್ ಹರೇಕಳ, ಒತ್ತು ಗುರ್ಕಾರ್ಲಾದ್ ಹರೀಶ್ ಪೂಜಾರಿ ಕೊಣಾಜೆ, ಪ್ರದಾನ ಕಾರ್ಯದರ್ಶಿಯಾದ್ ಕೃಷ್ಣಪ್ರಸಾದ್ ಪಜೀರು, ಕೋಶಾಧಿಕಾರಿಯಾದ್ ವಿಜಯಕುಮಾರ್ ಕಿಲ್ಲೂರು, ಜೊತೆ ಕಾರ್ಯದರ್ಶಿಯಾದ್ ಸುಭಾಷ್ ಧರ್ಮನಗರ, ಮಹಿಳಾ ಘಟಕದ ಗುರ್ಕಾರ್ಲಾದ್ ಸುಜಾತ ಹರೇಕಳ, ಒತ್ತುಗುರ್ಕಾರ್ಲಾದ್ ಗೀತಾ ಕುಂದರ್, ಕಾರ್ಯದರ್ಶಿ ಬಬಿತ ಬಾನಬೆಟ್ಟು, ಲೆಕ್ಕ ಪರಿಶೋಧಕೆರಾದ್ ಗಂಗಾಧರ ಮಾಸ್ಟರ್ ಪಜೀರು ಮೆಕ್ಲೆನ್ ಆಯ್ಕೆ ಮಲ್ತೆರ್ .

ರಾಜ್ಯೋಡು ವೀಕೆಂಡ್ ಕರ್ಫ್ಯೂ-ಒರಿನ ದಿನ ನೈಟ್ ಕರ್ಫ್ಯೂ ಜಾರಿ

ಕರ್ನಾಟಕ : ರಾಜ್ಯಡ್ ಶನಿವಾರ ಬೊಕ್ಕ ಐತಾರ ವೀಕೆಂಡ್ ಕರ್ಫ್ಯೂ-ಒರಿನ ದಿನ ನೈಟ್ ಕರ್ಫ್ಯೂ ಪಾಡೊಡು ಪಂದ್ ಸರಕಾರ ಆದೇಶ ಕೊರ್ತುಂಡು .ಏಪ್ರಿಲ್ 21ರ್ದ್ ಪೊಸ ಮಾರ್ಗಸೂಚಿ ಜಾರಿ ಮಲ್ದೆರ್ ಸರಕಾರದ ಮುಖ್ಯ ಕಾರ್ಯದರ್ಶಿಲೆಗ್ ಆದೇಶ ಕೊರ್ತೆರ್ . ಬರ್ಪಿನ ಮೇ ತಿಂಗೊಲ್ ದ 4 ತಾರೀಖ್ ಮುಟ ಪೊಸ ಮಾರ್ಗ ಸೂಚಿ ಜಾರಿಡ್ ಉಂಡು . ನನ ರಾತ್ರಿ 9 ಗಂಟೆರ್ದ್ ಕಾಂಡೆ 6 ಗಂಟೆ ಮುಟ ನೈಟ್ ಕರ್ಫ್ಯೂ ಜಾರಿಡ್ ಉಂಡು .

ಒರಿನoಚ ಶುಕ್ರವಾರ ರಾತ್ರಿ 9 ಗಂಟೆರ್ದ್ ಸೋಮವಾರ ಕಾಂಡೆ 6 ಗಂಟೆ ಮುಟ ವೀಕೆಂಡ್ ಕರ್ಫ್ಯೂ ಜಾರಿಡ್ ಉಪ್ಪುಂಡು . ಈ ಪೊರ್ತುಡು ಕಾಂಡೆ 11 ಗಂಟೆ ಮುಟ ಅಗತ್ಯ ವಸ್ತು ಮುಟ ಖರೀದಿಗ್ ಅವಕಾಶ ಕೊರ್ತೆರ್ .

ಧಾರ್ಮಿಕ ಕೇಂದ್ರಲು ಸಂಪೂರ್ಣ ಬಂದ್:
ನನ ಧಾರ್ಮಿಕ ಕೇಂದ್ರಲೆನ್ ಸಂಪೂರ್ಣ ಬಂದ್ ಮಲ್ಪೊಡು ಪಂದ್ ಆದೇಶ ಕೊರ್ತೆರ್ . ಕೇವಲ ಪೂಜಾರಿಲೆಗ್ ಮಾತ್ರ ದೇವಾಲಯಡ್ ಅವಕಾಶ ಕೊರ್ತೆರ್ .

ಮದಿಮೆ ಸಮಾರಂಭಡ್ 50 ಜನಕ್ಲೆಗ್ ಮಾತ್ರ ಅವಕಾಶ :
ಮದಿಮೆ ಸಮಾರಂಭಗ್ 50 ಜನಕ್ಲೆನ ಮಿತಿ ವಿಧಿಸಾದೆರ್ . ಒರಿನ ಬೇತೆ ಪರ್ಬ ಅಂಚನೇ ಅಂತ್ಯ ಸಂಸ್ಕಾರಗ್ 20 ಜನಕ್ಲೆಗ್ ಮಾತ್ರ ಅವಕಾಶ ಕೊರ್ತೆರ್ .

ಶಾಲಾ ಕಾಲೇಜುಲಾ ಬಂದ್:
ನನ ದುಂಬುದ ಏಳ್ ದಿನ ಶಾಲಾ ಕಾಲೇಜುಲೆನ್ ಸಂಪೂರ್ಣ ಬಂದ್ ಮಲ್ಪರೆ ಆದೇಶ ಕೊರ್ತೆರ್.

You Missed