Sun. Nov 22nd, 2026

ಕಾರ್ಲದ ಸುದ್ದಿ Karkala News

ಕಟೀಲ್ ದೇವಸ್ಥಾನೊಡು ಉದಿಪನ ಆಂಡ್ ತುಳುಲಿಪಿ ಪಲವೆ

ಕುಡ್ಲ , ಎಪ್ರಿಲ್ 18: ಕಟೀಲು ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನಡ್ ತುಳುಲಿಪಿಟ್ ಪುದರ್ ಪಲವೆ ಪಾಡ್ಯೆರ್, ದೇವಸ್ಥಾನದ ರಡ್ಡನೇ ಗೋಪುರಡ್ ಕಟೀಲು ಶ್ರೀ ದುರ್ಗಾಪರಮೇಶ್ವರಿ ದೇವಲ್ಯ ಪಂದ್ ತುಳು ಲಿಪಿಟ್ ಪಲವೆ ಪಾಡಿಯೆರ್.

ಈ ಬಗ್ಗೆ ಪಾತೆರಿನ ದೇವಳದ ಆನುವಂಶಿಕ ಅರ್ಚಕ ಹರಿನಾರಾಯಣ ಆಸ್ರಣ್ಣ , ಈ ಮುಖೇನ ತುಳುಲಿಪಿ ಕುಡೋರ ಜನಮಾನಸಡ್ ಮೂಡ್ದು ಬರಡ್ ಪಂದ್ ಪಂಡೆರ್.

ಸೌಮ್ಯಲತಾ ಪಿ. ಮೆರೆಗ್ ಹಂಪಿದ ಕನ್ನಡ ವಿಶ್ವವಿದ್ಯಾಲಯ ಪಿಎಚ್.ಡಿ ಪದವಿ

ಒಡಿಪು , ಎ.17: ಅಜ್ಜರಕಾಡು ಡಾ.ಜಿ.ಶಂಕರ್ ಸರಕಾರಿ ಮಹಿಳಾ ಪ್ರಥಮ ದರ್ಜೆ ಕಾಲೇಜ್ ದ ಕನ್ನಡ ಸಹಪ್ರಾಧ್ಯಾಪಕಿ ಸೌಮ್ಯಲತಾ ಪಿ. ಮೇರ್ , ಡಾ. ಮೋಹನ ಕುಂಟಾರ್ ಮಾರ್ಗದರ್ಶನಡ್ ಮಂಡಣೆ ಮಲ್ದಿನ ‘ಕನ್ನಡ ಕಾವ್ಯಗಳಲ್ಲಿ ನಾಡು-ನುಡಿಯ ಪ್ರತಿನಿಧೀಕರಣ’ ಪನ್ಪಿನ ಮಹಾಪ್ರಬಂಧಗ್ ಹಂಪಿದ ಕನ್ನಡ ವಿಶ್ವವಿದ್ಯಾಲಯ ಪಿಎಚ್.ಡಿ ಪದವಿ ಕೊರ್ದು ಮಾನದಿಗೆ ಮಲ್ದೆರ್ . ಮೇರ್ ಮಣಿಪಾಲ ವಿಶ್ವವಿದ್ಯಾಲಯದ ನಿವೃತ್ತ ಪ್ರಾಧ್ಯಾಪಕ ಡಾ.ಹರಿಶ್ಚಂದ್ರ ಹೆಬ್ಬಾರೆರ್ನ ಪತ್ನಿ.

ಹಾಜಿರಾ ಸಜಿನಿ ಎಸ್. ಗ್ ಡಾಕ್ಟರೇಟ್

ಕುಡ್ಲ , ಎ.17: ಕರ್ನಾಟಕ ಸರಕಾರದ ಗಣಿ ಬೊಕ್ಕ ಭೂ ವಿಜ್ಞಾನ ಇಲಾಖೆಡ್ ಭೂ ವಿಜ್ಞಾನಿಯಾದ್ ಒಡಿಪುಡು ಬೇಲೆ ಮಲ್ತೊಂದು ಉಪ್ಪುನ ಹಾಜಿರಾ ಸಜಿನಿ ಎಸ್. ಮಂಡಣೆ ಮಲ್ದಿನ ‘An Intergrated Hydroglogical Investigation of Sullia Taluk’ ಪನ್ಪಿನ ಮಹಾಪ್ರಬಂಧಗ್ ಕುಡ್ಲ ವಿಶ್ವವಿದ್ಯಾನಿಲಯ ಡಾಕ್ಟರೇಟ್ ಕೊರ್ದು ಮಾನದಿಗೆ ಮಲ್ದುಂಡು.

ಪ್ರೊಫೆಸರ್ ಡಾ.ಶಿವಣ್ಣ ಮಾರ್ಗದರ್ಶನಡ್ ಮೇರ್ ಈ ಪ್ರಬಂಧನ್ ಮಂಡಣೆ ಮಲ್ದೆರ್ .

ಹಾಜಿರಾ ಸಜಿನಿ ಮೇರ್ ಬೆಳ್ತಂಗಡಿ ಮನ್ಶರ್ ಕಾಲೇಜ್ ಆಫ್ ಪ್ಯಾರಾ ಮೆಡಿಕಲ್ ಸೈನ್ಸ್ ನ ಪ್ರಾಂಶುಪಾಲ ಕಡಬ – ಮರ್ದಾಳ ನಿವಾಸಿ ಹೈದರ್ ಮೆರ್ನ ಪತ್ನಿ.

ಪುತ್ತೂರು ನಗರ ಕಾಂಗ್ರೆಸ್ ಸಮಿತಿದ ಪೊಸ ಗುರ್ಕಾರ್ಲಾದ್ ಹೆಚ್. ಮುಹಮ್ಮದ್ ಆಲಿ ಆಯ್ಕೆ

ಪುತ್ತೂರು: ಪೆರಿಯ ಕಾಂಗ್ರೆಸ್ ಕಾರ್ಯಕರ್ತೆ ಪುತ್ತೂರು ನಗರಸಭೆದ ಮಾಜಿ ವಿಪಕ್ಷ ನಾಯಕ ಹೆಚ್. ಮುಹಮ್ಮದ್ ಆಲಿ ಮೇರ್ ಪುತ್ತೂರು ನಗರ ಕಾಂಗ್ರೆಸ್ ಸಮಿತಿದ ಪೊಸ ಗುರ್ಕಾರ್ಲಾದ್ ಆಯ್ಕೆ ಆತೆರ್. ಮುಹಮ್ಮದ್ ಆಲಿ ಮೆರೆನ್ ದ.ಕ. ಜಿಲ್ಲಾ ಕಾಂಗ್ರೆಸ್ ಸಮಿತಿ ಗುರ್ಕಾರ್ಲಾಯಿನ ಹರೀಶ್ ಕುಮಾರ್ ಮೇರ್ ನೇಮಕ ಮಲ್ದೆರ್.

ಸಂಪ್ಯ ಮಂಡಲ ಪಂಚಾಯತ್ ಗುರ್ಕಾರ್ಲಾದ್ 5 ವರ್ಷ ಬೇಲೆ ಮಲ್ದಿನ ಮುಹಮ್ಮದ್ ಆಲಿ ಮೇರ್ ಐರ್ದ್ ಬೊಕ್ಕ ನಿರಂತರ ಪುತ್ತೂರು ಪುರಸಭೆತ ಸದಸ್ಯರಾದ್ ಬೇಲೆ ಮಲ್ದೆರ್ .

ಭಾರತೀಯ ಕ್ರಿಶ್ಚಿಯನ್ ವಿವಾಹ ನೋಂದಣಾಧಿಕಾರಿಯಾದ್ ರೀಮಾ ಸ್ವೀತಾ ಪಿರೇರಾ ಆಯ್ಕೆ

ಕಾರ್ಕಳ, ಎ.17: ಕಾರ್ಕಳಡ್ ನ್ಯಾಯವಾದಿಯಾಯಿನ ರೀಮಾ ಸ್ವೀತಾ ಪಿರೇರಾ ಮೆರೆನ್ ಓಡಿಪು ಜಿಲ್ಲಾ ವ್ಯಾಪ್ತಿಗ್ ಭಾರತೀಯ ಕ್ರಿಶ್ಚಿಯನ್ ವಿವಾಹ ನೋಂದಣಾಧಿಕಾರಿಯಾದ್ ನೇಮಕ ಮಲ್ತ್ ಕರ್ನಾಟಕ ಸರಕಾರ ಆದೇಶ ಕೊರ್ತೆರ್ .

ರೀಮಾ ಸ್ವೀತಾ ಪಿರೇರಾ ಮೆರೆನ್ ತಕ್ಷಣರ್ದ್ ಜಾರಿಗ್ ಬರ್ಪಿಲಕ ಕ್ರಿಶ್ಚಿಯನ್ ಜನಾಂಗದ ವಿವಾಹ ನೋಂದಣಾಧಿಕಾರಿಯಾದ್ ನೇಮಕ ಮಲ್ದೆರ್ , ದುಂಬುದ ಆದೇಶದ ಮುಟ ನೇಮಕ ಜಾರಿಡ್ ಉಪ್ಪುಂಡು .

ಸುಮಾರ್ 900ರ್ದ್ ಜಾಸ್ತಿ ಸಾರಿಗೆ ಸಿಬ್ಬಂದಿಲು ಬೇಲೆಗ್ ಹಾಜರ್

ಎ.17: ಆಜನೇ ವೇತನ ಆಯೋಗದ ಶಿಫಾರಸು ಅನುಷ್ಠಾನಗ್ ಆಗ್ರಹ ಮಲ್ತ್ ಕೆಎಸ್ಸಾರ್ಟಿಸಿ ಬಸ್ ನೌಕರೆರ್ ನಡಪಾವೊಂದು ಉಪ್ಪುನ ಅನಿರ್ಧಿಷ್ಟಾವಧಿ ಮುಷ್ಕರ ರಾಜ್ಯಾದ್ಯಂತ ನಡತೊಂದು ಇತ್ತ್oಡಲ ಕೂಡ ದ.ಕ. ಜಿಲ್ಲೆಡ್ ಮುಷ್ಕರ ನಡತೊಂದು ಇಜ್ಜಿ .

ಗುರುವಾರ ಜಿಲ್ಲೆಡ್ ಸುಮಾರ್ 900ರ್ದ್ ಲಾ ಜಾಸ್ತಿ ಸಾರಿಗೆ ಸಿಬ್ಬಂದಿಲು ಬೇಲೆಗ್ ಹಾಜರ್ ಆತೆರ್. ಆತೆ ಅತ್ತಂದೆ 400ರ್ದ್ ಜಾಸ್ತಿ ಸರಕಾರಿ ಬಸ್ ಬೇತೆ ಬೇತೆ ಮಾರ್ಗಡ್ ಪೋತುಂಡು. ಕುಡ್ಲ ಕೆಎಸ್ಸಾರ್ಟಿಸಿ ವಿಭಾಗಡ್ 310 ಅನುಸೂಚಿಡ್ ಬಸ್ ಕಾರ್ಯಾಚರಣೆ ಮಲ್ದುಂಡು . ಕರ್ನಾಟಕ ಸಾರಿಗೆ, ರಾಜಹಂಸ, ನಾನ್ ಎಸಿ ಸ್ಲೀಪರ್, ವೋಲ್ವೋ, ವೋಲ್ವೋ ಮಲ್ಟಿ ಆಕ್ಸೆಲ್, ಡ್ರೀಮ್ ಕ್ಲಾಸ್ ಸಹಿತ ಸ್ಥರದ ಬಸ್‌ಲು ಕಾರ್ಯಾಚರಣೆ ಮಲ್ದುಂಡು .

ಭ! ೧೦೦೮ ಆದಿನಾಥ ಸ್ವಾಮಿ ಬಸದಿಗ್ ಶ್ರೀ ಕ್ಷೇತ್ರ ಧರ್ಮಸ್ಥಳದ ಧರ್ಮಾಧಿಕಾರಿ ಪೂಜ್ಯ ಡಾ. ಡಿ. ವೀರೇಂದ್ರ ಹೆಗ್ಗಡೆರ್ನ ಪರವಾದ್ ಪಣವುದ ಸಾಕಾರ

ಅಳದಂಗಡಿಡ್ ಜೀರ್ಣೋದ್ಧಾರ ಆವೊಂದು ಉಪ್ಪುನ ಭ! ೧೦೦೮ ಆದಿನಾಥ ಸ್ವಾಮಿ ಬಸದಿಗ್ ಶ್ರೀ ಕ್ಷೇತ್ರ ಧರ್ಮಸ್ಥಳದ ಧರ್ಮಾಧಿಕಾರಿ ಪೂಜ್ಯ ಡಾ. ಡಿ. ವೀರೇಂದ್ರ ಹೆಗ್ಗಡೆರ್ ಬಸದಿದ ಭಕ್ತರ ಕೋರಿಕೆದ ಮಿತ್ತ್ ರೂ.2,50,000 ಕೊಡುಗೆಯಾದ್ ಕೊರ್ತೆರ್.

ಪೂಜ್ಯ ಧರ್ಮಾಧಿಕಾರಿಲೆನ ಕೊಡುಗೆನ್ ಬಸದಿದ ಜೀರ್ಣೋದ್ಧಾರ ಸಮಿತಿದಕುಲು ಭಕ್ತಿಪೂರ್ವಕವಾದ್ ದೆತೊoಡೆರ್ .

ಡಿ. ಡಿ. ಹಸ್ತಾಂತರದ ಪೊರ್ತುಡು ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮೀಣಾಭಿವೃದ್ಧಿ ಸಂಸ್ಥೆದ ಜಿಲ್ಲಾ ನಿರ್ದೇಶಕೆರಾಯಿನ ಸತೀಶ್ ಶೆಟ್ಟಿ , ತಾಲ್ಲೂಕು ಯೋಜನಾಧಿಕಾರಿ ಯಶವಂತ್ ಎಸ್, ತಾಲ್ಲೂಕು ಜನಜಾಗೃತಿ ವೇದಿಕೆದ ನಿಕಟಪೂರ್ವ ಗುರ್ಕಾರ್ಲಾಯಿನ ಕಿಶೋರ್ ಹೆಗ್ಡೆ, ಜನಜಾಗೃತಿ ವಲಯಾಧ್ಯಕ್ಷಷೆರಾಯಿನ ಪ್ರಮೋದ್ ಜೈನ್, ವಲಯ ಮೇಲ್ವೀಚಾರಕಿ ಶ್ರೀಮತಿ ಮಲ್ಲಿಕಾ, ಸೇವಾಪ್ರತಿನಿಧಿ ಶ್ರೀಮತಿ ಹೇಮಲತಾ ಬೊಕ್ಕ ಆದಿನಾಥ ಬಸದಿದ ಜೀರ್ಣೋದ್ಧಾರ ಸಮಿತಿದ ಗುರ್ಕಾರ್ಲಾಯಿನ ಧನಂಜಯ್ ಜೈನ್, ಕಾರ್ಯಾಧ್ಯಕ್ಷೆರಾಯಿನ ಚಿತ್ತರಂಜನ್ ಹೆಗ್ಡೆ ಬೊಕ್ಕ ಪದಾಧಿಕಾರಿಲು ಪಾಲ್ ಪಡೆದಿತ್ತೆರ್.

ರೆಂಜಾಳಡ್ ತುಲುಲಿಪಿಕ್ ಪ್ರೋತ್ಸಾಹ- ಶ್ರೀಮತಿ ಮಲ್ಲಿಕಾ ಮುನಿರಾಜ್ ಜೈನ್ ರೆಂಜಾಳ

ಕಾರ್ಕಳ, ಎಪ್ರಿಲ್ 15: ಪಂಚದ್ರಾವಿಡ ಭಾಷೆಡ್ ಒಂಜಾಯಿನ ತುಳು ಮಾಜೊಂದು ಉಪ್ಪುನಗ ,ಅವೆನ್ ಬುಲೆಪಾದ್ ಒರಿಪಾವುನ ತುಳುವೆರ್ನ ಜವಾಬ್ದಾರಿಯಾದುಂಡು , ತುಳು ಭಾಷೆಗ್ ತನ್ನನೇ ಆಯಿನ ಇತಿಹಾಸ ಉಂಡು ದೇಶದ ಸಂಸ್ಕೃತಿಗ್ ಅಪಾರ ಕೊಡುಗೆ ಕೊರ್ತುಂಡು ,ಈ ನಿಲೆಟ್ಟ್ ರೆಂಜಾಳ ಮಹಾಲಕ್ಷ್ಮಿ ನಗರಡ್ ತುಳುಲಿಪಿತ ಪುದರ್ ಪಲವೆ ಪಾಡಿಯೆರ್, ಶ್ರೀಮತಿ ಮಲ್ಲಿಕಾ ಮುನಿರಾಜ್ ಜೈನ್ ಪುದರ್ ಪಲವೆದ ಬೋರ್ಡ್ ನ್ ಉದಿಪನ ಮಲ್ತೆರ್. ರೆಂಜಾಳದ ತುಲು ಬಾಂಧವೆರೆಗ್ ತುಲು ಲಿಪಿ‌ಕಲಿಕೆಗ್ ಅನುಕೂಲ ಆಪಿನoಚ ತುಲುಲಿಪಿ ತರಗತಿನ್ ಸುರು ಮಲ್ಪುವ ಪಂದ್ ಪಂಡೆರ್.

ಈ ಲೇಸ್ ಡ್ ರೆಂಜಾಳ ಪಂಚಾಯತ್ ಗುರ್ಕಾರ್ಲಾಯಿನ ಶ್ರೀಮತಿ ದೀಪಿಕಾ ಶೆಟ್ಟಿ, ಪಂಚಾಯತ್ ಸದಸ್ಯೆರಾಯಿನ ಶ್ರೀ ರಮೇಶ್ ಶೆಟ್ಟಿ ಮಂಟೊಟ್ಟು, ಜೈ ತುಳುನಾಡು(ರಿ.) ಸಂಘಟನೆದ ಪ್ರಮುಖೆರಾಯಿನ ವಿಶು.ಶ್ರೀಕೇರ, ಶೇಖರ್ ಶ್ರೀಗಂಗೆ, ಸದಸ್ಯೆರಾಯಿನ ಪವನ್ ಕರ್ಕೇರ,ಪ್ರಶಾಂತ್ ಆಚಾರ್ಯ ಬೊಕ್ಕ ಗ್ರಾಮಸ್ಥೆರಾಯಿನ ದೀಕ್ಷಿತ್ ಶೆಟ್ಟಿ, ಚೇತನ್ ಶೆಟ್ಟಿ, ಕುಮಾರಿ ಶಾಂತಿ ಗೌಡ ,ಪ್ರವೀಣ್ ಶೆಟ್ಟಿ,ರಮೇಶ್ ಶೆಟ್ಟಿ,ರಾಜೇಶ್ ಶೆಟ್ಟಿ, ಉದಯ್ ಶೆಟ್ಟಿ, ಸಂತೋಷ್ ಬೊಕ್ಕ ನೆರೆಕರೆದಕುಲು ಪಾಲ್ ಪಡೆದಿತ್ತೆರ್.

ಶ್ರೀ ಮುದ್ದಡ್ಕತಾಯಿ ಪಿಲಿಚಾಮುಂಡಿ ದೈವಸ್ಥಾನ ವರ್ಷಾವದಿ ನೇಮೋಚ್ಚಯ

ಬೊಲ್ತೆರ್, ಎಪ್ರಿಲ್ 13:ಶ್ರೀ ಮುದ್ದಡ್ಕತಾಯಿ ಪಿಲಿಚಾಮುಂಡಿ ದೈವಸ್ಥಾನದ ವರ್ಷಾವದಿ ನೇಮೋಚ್ಚಯ ಶ್ರೀ ರಘುರಾಮ್ ಭಟ್ ಮಠ ದ ಇಲ್ಲರ್ದ್ ಬೈಯ್ಯ 6:30 ಗಂಟೆಗ್ ಭಂಡಾರದೊಟ್ಟುಗು ಮೆರವಣಿಗೆ ಬತ್ತ್ ದ್ ಅವ್ವೆ ದಿನ ರಾತ್ರಿ 8 ಗಂಟೆರ್ದ್ ಸಾರ್ವಜನಿಕ ಅನ್ನಸಂತರ್ಪಣೆ ನಡಪರೆ ಉಂಡು.

ತಾರೀಖ್ 16-04-2021ನೇ ಶುಕ್ರವಾರ ರಾತ್ರಿ 8 ಗಂಟೆಗ್ ಮಾರಿಪೂಜೆ ನಡಪರೆ ಉಂಡು.
ಅಂಚನೇ ತಾರೀಖ್ 15/4/2021 ನೇ ಗುರುವಾರ ದಿ | ನರಸಿಂಹ ಪ್ರಭು ಪತ್ನಿ ಬೊಕ್ಕ ಜೋಕ್ಲೆನ ಪರಕೆದ ಕೋಲ ನಡಪರೆ ಉಂಡು.

ಭೌತಶಾಸ್ತ್ರಡ್ ಎಂಎಸ್ಸಿ ಮಲ್ದಿನ ಪ್ರಮಿತಾಗ್ ಬಂಗಾರ್ದ ಪದಕ ಬೊಕ್ಕ ಪಣವುದ ಇನಾಮು

ಕುಡ್ಲ, ಎಪ್ರಿಲ್ 12: ಸೈಂಟ್ ಫಿಲೋಮಿನಾ ಕಾಲೇಜ್ ಡ್ ಭೌತಶಾಸ್ತ್ರಡ್ ಎಂಎಸ್ಸಿ ಮಲ್ದಿನ ಪ್ರಮಿತಾ ಮೇರ್ ಶನಿವಾರ ಮಂಗಳೂರು ವಿವಿಡ್ ನಡತಿನ ಘಟಿಕೋತ್ಸವಡ್ ಸುರುತ್ತ ರ್ಯಾಂಕ್‍ದೊಟ್ಟುಗು ಒಂಜಿ ಬಂಗಾರ್ದ ಪದಕ ಬೊಕ್ಕ ನಾಲ್ ಪನವು ದ ಇನಾಮು ಪಡೆತೆರ್.

ಸುಳ್ಯದ ಕೃಷಿಕ ಶ್ರೀಪ್ರಸಾದ್ ಬಾರಿತ್ತಾಯ ಬೊಕ್ಕ ಶಾಲಾ ಮುಖ್ಯೋಪಾದ್ಯಾಯಿನಿಯಾದ್ ಪದ್ಮಾ ಮೆಕ್ಲೆನ ಪುತ್ರಿಯಾಯಿನ ಪ್ರಮಿತ ಸುಳ್ಯದ ನೆಹರೂ ಮೆಮೋರಿಯಲ್ ಕಾಲೇಜ್ ಡ್ ಪದವಿ ಮಲ್ತ್ ದ್ ಏಳನೇ ರ್ಯಾಂಕ್ ಪಡೆತೆರ್ . ಇತ್ತೆ ಮಣಿಪಾಲದ ಎಂಐಟಿ ಡ್ ಪಿಎಚ್‍ಡಿ ಅಧ್ಯಯನ ಮಲ್ದಿನ ಮೇರ್ ಭೌತಶಾತ್ರ ಕ್ಷೇತ್ರಡ್ ಸಂಶೋಧನೆಡ್ ತೊಡಗಿಸಿಕೊಂಡು ಸಾಧನೆ ಮಲ್ಪೊಡು ಪಂದ್ ಕನ ಕಟ್ಟ್ ದೆರ್ .

You Missed