The 14 th annual program of Sri Jarandaya Dumavathi Youth club; Kolachikambala; Collective Satyanarayana Pooja to be organised ಕೊಳಚಿಕಂಬಳ ಶ್ರೀ ಜಾರಂದಾಯ ಧೂಮಾವತಿ ಯೂತ್ ಕ್ಲಬ್ ದ 14 ನೇ ವಾರ್ಷಿಕ ಉಚ್ಚಯ, ಸಾಮೂಹಿಕ ಸತ್ಯನಾರಾಯಣ ಪೂಜೆ
ಮುಲ್ಕಿ : ಕೊಳಚಿಕಂಬಳ ಶ್ರೀ ಜಾರಂದಾಯ ಧೂಮಾವತಿ ಯೂತ್ ಕ್ಲಬ್ ದ 14 ನೇ ವರ್ಷದ ಉಚ್ಚಯ, ಶಿವರಾತ್ರಿ ಲೆಕ್ಕೊಡು ಸಾಮೂಹಿಕ ಸತ್ಯನಾರಾಯಣ ಪೂಜೆ ಫೆ.25 ಸನಿಯಾರ ಕೊಳಚಿಕಂಬಳ ಜಾರಂದಾಯ ಧೂಮಾವತಿ ದೈವಸ್ಥಾನದ ವಠಾರೊಡು ನಡತ್ಂಡ್.
ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನ ದ ಅರ್ಚಕೆರ್ ಪ್ರಸಾದ್ ಭಟ್ ಆಶೀರ್ವಚನ ಮಲ್ತೆರ್. ಮುಲ್ಕಿ ನಗರ ಪಂಚಾಯತ್ ಅಧ್ಯಕ್ಷೆರ್ ಸುಭಾಷ್ ಶೆಟ್ಟಿ ಲೇಸ್ ಉದಿಪನ ಮಲ್ತೆರ್.
ಈ ಪೊರ್ತುಡು ಪಾತೆರಿನ ಆರ್, ಕೊಳಚಿಕಂಬಳಗ್ 1.5 ಕೋಟಿ ರೂ. ಕರ್ಚಿಡ್ ಕಾಂಕ್ರೀಟ್ ರೋಡ್ ಗ್ ಅನುದಾನ ಮಂಜೂರು ಆತ್ಂಡ್. ಆಯಿನಾತ್ ಬೇಗ ಪರ್ಪಿನ ನೀರ್ ದ ಟ್ಯಾಂಕರ್ ದ ವ್ಯವಸ್ಥೆ ಮಲ್ತೊಂದುಲ್ಲ.
ಮುಲ್ಕಿ ನಗರ ಪಂಚಾಯತ್, ಕಿನ್ನಿಗೋಳಿ ಪಟ್ಟಣ ಪಂಚಾಯತ್, ಬಜ್ಪೆ ಪಟ್ಟಣ ಪಂಚಾಯತ್ ಮುಕೇನ ಮಳವೂರುರ್ದು ಅಮೃತ್ ಜಲ ಯೋಜನೆ ಮುಕೇನ ಪರ್ಪಿನ ನೀರ್ ಪೂರೈಕೆ ಮಲ್ಪುನ ಯೋಜನೆದ ಡಿಪಿಆರ್ ಆತ್ಂಡ್. ಆಯಿನಾತ್ ಬೇಗ ಆ ಯೋಜನೆ ಆವಡ್ ಪಂದ್ ಪಂಡೆರ್.
ರಾಷ್ಟ್ರೀಯ ಬಿಲ್ಲವ ಮಹಾಮಂಡಲದ ಅಧ್ಯಕ್ಷೆರ್ ಡಾ.ರಾಜಶೇಖರ ಕೋಟ್ಯಾನ್ ಲೇಸ್ ದ ಗುರ್ಕಾರ್ಮೆ ಒಯಿಸ್ ದ್ ಕೆಲವು ಪಂತೊಲೆಡ್ ಗೆಂದಿನಕ್ಲೆಗ್ ಇನಾಮು ಪಟ್ಟಿಯೆರ್.
ಶೈಕ್ಷಣಿಕ ಕ್ಷೇತ್ರದ ಸಾಧಕೆರಾಯಿನ ವಿನೀತ್ ಪಿ. ಸುವರ್ಣ, ದಿಯಾ ಜಿ ಪಾಲನ್, ಕಾವ್ಯ ಮೊಕ್ಲೆಗ್ ಪ್ರತಿಭಾ ಪುರಸ್ಕಾರ ನಡತ್ಂಡ್.
ಈ ಪೊರ್ತುಡು ಸಾಧಕೆರ್ನ ನಿಲೆಟ್ಟ್ ಜಾರಂದಾಯ ಧೂಮಾವತಿ ಮಹಿಳಾ ಮಂಡಳಿದ ಅಧ್ಯಕ್ಷೆರ್ ಲತಾ ಶೇಖರ್, ಕಬಡ್ಡಿಪಟು ಶಶಾಂಕ್ ಆಚಾರ್ಯ ಕಾರ್ನಾಡ್ ಧರ್ಮಸಾನದ ಅರ್ಚಕೆರ್ ಸದಾನಂದ ಪೂಜಾರಿ
ಮೆರೆಗ್ ಮಾನಾದಿಗೆ ನಡತ್ಂಡ್.
ಶ್ರಾವ್ಯ ಬೊಕ್ಕ ದಿವ್ಯಾ ಮೊಕುಲು ಮಾನಾದಿಗೆದ ಓಲೆ ಓದಿಯೆರ್.
ಊರುದ ಗುರ್ಕಾರ್ಲಾಯಿನ ಹರಿಶ್ಚಂದ್ರ ಸಾಲ್ಯಾನ್ ಪ್ರಾಸ್ತಾವಿಕವಾದ್ ಪಾತೆರ್ದ್, ಕೊಳಚಿಕಂಬುಲ ಗ್ರಾಮದ ಅಭಿವೃದ್ಧಿದ ವಿಷಯೊಡು ಮಸ್ತ್ ಬೇಲೆ ಆವರೆ ಉಂಡು.
ಪಡ್ಡಾಯಿಡ್ ಹೆಜಮಾಡಿ ಬಂದರ್ ಆವೊಂದುಂಡು. ಅಂಚಾದ್ ಅಯಿತ್ತ ಅರುವೆರ್ದ್ ಕೊಳಚಿಕಂಬುಲದ ಜಾಗೆಗ್ ಭಾರಿ ಅಪಾಯ ಉಂಡು. ಅಯಿಕ್ ಸರಿಯಾಯಿನ ಪರಿಹಾರ ತೋಜಾವೊಡು ಪಂಡೆರ್.
ಬಿನ್ನೆರಾದ್ ಮುಲ್ಕಿ ನಗರ ಪಂಚಾಯತ್ ಉಪಾಧ್ಯಕ್ಷೆರ್ ಸತೀಶ್ ಅಂಚನ್ , ನಗರಪಂಚಾಯತ್ ಸದಸ್ಯೆರಾಯಿನ ಯೋಗೇಶ್ ಕೋಟ್ಯಾನ್, ಬಾಲಚಂದ್ರ ಕಾಮತ್,
ಅತಿಕಾರಿಬೆಟ್ಟು ಗ್ರಾಮಪಂಚಾಯತ್ ಅಧ್ಯಕ್ಷೆರ್ ಮನೋಹರ ಕೋಟ್ಯಾನ್, ಬಿಜೆಪಿ ಮುಲ್ಕಿ ಬೆದ್ರ ಮಂಡಲ ಅಧ್ಯಕ್ಷೆರ್ ಸುನಿಲ್ ಆಳ್ವ,
ರಂಗಕರ್ಮಿ ಪರಮಾನಂದ ಸಾಲ್ಯಾನ್, ಸಾನದ ಇಲ್ಲದ ಕೃಷ್ಣ ಪೂಜಾರಿ, ಯೂತ್ ಕ್ಲಬ್ ದ ಅಧ್ಯಕ್ಷೆರ್ ಜೀವನ್ ಕೋಟ್ಯಾನ್, ಕಾರ್ಯದರ್ಶಿ ಕಾರ್ತಿಕ್ ಕೋಟ್ಯಾನ್ ಇತ್ತೆರ್.
ಮುಲ್ಕಿ ಬಿಲ್ಲವ ಸಮಾಜ ಸೇವಾ ಸಂಘದ ಅಧ್ಯಕ್ಷೆರ್ ಪ್ರಕಾಶ್ ಸುವರ್ಣ ಬಿನ್ನೆರೆನ್ ಎದ್ಕೊಂಡೆರ್. ಕಾರ್ತಿಕ್ ಮುಲ್ಕಿ ಸಭೆ ಸುಧಾರಿಕೆ ಮಲ್ತೆರ್. ಸರಿತಾ ಸೊಲ್ಮೆ ಸಂದಾಯೆರ್.ಅವೆರ್ದ್ ಜೋಕುಲು ಬೊಕ್ಕ ಮಹಿಳಾ ಸದಸ್ಯೆರೆರ್ದ ನೃತ್ಯ ಕಾರ್ಯಕ್ರಮ ನಡತ್ಂಡ್ .ಪುಗರ್ತೆದ ರಂಗ ನಿರ್ದೇಶಕೆರ್ ಪರಮಾನಂದ ಸಾಲ್ಯಾನ್ ಮುತಾಲಿಕೆದ ಪರಮ ಪದ್ಮ ಕಲಾವಿದೆರೆರ್ದ್ “ಶಿವ ಪುರ್ಸಾದ ಬಬ್ಬರ್ಯೆ” ನಾಟಕ ನಡತ್ಂಡ್.
ಕಾಂಡೆ ಮಹಾಶಿವರಾತ್ರೆದ ಲೆಕ್ಕೊಡು ಸಾಮೂಹಿಕ ಸತ್ಯನಾರಾಯಣ ಪೂಜೆ ನಡತ್ಂಡ್.
