ಉಡುಪಿದ ಸುದ್ದಿ | Udupi News

ಕಾರ್ಲ: ಶ್ರೀ ಉಮಾಮಹೇಶ್ವರ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯಡ್ ಮಾ.22-28 ಮುಟ್ಟ ಬ್ರಹ್ಮಕಲಶೋಚ್ಚಯ ಅಂಚನೆ ಸಹಸ್ರ ಚಂಡಿಕಾ ಮಹಾಯಾಗ

ಒಡಿಪು: ಕಾರ್ಲ ತಾಲೂಕ್‌ದ ಅಡಪಾಡಿ ಪಳ್ಳಿ ಗ್ರಾಮದ ಶ್ರೀ ಉಮಾಮಹೇಶ್ವರ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯಡ್ ಮಾ.22-28 ಮುಟ್ಟ ಶ್ರೀ ಕ್ಷೇತ್ರಡ್ ಬ್ರಹ್ಮಕಲಶೋಚ್ಚಯ ಅಂಚನೆ ಸಹಸ್ರ ಚಂಡಿಕಾ ಮಹಾಯಾಗ ನಡಪರೆ ಉಂಡು.

ಬೇತೆ ಬೇತೆ ಧಾರ್ಮಿಕ ಕಾರ್ಯಕ್ರಮದೊಟ್ಟುಗು ಅಂಚನೆ ಶ್ರೀ ಸಂಸ್ಥಾನ ಗೌಡಪಾದಾಚಾರ್ಯ ಕೈವಲ್ಯ ಮಠಾಧೀಶ ಶ್ರೀಮದ್ ಶಿವಾನಂದ ಸರಸ್ವತೀ ಸ್ವಾಮೀಜಿ ಮೆರೆನ ಉಪಸ್ಥಿತಿಡ್ ಅಂಚನೆ ವೇದಮೂರ್ತಿ ಶ್ರೀ ಮೃಗೇಶ್ ಭಟ್, ಲಕ್ಷ್ಮೀಪುರ ಹಿರ್ಗಾನ ಬೊಕ್ಕ ವೇದಮೂರ್ತಿ ಶ್ರೀ ದಯಾನಂದ್ ಭಟ್, ಕಲ್ಲಡ್ಕ ಮೆರೆನ ಮುತಾಲಿಕೆಡ್ ನಡಪರೆ ಉಂಡು. ಈ ಲೇಸ್‌ಗ್ ಮಾತ ಭಕ್ತೆರ್ ಬತ್ತ್‌ದ್ ದೇವೆರೆನ ಅನುಗ್ರಹಗ್ ಪಾತ್ರರಾವೊಡು ಪಂದ್ ದೇವಲ್ಯದ ಅರ್ಚಕೆರ್ ಅಂಚನೆ ಅಡಪಾಡಿ ಕೋಡಿಮನೆ ಕುಟುಂಬಸ್ಥೆರ್, ಧರ್ಮದರ್ಶಿಲು ಪುಂಡಲೀಕ ನಾಯಕ್ ಲೆಪ್ಪೋಲೆಡ್ ತೆರಿಪಾದೆರ್.

ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಮಿಥುನ್ ರೈಗ್ ಜೂವ ಬೆದರಿಕೆ, ದೂರು ದಾಖಲ್

ಮುಲ್ಕಿ : ಕಾಂಗ್ರೆಸ್ ಮುಖಂಡೆರ್, ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಅಂಚಿನ ಮುಲ್ಕಿ-ಬೆದ್ರ ಕ್ಷೇತ್ರದ ವೋಟುದ ಉಸ್ತುವಾರಿ ಆಯಿನ ಮಿಥುನ್ ರೈ ಮೆರೆಗ್ ಸಾಮಾಜಿಕ ಜಾಲತಾಣಡ್ ಜೂವ ಬೆದರಿಕೆ ಪಾಡ್ದಿನ ಘಟನೆ ನಡದ್ಂಡ್.

ಈ ನಿಲೆಟ್ಟ್ ಮುಲ್ಕಿ ಪೊಲೀಸ್ ಠಾಣೆಡ್ ಮುಲ್ಕಿ ಬ್ಲಾಕ್ ಕಾಂಗ್ರೆಸ್ ದೂರು ದಾಖಲ್ ಮಲ್ತ್‌ದೆರ್. ಜೈ ಶ್ರೀ ರಾಮ್ ಪನ್ಪಿನ ಪುದರ್‌ದ ವಾಟ್ಸ್ ಆಪ್ ಗ್ರೂಪ್‌ಡ್ ಹನಿ ಹಿಂದೂಸ್ತಾನಿ ಬೊಂಬಾಯಿ ಪನ್ಪಿನ ಪುದರ್‌ಡ್ “ಮಿಥುನ್ ರೈ ಮೆರೆಗ್ “ಗುಂಡುದ ವನಸ್ ಮಲ್ಪಾವೆ” ಪನ್ಪಿನ ಬೆದರಿಕೆದ ಪೋಸ್ಟ್ ಒಂಜೆನ್ ಪಾಡ್ದೆರ್ ಪಂದ್ ಪೊಲೀಸ್ ದೂರ್‌ಡ್ ತೆರಿಪಾದೆರ್.
ಜೂವ ಬೆದರಿಕೆದ ಪೋಸ್ಟ್ ಪಾಡ್ದಿನಕ್ಲೆನ ಮಿತ್ತ್ ಸರಿಯಾಯಿನ ಕ್ರಮ ದೆತೊನೊಡು ಪಂದ್ ಮುಲ್ಕಿ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷೆರ್ ಮೋಹನ್ ಕೋಟ್ಯಾನ್ ಪಂತೆರ್.

ಕುಡ್ಲ: ದ್ವಿತೀಯ ಪಿಯುಸಿ ಪರೀಕ್ಷೆ ಸುರು-ತುಳುನಾಡ್‌ರ್ದ್ 49,975 ಕಲ್ಪಾರ್ಥಿಲು ಪರೀಕ್ಷೆಗ್ ಹಾಜರ್

ಕುಡ್ಲ/ಒಡಿಪು: ರಾಜ್ಯಡ್ ಇನಿರ್ದ್ ದ್ವಿತೀಯ ಪಿಯುಸಿ ಪರೀಕ್ಷೆ ಸುರು ಆದಿತ್ತ್‌ದ್, ಒಡಿಪು ಬೊಕ್ಕ ದಕ್ಷಿಣ ಕನ್ನಡ ಜಿಲ್ಲೆಡ್ 49,975 ಕಲ್ಪಾರ್ಥಿಲು ಪರೀಕ್ಷೆ ಬರಿಯೊಂದುಲ್ಲೆರ್.

ಕಾಂಡೆ 10.30 ಕ್ಕ್ ಪರೀಕ್ಷೆ ಸುರು ಆದಿತ್ತ್‌ದ್, ಮಧ್ಯಾಹ್ನ 1.30 ಮುಟ್ಟ ನಡಪರೆ ಉಂಡು. ಪರೀಕ್ಷೆದ ಕೇಂದ್ರಡ್ ಒವ್ವೇ ತೊಂದರೆ ಆಯರೆ ಬಲ್ಲಿ ಪಂದ್ ಸಿಸಿ ಕ್ಯಾಮರಾನ್ ಪಾಡ್ದೆರ್.

ಬಂಗಾರ್‌ದ ಅಂಗಡಿದ ಬೇಲೆದಾರೆನ್ ಕೆರ್ತಿನ ಆರೋಪಿ ಕುಡ್ಲಡ್ ಡಿಪ್ಲೊಮಾ ಮಲ್ತ್ ದಿತ್ತೆ!

ಕುಡ್ಲ: ಪೇಂಟೆದ ಹಂಪನಕಟ್ಟೆಡ್ ಇಪ್ಪುನ ಬಂಗಾರ್‌ದ ಅಂಗಡಿಡ್ ಬೇಲೆ ಮಲ್ತೊಂದಿತ್ತಿನ ರಾಘವೇಂದ್ರ ಆಚಾರ್ಯ ಮೆರೆನ್ ಕೆರ್ದ್ ಅಂಗಡಿಡ್ ಇತ್ತಿನ ಕೆಲ ಸೊತ್ತುಲೆನ್ ಕಂಡ್‌ದ್ ಪದ್ರಾಡ್ ಆತಿನ ಆರೋಪಿನ್ ಪೊಲೀಸೆರ್ ನಾಡ್ ಪತ್ ದೆರ್.

ದರೋಡೆ ಮಲ್ಪುನ ಉದ್ದೇಶರ್ದ್ ಕೆರ್ತೆ ಪಂದ್ ಆರೋಪಿ ಒತ್ತೊಂದೆ. ಕೋಯಿಕ್ಕೋಡ್ ಕೊಯಿಲಾಂಡಿದ ಶಿಫಾಝ್ (33) ಅರೆಸ್ಟ್ ಆಯಿನ ಆರೋಪಿ. ಬೇತೆ ಬೇತೆ ಆಯಾಮಡ್ ಕರ್ನಾಟಕ ಬೊಕ್ಕ ಕೇರಳಡ್ ಕೇಸ್‌ದ ತನಿಖೆ ಮಲ್ತಿನ ಪೊಲೀಸೆರೆಗ್ ಕಡೆಕ್ಕ್‌ಲ ಕಾಸ್ರೋಡುಡು ತಿಕ್ಕ್‌ದ್ ಬೂರ್ದೆ.

ಶಿಫಾಝ್ ಕುಡ್ಲದ ಕಾಲೇಜ್‌ಡ್ ಮೆಕ್ಯಾನಿಕಲ್ ಇಂಜಿನಿಯರಿಂಗ್‌ ಡಿಪ್ಲೊಮಾ ರಡ್ಡ್ ವರ್ಷ ಮಲ್ತ್‌ದ್ ಅಯಿರ್ದ್ ಬೊಕ್ಕ 2014-2019 ಮುಟ್ಟ ದುಬೈಡ್ ಬೇಲೆ ಮಲ್ತೊಂದಿತ್ತೆ. ಬೊಕ್ಕ ಬ್ಯಾರ ಮಲ್ತೊಂದಿತ್ತೆ ಪಂದ್ ತೆರಿದ್ ಬೈದ್ಂಡ್. ಆರೋಪಿಗ್ ಬೊಡೆದಿ ಬೊಕ್ಕ ಮಗಲ್ ಉಲ್ಲೆರ್. ಬೊಡೆದಿ ಬೊಕ್ಕ ಮಗಲ್ ಶಿಫಾಝ್‌ನ ಪೊಪ್ಪ ಬೊಕ್ಕ ಅಮ್ಮನೊಟ್ಟುಗು ಕ್ಯಾಲಿಕಟ್‌ಡ್ ವಾಸ ಆದ್ ಉಲ್ಲೆರ್.

ತೋಕೂರು ಫೇಮಸ್ ಯೂತ್ ಕ್ಲಬ್ ಅಧ್ಯಕ್ಷೆರಾದ್ ಭಾಸ್ಕರ್ ಅಮೀನ್ ಅವಿರೋಧ ಆಯ್ಕೆ

ಹಳೆಯಂಗಡಿ : ಫೇಮಸ್ ಯೂತ್ ಕ್ಲಬ್ (ರಿ)10ನೇ ತೋಕೂರು ನೆತ್ತ ಅಧ್ಯಕ್ಷೆರಾದ್ ಭಾಸ್ಕರ್ ಅಮೀನ್ ಮೇರ್ 5ನೇ ವರ್ಷೊಗುಲ ಅವಿರೋಧ ಆಯ್ಕೆ ಆಯೆರ್.

ಇಂಚೊಗು ನಡತಿನ ಕ್ಲಬ್ ದ ಮಹಾಸಭೆಟ್ಟ್ ಪೊಸ ಪದಾಧಿಕಾರಿಲೆನ ಆಯ್ಕೆ ನಡತ್ಂಡ್. ಗೌರವಾಧ್ಯಕ್ಷೆರಾದ್ ಗುರುರಾಜ ಎಸ್ ಪೂಜಾರಿ, ಉಪಾಧ್ಯಕ್ಷೆರಾದ್ ಭೋಜ ಕೋಟ್ಯಾನ್, ಕಾರ್ಯದರ್ಶಿಯಾದ್ ಹಿಮಕರ ಕೋಟ್ಯಾನ್, ಜೊತೆ ಕಾರ್ಯದರ್ಶಿಯಾದ್ ಬಶೀರ್ ಕಲ್ಲಾಪು, ಕೋಶಾಧಿಕಾರಿಯಾದ್ ನವೀನ್ ಚಂದ್ರ ಅಮೀನ್, ಸಂಘಟನಾ ಕಾರ್ಯದರ್ಶಿಲಾದ್ ಪ್ರಮೋದ್ ದೇವಾಡಿಗ, ಮಹಮ್ಮದ್ ಶರೀಫ್, ಸುಧೀರ್ ಭಂಡಾರಿ, ವಿಶ್ವಜೀತ್ ಆಚಾರ್ಯ, ಮಾಧ್ಯಮ ನಿರ್ವಾಹಕೆರಾದ್ ದುರ್ಗಾಪ್ರಸಾದ್, ಕ್ರೀಡಾ ಕಾರ್ಯದರ್ಶಿಯಾದ್ ಸಂಪತ್ ಜೆ ಶೆಟ್ಟಿ, ಜೊತೆ ಕ್ರೀಡಾ ಕಾರ್ಯದರ್ಶಿಯಾದ್ ಪ್ರಮೋದ್ ದೇವಾಡಿಗ, ಸಾಂಸ್ಕೃತಿಕ ಕಾರ್ಯದರ್ಶಿಯಾದ್ ಮೋಹನದಾಸ ದೇವಾಡಿಗ ಆಯ್ಕೆ ಆತೆರ್.

ಸಭೆಟ್ಟ್ ಕಾರ್ಯದರ್ಶಿ ಹಿಮಕರ್ ಕೋಟ್ಯಾನ್ ಸ್ವಾಗತ ಮಲ್ತ್ ದ್ ವಾರ್ಷಿಕ ಲೆಕ್ಕ ಪತ್ರ ಓದುದು ಕಡೆಕ್ಕ್ ಸೊಲ್ಮೆ ಸಂದಾಯೆರ್.

ಮುಲ್ಕಿ ಬಿಲ್ಲವ ಸಮಾಜ ಸೇವಾ ಸಂಘದ ಸದಸ್ಯತ್ವ ಅಭಿಯಾನ ಸುರು

ಮುಲ್ಕಿ : ದ.ಕ. ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪಡೆದಿನ ಬಿಲ್ಲವ ಸಮಾಜ ಸೇವಾ ಸಂಘ ಮುಲ್ಕಿ ನೆತ್ತ ಸದಸ್ಯತ್ವ ಅಭಿಯಾನಗ್ ಶಾಸಕೆರ್ ಉಮಾನಾಥ ಕೋಟ್ಯಾನ್ ಫೆ. 26 ಐತಾರ ಬಿಲ್ಲವ ಸಂಘದ ಚಾವಡಿಡ್ ಚಾಲನೆ ಕೊರಿಯೆರ್.

ಈ ಪೊರ್ತುಡು ಪಾತೆರಿನ ಆರ್, 1934 ನೇ ಇಸ್ವಿಡ್ ಸ್ಥಾಪನೆ ಆತಿನ ಪಿರಾಕ್ ದ ಬಿಲ್ಲವ ಸಮಾಜ ಸೇವಾ ಸಂಘೊಡು ಮಾತೆರ್ಲ ಸದಸ್ಯೆರಾದ್ ಸಂಘ ಗಟ್ಟಿ ಮಲ್ಪೊಡು, ನಮ್ಮ ಸಮಾಜದ ಶಕ್ತಿನ್ ತೋಜಾವೊಡು ಪಂದ್ ಶಾಸಕೆರ್ ಉಮಾನಾಥ ಕೋಟ್ಯಾನ್ ಪಂಡೆರ್.

ಮುಲ್ಕಿ ಬಿಲ್ಲವ ಸಂಘ ನಮಕ್ಕ್ ಮಾತೆರೆಗ್ಲ ಆದಿದ ಸಂಘ ಇತ್ತಿಲೆಕ್ಕ. ಓಲಿತ್ತಿನಕುಲುಲ ಮೂಲು ಸದಸ್ಯೆರಾವೊಲಿ. ಮಾತೆರ್ಲ ಸದಸ್ಯೆರಾದ್ ಸಂಘೊನು ನನಾತ್ ಬಲಿಷ್ಠ ಮಲ್ಪುಗ. ಮುಲ್ಕಿ ಬಿಲ್ಲವ ಸಂಘದ ಸಮುದಾಯ ಭವನೊಗು ಕುಡೊಂಜಿ ಹಂತೊಡು 50 ಲಕ್ಷ ರೂ. ಅನುದಾನ ಕೊರೊಂದುಲ್ಲ ಪಂಡೆರ್.

ಈ ಪೊರ್ತುಡು ಸಮುದಾಯ ಭವನದ ವಿಜ್ಞಾಪನೆ ಪತ್ರನ್ ಬಿನ್ನೆರೆನ್ ನಕುಲು ಬುಡುಗಡೆ ಮಲ್ತೆರ್.
ಅವ್ವತ್ತಾಂದೆ 5,000 ರೂ. ಕೊರ್ದು ಎ ವಿಭಾಗದ ಆಜೀವ ಸದಸ್ಯತ್ವನ್ ಶಾಸಕೆರ್ ದೆತೊಂದು ಸಾಂಕೇತಿಕವಾದ್ ಅರೆನನೇ ಸದಸ್ಯತ್ವ ಕಾರ್ಡ್ ಬುಡುಗಡೆ ಮಲ್ದೆರ್ .

ಮಲ್ಲ ಬಿನ್ನೆರಾದ್ ರಾಷ್ಟ್ರೀಯ ಬಿಲ್ಲವ ಮಹಾಮಂಡಲದ ಅಧ್ಯಕ್ಷೆರ್ ಡಾ.ರಾಜಶೇಖರ ಕೋಟ್ಯಾನ್, ಬಿರುವೆರ್ ಕುಡ್ಲ ಮುಲ್ಕಿದ ಅಧ್ಯಕ್ಷೆರ್ ಕಿಶೋರ್ ಸಾಲ್ಯಾನ್,
ಯುವವಾಹಿನಿ ಮುಲ್ಕಿ ಘಟಕದ ಅಧ್ಯಕ್ಷೆರ್ ಭಾರತಿ ಭಾಸ್ಕರ್, ಶ್ರೀ ನಾರಾಯಣಗುರು ಮಹಿಳಾ ಮಂಡಳಿದ ಅಧ್ಯಕ್ಷೆರ್ ಶಶಿಕಲಾ ಯದೀಶ್ ಅಮೀನ್, ಸೇವಾದಳದ ಅಧ್ಯಕ್ಷೆರ್ ಶಂಕರ್ ಪಡುಬೈಲ್ ಬತ್ತಿತ್ತೆರ್. ಯಶಸ್ವಿ, ಮೇಘನಾ ದೇವೆರೆನ್ ಸುಗಿತೆರ್. ಬಿಲ್ಲವ ಸಂಘದ ಅಧ್ಯಕ್ಷೆರ್ ಪ್ರಕಾಶ್ ಸುವರ್ಣ ಪ್ರಾಸ್ತಾವಿಕ ವಾದ್ ಪಾತೆರಿಯೆರ್. ಪತ್ರಕರ್ತೆರ್ ನರೇಂದ್ರ ಕೆರೆಕಾಡು ಸಭೆ ಸುಧಾರಿಕೆ ಮಲ್ತೆರ್. ಜಯಕುಮಾರ್ ಕುಬೆವೂರು ಸೊಲ್ಮೆ ಸಂದಾಯೆರ್.

ಕಾಂಡೆ ಬಿಲ್ಲವ ಸಮಾಜ ಸೇವಾ ಸಂಘ, ಮುಲ್ಕಿ, ಶ್ರೀ ನಾರಾಯಣಗುರು ಮಹಿಳಾ ಮಂಡಳಿ ಅಂಚೆನೆ ಶ್ರೀ ನಾರಾಯಣ ಗುರು ಸೇವಾ ದಳತ್ತ ಮುತಾಲಿಕೆಡ್ ಸಾರ್ವಜನಿಕ ಶ್ರೀ ಸತ್ಯನಾರಾಯಣ ಪೂಜೆ ನಡತ್ಂಡ್.