ಶ್ರೀ ನಾರಾಯಣ ಗುರು ಸೇವಾ ಸಮಿತಿ (ರಿ) ಹಳೆಸಂತೆವೇರಿ, ಸಕಲೇಶಪುರ ಹಾಸನ, ಬ್ರಹ್ಮಶ್ರೀ ನಾರಾಯಣ ಗುರು ಮಹಿಳಾ ಸಮಿತಿ ಬ್ರಹ್ಮಶ್ರೀ ಯುವ ಬಿಲ್ಲವ ವೇದಿಕೆ ಮೊಕ್ಲೆನ ಒಟ್ಟು ಸೇರಿಗೆಡ್ ಗುರು ವಂದನಾ ಕಾರ್ಯಕ್ರಮ-2022 ಲೇಸ್ ನ.17 ತಾರೀಕ್ ಗುರುವಾರ ಕಾಂಡೆ 9.30 ಗಂಟೆಗ್ ಸಕಲೇಶಪುರತ್ತ ಕುಶಾಲನಗರ ಬಡಾವಣೆ ಶ್ರೀಮತಿ ಗಂಗಮ್ಮ ಲಕ್ಷ್ಮೇಗೌಡೆರ್ನ ಒಕ್ಕಲಿಗೆರೆ ಸಮುದಾಯ ಭವನಡ್ ನಡಪರೆ ಉಂಡು.
ಗಡಿನಾಡ ಸಾಹಿತ್ಯ ಸಾಂಸ್ಕೃತಿಕ ಅಕಾಡೆಮಿ (ರಿ) ಯುಎಇ ಘಟಕ ದುಬೈ ಮುತಾಲಿಕೆಡ್ “ದುಬೈ ಗಡಿನಾಡ ಉತ್ಸವ” ಲೇಸ್ ನ.20 ಗ್ ದುಬೈದ ಜೆಎಸ್ಎಸ್ ಸ್ಕೂಲ್ ಆಡಿಟೋರಿಯಂ ಆಲ್-ಸಫಾಡ್ ನಡಪರೆ ಉಂಡು.
ಈ ಲೇಸ್ಡ್ ಜಾನಪದ ಪರಿಷತ್ ಬೆಂಗ್ಲೂರ್ ಅಂಚನೆ ದಕ್ಷಿಣ ಕನ್ನಡ ಜಿಲ್ಲೆದ ಅಧ್ಯಕ್ಷೆರ್ ಆಯಿನ ಪ್ರವೀಣ್ ಕುಮಾರ್ ಕೊಡಿಯಾಲ್ ಬೈಲ್ ಮೇರ್ ಮಾನಾದಿಗೆ ದೆತೊನರೆ ಉಲ್ಲೆರ್.
ಯಕ್ಷಗಾನ ಪಟ್ಲ ಫೌಂಡೇಶನ್ ದುಬಾಯಿ ಘಟಕ ಬೊಕ್ಕ ಯಕ್ಷಗಾನ ಅಭ್ಯಾಸ ಕೇಂದ್ರ ಯುಎಇ ಮೊಕಲೆನ ಒಟ್ಟು ಸೇರಿಗೆಡ್ ನಡಪುನ “ಪಟ್ಲ ಸಂಭ್ರಮ 2023 ದುಬೈ” ಉಂದೆತ್ತ ಸಮಾಲೋಚನ ಸಭೆ ಪೇಂಟೆದ ಗಿಸಸ್ ದ ಫಾರ್ಚೂನ್ ಪ್ಲಾಝದ ಸಭಾಂಗಣಡ್ ನಡತ್ಂಡ್.
ಪಟ್ಲ ಪೌಂಡೇಶನ್ ದುಬೈ ಘಟಕದ ಅಧ್ಯಕ್ಷೆರ್ ಸರ್ವೋತ್ತಮ ಶೆಟ್ಟಿ, ಪಟ್ಲ ಘಟಕದ ಸಂಚಾಲಕೆರ್ ಪ್ರವೀಣ್ ಕುಮಾರ್ ಶೆಟ್ಟಿ, ಬೊಂಬಾಯಿ ಕಲಾ ಸಂಘಟಕೆರ್ ಕರ್ನೂರು ಮೋಹನ್ ರೈ, ಉದ್ಯಮಿ ಸುಂದರ ಶೆಟ್ಟಿ, ಮನೋಹರ ತೋನ್ಸೆ,ಚಿತ್ರ ನಿರ್ಮಾಪಕೆರ್ ಈಶ್ವರದಾಸ್ ಶೆಟ್ಟಿ,ಬಿಲ್ಲವಾಸ್ ದುಬೈದ ಪ್ರಭಾಕರ ಸುವರ್ಣ, ಗಮ್ಮತ್ ಕಲಾವಿದರ ವಾಸು ಶೆಟ್ಟಿ ಬೊಕ್ಕ ಯಕ್ಷಗಾನ ಅಭ್ಯಾಸ ಕೆಂದ್ರ ಯುಎಇ ದ ಗುರುಕುಲು ಆಯಿನ ಶೇಖರ್ ಡಿ.ಶೆಟ್ಟಿಗಾರ್ ಮೊಕುಲು ತುಡರ್ ಅರ್ಲಾದ್ ಲೇಸ್ ಉದಿಪನ ಮಲ್ತೆರ್. ಪಟ್ಲ ಫೌಂಡೇಶನ್ ದುಬೈ ಘಟಕದ ಅಧ್ಯಕ್ಷೆರ್ ಸರ್ವೋತ್ತಮ ಶೆಟ್ಟಿ ಪಾತೆರ್ದ್, ಜೂನ್ 11 ಕ್ಕ್ ಪಟ್ಲ ಸಂಭ್ರಮ 2023 ಲೇಸ್ ದುಬೈಡ್ ನಡಪರೆ ಉಂಡು. ಈ ಲೇಸ್ಡ್ ಜಗತ್ತ್ಡ್ ಇಪ್ಪುನ 39 ಪಟ್ಲ ಘಟಕದ ಪದಾಧಿಕಾರಿಲು ಪಾಲ್ ಪಡೆಯರೆ ಉಲ್ಲೆರ್ ಪಂದ್ ಪಂಡೆರ್.
ಈ ಪೊರ್ತುಡು ಸಂಚಾಲಕೆರ್ ಪ್ರವೀಣ್ ಕುಮಾರ್ ಶೆಟ್ಟಿ, ಮನೋಹರ ತೋನ್ಸೆ, ಕರ್ನೂರು ಮೋಹನ್ ರೈ, ಯಕ್ಷಗಾನ ಗುರು ಶೇಖರ್ ಡಿ ಶೆಟ್ಟಿಗಾರ್, ಪ್ರಭಾಕರ್ ಸುವರ್ಣ, ವಾಸು ಶೆಟ್ಟಿ, ಬಾಲಕೃಷ್ಣ ಶೆಟ್ಟಿ ಮಾಡುರುಗುತ್ತು ಲೇಸ್ಡ್ ಇತ್ತೆರ್.
ಯಕ್ಷ ಯೋಧಾಸ್ ಮುತಾಲಿಕೆಡ್ ಡಿಸೆಂಬರ್ ತಿಂಗೊಲ್ಡ್ ನಡಪುನ ಅಂತರ್ ಕ್ಲಬ್ ಕ್ರಿಕೆಟ್ ಟೂರ್ನಮೆಂಟ್ ದ ಬಗೆಟ್ ನಡತ್ಂಡ್. ಪಟ್ಲ ಘಟಕದ ಕೋಶಾಧಿಕಾರಿ ದಿನೇಶ್ ಶೆಟ್ಟಿ ಕೊಟಿಂಜ ಬತ್ತಿನ ಬಿನ್ನೆರೆನ್ ಎದ್ಕೊಂದು ಲೇಸ್ ಸುದಾರಿಕೆ ಮಲ್ತೆರ್.
ವರದಿ: ವಿಜಯಕುಮಾರ್ ಶೆಟ್ಟಿ ಗಾಣದಮೂಲೆ ಮಜಿಬೈಲ್ (ದುಬೈ)
ಕೆನ್ -ಈ -ಮಾಬುನಿ ಶಿಟೋರಿಯೋ ಕರಾಟೆ ಸ್ಕೂಲ್ ಆಫ್ ಇಂಡಿಯಾ ಮೊಕುಲೆನ ಸಂಘಟನೆಟ್ಟ್ ಸುರುತ್ತ ಸರ್ತಿ ರಾಷ್ಟ್ರಮಟ್ಟದ ಕರಾಟೆ ಚಾಂಪಿಯನ್ ಶಿಪ್ ಒಡಿಪುದ ತಂಡರ್ಸ್ ಗ್ರಾಂಡ್ ಬೇ ಸುಭಾಷ್ ನಗರ ಕುರ್ಕಾಲ್ ಡ್ ನಡತ್ಂಡ್.
ಉಂದೆಟ್ಟ್ ಒಡಿಪುದ ಮುಕುಂದ ಕೃಪಾ ಆಂಗ್ಲ ಮಾಧ್ಯಮ ಶಾಲೆದ ಕಲ್ಪಾರ್ಥಿಲು ಪಾಲ್ ಪಡೆದ್ ಇನಾಮು ಪಡೆತೆರ್. ಈ ಪೊರ್ತುಡು ಮುಖ್ಯೋಪಾಧ್ಯಾಯಿನಿ ಸುಜಾತ ಶಾಂತಾರಾಮ ಶೆಟ್ಟಿ, ಕರಾಟೆದ ಮುಖ್ಯ ಶಿಕ್ಷಕೆರ್ ಸುಂದರಂ ಅಂಚನೆ ರವಿ ಸಾಲ್ಯಾನ್, ಪಾಂಡುರಂಗ ಪದ್ದಂ ಲೇಸ್ಡ್ ಇತ್ತೆರ್.
“ಕಾಂತಾರ ಪಿಚ್ಚರ್ರ್ದ್ ಬೊಕ್ಕ ದೈವದ ಮಿತ್ತ್ ನಂಬಿಕೆ ಎಚ್ಚ ಆತ್ಂಡ್. ಕೊರಗಜ್ಜನ ಬಗೆಟ್ಟ್ ಕೇಂದ್ ತೆರಿದಿತ್ತೆ. ಈ ಸಾನಿಧ್ಯನ್ ತೂಯರೆ ಬೈದೆ. ಅಜ್ಜನ ದಯೆರ್ದ್ ನನಾತ್ ಪಿಚ್ಚರ್ ತಿಕ್ಕಡ್ ಪಂದ್ ಪ್ರಾರ್ಥನೆ ಮಲ್ತ್ದೆ. ಕಾಂತಾರ ಪಿಚ್ಚರ್ 50 ದಿನ ದಾಟಿನವು ದೈವದ ಕೃಪೆರ್ದ್ “” ಪಂದ್ ಕಾಂತಾರ ಪಿಚ್ಚರ್ದ ನಾಯಕ ನಟಿ ಸಪ್ತಮಿ ಪಂಡೆರ್.
ಆರ್ ಕಲ್ಲಾಪು ಬುರ್ದುಗೋಳಿ ಕೊರಗಜ್ಜನ ಆದಿಜಾಗೆಗ್ ಅಂಚನೆ ಕುತ್ತಾರು ಕೊರಗಜ್ಜನ ಆದಿಜಾಗೆಗ್ ಭೇಟಿ ಕೊರ್ದ್ ಪಾತೆರಿಯೆರ್.
ಈ ಪೊರ್ತುಡು ಕಾಂತಾರ ಪಿಚ್ಚರ್ದ ನಟಿ ಗುರು ಸನಿಲ್, ಕದ್ರಿ ಕ್ರಿಕೆಟರ್ಸ್ ಅಧ್ಯಕ್ಷೆರ್ ಜಗದೀಶ್ ಕದ್ರಿ, ಸಪ್ತಮಿ ಮೆರೆನ ಅಪ್ಪೆ ಶಾಂತಾ ಯು., ಕಲ್ಲಾಪು ಬುರ್ದುಗೋಳಿ ಕೊರಗಜ್ಜ ಸ್ಥಾನದ ವ್ಯವಸ್ಥಾಪನಾ ಸಮಿತಿದ ವಿಶ್ವನಾಥ್ ನಾಯಕ್, ಕುತ್ತಾರು ಕೊರಗಜ್ಜನ ತಳದ ದೇವಿಪ್ರಸಾದ್ ಶೆಟ್ಟಿ, ಸಾಯಿ ಪರಿವಾರ್ ಟ್ರಸ್ಟಿಲು ಆಯಿನ ಪುರುಷೋತ್ತಮ್ ಕಲ್ಲಾಪು, ಸಂತೋಷ್ ಅಂಬ್ಲಮೊಗರು, ಪ್ರವೀಣ್ ಎಸ್. ಕುಂಪಲ, ಕಿಶೋರ್ ಡಿ.ಕೆ., ಪುರುಷೋತ್ತಮ್ ಶೆಟ್ಟಿ, ಪ್ರಶಾಂತ್, ಲೇಸ್ಡ್ ಇತ್ತೆರ್.
ವರದಿ: ಸಂತೋಷ್ ಅಂಬ್ಲಮೊಗರು
ಕುಡ್ಲ : 69ನೇ ಅಖಿಲ ಭಾರತ ಸಹಕಾರ ಸಪ್ತಾಹ 2022 ಲೇಸ್ ನ. 18 ಸುಕ್ರಾರ ಕಾಂಡೆ 10 ಗಂಟೆಗ್ ಕುಡ್ಲದ ಕರಾವಳಿ ಉತ್ಸವ ಮೈದಾನಡ್ ನಡಪರೆ ಉಂಡು.
ದಕ್ಷಿಣ ಕನ್ನಡ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ ನಿಯಮಿತ ಕುಡ್ಲ, ಕರ್ನಾಟಕ ರಾಜ್ಯ ಸಹಕಾರ ಮಹಾಮಂಡಳ ನಿಯಮಿತ ಬೆಂಗ್ಲೂರ್, ಕರ್ನಾಟಕ ರಾಜ್ಯ ಸಹಕಾರ ಮಾರಾಟ ಮಹಾಮಂಡಳ ನಿಯಮಿತ ಬೆಂಗ್ಲೂರ್ ಮೊಕುಲೆನ ಮುತಾಲಿಕೆಡ್ ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲಾ ಸಹಕಾರಿ ಯೂನಿಯನ್ ನಿಯಮಿತ, ದಕ್ಷಿಣ ಕನ್ನಡ ಸಹಕಾರಿ ಹಾಲು ಉತ್ಪಾದಕೆರ್ನ ಒಕ್ಕೂಟ ನಿಯಮಿತ ಕುಡ್ಲ, ನವೋದಯ ಗ್ರಾಮ ವಿಕಾಸ ಚಾರಿಟೇಬಲ್ ಟ್ರಸ್ಟ್ ರಿ. ಕುಡ್ಲ, ಸಹಕಾರ ಇಲಾಖೆ ಅಂಚನೆ ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲೆದ ಮಾತ ಕೃಷಿ ಪತ್ತ್ದ ಸಹಕಾರ ಸಂಘಲು, ಪಟ್ಟಣ ಸಹಕಾರ ಬ್ಯಾಂಕ್ ಅಂಚನೆ ಮಾತ ಬಗೆತ್ತ ಸಹಕಾರ ಸಂಘದ ಒಟ್ಟು ಸೇರಿಗೆಡ್ ಈ ಲೇಸ್ ನಡಪರೆ ಉಂಡು.
ಈ ಬಗೆಟ್ಟ್ ಅಂಗಾರೆ ಪತ್ರಿಕಾಗೋಷ್ಠಿಡ್ ಪಾತೆರಿನ ಎಸ್ ಸಿಡಿಸಿಸಿ ಬ್ಯಾಂಕ್ ದ ಅಧ್ಯಕ್ಷೆರ್ ಡಾ| ಎಂ. ಎನ್. ರಾಜೇಂದ್ರ ಕುಮಾರ್ ಮೇರ್, ಪ್ರತಿ ವರ್ಷ ನ.14-20 ಮುಟ್ಟ ರಾಷ್ಟ್ರ ಮಟ್ಟಡ್ “ಅಖಿಲ ಭಾರತ ಸಹಕಾರ ಸಪ್ತಾಹ” ನಡಪುಂಡು. ಪಂಡಿತ್ ನೆಹರೂ ಮೆರೆನ ಪುಟ್ಟಿನ ದಿನ ಆಯಿನ ಕೋಡೆ ನವೆಂಬರ್ 14 ಕ್ಕ್ ಸಪ್ತಾಹದ ಉದಿಪನ ನಡತ್ಂಡ್. ಕುಡ್ಲಡ್ ನಡಪುನ ಲೇಸ್ ನ್ ಮೈಸೂರ್ ಜಿಲ್ಲಾ ಉಸ್ತುವಾರಿ ಸಚಿವೆರ್ ಎಸ್. ಟಿ. ಸೋಮಶೇಖರ್ ಉದಿಪನ ಮಲ್ಪರೆ ಉಲ್ಲೆರ್. ಜಿಲ್ಲೆದ 5 ಜನಕ್ಕ್ ಸಹಕಾರ ರತ್ನ ಪ್ರಶಸ್ತಿ ಪಟ್ಟುನ ಲೇಸ್ ನಡಪರೆ ಉಂಡು. ದಕ್ಷಿಣ ಕನ್ನಡ ಜಿಲ್ಲೆರ್ದ್ ಕೊಂಕೋಡಿ ಪದ್ಮನಾಭ, ನಿತ್ಯಾನಂದ ಮುಂಡೋಡಿ ಅಂಚನೆ ದಂಬೆಕಾನ ಸದಾಶಿವ ರೈ, ಒಡಿಪು ಜಿಲ್ಲೆರ್ದ್ ಜಯಕರ ಶೆಟ್ಟಿ ಇಂದ್ರಾಳಿ, ಯಶ್ಪಾಲ್ ಸುವರ್ಣ ಮೊಕುಲು ಸಹಕಾರ ರತ್ನ ಪ್ರಶಸ್ತಿಗ್ ಆಯ್ಕೆಯಾತೆರ್. ಈ ಪ್ರಶಸ್ತಿನ್ ಜಿಲ್ಲಾ ಉಸ್ತುವಾರಿ ಸಚಿವೆರ್ ಆಯಿನ ವಿ. ಸುನಿಲ್ ಕುಮಾರ್ ಪಟ್ಟಿಯೆರ ಉಲ್ಲೆರ್ ಪಂದ್ ತೆರಿಪಾಯೆರ್.
ಕಾಂಡೆ 9 ಗಂಟೆಗ್ ಸಹಕಾರ ಸಂಘ, ಸಂಸ್ಥೆಲೆನ ಪ್ರತಿನಿಧಿಲೆನ “ಸಹಕಾರ ಜಾಥಾ” ದಕ್ಷಿಣ ಕನ್ನಡ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ದ ಜಾಗೆರ್ದ್ ಕರಾವಳಿ ಉತ್ಸವ ಮೈದಾನ ಮುಟ್ಟ ಪೋಯರೆ ಉಂಡು. ಬೇತೆ ಬೇತೆ ರೀತಿದ ಟ್ಯಾಬ್ಲೊ, ಚೆಂಡೆ, ಕೊಂಬು, ಸ್ಯಾಕ್ಸೋಫೋನ್ದೊಟ್ಟುಗು ಈ ಜಾಥಾ ನಡಪರೆ ಉಂಡು. ಪತ್ರಿಕಾಗೋಷ್ಠಿಡ್ ಗೋವಿಂದ ಶೆಟ್ಟಿ, ರಮೇಶ್ ಸೇರಿನಂಚನೆ ಬ್ಯಾಂಕ್ದ ಪದಾಧಿಕಾರಿಲು ಇತ್ತೆರ್.
ಕುಡ್ಲ: ಕಾಂತಾರ ಪಿಚ್ಚರ್ ಡ್ ದೈವಾರಾಧನೆಡ್ ಇಪ್ಪುನ ಪರಿಶಿಷ್ಟ ಜಾತಿಗ್ ಸೇರಿನ ಸಮುದಾಯನ್ ಎಲ್ಯ ಮಟ್ಟಡ್ ತೋಜ್ಪಾದೆರ್. ಕೆಲವು ಕಡೆಟ್ಟ್ ಹಿಂಸೆನ್ ತೊಜಪಾದೆರ್ ಪಂದ್ ಸಮತಾ ಸೈನಿಕ ದಳತ್ತಕುಲು ಅಯಿತ್ತ ವಿರುದ್ದ ಸ್ವರ ಲಕ್ಕಾದೆರ್.
ಈ ಬಗೆಟ್ಟ್ ಕುಡ್ಲಡ್ ಸುದ್ದಿಗೋಷ್ಠಿ ಮಲ್ತ್ದ್ ರಾಜ್ಯ ಪ್ರಧಾನ ಕಾರ್ಯದರ್ಶಿ ಲೋಲಾಕ್ಷ ತೆರಿಪಾದೆರ್. ಈ ಪಿಚ್ಚರ್ಡ್ ಬೊಡ್ಚಾಂದಿನ ದೃಶ್ಯಲೆನ್ ಕಟ್ಟ್ ಮಲ್ಪೊಡು. ಅಡೆ ಮುಟ್ಟ ಪಿಚ್ಚರ್ದ ಶೋನ್ ಉಂತಾವೊಡು ಪಂದ್ ಒತ್ತಾಯ ಮಲ್ತೆರ್.
ಪಿಚ್ಚರ್ದ ಕೂಟದ ಬಗೆಟ್ ದೂರು ಇಜ್ಜಿ. ಪಿಚ್ಚರ್ಡ್ ದೈವನರ್ತಕ ಸಮುದಾಯದ ಜನಕ್ಲೆನ್ ಅವೆಟ್ಟ್ಲ ಪೊಂಜೊವುಲೆನ್ ಬೊಕ್ಕ ಜವನೆರೆನ್ ಅಪಮಾನ ಮಲ್ಪುನ ದೃಶ್ಯ ಉಂಡು. ನಮ್ಮ ಸಮುದಾಯದ ಜವನೆರೆಗ್ ಕಾಸ್, ಸಾರಯಿ ಕೊರ್ಂಡ ಒವ್ ಬೇಲೆಲ ಮಲ್ಪುವೆರ್ ಪಂದ್ ಈ ಪಿಚ್ಚರ್ಡ್ ಕೆಲ ದೃಶ್ಯ ಉಂಡು. ದೈವಾರಾಧನೆಡ್ ಮಾನವ ಹಿಂಸೆಗ್ ಅವಕಾಶ ಇಜ್ಜಿ. ಆ ಪಿಚ್ಚರ್ದ ಕೆಲ ದೃಶ್ಯಲೆಡ್ ದೈವ ನಿಂದನೆ ಆತ್ಂಡ್. ಆಂಡಲ ಈ ಪಿಚ್ಚರ್ಗ್ ಸೆನ್ಸಾರ್ ಮಂಡಳಿ ಯು/ಎ ಪ್ರಮಾಣ ಪತ್ರನ್ ಕೊರ್ತ್ಂಡ್. ಈ ಕ್ರಮ ಸರಿ ಅತ್ತ್ ಪಂದ್ ಆರ್ ಪಂತೆರ್.
ಕಾಂತಾರ ಪಿಚ್ಚರ್ಡ್ ಇಂಚಿನ ಕೆಲ ದೃಶ್ಯಲೆನ್ ಕಟ್ಟ್ ಮಲ್ಪುನ ಮುಟ್ಟ ಈ ಪಿಚ್ಚರ್ದ ಪ್ರದರ್ಶನನ್ ತಡೆಯರೆ ಜಿಲ್ಲಾ ದಂಡಾಧಿಕಾರಿ ಆಯಿನ ಜಿಲ್ಲಾಧಿಕಾರಿ ಕ್ರಮ ದೆತೊನೊಡು ಪಂದ್ ಒತ್ತಾಯ ಮಲ್ತೆರ್.
ತೊರ್ತಲ್ : ಅಪ್ಪೆ ಬಾಸೆ ಪೊರ್ಂಬಾಟ ಕೂಟ ತುಲುನಾಡ್ ಮುತಾಲಿಕೆಡ್ ನ.27 ತಾರೀಕ್ ಗ್ ಬಯ್ಯ 4 ಗಂಟೆರ್ದ್ ಸುರತ್ಕಲ್ ಕರ್ನಾಟಕ ಸೇವಾ ವೃಂದ ಚಾವಡಿಡ್ “ತೊರ್ತಲ್ಡ್ ತುಲು ಉಚ್ಚಯ” ಲೇಸ್ ನಡಪರೆ ಉಂಡು.
ಈ ಲೇಸ್ ದ ಲೆಪ್ಪೋಲೆನ್ ಇನಿ ಸುರತ್ಕಲ್ ಇಡ್ಯಾ ಶ್ರೀ ಮಹಾಲಿಂಗೇಶ್ವರ ದೇವಲ್ಯಡ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ನಿಕಟ ಪೂರ್ವ ಅಧ್ಯಕ್ಷೆರ್ ದಯಾನಂದ ಜಿ ಕತ್ತಲ್ ಸಾರ್, ಸದಸ್ಯೆರ್ ನಾಗೇಶ್ ಕುಲಾಲ್, ದೇವಲ್ಯದ ಅರ್ಚಕೆರ್ ವಿದ್ಯಾಧರ ಭಟ್, ಶಂಕರ ಭಟ್, ತುಳು ಕೂಟ ಕತಾರ್ ದ ಕಾರ್ಯದರ್ಶಿ ಪುನೀತ್ ಸಾಗರ್ ಸಮ್ಮುಖಡ್ ಬುಡುಗಡೆ ಮಲ್ತೆರ್.
ಈ ಪೊರ್ತುಡು ಸುದರ್ಶನ್ ಸುರತ್ಕಲ್, ರಾಜ್ಶೇಖರ, ಪ್ರದೀಪ್ ರಾಜ್ ಕುಡ್ಲ, ಅರುಣ್ ಸುರತ್ಕಲ್, ವಿನೋದ್ ಶೆಟ್ಟಿ, ಸಂದೀಪ್ ಮದ್ಯ ಅಕ್ಷಯ್ ಪೇಜಾವರ ಲೇಸ್ ಡ್ ಇತ್ತೆರ್.
ಸೇವಾ ಭದ್ರತೆ ಸೇರಿನಂಚನೆ ಬೇತೆ ಬೇತೆ ಬೇಡಿಕೆಗ್ ಈಡೇರಿಸಾಯರೆ ಒತ್ತಾಯ ಮಲ್ತ್ದ್ ಅಖಿಲ ಭಾರತ ಬ್ಯಾಂಕ್ ಉದ್ಯೋಗಿಲೆನ ಒಕ್ಕೂಟ ನವೆಂಬರ್ 19 ತಾರೀಕ್ಗ್ ದೇಶಡ್ ಮುಷ್ಕರ ಮಲ್ಪರೆ ಲೆಪ್ಪು ಕೊರ್ತ್ಂಡ್.
ಇಂಚಾದ್ ಎಟಿಎಂ ಸೇರಿನಂಚನೆ ಬ್ಯಾಂಕಿಂಗ್ ಸೇವೆಲೆಡ್ ವ್ಯತ್ಯಾಸ ಆಪಿನ ಸಾಧ್ಯತೆ ಉಂಡು.
ಕುದ್ರೋಳಿ : ಬ್ರಹ್ಮಶ್ರೀ ನಾರಾಯಣ ಗುರುಕ್ಲೆನ ತತ್ವ ಸಂದೇಶ ಇತ್ತಿನ, ವಿದ್ದು ಉಚ್ಚಿಲ ನಿರ್ದೇಶನ ಮಲ್ತಿನ “ಶೂದ್ರ ಶಿವ” ನಾಟಕ ರಂಗಭೂಮಿಡ್ ಪೊಸ ರಂಗ್ನ್ ಕೊರ್ದು ಎಡ್ಡೆ ರೀತಿಡ್ ಪ್ರದರ್ಶನ ಆವಡ್ ಪಂದ್ ಕೇಂದ್ರದ ಮಾಜಿ ಸಚಿವೆರ್, ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರದ ಅಭಿವೃದ್ಧಿ ರೂವಾರಿ ಬಿ. ಜನಾರ್ದನ ಪೂಜಾರ್ಲು ಪಂಡೆರ್.
ಕುದ್ರೋಳಿ ಶ್ರೀ ಗೋಕರ್ಣನಾಥ ದೇವಲ್ಯದ ಕೊರಗಪ್ಪ ಕಲ್ಯಾಣ ಮಂಟಪಡ್ ರುದ್ರ ಥಿಯೇಟರ್ ಕುಡ್ಲ ಮುತಾಲಿಕೆಡ್ ನಿರ್ಮಾಣ ಆಯರೆ ಇಪ್ಪುನ ಪೊಸ ರಂಗ ಪ್ರಯೋಗ “ಶೂದ್ರ ಶಿವ” ಪೋಸ್ಟರ್ ಬುಡುಗಡೆ ಬೊಕ್ಕ ರಂಗ ಚಾಲನೆ ಮಲ್ತ್ದ್ ಪಾತೆರಿಯೆರ್. ಇತ್ತೆದ ಕಾಲಡ್ ಗುರುಕ್ಲೆನ ತತ್ವ, ಆದರ್ಶನ್ ಇಲ್ಲ್ ಇಲ್ಲಡೆ ಮುಟ್ಟೊಡು. ಈ ನಿಲೆಟ್ಟ್ “ಶೂದ್ರ ಶಿವ” ನಾಟಕ ಸಾರ್ಥಕತೆನ್ ತೋಜಾರೆ ಉಂಡು ಪನ್ಪಿನ ವಿಶ್ವಾಸ ಕೊರಿಯೆರ್.
ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರದ ಕೋಶಾಧಿಕಾರಿ ಆರ್. ಪದ್ಮರಾಜ್ ಲೇಸ್ದ ಗುರ್ಕಾರ್ಮೆ ಒಯಿಸ್ ದಿತ್ತೆರ್. ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರದ ಉಪಾಧ್ಯಕ್ಷೆರ್, ವಿಶ್ವ ಮಹಿಳಾ ಸಂಘದ ಅಧ್ಯಕ್ಷೆರ್ ಉರ್ಮಿಳಾ ರಮೇಶ್ ಕುಮಾರ್ ತುಡರ್ ಅರ್ಲಾದ್ ಲೇಸ್ನ್ ಉದಿಪನ ಮಲ್ತೆರ್. ರಂಗಾಯಣ ಮೈಸೂರ್ ಮಾಜಿ ನಿರ್ದೇಶಕೆರ್ ಎಚ್. ಜನಾರ್ದನ ರಂಗ ಚಾಲನೆ ಮಲ್ತೆರ್. ಕುದ್ರೋಳಿ ಗೋಕರ್ಣನಾಥ ಕ್ಷೇತ್ರದ ಅಭಿವೃದ್ಧಿ ಸಮಿತಿ ಅಧ್ಯಕ್ಷೆರ್ ದೇವೇಂದ್ರ ಪೂಜಾರಿ ಲೇಸ್ಡ್ ಇತ್ತೆರ್.
ಮನೋಜ್ ವಾಮಂಜೂರು ಬಿನ್ನೆರೆನ್ ಎದ್ಕೊನಿಯೆರ್. ಜರ್ನಿ ಥಿಯೇಟರ್ ಗ್ರೂಪ್ ಕಲಾವಿದೆರ್ ನಾಡಗೀತೆ ಪಂಡೆರ್. ದಿವಾಕರ ಬಳ್ಳಾಲ್ ಶಕ್ತಿನಗರ ಲೇಸ್ ಸುದಾರಿಕೆ ಮಲ್ತೆರ್.
ವಿದ್ಯಾರ್ಥಿ ವೇತನ
ಕುಡ್ಲ ಅಸೋಸಿಯೇಶನ್ ಸೌದಿ ಅರೇಬಿಯಾ ಅಂಚನೆ ಗುರು ಬೆಳದಿಂಗಳು ಫೌಂಡೇಶನ್ ಕುದ್ರೋಳಿ ಉಂದೆತ್ತ ಒಟ್ಟು ಸೇರಿಗೆಡ್ ಬಡವೆರೆಗ್ ಪನವುದ ಸಕಾಯ ಅಂಚನೆ ಕಲ್ಪಾರ್ಥಿಲೆಗ್ ವೇತನ ಕೊರ್ಪಿನ ಲೇಸ್ ನಡತ್ಂಡ್.
