ಪಾವೂರು: ಕಟೀಲು ಶ್ರೀ ದುರ್ಗಾಪರಮೇಶ್ವರೀ ಪ್ರಸಾದಿತ ದಶಾವತಾರ ಯಕ್ಷಗಾನ ಮಂಡಳಿ ಮೊಕಲೆರ್ದ್ ಡಿ. 6 ಅಂಗಾರೆ ಬಯ್ಯ 6.30 ಗಂಟೆರ್ದ್ 12 ಗಂಟೆ ಮುಟ್ಟ ಶ್ರೀ ದೇವಿ ಮಹಾತ್ಮೆ ಯಕ್ಷಗಾನ ಪಾವೂರುದ ಶ್ರೀ ಚಾಮುಂಡೇಶ್ವರೀ ದೈವಸ್ಥಾನದ ಜಾಗೆಡ್ ನಡಪರೆ ಉಂಡು.
ಈ ಲೇಸ್‌ಗ್ ಎಚ್ಚದ ಸಂಖ್ಯೆಡ್ ಭಕ್ತೆರ್ ಬತ್ತ್‌ದ್ ಶ್ರೀ ದೇವಿನ ಗಂಧಪ್ರಸಾದನ್ ದೆತೊಂದು ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ಶಾರದಾ ನಿಲಯ ಪಾವೂರುದ ಅಕ್ಷಿತಾ ಬೊಕ್ಕ ಪುರುಷೋತ್ತಮ ಲೆಪ್ಪೋಲೆಡ್ ತೆರಿಪಾದೆರ್.
ಮುಲ್ಕಿ : ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಶ್ರೀ ಕುಳೂರು ಕನ್ಯಾನ ಸದಾಶಿವ ಶೆಟ್ಟಿ ಕಟ್ವಾಣದ ಪಲವೆ ಉದಿಪನ ಲೇಸ್ ನ. 24 ಗುರುವಾರ ಮುಲ್ಕಿ ರಾಜ ಮಾರ್ಗದ ಪಡುಬೈಲ್ ಡ್ ನಡತ್ಂಡ್.
ಮಲ್ಲ ಬಿನ್ನೆರಾದ್ ಬತ್ತಿತ್ತಿನ ಉದ್ಯಮಿ, ದಾನಿಲು ಕುಳೂರು ಕನ್ಯಾನ ಸದಾಶಿವ ಶೆಟ್ರ್ ಪಾತೆರ್ದ್, ಇನಿ ಜಾಗತಿಕ ಬಂಟರ ಸಂಘಲೆನ ಒಕ್ಕೂಟಡ್ ಸುವರ್ಣಾಕ್ಷರೊಡು ಬರೆದ್ ದೀಪಿನ ದಿನ ಆದುಂಡು ಪಂಡೆರ್.
ಮುಲ್ಕಿ ರಾಜಮಾರ್ಗದ ಬರಿಟ್ಟೆ ಉಪ್ಪುನ 65 ಸೆನ್ಸ್ ಜಾಗೆನ್ ಸಮಾಜದ ಸೇವೆಗಾದ್ ಕಾಸ್ ದಂಚಿ ತೂವಂದೆ ಒಕ್ಕೂಟೊಗು ಕೈ ಏರ್ದ್ ಎಡ್ಡೆ ಮನಸ್ ಡೇ ಕೊರೊಂದುಲ್ಲೆ. ಬಂಟ ಸಮಾಜೊಗೇ ಪೆರ್ಮೆ ಆಪಿನಂಚ ಈ ಜಾಗೆನ್ ಅಭಿವೃದ್ಧಿ ಮಲ್ಪುವ ಪಂದ್ ಆರ್ ಭರವಸೆ ಕೊರಿಯೆರ್.
ಈ ಜಾಗೆಡ್ ಪಾಸಿಟಿವ್ ಎನರ್ಜಿ ತಿಕ್ ದ್ಂಡ್. ಆಂಡ ಈ ಜಾಗೆನ್ ಮನಸಾರೆ ಕೊರ್ತೆ . ಏರ್ನಲ ಒತ್ತಡಲ ಇಜ್ಜಿ. ಉಂದು ಕಟೀಲ್ದ ಬೊಕ್ಕ ಬಪ್ಪನಾಡ್ ದ ಅಪ್ಪೆನ ಕೃಪೆ ಪಂಡೆರ್.
ಈ ಪೊರ್ತುಡು ಜಾಗತಿಕ ಬಂಟರ ಸಂಘದ ಜಾಗೆದ ಪತ್ರ ಬೊಕ್ಕ ಒಪ್ಪಿಗೆ ಪತ್ರೊನು ಕನ್ಯಾನ ಸದಾಶಿವ ಶೆಟ್ರ್ ಐಕಳ ಹರೀಶದ ಶೆಟ್ರೆಗ್ ಹಸ್ತಾಂತರ ಮಲ್ತೆರ್.
ಅಂಚೆನೆ ಈ ಪೊರ್ತುಡು ಡಿ.4 ತಾರೀಕ್ ನಡಪುನ ದೇವಿ ಮಹಾತ್ಮೆ ಯಕ್ಷಗಾನ ದ ಲೆಪ್ಪೋಲೆ ಬುಡುಗಡೆ ಮಲ್ತೆರ್.
ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಗುರ್ಕಾರೆ, ಸಾರ್ವಭೌಮ ಐಕಳ ಹರೀಶ್ ಶೆಟ್ಟಿ ಪಾತೆರ್ದ್, ಬಂಟ ಸಮಾಜ ಮಾತ್ರ ಅತ್ತಾಂದೆ ಬೇತೆ ಸಮಾಜದಕ್ಲೆಗ್ ಲ ಸಕಾಯ ಮಲ್ಪುನ ಉದ್ದೇಶೊಡು ಈ ಕಟ್ವಾಣ ತಯಾರಾವೊಂದುಂಡು.
ಬಿಪಿಎಲ್ ಕಾರ್ಡ್ ದಕ್ಲೆಗ್ ಉಚಿತವಾದ್ ಮದಿಮೆ ಮಲ್ಪಾವುನ, ಅಂಚೆನೆ ಸಾಂಸ್ಕೃತಿಕ ಕಾರ್ಯಕ್ರಮ ಮಲ್ಪರೆ ಮೂಲು ಅವಕಾಶ ಕೊರ್ಪಿನ ಉದ್ದೇಶ ಉಂಡು ಪಂಡೆರ್.
ಮಲ್ಲ ಬಿನ್ನೆರಾದ್ ಬಪ್ಪನಾಡ್ ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನದ ಆಡಳಿತ ಮೊಕ್ತೇಸರೆರ್ ಮನೋಹರ ಶೆಟ್ರ್, ಉದ್ಯಮಿಲು ಮನೋಜ್ ಶೆಟ್ಟಿ, ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಮಿಥುನ್ ರೈ, ಪಟ್ಲ ಫೌಂಡೇಶನ್ ದ ಪಟ್ಲ ಮುಖ್ಯಸ್ಥೆರ್ ಸತೀಶ್ ಶೆಟ್ಟಿ, ಒಕ್ಕೂಟದ ಕಾರ್ಯದರ್ಶಿ ಜಯಕರ ಶೆಟ್ಟಿ ಇಂದ್ರಾಳಿ, ನಿರ್ದೇಶಕೆರ್ ಶಶಿಧರ ಶೆಟ್ಟಿ ಇನ್ನಂಜೆ,ಉದ್ಯಮಿ ಚಂದ್ರಹಾಸ ಶೆಟ್ಟಿ, ಎಳತ್ತೂರು ಸದಾಶಿವ ದೇವಸ್ಥಾನದ ಅಧ್ಯಕ್ಷೆರ್ ಸಂತೋಷ್ ಹೆಗ್ಡೆ, ಮುಲ್ಕಿ ನಗರಸಭೆ ಅಧ್ಯಕ್ಷೆರ್ ಸುಭಾಷ್ ಶೆಟ್ಟಿ ಉಪಾಧ್ಯಕ್ಷೆರ್ ಸತೀಶ್ ಅಂಚನ್ , ನಗರಸಭೆ ಸದಸ್ಯೆರ್ ಯೋಗೀಶ್ ಕೋಟ್ಯಾನ್, ಉದ್ಯಮಿಲಾಯಿನ ಮುಂಡ್ಕೂರು ಮೋಹನ್ ದಾಸ್ ಶೆಟ್ಟಿ,ಪ್ರವೀಣ್ ಶೆಟ್ಟಿ, ನಾಗೇಶ್ ಶೆಟ್ಟಿ ಮಸ್ಕತ್, ಮುಲ್ಕಿ ಬಂಟ್ಸ್ ಸಂಘದ ಅಧ್ಯಕ್ಷೆರ್ ಕರುಣಾಕರ ಶೆಟ್ಟಿ ಮತ್ತರ್ಮೆಡ್ ಇತ್ತೆರ್.
ಮುಲ್ಕಿ ಅರಸು ಕಂಬುಲ ಸಮಿತಿದ ಅಧ್ಯಕ್ಷೆರ್ ಕೊಲ್ನಾಡುಗುತ್ತು ಕಿರಣ್ ಕುಮಾರ್ ಶೆಟ್ಟಿ, ಸಹಕಾರಿ ಕ್ಷೇತ್ರದ ಬೆಳಪು ದೇವಿಪ್ರಸಾದ್ ಶೆಟ್ಟಿ, ಉದ್ಯಮಿ ಜೀವನ್ ಶೆಟ್ಟಿ, ತುಳು ಬರವುಗಾರೆ, ಡಿ.ಕೆ.ಶೆಟ್ಟಿ,ಸುರತ್ಕಲ್ ಬಂಟ್ಸ್ ಸಂಘದ ಅಧ್ಯಕ್ಷೆರ್ ಸುಧಾಕರ ಪೂಂಜ, ಪಿಲಿ ಚಿತ್ರ ನಿರ್ಮಾಪಕೆರ್ ಭರತ್ ಭಂಡಾರಿ, ಎಕ್ಕಾರ್ ಮುರ ಸದಾಶಿವ ಶೆಟ್ಟಿ ಮೊಕುಲು ಮಾತ ಬತ್ತಿತ್ತೆರ್.
ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಉಪಾಧ್ಯಕ್ಷೆರ್ ಕರ್ನಿರೆ ವಿಶ್ವನಾಥ ಶೆಟ್ರ್ ಬಿನ್ನೆರೆನ್ ಎದುಕೊಂಡೆರ್. ಒಕ್ಕೂಟದ ಕಾರ್ಯದರ್ಶಿ ಇಂದ್ರಾಳಿ ಜಯಕರ ಶೆಟ್ಟಿ ಸೊಲ್ಮೆ ಸಂದಾಯೆರ್. ಪಕ್ಕಳ ಅಶೋಕ್ ಶೆಟ್ಟಿ ಸಭೆ ಸುಧಾರಿಕೆ ಮಲ್ತೆರ್.
ಕುಡ್ಲದ ಕುಕ್ಕರ್ ಬಾಂಬ್ ಬ್ಲಾಸ್ಟ್ ಆರೋಪಿ ಶಾರಿಕ್ , ಜಿಹಾದಿ ಗ್ರೂಪುಡು ಬರೊಂದಿತ್ತಿನ ಮೆಸೇಜ್ ಅಂಚನೆ ವಿಡಿಯೋನ್ ತೂದು ಬಾಂಬ್ ತಯಾರ್ ಮಲ್ಪುನೆನ್ ಕಲ್ತ್‌ದೆ ಪಂದ್ ಪೊಲೀಸ್ ಮೂಲ ತೆರಿಪಾದ್ಂಡ್.
ಮೈಸೂರ್‌ದ ಮೊಬೈಲ್ ರಿಪೇರಿ ಅಂಗಡಿಡ್ ಪುದರ್ ಬದಲ್ ಮಲ್ತ್‌ದ್ ಬೇಲೆಗ್ ಸೇರಿನ ಆರೋಪಿ, ವೀಡಿಯೋ ತೂದು ಈ ಬೇಲೆಗ್ ಕೈ ಪಾಡ್ದೆ. ಈ ಕೇಸ್‌ದ ಬಗೆಟ್ ಪೊಲೀಸೆರ್ ವಿಚಾರಣೆ ಮಲ್ತೊಂದಿತ್ತ್‌ದ್ ಎನ್‌ಐಎ ದ ಬೇತೆ ಬೇತೆ ತರೊಟ್ಟು ತನಿಖೆ ಮಲ್ತೊಂದು ಉಂಡು.
ಅಬುಧಾಬಿ: ಫಿಫಾ ವಿಶ್ವಕಪ್‌ಗ್ ಬಿನ್ನೆರಾದ್ ಬತ್ತಿನ ಕತಾರ್ ದ ಅಮಿರ್ ಶೇಖ್ ತಮೀಮ್ ಬಿನ್ ಹಮದ್ ಅಲ್ ಥಾನಿ ಮೊಕುಲೆನ್ ಯುಎಇ ಅಧ್ಯಕ್ಷೆರ್ ಶೇಖ್ ಮುಹಮ್ಮದ್ ಬಿನ್ ಝಾಯೆದ್ ಅಲ್ ನಹ್ಯಾನ್ ಮಾನಾದಿಗೆ ಮಲ್ತ್‌ದೆರ್.
ವಿಶ್ವಕಪ್‌ಗ್ ಬತ್ತಿನೆಕ್ಕ್ ಯಾನ್ ನಿಕ್ಲೆಗ್ ಎಡ್ಡೆಪ್ಪುನು ಬಯಕುವೆ ಬೊಕ್ಕ ಈ ಪಂದ್ಯಾಕೂಟನ್ ಯಶಸ್ಸು ಮಲ್ಪರೆ ಯುಎಇ ಬೆಂಬಲ ಕೊರ್ಪುಂಡು ಪಂದ್ ಆರ್ ಈ ಪೊರ್ತುಡು ಬತ್ತಿನ ಬಿನ್ನೆರೆಗ್ ಪಂಡೆರ್.
ಕೆಮ್ಮಿಂಜೆ ಶ್ರೀ ಷಣ್ಮುಖ ಸುಬ್ರಹ್ಮಣ್ಯ, ಶ್ರೀ ಮಹಾವಿಷ್ಣು ದೇವಲ್ಯಡ್ ನ.28 ಬೊಕ್ಕ 29 ಗ್ ಷಷ್ಠಿ ಮಹೋಚ್ಚಯ ನಡಪರೆ ಉಂಡು.
ಕ್ಷೇತ್ರೊಡು ಪಂಚಮಿ ಉಚ್ಚಯ, ಆಶ್ಲೇಷ ಬಲಿ, ನಾಗತಂಬಿಲ ಸೇವೆ ನಡಪರೆ ಉಂಡು ಪಂದ್ ದೇವಲ್ಯದ ವ್ಯವಸ್ಥಾಪನ ಸಮಿತಿದ ಅಧ್ಯಕ್ಷೆರ್ ಬೊಕ್ಕ ಸದಸ್ಯೆರ್ ಪ್ರಕಟನೆಡ್ ತೆರಿಪಾದೆರ್.
ಯುಎಇ: ಓವರ್ ಸೀಸ್ ಮೂವೀಸ್, ಗಲ್ಫ್ ನೆತ್ತ ಮುತಾಲಿಕೆಡ್ ಕಾಂತಾರ ಪಿಚ್ಚರ್‌ದ 50 ನೇ ದಿನತ್ತ ವಿಶೇಷ ಲೇಸ್‌ದೊಟ್ಟುಗು ಕರ್ನಾಟಕ ರಾಜ್ಯೋತ್ಸವನ್ ಇಂಚೊಗು ಆಚರಣೆ ಮಲ್ತೆರ್.
ಪೇಂಟೆದ ದೇರಾ ಹಯಾತ್ ಗ್ಯಾಲರಿದ ಸಿನಿ ಮಂದಿರಡ್ ನ.18 ಗ್ ಬಯ್ಯ ಕಾಂತಾರ ಪಿಚ್ಚರ್‌ದ 50ನೇ ದಿನತ್ತ ಗೌಜಿನ್ ಕಾಂತಾರ ಪಿಚ್ಚರ್‌ದ ವಿಶೇಷ ಪ್ರದರ್ಶನದ ಮುಕೇನ ಆಚರಣೆ ಮಲ್ತೆರ್. ಓವರ್ಸೀಸ್ ಮೂವೀಸ್ ಗಲ್ಫ್ ಮುತಾಲಿಕೆಡ್ ರಿಷಭ್ ಶೆಟ್ಟಿ ಮೆರೆಗ್ ಬೊಲ್ಲಿದ ಕಡಗ ಕೈಕ್ ಪಾಡ್ದ್ “ಕನ್ನಡ ಸಿರಿ” ಬಿರ್ದ್ ಕೊರ್ದು ಮೈಸೂರ್ ಪೇಟ ಪಾಡ್ದ್ ಮಾನಾದಿಗೆ ಮಲ್ತೆರ್.
ಈ ಪೊರ್ತುಡು ಅಬುಧಾಬಿ ಕರ್ನಾಟಕ ಸಂಘದ ಅಧ್ಯಕ್ಷೆರ್ ಸರ್ವೋತ್ತಮ ಶೆಟ್ಟಿ, ಎನ್.ಆರ್.ಐ. ಫೋರಂದ ಅಧ್ಯಕ್ಷೆರ್ ವಕ್ವಾಡಿ ಪ್ರವೀಣ್ ಕುಮಾರ್ ಶೆಟ್ಟಿ, ಕನ್ನಡ ತುಳು ಪಿಚ್ಚರ್‌ದ ನಿರ್ಮಾಪಕೆರ್ ಹರೀಶ್ ಶೇರಿಗಾರ್, ರಿಷಭ್ ಶೆಟ್ಟಿ ಮೆರೆನ ಬೊಡೆದಿ ಪ್ರಗತಿ ರಿಷಭ್ ಶೆಟ್ಟಿ ಲೇಸ್‌ಡ್ ಇತ್ತೆರ್.
ಇಟಾನಗರ: ಪ್ರಧಾನಿ ನರೇಂದ್ರ ಮೋದಿ ಮೇರ್ ಅರುಣಾಚಲ ಪ್ರದೇಶದ ಇಟಾನಗರದ ಹೊಳ್ಳಂಗಿಡ್ ಸನಿವಾರ ಸುರುತ್ತ ಗ್ರೀನ್‌ಫೀಲ್ಡ್ ಇಮಾನ ನಿಲ್ದಾಣ ಉದಿಪನ ಮಲ್ತೆರ್. ಉಂದು ಈಶಾನ್ಯ ಪ್ರದೇಶದ 16 ನೇ ಇಮಾನ ನಿಲ್ದಾಣ ಆತ್ಂಡ್.
ದೋನಿ ಪೋಲೋ ಇಮಾನ ನಿಲ್ದಾಣ ನಿರ್ಮಾಣಗ್ 640 ಕೋಟಿ ರೂ. ಕರ್ಚಿ ಆತ್ಂಡ್. 690 ಎಕ್ರೆ ಜಾಗೆಡ್ ಈ ನಿಲ್ದಾಣ ಉಂಡು.
ದುಬೈ: ಸುವರ್ಣ ಕರ್ನಾಟಕ ರಾಜ್ಯೋತ್ಸವ ಪುರಸ್ಕೃತೆರ್ ಅಬುಧಾಬಿ ಕರ್ನಾಟಕ ಸಂಘದ 41 ನೇ ವರ್ಷದ ಕರ್ನಾಟಕ ರಾಜ್ಯೋತ್ಸವ ಅಬುಧಾಬಿ ಪೇಂಟೆದ ಇಂಡಿಯನ್ ಸೋಷಿಯಲ್ ಆಂಡ್ ಕಲ್ಚರಲ್ ಸೆಂಟರ್ ಚಾವಡಿಡ್ ನ.6 ಕ್ಕ್ ಭಾರೀ ಗೌಜಿಡ್ ನಡತ್ಂಡ್.
ಕರ್ನಾಟಕ ಸಂಘದ ಸದಸ್ಯೆರ್ ಕರ್ನಾಟಕದ ನಾಡಗೀತೆ ಪನ್ಪಿನ ಮುಕೇನ ಲೇಸ್ ಸುರು ಮಲ್ತೆರ್. ಯು.ಎ.ಇ ಭಾರತೀಯ ದೂತಾವಾಸದ ರಾಯಭಾರಿ ಸಂಜಯ್ ಸುಧೀರ್ ತುಡರ್ ಅರ್ಲಾದ್ ಲೇಸ್‌ನ್ ಉದಿಪನ ಮಲ್ತೆರ್.
ಈ ಪೊರ್ತುಡು ದ.ಕ.ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ವಿಜೇತೆರ್ ಸಮಾಜ ಸೇವಕೆರ್ ಮಿತ್ರಂಪಾಡಿ ಜಯರಾಮ ರೈ ಬೊಕ್ಕ ಬಿ.ಕೆ ಗಣೇಶ್ ರೈ, ವಿದುಷಿ ಸ್ವಪ್ನ ಕಿರಣ್ ಮೊಕಲೆನ್ ಲೇಸ್‌ಡ್ ಮಾನಾದಿಗೆ ಮಲ್ತೆರ್. ಮನೋಹರ ತೋನ್ಸೆ ಸಂಪಾದಕೆರ್ ಬರೆಯಿನ “ದುಬಾಯಿಡ್ ಧ್ವನಿ” ಬೂಕುನ್ ಲೇಸ್‌ಡ್ ಇತ್ತಿನ ಬಿನ್ನೆರ್ ಬುಡುಗಡೆ ಮಲ್ತೆರ್.
ಇಂಡಿಯನ್ ಸೋಷಿಯಲ್ ಆಂಡ್ ಕಲ್ಚರಲ್ ಸೆಂಟರ್ ಅಬುಧಾಬಿ ಅಧ್ಯಕ್ಷೆರ್ ಡಾ. ನಟರಾಜನ್, ಸರ್ಮೋತ್ತಮ ಶೆಟ್ಟಿ, ಇಂಡಿಯನ್ ಎಂಬೆಸಿ ಕಮ್ಯೂನಿಟಿ ಅಫೇರ್ಸ್ ಮುಖ್ಯಸ್ಥೆರ್ ರೀಶಾ ಒಬೆರಾಯ್, ಹಾಸ್ಯ ಕಲಾವಿದೆರ್ ಸುಧಾ ಬರಗೂರು ಸೇರಿನಂಚನೆ ಮಸ್ತ್ ಬಿನ್ನೆರ್ ಲೇಸ್‌ಡ್ ಇತ್ತೆರ್. ಮನೋಹರ ತೋನ್ಸೆ ಬೊಕ್ಕ ಕೃಷ್ಣ ಕುಳಾಯಿ ಲೇಸ್ ಸುಧಾರಿಕೆ ಮಲ್ತೆರ್.
ಕುಡ್ಲ: ತುಳುನಾಡ್ ದ ಸ್ವಾತಂತ್ರ್ಯ ಪೊರ್ಂಬಾಟಗಾರೆ, ಸಮರವೀರೆ ಕೆದಂಬಾಡಿ ರಾಮಯ್ಯ ಗೌಡ ಮೆರೆನ ಪೊರ್ಲಕಂಟ್ ದ ಕಂಚಿದ ಮೂರ್ತಿನ್ ಸಿಎಂ ಬಸವರಾಜ್ ಬೊಮ್ಮಾಯಿ ಮೇರ್ ಸನಿಯಾರ ಕಾಂಡೆ ಕುಡ್ಲದ ಬಾವುಟಗುಡ್ಡೆ ಪಾರ್ಕ್ ಡ್ ಉದಿಪನ ಮಲ್ತೆರ್.
ಈ ಪೊರ್ತುಡು ಬಂದರು, ಮೀನುಗಾರಿಕೆ ಅಂಚನೆ ಒಳನಾಡು ಜಲಸಾರಿಗೆ ಸಚಿವೆರ್ ಎಸ್. ಅಂಗಾರ, ಉಳ್ಳಾಲ ವಿಧಾನಸಭಾ ಕ್ಷೇತ್ರದ ಶಾಸಕೆರ್ ಯು.ಟಿ.ಖಾದರ್, ಕುಡ್ಲ ದಕ್ಷಿಣ ಕ್ಷೇತ್ರದ ಶಾಸಕೆರ್ ವೇದವ್ಯಾಸ್ ಕಾಮತ್ ಸೇರಿನಂಚನೆ ಮಸ್ತ್ ಜನ ಪ್ರತಿನಿಧಿಕುಲು ಲೇಸ್‌ಡ್ ಪಾಲ್ ಪಡೆದಿತ್ತೆರ್.
ಕುಡ್ಲ: ಸ್ವಾತಂತ್ರ್ಯ ಪೊರ್ಂಬಾಟಗಾರೆ, ಸಮರವೀರೆ ಕೆದಂಬಾಡಿ ರಾಮಯ್ಯ ಗೌಡ ಮೆರೆನ ಕಂಚ್‌ದ ಮೂರ್ತಿ ಲೋಕಾರ್ಪಣೆ ಮಲ್ಪರೆ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಸನಿವಾರ ಬಜಪೆದ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಗ್ ಬತ್ತೆರ್.
ಈ ಪೊರ್ತುಡು ಬಂದರು, ಮೀನುಗಾರಿಕೆ ಅಂಚನೆ ಒಳನಾಡು ಜಲಸಾರಿಗೆ ಸಚಿವೆರ್ ಎಸ್. ಅಂಗಾರ ಅಂಚನೆ ಜನಪ್ರತಿನಿಧಿಲು ಅರೆನ್ ಎದ್ಕೊನಿಯೆರ್.
