ಕುಡ್ಲದ ಸುದ್ದಿ | Mangalore News

ಅ.15-25: ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರಡ್ ಮಾರ್ನೆಮಿ ಉಚ್ಚಯ

ಕುಡ್ಲ: ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರದ ಮುತಾಲಿಕೆಡ್ ಕುಡ್ಲ ದಸರಾ ಉಚ್ಚಯ ಅ.15-25 ಮುಟ್ಟ ನಡಪರೆ ಉಂಡು ಪಂದ್ ಕ್ಷೇತ್ರದ ಆಡಳಿತ ಮಂಡಳಿ ಗುರ್ಕಾರೆ ಎಚ್‌.ಎಸ್‌. ಸಾಯಿರಾಮ್ ಪಂಡೆರ್.

ಮೇರ್ ಗುರುವಾರ ಸುದ್ದಿಗೋಷ್ಠಿಡ್ ಪಾತೆರ್ದ್, ಕುದ್ರೋಳಿ ಕ್ಷೇತ್ರದ ನವೀಕರಣದ ರೂವಾರಿ ಬಿ. ಜನಾರ್ದನ ಪೂಜಾರಿ ಮೆರೆನ ಮಾರ್ಗದರ್ಶನಡ್ ಕುಡ್ಲ ದಸರಾ ಉಚ್ಚಯನ್ ಆಯೋಜನೆ ಮಲ್ದ್ಂಡ್. ಅ.15 ಕ್ಕ್ ಬೊಲ್ಪುಗು ನವದುರ್ಗೆಯೆರ್ ಬೊಕ್ಕ ಶ್ರೀ ಶಾರದಾ ಮಾತೆನ ಪ್ರತಿಷ್ಠಾಪನೆ ನಡಪರೆ ಉಂಡು. ಈ ಲೇಸ್ ನ್ ಬಿನ್ನೆರ್ ಉದಿಪನ ಮಲ್ಪುವೆರ್. ಅ.20 ಕ್ಕ್ ಬೊಲ್ಪುಗು ಸಾಮೂಹಿಕ ಮಹಾಚಂಡಿಕಾ ಹೋಮ ನಡಪುಂಡು. ಅಂಚೆನೆ ಕ್ಷೇತ್ರಡ್ ಪ್ರತಿದಿನೊಲ ಬಯ್ಯಗ್ ಕಲಾವಿದೆರ್ದ್ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು ಪಂದ್ ಪಂಡೆರ್.

ದೇವಲ್ಯ ಅಭಿವೃದ್ಧಿ ಸಮಿತಿದ ಸದಸ್ಯೆರ್ ಹರಿಕೃಷ್ಣ ಬಂಟ್ವಾಳ್ ಪಾತೆರ್ದ್, ಅ.24 ಕ್ಕ್ ಬಯ್ಯಗ್ ಶೋಭಾಯಾತ್ರೆ ಸುರು ಆಪುಂಡು. ಕರಿನ ಸರ್ತಿದಂಚೆನೆ ಈ ಸರ್ತಿಲ ಮುಂಚೂಣಿಡ್ ನವದುರ್ಗೆಯೆರ್ ಬೊಕ್ಕ ಶ್ರೀ ಶಾರದಾ ಮಾತೆನ ಮೂರ್ತಿ ಇಪ್ಪುಂಡು. ಅಯಿತ್ತ ಪಿರವು ಬೇತೆ ಬೇತೆ ಸ್ತಬ್ಧಚಿತ್ರಲು ಇಪ್ಪುಂಡು. ಕ್ಷೇತ್ರರ್ದ್ ಪಿದಾಡಿನ ಶೋಭಾಯಾತ್ರೆ ಮಣ್ಣಗುಡ್ಡ, ನಾರಾಯಣಗುರು ವೃತ್ತ, ಎಂಜಿ ರಸ್ತೆ, ಕೆಎಸ್ ರಾವ್ ರಸ್ತೆ, ಹಂಪನಕಟ್ಟೆ, ಜಿಎಚ್‌ ಎಸ್ ರಸ್ತೆ, ರಥಬೀದಿ, ಅಳಕೆಯಾದ್ ಬತ್ತ್ ದ್ ಕ್ಷೇತ್ರದ ಕೆರೆಟ್ಟ್ ವಿಸರ್ಜನೆ ಆಪುಂಡು. ಅಂಚೆನೆ ಶೋಭಾಯಾತ್ರೆ ಆಪುನ ಮಾರ್ಗದ ಸೈಡ್ ಲೆನ ಕಟ್ವಾನಲೆಡ್ ಕರೆಂಟ್ ದ ತುಡರ್ ರ್ದ್ ಅಲಂಕಾರ ಮಲ್ಪೊಡು ಪಂದ್ ಬಿನ್ನಾಪು ಮಲ್ಪುವೆ. ಅತ್ತಂದೆ ಮನಪಾ ಮುತಾಲಿಕೆಡ್ ಈ ಸರ್ತಿಲ ಕರೆಂಟ್ ದ ದೀಪಾಲಂಕಾರ ಉಂಡು ಪಂದ್ ಪಂಡೆರ್.

ಈ ಪೊರ್ತುಡು ದೇವಲ್ಯ ಆಡಳಿತ ಸಮಿತಿದ ಉಪಾಧ್ಯಕ್ಷೆರ್ ಉರ್ಮಿಳಾ ರಮೇಶ್, ಕಾರ್ಯದರ್ಶಿ ಮಾಧವ ಸುವರ್ಣ, ಕೋಶಾಧಿಕಾರಿ ಪದ್ಮರಾಜ್ ಆರ್., ದೇವಲ್ಯದ ಟ್ರಸ್ಟಿ ರವಿಶಂಕರ ಮಿಜಾರು, ಶೇಖರ ಪೂಜಾರಿ, ಕೆ.ಮಹೇಶ್ಚಂದ್ರ, ದೇವಲ್ಯ ಅಭಿವೃದ್ಧಿ ಸಮಿತಿದ ಗುರ್ಕಾರೆ ದೇವೇಂದ್ರ ಪೂಜಾರಿ, ಒತ್ತು ಗುರ್ಕಾರ್ದಿ ಡಾ. ಅನಸೂಯ ಬಿ.ಟಿ. ಸಾಲ್ಯಾನ್, ಉಪಾಧ್ಯಕ್ಷೆರ್ ಡಾ. ಬಿ.ಜಿ. ಸುವರ್ಣ, ಸದಸ್ಯೆರ್ ಚಂದನ್‌ ದಾಸ್, ಲೀಲಾಕ್ಷ ಕರ್ಕೇರ, ಕಿಶೋರ್ ದಂಡಕೇರಿ, ಪಿ.ಕೆ. ಗೌರವಿ ರಾಜಶೇಖರ್, ವಾಸುದೇವ ಪಾಲ್ ಪಡೆದಿತ್ತೆರ್.

ಸುಮಾರ್ ವರ್ಷ ಬಾಕಿ ಇತ್ತಿನ ಅರಕೆರೆ ಚರಂಡಿ ಸಮಸ್ಯೆಗ್ ಪರಿಹಾರ

ಕುಡ್ಲ: ಪುಗರ್ತೆದ ಗುಜ್ಜರಕೆರೆ ಕೈತಲ್ ದ ಆರೆಕೆರೆ ಭಾಗಡ್ ಸುಮಾರ್ ವರ್ಷೊದಿಂಚ ಮರಿಯಲಡ್ ಆವೊಂದು ಇತ್ತಿನ ಒಳಚರಂಡಿ ಸಮಸ್ಯೆ ಇತ್ತೆ ಸರಿ ಆತ್ಂಡ್.

ಎಲ್ಯ ಬರ್ಸಗೇ ಈ ಭಾಗಡ್ ಚರಂಡಿ ದಿಂಜಿದ್ ನೀರ್ ಮಾರ್ಗಡ್ ಪೋವೊಂದು ಇತ್ತ್ಂಡ್. ನೆರ್ದ್ ಕೈತಲ್ ದ ನಿವಾಸಿಲು ಬೇತೆ ಬೇತೆ ರೀತಿದ ಸಮಸ್ಯೆ ಎದುರಿಸಾವೊಡಾಪುಂಡು. ಸುಮಾರ್ ವರ್ಷೊದಿಂಚ ಆಡಳಿತಡ್ ಇಪ್ಪುನಕ್ಲೆಗ್ ಕೈತಲ್ ದಕುಲು ಬಿನ್ನಾಪು ಮಲ್ತ್ಂಡಲ ಆ ಸಮಯಗ್ ಅಧಿಕಾರಡ್ ಇತ್ತಿನ ಆಡಳಿತ ವರ್ಗ ಬೊಕ್ಕ ಸಂಬಂಧ ಪಟ್ಟಿನ ಇಲಾಖೆರ್ದ್ ಈ ಬಗೆಟ್ಟ್ ಸಕಾರಾತ್ಮಕ ಸ್ವಂದನೆ ತಿಕ್ಕಂದಿನ ಪರಿಣಾಮ ಸಮಸ್ಯೆ ಅಂಚೆನೆ ಇತ್ತ್ಂಡ್.

ಈ ಬಗೆಟ್ಟ್ ಟೈಮ್ಸ್ ಆಫ್ ಕುಡ್ಲ ತುಳು ಪ್ರತಿಕೆ ವರದಿ ಪ್ರಕಟ ಮಲ್ತ್ ದ್ ಇತ್ತ್ಂಡ್. ಇತ್ತೆ ಶಾಸಕೆರ್ ವೇದವ್ಯಾಸ ಕಾಮತ್, ಕೈತಲ್ ದ ಮನಪಾ ಸದಸ್ಯೆ ರೇವತಿ ಶ್ಯಾಮ ಸುಂದರ್ ಮೇರ್ ಸಮಸ್ಯೆಗ್ ಸ್ವಂದಿಸಾದೆರ್. ಅಧಿಕಾರಿಲೆನ ಮುಖೇನ ಒಳಚರಂಡಿ ಸಮಸ್ಯೆ ಬಗೆಹರಿಸಾವೆ ಪಂದ್ ಪಂತೆರ್ ಪಂದ್ ಕೈತಲ್ ದ ನೇಮು ಕೊಟ್ಟಾರಿ ತೆರಿಪಾದೆರ್.

ರಾಷ್ಟ್ರೀಯ ಮಟ್ಟದ ವಾಲಿಬಾಲ್ ಪಂತೊಡು ಷಷ್ಠೀಶ್ ಪಿ ಶೆಟ್ಟಿಗ್ ಪ್ರಶಸ್ತಿ

ಕುಡ್ಲ: ಛತ್ತಿಸ್ ಗಡಡ್ ನಡತಿನ ರಾಷ್ಟ್ರೀಯ ಮಟ್ಟದ 19 ವರ್ಷೊದ ಬಾಲಕೆರೆನ ವಾಲಿಬಾಲ್ ಪಂತೊಡು ಸಾಲೆತ್ತೂರು ಗೌರಿಕೋಡಿ ನಿವಾಸಿ ಷಷ್ಠೀಶ್ ಪಿ ಶೆಟ್ಟಿ ಕರ್ನಾಟಕ ರಾಜ್ಯನ್ ಪ್ರತಿನಿಧಿಸಾದ್ ಸುರುತ್ತ ತಾನನ್ ಪಡೆತೆರ್.

ಮೇರ್ ಕುಡ್ಲದ ಪುಗರ್ತೆದ ಶಾರದಾ ಪಿ.ಯು. ಕಾಲೇಜ್ ದ ರಡ್ಡನೇ ವರ್ಷೊದ ವಿಜ್ಞಾನ ವಿಭಾಗಡ್ ಕಲ್ತೊಂದು ಉಲ್ಲೆರ್. ವಾಲಿಬಾಲ್ ಡ್ ರಾಷ್ಟ್ರೀಯ ಮಟ್ಟದ ಸ್ಕೂಲ್ ಗೇಮ್ ಫೆಡರೇಶನ್ ಅಪ್ ಇಂಡಿಯಾ ಪನ್ಪುನ ಸಂಸ್ಥೆಗ್ ಆಯ್ಕೆ ಆತೆರ್. ಮೇರ್ ಸಾಲೆತ್ತೂರು ಗೌರಿಕೋಡಿ ನಿವಾಸಿ ಮಾಜಿ ಕಬ್ಬಡಿ ಬೊಕ್ಕ ವಾಲಿಬಾಲ್ ಆಟಗಾರೆ ಪ್ರವೀಣ್ ಶೆಟ್ಟಿ ಬೊಕ್ಕ ಅಭಿಮತ ಟಿವಿ ಕುಡ್ಲದ ಆಡಳಿತ ಪಾಲುದಾರೆ ಮಮತಾ ಪಿ ಶೆಟ್ಟಿ ದಂಪತಿಲೆನ ಮಗೆ ಆತೆರ್.