Fri. Nov 20th, 2026

ಕುಡ್ಲದ ಸುದ್ದಿ | Mangalore News

ಕುಡ್ಲ : ಲಾರಿದ ಪಿರವುಗು ಕಾರ್ ಗುದ್ದುದು 2 ಜನಕ್ಕ್ ಮಲ್ಲ ಪೆಟ್ಟ್

ಕುಡ್ಲ : ಕಾರ್ ಬೊಕ್ಕ ಲಾರಿದ ನಡುಟ್ಟು ನಡತಿನ ಅಪಘಾತಡ್ ಕಾರ್ ಚಾಲಕೆ ಸೇರ್ದ್ ರಡ್ಡ್ ಜನಕ್ಕ್ ಮಲ್ಲ ಪೆಟ್ಟಾಯಿನ ಘಟನೆ ನಂತೂರು ಜಂಕ್ಷನ್‌ಡ್ ಗುರುವಾರ ರಾತ್ರಿ ನಡದ್ಂಡ್.
“ನ. 12 ರಾತ್ರಿ 9:50ತ್ತ ಪೊರ್ತುಡು ಪಂಪ್‌ವೆಲ್ ಕಡೆರ್ದ್ ಬೈದಿನ ತಮಿಳುನಾಡ್‌ದ ಲಾರಿ ಡ್ರೈವರ್‌ ನಿರ್ಲಕ್ಷ್ಯಡ್ ಚಾಲನೆ ಮಲ್ತ್‌ದ್ ಒರಾನೆ ಬ್ರೇಕ್ ಪಾಡ್ದೆ . ಈ ಪೊರ್ತುಡು ಪಿರವುಡ್ದು ಬರೊಂದಿತ್ತಿನ ಕಾರ್ ಲಾರಿದ ಪಿರವುಗು ಗುದ್ದುದುಂಡ್ ಪಂಡ್‌ದ್ ತೆರಿದ್ ಬೈದ್ಂಡ್.
ಕಾರ್ ಡ್ರೈವರ್ ನಿಝಾಮ್ ಬೊಕ್ಕ ಒಟ್ಟುಗಿತ್ತಿನಾರ್ ಮುಫಿಝ್ ಮೊಕ್ಲೆಗ್ ಮಲ್ಲ ಪೆಟ್ಟಾದ್ ಖಾಸಗಿ ಆಸ್ಪತ್ರೆಗ್ ಸೇರ್ಸಾದೆರ್. ಗುದ್ದುದಿನ ರಭಸಗ್ ಕಾರ್ ಸಂಪೂರ್ಣ ಜಖಂ ಆದ್, ಲಾರಿದ ಪಿರವು ಬಲತ್ತ ಭಾಗ ಜಖಂ ಆತ್ಂಡ್.

ಆಕ್ಸಿಡೆಂಟ್ ಆಪಿನಂಚಿನ 10 ಹಂಪ್ಸ್‌ಲೆಗ್ ಪೈಂಟ್ ಹಾಕಿನ ‘ಮೀಡಿಯಾ ಮನಸುಲು’

ಸುರತ್ಕಲ್: ಸುರತ್ಕಲ್ ಮಾರ್ಗಡ್ ಇಪ್ಪುನ ಹಂಪ್ಸ್‌ಲು ಗಾಡಿಲೆನ ಸ್ವೀಡ್ ಗ್ ನಿಯಂತ್ರಣ ಮಲ್ಪೊಡೇ ಹೊರತ್, ಸವಾರೆರೆಗ್ ತೊಂದರೆ ಮಲ್ಪೆರೆ ಬಲ್ಲಿ. ಆಂಡ ಸುರತ್ಕಲ್‌ದ ಪ್ರಮುಖ ಮಾರ್ಗಲೆನ ಬಣ್ಣ ಪೋದು ಹಂಪ್ಸ್‌ಲು ರಾತ್ರೆಗ್ ತೂಜಂದೆ ದ್ವಿಚಕ್ರ ಸವಾರೆರೆನ ಜೀವಗ್ ತೊಂದರೆ ಆವೊಂದು ಉಂಡು. ಈ ಸಮಸ್ಯೆಗ್ ಸ್ಪಂದಿಸಾಯಿನ ‘ಮೀಡಿಯಾ ಮನಸುಲು’ ಕೂಟದ ಸದಸ್ಯೆರ್ ಬುದಾರ ನಡುರಾತ್ರೆ ಪತ್ತ್ ‌ ಹಂಪ್ಸ್‌ಲೆಗ್ ಬಣ್ಣ ಪಾಡುನ ಮುಕೇನ ತನ್ನ 14ನೇ ಸಾಮಾಜಿಕ ಲೇಸ್ ನ್ ಯಶಸ್ವಿಯಾದ್ ಮಲ್ದೆರ್.

ಸುರತ್ಕಲ್ ಕೈತಲ್ದ ರಚನಾ ಹೋಟೆಲ್, ತಡಂಬೈಲ್, ಮಾರಿಗುಡಿ, NITK ಕೈತಲ್ದ ಸರ್ವಿಸ್ ಮಾರ್ಗಡ್ ಇತ್ತಿನ 10 ಹಂಪ್ಸ್ ಲೆಗ್ ಬುದಾರ ನಡುರಾತ್ರೆ ಗಾಡಿ ಸಂಚಾರಗ್ ಒವ್ವೇ ರೀತಿದ ತೊಂದರೆ ಅವಂದಿಲೆಕ್ಕ ನಡುರಾತ್ರೆಡ್ ಮಾರ್ಗಗ್ ಶ್ರಮದಾನ ಮಲ್ದೆರ್. ಈ ಬೇಲೆಡ್ ‘ಮೀಡಿಯಾ ಮನಸುಲು’ ಕೂಟದ ಪ್ರಮುಖೆರ್ ಶಶಿ ಬೆಳ್ಳಾಯರ್, ರಜನ್ ಕುಮಾರ್ ಕಾವೂರ್, ಗಿರೀಶ್ ಮಣೇಲ್, ಶಿವು ಕುಲಾಲ್ ಬೊಕ್ಕ ಸಂದೇಶ್ ಶೆಟ್ಟಿ ಎಪೊಲ ಪಾಲ್ ಪಡೆವೊಂದು ಉಲ್ಲೆರ್.

“ಸಮಾಜಮುಖಿ ಕಾರ್ಯನ್ ಮೆಚ್ಚೊಡಾಯಿನವು” “ಮೀಡಿಯಾ ಮನಸುಲು ಕೂಟದಕುಲು ಮೆಚ್ಚೊಡಾಯಿನ ಬೇಲೆ ಮಲ್ತೊಂದು ಉಲ್ಲೆರ್. ಕೈತಲ್ದ ಆಡಳಿತ ನಗರಪಾಲಿಕೆ ಮಲ್ಪೊಡಾಯಿನ ಬೇಲೆನ್ ಇತ್ತೆ ಜವನೆರ್ ಸ್ವಯಂಪ್ರೇರಿತೆರಾದ್ ಮಲ್ತೊಂದು ಇಪ್ಪುನೇ ಪೆರ್ಮೆದ ಇಸಯ. ಸಾರ್ವಜನಿಕೆರೆನ ಸುರಕ್ಷತೆಗಾದ್ ಇಂಚಿನ ಸಾರ್ಥಕ ಪ್ರಯತ್ನಲು ನಿರಂತರವಾದ್ ನಡಪಾಡ್. ಅಕ್ಲೆನ ಕೂಟಗ್ ಸುರತ್ಕಲ್ ಭಾಗದ ನಾಗರಿಕೆರೆನ ಪರವಾದ್ ಸೊಲ್ಮೆನ್ ಸಂದಾವೆ“

”ಆಪತ್ಬಾಂಧವ“ ಉಮೇಶ್ ಇಡ್ಯಾ

ಬೈಕ್‌ಗ್ ಖಾಸಗಿ ಬಸ್ ಎಡ್ತ್‌ದ್ ಒರಿಯನ ಮರಣ, ಕುಡೊರಿಯಗ್ ಮಲ್ಲ ಪೆಟ್ಟ್

ಕುಡ್ಲ : ಬೈಕ್‌ಗ್ ಪ್ರೈವೇಟ್ ಬಸ್ ಡಿಕ್ಕಿಯಾದ್ ಒರಿ ಜವನೆ ತೀರ್ ಪೋದು ಬೊಕ್ಕೊರಿಯಗ್ ಮಲ್ಲ ಪೆಟ್ಟ್ ಆಯಿನ ಘಟನೆ ಪಣಂಬೂರು ಎನ್ಎಂಪಿಎ ಕೈತಲ್ ಸೋಮವಾರ ನಡತ್ಂಡ್.
ಕುಡ್ಲದ ಪಾಂಡೇಶ್ವರ ನಿವಾಸಿ, ಬೈಕ್ ಸವಾರೆ ಮೊಹಮ್ಮದ್ ನಾಸಿರ್ (18) ತೀರ್ ಪೋತಿನಾರ್.‌ ಕುಡೊರಿ ಮಹಮ್ಮದ್ ಅಮೀರ್ ಮಸ್ತ್ ಪೆಟ್ಟಾದ್ ಎಜೆ ಆಸ್ಪತ್ರೆಡ್ ಚಿಕಿತ್ಸೆ ಪಡೆಯೊಂದುಲ್ಲೆರ್ ಪಂಡ್‌ದ್ ತೆರಿದ್ ಬೈದ್ಂಡ್.

ಸಿನಿಮಾ ನಟೆ ವಿನೀತ್ ಬೊಕ್ಕ ಫ್ರೆಂಡ್ಸ್‌ನ ಪೊಸ ಉದ್ಯಮ “​ವಿಕೆ ಕೋಸ್ಟಲ್ ವೆಂಚರ್ಸ್‌” ಉದಿಪನ

ಕುಡ್ಲ : ಸಿನಿಮಾ ನಟೆ ವಿನೀತ್ ಬೊಕ್ಕ ಕೂಟದಕ್ಲೆನ ಪೊಸ ಉದ್ಯಮ ‘ವಿಕೆ ಕೋಸ್ಟಲ್ ವೆಂಚರ್ಸ್’ ಐತಾರ ಬೊಲ್ಪುಗು ಪಂಪ್‌ವೆಲ್‌‌ಡ್
ಉದಿಪನ ಆಂಡ್.
ಬೈದಿ ಬಿನ್ನೆರ್ ತುಡರ್ ಅರ್ಲಾದ್ ಲೇಸ್ ಉದಿಪನ ಮಲ್ತ್‌ದ್ ಪೊಸ ಉದ್ಯಮಗ್ ಎಡ್ಡೆಪ್ಪು ಬಯಕಿಯೆರ್.
​ಈ ಪೊರ್ತುಡು ಪಾತೆರಿನ ಎಸ್.ಎಲ್. ಶೇಟ್ ಡೈಮಂಡ್ ಹೌಸ್‌ದ ಧಣಿಕುಲು ರವೀಂದ್ರ ಶೆಟ್ಟಿ ಆರ್, ಚಿತ್ರನಟೆ ವಿನೀತ್ ಕುಮಾರ್, ಸಮತಾ ಅಮೀನ್, ನಿತಿನ್ ರಾಜ್ ಶೆಟ್ಟಿ, ದೀಕ್ಷಾ ಶೆಟ್ಟಿ ಮೊಕ್ಲೆನ ಈ ಪೊಸ ಉದ್ಯಮ ಎಡ್ಡೆ ರೀತಿಡ್ ದುಂಬು ನಡಪಡ್. ಇಂದೆಡ್ದ್ ಮಾತೆರೆಗ್ಲಾ ಎಡ್ಡೆ ಆವಡ್ ಪಂದ್ ಪಂಡೆರ್.
​ಡಾ. ದೇವರಾಜ್ ಆಚಾರ್ಯ ಪಾತೆರ್ದ್, ವಿನೀತ್ ಎನ್ನ ವಿದ್ಯಾರ್ಥಿ. ಮೊಕ್ಲೆನ ಈ ಪೊಸ ಉದ್ಯಮ ಯಶಸ್ವಿ ಆವಡ್ ಪಂದ್ ಪಂಡೆರ್.
​ಉದ್ಯಮಿ ಹರಿಪ್ರಸಾದ್ ರೈ ಬೆಳ್ಳಿಪ್ಪಾಡಿ ಪಾತೆರ್ದ್, ಕುಡ್ಲ ರಾಜ್ಯೊಡೇ ಮಸ್ತ್ ಬೇಗ ಬುಳೆವೊಂದುಪ್ಪುನ ಪೇಂಟೆ. ಇಂಚಿನ ಪೊಸ ಪೊಸ ಉದ್ಯಮಲು ಬರ್ಪಿನ ಪನ್ಪಿನವು ಖುಷಿತ ಸಂಗತಿ. ವಿನೀತ್ ಬೊಕ್ಕ ಫ್ರೆಂಡ್ಸ್ ‌ನ ಈ ಪಯಣ ಜಯ ಶಾಲಿಯಾವಡ್” ಪಂಡೆರ್.
​ಚಿತ್ರ ನಿರ್ಮಾಪಕೆರ್ ಪ್ರಕಾಶ್ ಪಾಂಡೇಶ್ವರ್ ಪಾತೆರ್ದ್, “ವಿನೀತ್ ಚಿತ್ರರಂಗೊಡು ಗೆಲ್ಮೆ ಪಡೆದ್‍ನಂಚನೆ ಪೊಸ ಉದ್ಯಮಡ್‌ಲ ಗೆಲ್ಮೆ ಪಡೆಯೊಡು” ಪಂದ್ ಪಂಡೆರ್.
​ರಕ್ಷಿತ್ ರಾವ್, ಸುಧಾಂಜಿ, ಅರವಿಂದ್ ಬೋಳಾರ್, ಜಗನ್ನಾಥ ಶೆಟ್ಟಿ ಬಾಳ, ವಿಖ್ಯಾತ್, ಮಯೂರ್, ಅಶ್ವಿನ್, ಆನಂದ ಕುಂಪಲ, ಆರ್.ಜೆ. ಶಾಹಿಲ್ ಬೊಕ್ಕ ವಿನೀತ್ ಕುಮಾರ್, ಸಮತಾ ಅಮೀನ್, ನಿತಿನ್ ರಾಜ್ ಶೆಟ್ಟಿ, ದೀಕ್ಷಾ ಶೆಟ್ಟಿ, ಬೊಕ್ಕ ಮುಲ್ಪ ಇತ್ತಿನಕುಲು ಹಾಜರಿತ್ತೆರ್.
​ಸಾಹಿಲ್ ರೈ ಕಾರ್ಯಕ್ರಮ ನಡಪಾದ್ ಕೊರಿಯೆರ್.

ಮೀನ್‌ದ ಲಾರಿಲೆನ ಮಿತ್ತ್ 604 ಕೇಸ್ : 3.02 ಲಕ್ಷ ರೂ. ದಂಡ ವಸೂಲ್

ಕುಡ್ಲ : ಮೀನ್ ಸಾಗಾಟ ಮಲ್ಪುನ ಲಾರಿಲೆರ್ದ್ ಮಾರ್ಗದ ಮಿತ್ತ್ ಗಲೀಜಿ ನೀರ್ ಬೂರುನೆರ್ದಾವರ ಸಾರ್ವಜನಿಕೆರೆಗ್ ಮಸ್ತ್ ಸಮಸ್ಯೆ ಆವೊಂದಿತ್ತಿನೆನ್ ಸೀರಿಯಸ್ ಆದ್ ದೆತೊನ್ನ ಪೊಲೀಸ್ ಇಲಾಖೆ ಈ ವರ್ಷಡ್ ಇದಮುಟ್ಟ 604 ಕೇಸ್ ದಾಖಲ್ ಮಲ್ತ್‌ದ್ ಒಟ್ಟು 3,02,000 ರೂ. ದಂಡ ವಸೂಲಿ ಮಲ್ದ್ಂಡ್ ಪಂಡ್‌ದ್ ಪೊಲೀಸ್ ಆಯುಕ್ತೆರ್ ಸುಧೀರ್ ಕುಮಾರ್ ರೆಡ್ಡಿ ತೆರಿಪಾದೆರ್.
ಕರಿನ ವರ್ಷಗ್ ತೂಂಡ ಈ ಸರ್ತಿ ಶೇ. 30 ಗುಲ ಎಚ್ಚ ಕೇಸ್ ದಾಖಲ್ ಆತ್ಂಡ್. ಮೀನ್ ಸಾಗಣೆ ಮಲ್ಪುನ ಪೊರ್ತುಡು ಗಾಡಿರ್ದ್ ನೀರ್ ದೊರಿಯಂದಿಲೆಕ ತಡೆಪರೆ ಪೊಲೀಸೆರ್ ನಿರಂತರ ತಪಾಸಣೆ ಮಲ್ತೊಂದುಲ್ಲೆರ್. ಕೆಲವು ಮಾರ್ಗೊಡು ಇಂಚಿನ ಗಾಡಿಲೆನ ಸಂಚಾರಗ್ ನಿರ್ಬಂಧ ಪಾಡ್ದಿನ ಬಗೆಟ್ಟ್ ಪಲವೆಲೆನ್ ಪಾಡ್ದೆರ್.

ಕುಡ್ಲಡ್ ಸುರುತ ವಿಶ್ವ ಕೊಂಕಣಿ ಸಂಗೀತ ಮಹಾಸಮ್ಮೇಳನಗ್ ಗೋವಾ ಮುಖ್ಯಮಂತ್ರಿ ಡಾ. ಪ್ರಮೋದ್ ಸಾವಂತ್ ಚಾಲನೆ

12 ದಿನತ ನಿರಂತರ ಪದ ಪನ್ಪಿನೆತ್ತ ಗಿನ್ನೆಸ್ ವಿಶ್ವ ದಾಖಲೆ ಪ್ರಯತ್ನ : 6,700ಡ್ದ್ ಜಾಸ್ತಿ ಗಾಯಕೆರ್

ಕುಡ್ಲ : ಕೊಂಕಣಿ ಸಾಂಸ್ಕೃತಿಕ ಸಂಘಟನೆ ಮಾಂಡ್ ಸೊಭಾಣ್‌ದ 40ನೇ ವರ್ಷದ ಪರ್ಬದ ಅಂಗವಾದ್ ಆಯೋಜನೆ ಮಲ್ದಿನ ಪ್ರಪ್ರಥಮ ವಿಶ್ವ ಕೊಂಕಣಿ ಸಂಗೀತ ಮಹಾಸಮ್ಮೇಳನಗ್ ಅಂಗಾರೆ ಕಾಂಡೆ 5 ಗಂಟೆಗ್ ಕುಡ್ಲದ ಪುರಭವನಡ್ ಅದ್ದೂರಿ ಚಾಲನೆ ತಿಕ್ಂಡ್.
ನ. 3ಡ್ದ್ 15 ತಾರೀಕ್ ಮುಟ್ಟ ನಡೆಪರೆ ಉಪ್ಪುನ 13 ದಿನತ ಈ ಅಂತಾರಾಷ್ಟ್ರೀಯ ಸಮ್ಮೇಳನ ಜಗತ್ತ್‌ದ ಮಾತ ಕೊಂಕಣಿ ಭಾಷಿಕೆರೆನ್ ಒಂಜೇ ವೇದಿಕೆಡ್ ಒಟ್ಟು ಮಲ್ಪುನ ಉದ್ದೇಶ ದೀವೊಂದುಂಡು.
ಗೋವಾ ಮುಖ್ಯಮಂತ್ರಿ ಡಾ. ಪ್ರಮೋದ್ ಸಾವಂತ್ ಸಮ್ಮೇಳನನ್ ಉದ್ಘಾಟನೆ ಮಲ್ತೆರ್. ಕುಡ್ಲ ಧರ್ಮಪ್ರಾಂತ್ಯದ ಬಿಷಪ್ ಅತಿ ವಂ. ಡಾ. ಪೀಟರ್ ಪೌಲ್ ಸಲ್ಡಾನ್ಹಾ ಆರ್ ಆಶೀರ್ವಚನ ಕೊರಿಯೆರ್.
ಸಮ್ಮೇಳನದ ವಿಶೇಷ ಆಕರ್ಷಣೆಯಾದ್ ‘ಕೊಂಕಣಿ ನಿರೊಂತರಿ – ಸೊಂಸಾರ್ ಸೊರಾಸೊರಿ’ ಪನ್ಪಿನ ಪುದರ್‌ಡ್ ಗಿನ್ನೆಸ್ ವಿಶ್ವ ದಾಖಲೆ ಮಲ್ಪುನ ಪ್ರಯತ್ನ ನಡೆಪರೆ ಉಂಡು. ಸತತ 12 ದಿನ ಬುಡಂದೆ ಪದ್ಯ ಪನ್ಪಿನ ಮ್ಯಾರಥಾನ್ ಆಯೋಜನೆ ಮಲ್ದ್‌ದ್, 300 ತಂಡದ ಗಾಯಕೆರ್ ಸರದಿದ ಪ್ರಕಾರೊಡು ಪಾಲ್ ಪಡೆವೆರ್. ಜಗತ್ತ್‌ದ ಬೇತೆ ಬೇತೆ ಜಾಗೆಡ್ದ್ 6,700ಡ್ದ್ ಜಾಸ್ತಿ ಗಾಯಕೆರ್ ಪಾಲ್ ಪಡೆವೆರ್. ನೆಟ್ಟ್ ಗೋವಾದ 53 ತಂಡದಕುಲುಲ ಸೇರ್ದೆರ್. ಬೇತೆ ಬೇತೆ ಕೊಂಕಣಿ ಉಪಭಾಷೆಲು, ಸಮುದಾಯೊಲು ಬೊಕ್ಕ ಸಂಗೀತ ಪರಂಪರೆನ್ ಪ್ರತಿನಿಧಿಸಾವುನ 4,500ಡ್ದ್ ಜಾಸ್ತಿ ಪದೊಕುಲೆನ್ ಒಂಜೊಂಜಿ ಪದ ಅತ್ತ್ಂಡ ಪದ ರಿಪೀಟ್ ಮಲ್ಪಂದೆ ಪನ್ಪಿನ ಗುರಿ ದೀತೆರ್.
ಗೋವಾದ ಕ್ಯಾಲಂಗುಟ್ ಕ್ಷೇತ್ರದ ಶಾಸಕೆರ್ ಮೈಕಲ್ ಲೋಬೋ ಮೇರ್ ಮಾಂಡ್ ಸೊಭಾಣ್‌ದ ಸ್ಥಾಪಕೆರ್ ಎರಿಕ್ ಒಝಾರಿಯೊ ಅರೆನ ನೆಂಪು ಮಲ್ತೆರ್.
ಕಾರ್ಯಕ್ರಮಡ್ ಕರ್ನಾಟಕ ವಿಧಾನ ಪರಿಷತ್ ಸದಸ್ಯೆರ್ ಐವನ್ ಡಿಸೋಜ, ಗೋವಾದ ಶಾಸಕೆರಾಯಿನ ಮೈಕಲ್ ಲೋಬೋ ಬೊಕ್ಕ ದೆಲಿಲಾ ಲೋಬೋ, ಸ್ವಾಗತ ಸಮಿತಿದ ಸದಸ್ಯೆರ್ ಡಾಲ್ಫಿ ಪ್ರಶಾಂತ್ ಡಿಸೋಜ, ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿದ ಅಧ್ಯಕ್ಷೆರ್ ಸ್ಟ್ಯಾನಿ ಅಲ್ವಾರಿಸ್, ಜಾಯ್ಸ್ ಒಝಾರಿಯೊ, ರಾಯ್ ಕ್ಯಾಸ್ಟೆಲಿನೊ, ಪ್ರಕಾಶ್ ಶೆಟ್ಟಿ ಮಂಗಳೂರು, ಎರಿಕ್ ಕೊರೆಯಾ, ರೊನಾಲ್ಡ್ ಸಿಲ್ವನ್ ಡಿಸೋಜ ಬೊಕ್ಕ ಕೃಷ್ಣಪ್ರಸಾದ್ ಪಾಲ್ ಪಡೆದಿತ್ತೆರ್.
ಮಾಂಡ್ ಸೊಭಾಣ್ ಅಧ್ಯಕ್ಷೆರ್ ಲೂಯಿಸ್ ಜೆ. ಪಿಂಟೊ ಆರ್ ಬಿನ್ನೆರೆನ್ ಎದ್ಕೊಂಡೆರ್. ರೈನೆಲ್ ಸಿಕ್ವೇರಾ ಕಾರ್ಯಕ್ರಮನ್ ನಡಪಾದ್ ಕೊರಿಯೆರ್.
ಕಾಂಡೆ ಸರಿ 6 ಗಂಟೆಗ್ ಗೋವಾ ಮುಖ್ಯಮಂತ್ರಿ ಡಾ. ಪ್ರಮೋದ್ ಸಾವಂತ್ ಆರ್ ಗುಮಟ ವಾದ್ಯ ಬೊಟ್ಟ್ ಲೆಕ್ಕನೆ ಬುಡಂದೆ ಪದ ಪನ್ಪಿನ ಮ್ಯಾರಥಾನ್‌ಗ್ ಚಾಲನೆ ಕೊರಿಯೆರ್.

ಸಹಕಾರ, ಸಮಾಜ ಸೇವೆ ರಂಗಡ್ ಸಾಧನೆ ಮಲ್ತ್ ದ್ ರಾಜ್ಯಮಟ್ಟದ ಪ್ರಶಸ್ತಿಗ್ ಆಯ್ಕೆ ಆಯಿನ ದ.ಕ. ಸಹಕಾರಿ ನೌಕರೆರೆನ ಸಹಕಾರ ಸಂಘ

ಕುಡ್ಲ : ಡಾ. ಎಂ.ಎನ್. ರಾಜೇಂದ್ರ ಕುಮಾರ್ ಮೆರೆನ ಸಮರ್ಥ ಬೊಕ್ಕ ದಕ್ಷ ಮಾರ್ಗದರ್ಶನಡ್ ಯಶಸ್ವಿಯಾದ್ ನಡತೊಂದು ಇಪ್ಪುನ ದಕ್ಷಿಣ ಕನ್ನಡ ಜಿಲ್ಲಾ ಕೇಂದ್ರ ಸಹಕಾರಿ ನೌಕರೆರೆನ ಸಹಕಾರ ಸಂಘ ಇತ್ತೆ ಅತ್ಯುನ್ನತ ರಾಜ್ಯಮಟ್ಟದ ಪ್ರಶಸ್ತಿನ್ ಪಡೆದ್ ಕೀರ್ತಿ ಕನದ್ಂಡ್.

ಸುಮಾರ್ 95 ವರ್ಷೊಲೆನ ಪೆರ್ಮೆದ ಇತಿಹಾಸ ಇಪ್ಪುನ ಈ ಸಂಘ, ಇತ್ತೆನೆ ದಕ್ಷಿಣ ಕನ್ನಡ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ ರ್ದ್ ನಿರಂತರವಾದ್ ಒರ್ಂಬ ಸರ್ತಿ ಪ್ರಶಸ್ತಿನ್ ಪಡೆಪುನ ಮುಕೇನ ತನ್ನ ವಿಶಿಷ್ಟ ಸೇವೆನ್ ತೂಪಾದ್ಂಡ್.

ಸಹಕಾರ ಬೊಕ್ಕ ಸಮಾಜ ಸೇವಾ ಕ್ಷೇತ್ರಡ್ ನೌಕರೆರೆನ ಸಂಘ ತೂಪಾಯಿನ ಈ ವಿಶಿಷ್ಟ ಸೇವೆಗ್ ರಾಜ್ಯ ಮಟ್ಟದ ಪುಗರ್ತೆದ ಪ್ರಶಸ್ತಿ ತಿಕಿನವು ಸಂಘದ ಮಾತ ಪದುಕೆರ್ ಬೊಕ್ಕ ಸದಸ್ಯೆರೆಗ್ ಮಾಸ್ತ್ ಕುಸಿ ಕೊರ್ತುಂಡು ಪಂದ್ ಸಂಘದ ಅಧ್ಯಕ್ಷೆರ್ ಜಗದೀಶ್ ಅಂಚನ್ ಪಂಡೆರ್.

ಈ ಐತಿಹಾಸಿಕ ಸಾಧನೆಗ್ ಕಾರಣ ಆಯಿನ ಜಿಲ್ಲಾ ಆಡಳಿತ ಜಿಲ್ಲಾ ಉಸ್ತುವಾರಿ ಸಚಿವೆರ್ ಬೊಕ್ಕ ಸರ್ಕಾರದ ಮಾತ ಪ್ರತಿನಿಧಿಲೆಗ್ ಸಂಘದ ಮುತಾಲಿಕೆಡ್ ಉಡಲ್ ದಿಂಜಿನ ಬೊಕ್ಕ ಇಸೇಸ ಕೃತಜ್ಞತೆನ್ ಸಂದಾದೆರ್.

ರಾಜ್ಯ ಸರಕಾರ ಅಭಿವೃದ್ಧಿದ ಬೇಲೆಗ್ ಅನುದಾನ ಬುಡುಗಡೆ ಮಲ್ತಿಜಿಡ ಮಲ್ಲ ಪೊರ್ಂಬಾಟ ಮಲ್ಪುವ : ದಿನೇಶ್ ಪುತ್ರನ್

ಕಿನ್ನಿಗೋಳಿ : ಗ್ರಾಮ ಪಂಚಾಯಿತಿಲೆಗ್ ವೋಟುಗು ತಡ ಆವೊಂದು ಇಪ್ಪುರ್ನೆದಾವೆರ ಕೈತಲ್ದ ಆಡಳಿತ ಬೊಕ್ಕ ಅಭಿವೃದ್ಧಿ ಕಾರ್ಯಲೆನ ಮಿತ್ತ್ ಪರಿಣಾಮ ಬೂರ್ದುಂಡು, ಮಾರ್ಗಗ್ ಲೈಟ್ ಬೊಕ್ಕ ಪರ್ಪಿನ ನೀರ್ ದ ಸಮಸ್ಯೆರ್ದ್ ಜನಸಾಮಾನ್ಯೆರ್ ತೊಂದರೆ ಅನುಭವಿಸಾವೊಂದು ಉಲ್ಲೆರ್. ರಾಜ್ಯ ಸರಕಾರ ಅಭಿವೃದ್ಧಿ ಕಾಮಗಾರಿಲೆಗ್ ಆಯಿನಾತ್ ಬೇಗ ಅನುದಾನ ಬುಡುಗಡೆ ಮಲ್ತಿಜಿಂಡ ತಾಲೂಕ್ ಮಟ್ಟಡ್ ಮಲ್ಲ ಪೊರ್ಂಬಾಟ ಮಲ್ಪುವ ಪಂದ್ ಬಿಜೆಪಿ ಮುಲ್ಕಿ–ಬೆದ್ರ ಮಂಡಲದ ಅಧ್ಯಕ್ಷೆರ್ ದಿನೇಶ್ ಪುತ್ರನ್ ಎಚ್ಚೆರ್ಗೆ ಕೊರಿಯೆರ್.

ರಾಜ್ಯ ಸರಕಾರ ಗ್ರಾಮೀಣ ಪ್ರದೇಶಲೆನ ಅಭಿವೃದ್ಧಿ ಕಾಮಗಾರಿಲೆಗ್ ಅಗತ್ಯ ಅನುದಾನ ಬುಡುಗಡೆ ಮಲ್ಪಂದಿರ್ನೆದಾವೆರ ಗ್ರಾಮ ಮಟ್ಟಡ್ ಅಭಿವೃದ್ಧಿ ಕಾರ್ಯಲು ಆವೊಂದು ಇಜ್ಜಿ ಪಂದ್ ಮೇರ್ ಆರೋಪ ಮಲ್ತೆರ್. ಮೂಲಸೌಕರ್ಯಲೆನ ಕೊರತೆರ್ದ್ ಜನಕುಲು ಪ್ರತಿ ದಿನೊಲ ಸಮಸ್ಯೆನ್ ಎದುರಿಸಾವೊಡು. ದಾರಿದೀಪದ ವ್ಯವಸ್ಥೆ ಸಮರ್ಪಕ ಇಜ್ಜಂದೆ ಬೊಕ್ಕ ನೀರ್ ದ ಸಮಸ್ಯೆ ಸಾರ್ವಜನಿಕೆರೆಗ್ ತೊಂದರೆ ಆವೊಂದು ಉಂಡು ಪಂದ್ ಪಂಡೆರ್.

ಗ್ರಾಮ ಪಂಚಾಯಿತಿಲೆಗ್ ವೋಟು ಮಲ್ಪೆರೆ ಲೇಟಾಯಿರ್ನೆದಾವೆರ ಅಭಿವೃದ್ಧಿ ಕಾಮಗಾರಿಲೆಗ್ ಅನುದಾನ ಬುಡುಗಡೆ ಆತಿಜಿ. ಗ್ರಾಮೀಣ ಭಾಗದ ಪ್ರಗತಿಗ್ ತೊಂದರೆ ಆವೊಂದು ಉಂಡು ಪಂದ್ ದಿನೇಶ್ ಪುತ್ರನ್ ಅಭಿಪ್ರಾಯನ್ ತೆರಿಪಾಯೆರ್. ಜನಸಾಮಾನ್ಯೆರೆನ ಮೂಲಭೂತ ಅಗತ್ಯಲೆನ್ ನೇರವೇರಿಸಾವುನೇ ಸರಕಾರದ ಜಬದಾರಿ ಆತ್ಂಡ್, ಅಂಚಾದ್ ಈ ಕೂಡ್ಲೇ ಕ್ರಮ ದೆತೊನೊಡು ಪಂದ್ ಬೆಚ್ಚ ಆತೆರ್.

ಕ್ಷೇತ್ರ ವ್ಯಾಪ್ತಿದ ಗ್ರಾಮಲೆಡ್ ಅಭಿವೃದ್ಧಿ ಕಾರ್ಯಲು ಬೇಗ ಆಯೆರೆ ಸರಕಾರ ಕೂಡ್ಲೇ ಅಗತ್ಯ ಅನುದಾನ ಬುಡುಗಡೆ ಮಲ್ಪೊಡು. ಇಜ್ಜಿಂಡ ಜನಸಾಮಾನ್ಯೆರ್ ಸೇರ್ಸಾದ್ ತಾಲೂಕ್ ಮಟ್ಟಡ್ ಪೊರ್ಂಬಾಟ ಮಲ್ಪುವ. ಜನಕ್ಲೆನ ಸಮಸ್ಯೆಗ್ ಸ್ಪಂದಿಸಾವುನ ಮುಟ್ಟ ಪೊರ್ಂಬಾಟ ಆಪುಂಡು ಪಂದ್ ಮೇರ್ ರಾಜ್ಯ ಸರಕಾರಗ್ ಎಚ್ಚರಿಕೆ ಕೊರ್ತೆರ್.

ನ. 3-15 : ಕುಡ್ಲದ ಟೌನ್‌ಹಾಲ್‌ಡ್ ಕಡೀರ್‌ದ ವಿಶ್ವ ಕೊಂಕಣಿ ಸಂಗೀತ ಮಹಾ ಸಮ್ಮೇಳನ

ಕುಡ್ಲ : 1986 ಟ್ಟ್ ಸುರು ಆತಿನ ಕೊಂಕಣಿದ ಪ್ರಮುಖ ಸಾಂಸ್ಕೃತಿಕ ಸಂಘಟನೆ ಮಾಂಡ್ ಸೊಭಾಣ್ ತನ್ನ 40ನೇ ವರ್ಷಾಚರಣೆದ “ಮಾಣಿಕ್ಯೋತ್ಸವ” ಆಚರಣೆ ಮಲ್ತೊಂದುಂಡು. ಈ ಸಂದರ್ಭಡ್ ಜಗತ್ತ್‌ದ ಮೂಲೆ ಮೂಲೆರ್ದ್ ಕೊಂಕಣಿ ಸಮುದಾಯದ ಜನಕ್ಲೆನ್ ಒಟ್ಟು ಮಲ್ತ್‌ದ್, ಅದ್ಭುತ ಸಂಗೀತ ಕಾರ್ಯಕ್ರಮ ಸಂಯೋಜನೆ ಮಲ್ತ್‌ದ್ ಕೊಂಕಣಿ ಪತಾಕೆನ್ ಜಗದೆತ್ತರಗ್ ರಾಪಾವುನ ಉದ್ದೇಶಡ್ ನವೆಂಬರ್ 03 ರ್ದ್ 15 ತಾರೀಕ್ ಮುಟ್ಟ,ಕುಡ್ಲದ ಪುರಭವನಡ್ ಸುರೂತ್ತ ವಿಶ್ವ ಕೊಂಕಣಿ ಸಂಗೀತ ಮಹಾ ಸಮ್ಮೇಳನ ಆಯೋಜನೆ ಮಲ್ದೆರ್.

ಕೊಂಕಣಿದ ಮಾತಾ ಕ್ಷೇತ್ರಗ್ ಪ್ರಮುಖವಾದ್ ಕೊಂಕಣಿ ಸಂಗೀತ ಕ್ಷೇತ್ರಗ್ ಮಲ್ಲ ಕೊಡುಗೆ ಕೊರ್ತಿನ ಮಾಂಡ್ ಸೊಭಾಣ್ ಗುರ್ಕಾರ್ಲು ದಿ. ಎರಿಕ್ ಒಝೇರಿಯೊ ಮೆರೆನ ಗೌರವಾರ್ಥ ನಡಪುನ ಈ ಮಹಾ ಸಮ್ಮೇಳನಡ್ ವಿವಿಧ ಕಾರ್ಯಕ್ರಮ ಸಂಯೋಜನೆ ಆತ್ಂಡ್ ಪಂದ್ ಮಾಂಡ್ ಸೋಭಾಣ್‌ದ ಗುರ್ಕಾರ್ಲು ಲುವಿ ಜೆ. ಪಿಂಟೊ ಅಂಗಾರೆ ಪತ್ರಿಕಾಗೋಷ್ಠಿಡ್ ತೆರಿಪಾಯೆರ್.

ಉದಿಪನದ ಲೇಸ್:
ಈ ಮಹಾ ಸಮ್ಮೇಳನನ್ ಗೋವಾದ ಮುಖ್ಯಮಂತ್ರಿ ಡಾ. ಪ್ರಮೋದ್ ಸಾವಂತ್ ನ. 3 ಕ್ಕ್ ಕಾಂಡೆ 5 ಗಂಟೆಗ್ ಪುರಭವನಡ್ ಉದ್ಘಾಟನೆ ಮಲ್ಪುವೆರ್. ಮಂಗಳೂರು ಬಿಷಪ್ ಅ.ವಂ. ಡಾ. ಪೀಟರ್ ಪಾವ್ಲ್ ಸಲ್ಡಾನ್ಹಾ ಆಶೀರ್ವಚನ ಮಲ್ಪುವೆರ್. ಸ್ವಾಗತ ಸಮಿತಿ ಅಧ್ಯಕ್ಷೆರ್ ಡಾ. ರೊನಾಲ್ಡ್ ಕುಲಾಸೊ ಅಧ್ಯಕ್ಷತೆ ವಹಿಸೊನ್ವೆರ್.

ಗಿನ್ನೆಸ್ ವಿಶ್ವ ದಾಖಲೆಗ್ ಪ್ರಯತ್ನ
ನ.3 ತಾರೀಕ್ ಕಾಂಡೆ 6 ಗಂಟೆರ್ದ್ ಬೊಕ್ಕದ 12 ದಿನ, 12 ಗಂಟೆ ಬೊಕ್ಕ 12 ನಿಮಿಷದ, ಅತೀ ದೀರ್ಘ ಅವಧಿದ, ಸಮೂಹ ಗಾಯನದ ಗಿನ್ನೆಸ್ ದಾಖಲೆ ಮಲ್ಪರೆ ಪ್ರಯತ್ನ ಮಲ್ಪರೆ ಉಂಡು. ʻಕೊಂಕಣಿ ನಿರಂತರಿ – ಸಂಸಾರ್ ಸರಾಸರಿʼ ಪುದರ್‌ದ ಈ ಪ್ರಯತ್ನಡ್ ಭಾರತ, ಆಸ್ಟ್ರೇಲಿಯಾ, ಕುವೇಯ್ಟ್, ಓಮನ್, ಖತಾರ್ ದೇಶರ್ದ್ ಕ್ರೈಸ್ತ-ಹಿಂದೂ-ಮುಸ್ಲಿಮ್-ಧರ್ಮಗ್ ಸೇರ್ದಿನ ಕ್ರೈಸ್ತ, ಜಿ. ಎಸ್. ಬಿ., ಕುಡಾಲ್ ದೇಶಸ್ಥ, ಖಾರ್ವಿ, ಕುಡುಬಿ, ಸಿದ್ದಿ, ನವಾಯತಿ, ಸಿರಿಯನ್ ಕ್ರೈಸ್ತ ಇತ್ಯಾದಿ ಕೊಂಕಣಿ ಜನಸಮುದಾಯ ಬೊಕ್ಕ ಇತರೆ ಭಾಷೆದ ಜನಕುಲು ಪಾಲ್ ಪಡೆವೆರ್. 6789+ ಗಾಯಕೆರ್, 250+ ಸಂಗೀತ ಸಂಯೋಜಕೆರ್ ರಚನೆ ಮಲ್ದಿನ, ವಿವಿಧ ಭಾಷಾ ಪ್ರಬೇಧದ 4500+ ಕೊಂಕಣಿ ಪದ್ಯಲೆನ್ ಪನರೆ ಉಲ್ಲೆರ್. ಒಟ್ಟು 300 ತಂಡ, ತಲಾ 1 ಗಂಟೆ ಪದ್ಯ ಪಂಡ್‌ದ್ ಈ ದಾಖಲೆಗ್ ಪ್ರಯತ್ನ ಮಲ್ಪರೆ ಉಲ್ಲೆರ್. ಗುರುʼ ಜೊಯೆಲ್ ಪಿರೇರಾ ನೆತ್ತ ನಿರ್ದೇಶಕೆರಾದುಲ್ಲೆರ್ .
ವಿಚಾರ ಸಂಕಿರಣ: ಈ ಸಂಭ್ರಮಡ್ 12 ವಿಚಾರ ಗೋಷ್ಟಿ ನಡಪರೆ ಉಂಡು.1. ಕೊಂಕಣಿ ಭಕ್ತಿ ಸಂಗೀತ – ಗೋವಾ (ಫಾ. ಒನೆಸಿಸ್ ಡಿಕ್ರೂಜ್) 2. ಕೊಂಕಣಿ ಭಕ್ತಿ ಸಂಗೀತ – ಮಂಗಳೂರು ಮತ್ತು ಇತರೆಡೆ (ಫಾ ಜಯಪ್ರಕಾಶ್ ಡಿಸೋಜ) 3. ಕೊಂಕಣಿ ಜನಪದ ಸಂಗೀತ – ಗೋವಾ (ಡಾ. ಕೊಸ್ಮೊ ಫೆರ್ನಾಂಡಿಸ್) 4. ಕೊಂಕಣಿ ಜನಪದ ಸಂಗೀತ – ಮಂಗಳೂರು ಬೊಕ್ಕ ಬೇತೆ ಕಡೆ (ಡಾ. ಪ್ರೀತಿ ಕೀರ್ತಿ ಡಿಸೋಜ) 5. ಆರೋಗ್ಯಗಾದ್ ಸಂಗೀತ (ಅಂಕುಶ್ ನಾಯಕ್) 6. ಅಂತರರಾಷ್ಟ್ರೀಯ ಸಂಗೀತ (ಡಾ. ಪಾವ್ಲೊ ಪಚಿಯೊಲಾ) 7. ಬಾಯ್ಲಾ ಸಂಗೀತ (ಆಲ್ವಿನ್ ಫೆರ್ನಾಂಡಿಸ್) 8. ಸಂಗೀತಗಾರೆರ್ ಬೊಕ್ಕ ರಚನೆ (ನೀತಾ ರೆಬೆಲ್ಲೊ) 9.ರಂಗಭೂಮಿ ಬೊಕ್ಕ ಸಿನೆಮಾ ಸಂಗೀತ (ಕ್ಯಾಜಿಟನ್ ಡಾಯಸ್) 10. ಮಾಂಡ್ ಸೊಭಾಣ್ ಸಂಗೀತದ ಪ್ರಭಾವ (ವಂ. ಡಾ. ಆಲ್ವಿನ್ ಸೆರಾವೊ) 11. ಬೌದ್ಧಿಕ ಆಸ್ತಿ ಹಕ್ಕು (ಡಾ. ಸಾಯೊನಾರಾ ಟೆಲ್ಲೆಸ್) 12. ಯಾಂತ್ರಿಕ ಬುದ್ದಿಮತ್ತೆ ಬೊಕ್ಕ ಸಂಗೀತ (ವಂ. ಡಾ. ವಿಕ್ಟರ್ ಫೆರಾವೊ) ವಿಚಾರೊಡು ಪ್ರಬಂಧ ಮಂಡನೆ ಮಲ್ಪುವೆರ್.

ಸನ್ಮಾನ:
ಕೊಂಕಣಿ ಸಂಗೀತಗ್ ಮಲ್ಲ ಕೊಡುಗೆ ಕೊರ್ನ 12 ಹಿರಿಯ ಸಂಗೀತಗಾರೆರೆಗ್ ʻವಿಶ್ವ ಕೊಂಕಣಿ ಸಂಗೀತ ಸಾಧನಾ ಪುರಸ್ಕಾರʼ ಕೊರಿಯರೆ ಉಂಡು.. . ದಿ. ಕ್ರಿಸ್ ಪೆರಿ ಗೋವಾ, ಲಾರೆನ್ಸ್ ಸಲ್ಡಾನ್ಹಾ ಮುಂಬಯಿ, ಫಾ. ಲಿನೊ ಡೆಸಾ ಗೋವಾ, ದಿ. ವಸಂತಿ ಆರ್ ನಾಯಕ್ ಮಂಗಳೂರು, ದಿ. ಆಲ್ಫ್ರೆಡ್ ರೋಸ್ ಗೋವಾ, ಶ್ರೀಧರ್ ಖಾರ್ವಿ ಭಟ್ಕಳ, ಮೆಲ್ವಿನ್ ಪೆರಿಸ್ ಮಂಗಳೂರು, ನೇಮಿರಾಜ ಗೌಡ ಕೊಂಪದವು-ದಕ್ಷಿಣ ಕನ್ನಡ, ದಿ. ಜೆರೊಮ್ ಡಿಸೋಜ ಮುಂಬಯಿ, ಮಾಮ್ದು ಇಬ್ರಾಹಿಮ್ ಶೀರೂರು, ದಿ. ಉಲ್ಲಾಸ್ ಬುಯಾಂವ್ ಗೋವಾ ಮತ್ತು ಜುಲಿಯಾನ ಸಿದ್ದಿ ಹಳಿಯಾಳ ಮೊಕ್ಲೆನ್ ಬಿನ್ನೆರ್ ಸನ್ಮಾನ ಮಲ್ಪುವೆರ್.

ಫುಲ್ ಫುಲೊತಾ: ಸಮ್ಮೇಳನಡ್ 10-16 ವರ್ಷದ ಜೋಕ್ಲೆನ್ಲ ಸೇರ್ಸಾವುನ ಉದ್ದೇಶಡ್ ʻಫೂಲ್ ಫುಲೊತಾʼ (ಹೂವು ಅರಳುತ್ತಿದೆ) ಪನ್ಪಿನ ಕೊಂಕಣಿ ನಿರಂತರಿ ಶೈಲಿದ ಸಂಗೀತ ಸಂಜೆ, ನ. 13 ಕ್ಕ್ ಪುರಭವನದ ಎದುರುದ ರಾಜಾಜಿ ಪಾರ್ಕ್ ಬಯಲು ರಂಗ ಮಂದಿರಡ್ ನಡಪರೆ ಉಂಡು.

ವಸ್ತು ಪ್ರದರ್ಶನ : ಪುರಭವನದ ಪಿದಯಿಡ್ ಕೊಂಕಣಿ ಸಂಗೀತದ ಬಗ್ಗೆ ಮಾಹಿತಿ ಕೊರ್ಪಿನ, ಕೊಂಕಣಿ ಜನ ಜೀವನ, ಸಂಸ್ಕೃತಿ ತೊಜಪಾವುನ ತೂಪರಿಕೆ ನಡಪರೆ ಉಂಡು.

ಕೀರ್ತಿ ಮಂದಿರ:
ಮೂಲು ಕೊಂಕಣಿ ಸಂಗೀತ ಕ್ಷೇತ್ರಗ್ ಪೆರ್ಮೆ ಕನದಿನ ಹಿರಿ-ಕಿರಿಯ ಸಂಗೀತಗಾರರ ಬಗ್ಗೆ ಮಾಹಿತಿ ಉಪ್ಪುಂಡು.

ಕೊಂಕಣಿ ಅಟಿಲ್: ಕೊಂಕಣಿದ ವಿವಿಧ ಸಮುದಾಯದ ಖಾದ್ಯ ವೈವಿಧ್ಯದ ಮಾರಾಟ ಮಳಿಗೆ ಉಪ್ಪುಂಡು ಇರಲಿವೆ.

ಮುಗಿತಲದ ಲೇಸ್: ನವೆಂಬರ್ 15 ಬಯ್ಯಡ್ 6.12 ಕ್ಕ್ ಗಿನ್ನೆಸ್ ದಾಖಲೆದ ಗಾಯನ ಮುಗಿಯರೆ ಉಂಡು. ಅವೆರ್ದ್ ಬೊಕ್ಕ ಸಭಾ ಕಾರ್ಯಕ್ರಮ ನಡಪರೆ ಉಂಡು. ಮಾನ್ಯ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಪಾಲ್ ಪಡೆವೆರ್.

ಈ ಇಡೀ ಕಾರ್ಯಕ್ರಮಗ್ ಅಂದಾಜು 3 ಕೋಟಿ ರೂಪಾಯಿ ಖರ್ಚಿ ಉಂಡು ಪಂದ್ ಆರ್ ತೆರಿಪಾಯೆರ್.
ಪತ್ರಿಕಾ ಗೋಷ್ಠಿಡ್ ಆರ್ಥಿಕ ಸಮಿತಿದ ಅಧ್ಯಕ್ಷೆರ್ ರೊಯ್ ಕ್ಯಾಸ್ತೆಲಿನೊ, ಪ್ರಧಾನ ಸಂಗೀತ ನಿರ್ದೇಶಕೆರ್ ಜೊಯೆಲ್ ಪಿರೇರಾ, ಮಾಂಡ್ ಸೊಭಾಣ್ ಸಂಘಟಕೆರ್ ಜೋಕಿಂ ಸ್ಟ್ಯಾನಿ ಆಲ್ವಾರಿಸ್, ಕಾರ್ಯದರ್ಶಿ, ರೊನಾಲ್ಡ್ ಕ್ರಾಸ್ತಾ,
ಗೋವಾ ಸಂಯೋಜಕೆರ್ ಮೈಕಲ್ ಜೂಡ್ ಗ್ರೇಶಿಯಸ್ ಇತ್ತೆರ್.

ಪೊಲೀಸ್ ಕಿರುಕುಳರ್ದ್ ಜವನೆ ಆತ್ಮಹತ್ಯೆ ಆರೋಪ: ಸುರತ್ಕಲ್ ಹೈವೇಡ್ ಪ್ರತಿಭಟನೆ

ಕುಡ್ಲ : ಪೊಲೀಸೆರ್‌ನ ಕಿರುಕುಳರ್ದ್ ಸ್ಥಳೀಯ ವ್ಯಕ್ತಿಯೊರಿ ಆತ್ಮಹತ್ಯೆ ಮಲ್ತೊಂದೆರ್ ಪಂದ್ ಆರೋಪ ಮಲ್ದಿನ ಹೊಸಬೆಟ್ಟು ನಿವಾಸಿಲು ರಾಷ್ಟ್ರೀಯ ಹೆದ್ದಾರಿಡ್ ಪ್ರತಿಭಟನೆ ಮಲ್ತ್‌ದ್ ಸುರತ್ಕಲ್ ಪೊಲೀಸ್ ಠಾಣೆಗೆ ಮುತ್ತಿಗೆ ಪಾಡರೆ ಯತ್ನ ಮಲ್ದಿನ ಘಟನೆದ ಹಿನ್ನೆಲೆಡ್ ಉದ್ವಿಗ್ನ ವಾತಾವರಣ ಇತ್ತ್ಂಡ್.
ಆತ್ಮಹತ್ಯೆ ಮಲ್ತೊನ್ನಾರ್ ಹೊಸಬೆಟ್ಟು ನಿವಾಸಿ ಸೋಮನಾಥ್ ಪಂದ್ ಗುರುತಿಸಾದೆರ್. ಅ.
27 ಅಂಗಾರೆ ಕಾಂಡೆ ಅರೆನ ಇಲ್ಲಡ್ ಸೀಲಿಂಗ್‌ಗೆ ಬಲ್ಲ್ ಪಾಡೊಂದಿನ ಸ್ಥಿತಿಟ್ಟ್ ಸೋಮನಾಥ್ ಪತ್ತೆ ಆತೆರ್. ಕುಟುಂಬ ಸದಸ್ಯೆರ್ ಅರೆನ್ ಆಸ್ಪತ್ರೆಗ್ ಕೊನತೆರ್ಡಲ ಆರ್ ತೀರ್ ಪೋತೆರ್ ಪಂದ್ ವೈದ್ಯೆರ್ ತೆರಿಪಾದೆರ್. ಮೆರೆನ ಮರಣದ ಸುದ್ದಿ ತೆರಿದ್ ಕೋಪೊಡು ಸ್ಥಳೀಯೆರ್ ಅರೆಗ್ ಪೊಲೀಸ್ ವಿಚಾರಣೆದ ಪೊರ್ತುಡು ಕಿರುಕುಳ ಕೊರ್ತೆರ್ ಪಂದ್ ಪ್ರತಿಭಟನೆ ಮಲ್ದೆರ್.
ಈ ಪೊರ್ತುಡು ಶಾಸಕೆರ್ ಡಾ. ಭರತ್ ಶೆಟ್ಟಿ ಕೂಡ್ಲೆ ಸುರತ್ಕಲ್ ಪೊಲೀಸ್ ಠಾಣೆಗ್ ಬತ್ತ್‌ದ್ ಪ್ರತಿಭಟನಾಕಾರೆರ್ನ ಒಟ್ಟುಗು ಪಾತೆರ್‌ದ್ ಪರಿಸ್ಥಿತಿ ಶಾಂತ ಮಲ್ದೆರ್.
ಅ.25 ಐತಾರ ರಾತ್ರಿ ಹೊಸಬೆಟ್ಟು ಬೀಚ್‌‌ಗ್ ಬೈದಿನ ದಿಲ್ಲಿದ ದಂಪತಿಲೆನ್ “ಸೋಮನಾಥ್ ಬೊಕ್ಕ ಕೆಲವೆರ್ ತಡೆತ್‌ದ್ ಕಿರುಕುಳ ಕೊರ್ತೆರ್” ಪಂದ್ ಆ ದಂಪತಿಲು ಸುರತ್ಕಲ್ ಪೊಲೀಸ್ ಸ್ಟೇಶನ್‌ಡ್ ದೂರು ಕೊರ್ದಿತ್ತೆರ್.

You Missed