Fri. Nov 20th, 2026

ಕುಡ್ಲದ ಸುದ್ದಿ | Mangalore News

ಕುಡ್ಲರ್ದ್ ರಾಸ್ ಅಲ್ ಖೈಮಾಗ್ ಏರ್ ಇಂಡಿಯಾ ಎಕ್ಸ್‌ಪ್ರೆಸ್ ಡೈರೆಕ್ಟ್ ಫ್ಲೈಟ್

ಕುಡ್ಲ : ಕರಾವಳಿದ ಅಂತಾರಾಷ್ಟ್ರೀಯ ಪ್ರಯಾಣಿಕೆರೆಗ್ ವಿಶೇಷವಾದ್ ಯುಎಇಡ್ ಉಪ್ಪುನ ಅನಿವಾಸಿ ಭಾರತೀಯೆರೆಗ್ ಒಂಜಿ ಗುಡ್ ನ್ಯೂಸ್!
ಮಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣರ್ದ್ ಯುನೈಟೆಡ್ ಅರಬ್ ಎಮಿರೇಟ್ಸ್‌‌ದ (UAE) ಪ್ರಮುಖ ಕೈಗಾರಿಕಾ ಬಂದರು ನಗರ, ರಾಸ್ ಅಲ್ ಖೈಮಾಗ್ ಏರ್ ಇಂಡಿಯಾ ಎಕ್ಸ್‌ಪ್ರೆಸ್‌‌ ನೇರ ವಿಮಾನ ಸೇವೆ ಸುರು ಮಲ್ದ್ಂಡ್.

ಕುಡ್ಲರ್ದ್ ರಾಸ್ ಅಲ್ ಖೈಮಾಗೆ ಪೋಯಿನ ಕಡೀರ್‌ದ ವಿಮಾನ ‘IX 871’ಟ್ಟ್ 146 ಪ್ಯಾಸೆಂಜರ್ ಪ್ರಯಾಣ ಮಲ್ದೆರ್. ಪೊಸ ರೂಟ್‌ಗ್ ಸುರುತ್ತ ದಿನನೇ ಭಾರಿ ಬೇಡಿಕೆ ಬೈದ್ಂಡ್. ರಾಸ್ ಅಲ್ ಖೈಮಾರ್ದ್ ಕುಡ್ಲಗ್ ಬತ್ತಿನ ಸುರುತ್ತ ವಿಮಾನ ‘IX 872’ ಟ್ಟ್ 36 ಪ್ರಯಾಣಿಕೆರ್ ಇತ್ತೆರ್. ಸುರುತ್ತ ವಿಮಾನ ಯಾನನ್ ಪೈಲಟ್-ಇನ್-ಕಮಾಂಡ್ ತೇಜ್ ಸ್ವರೂಪ್ ತ್ಸಾಪಾ ಮೆರೆನ ನೇತೃತ್ವದ ಸಿಬ್ಬಂದಿ ಯಶಸ್ವಿಯಾದ್ ಚಾಲನೆ ಮಲ್ತೆರ್.

ಟೈಮ್ ಟೇಬಲ್ :
ಏರ್ ಇಂಡಿಯಾ ಎಕ್ಸ್‌ಪ್ರೆಸ್ ಈ ಮಾರ್ಗಡ್ ಪ್ರತಿ ಸೋಮವಾರ ಬೊಕ್ಕ ಶನಿವಾರ (ವಾರಗ್ ರಡ್ಡ್ ದಿನ) ಡೈರೆಕ್ಟ್ ಸಂಚಾರ ಮಲ್ಪುಂಡು.

ವಿಮಾನ IX 871: ಕುಡ್ಲರ್ದ್ ಕಾಂಡೆ 9:30ಕ್ಕ್ ಪಿದಾಡ್ದ್ ರಾಸ್ ಅಲ್ ಖೈಮಾ ಮುಟ್ಟುಂಡು.
ವಿಮಾನ IX 872: ರಾಸ್ ಅಲ್ ಖೈಮಾರ್ದ್ ಕುಡ್ಲಗ್ ಬಯ್ಯಗ್ 6:25ಕ್ಕ್ ಬತ್ತ್‌ದ್ ಮುಟ್ಟುಂಡು.

ಅ.30-ನ.1: ಕಟೀಲ್ ಡ್ ನುಡಿಪರ್ಬ

ಜನಾರ್ಧನ ಭಟ್ ಅಧ್ಯಕ್ಷತೆಡ್: ಕರ್ಜಗಿ, ಮುಮ್ತಾಸ್, ಮೋಹನ ಆಳ್ವ ಉಪನ್ಯಾಸ

ಕಟೀಲ್ : ಕಟೀಲ್ ಶ್ರೀ ದುರ್ಗಾಪರಮೇಶ್ವರೀ ದೇವಸ್ಥಾನ ಸಮೂಹ ಶಿಕ್ಷಣ ಸಂಸ್ಥೆಲೆನ ಒಟ್ಟುಸೇರಿಗೆಡ್ ನಡಪುನ ಆಜಿನೇ ವರ್ಷದ ಭ್ರಮರ ಇಂಚರ ನುಡಿಪರ್ಬ ಸಮ್ಮೇಳನ ಆ.30 ರ್ದ್ ನ.1 ಮುಟ್ಟ ಮೂಜಿ ದಿನ ಕಟೀಲ್ ಪದವಿಪೂರ್ವ ಕಾಲೇಜ್ ದ ಸಭಾಂಗಣಡ್ ನಡಪರೆ ಉಂಡು.

ಪುಗರ್ತೆದ ಸಾಹಿತಿ ಬಿ. ಜನಾರ್ಧನ ಭಟ್ ಅಧ್ಯಕ್ಷತೆಡ್ ನಡಪರೆ ಇಪ್ಪುನ ಈ ಸಮ್ಮೇಳನನ್ ಅ.30 ಸುಕ್ರಾರ ಬೊಲ್ಪುಗು ಕರ್ನಾಟಕ ಬ್ಯಾಂಕ್ ವ್ಯವಸ್ಥಾಪಕ ನಿರ್ದೇಶಕೆರ್ ರಾಘವೇಂದ್ರ ಎಸ್.ಭಟ್ ಉದಿಪನ ಮಲ್ಪೆರೆ ಉಲ್ಲೆರ್. ವಿದ್ವಾಂಸೆರ್ ಡಾ.ಚಿನ್ನಪ್ಪ ಗೌಡ ನುಡಿಸೇವೆದ ಪಾತೆರಿಯೆರೆ ಉಲ್ಲೆರ್. ಕೆ.ಎಂ. ಶೆಟ್ಟಿ ಮೆರವಣಿಗೆಗ್ ಚಾಲನೆ ಕೊರಿಯೆರೆ ಉಲ್ಲೆರ್. ದಿವಾಕರ ಕದ್ರಿ ಧ್ವಜಾರೋಹಣ ಮಲ್ಪೆರೆ ಉಲ್ಲೆರ್.

ವಸ್ತುಪ್ರದರ್ಶನನ್ ಸಾಂಸದೆರ್ ಬ್ರಿಜೇಶ್ ಚೌಟ ಉದಿಪನ ಮಲ್ಪುವೆರ್. ಶಾಸಕೆರ್ ಉಮಾನಾಥ ಕೋಟ್ಯಾನ್ ಕಾಲೇಜ್ ದ ವಿಶೇಷಾಂಕಲಾಯಿನ ಇಂಚರ, ಭ್ರಮರವಾಣಿಲೆನ್ ಬುಡುಗಡೆ ಮಲ್ಪೆರೆ ಉಲ್ಲೆರ್. ದುಂಬುದ ನುಡಿಪರ್ಬಲೆನ ಅಧ್ಯಕ್ಷೆರಾಯಿನ ಶ್ರೀಧರ ಡಿ.ಎಸ್, ಕೆ.ಪಿ.ರಾವ್, ಪಾದೇಕಲ್ಲು ವಿಷ್ಣು ಭಟ್, ಲಕ್ಷ್ಮೀಶ ತೋಳ್ಪಾಡಿ, ಕಬ್ಬಿನಾಲೆ ಡಾ. ವಸಂತ ಭಾರಧ್ವಾಜರೆನ ಉಪಸ್ಥಿತಿಡ್ ಗೋಷ್ಟಿ ನಡಪರೆ ಉಂಡು.

ಮೂರ್ತಿ ದೇರಾಜೆ ಜೋಕ್ಲೆನ ಸಾಹಿತ್ಯ ಗೋಷ್ಟಿಡ್ ಪಾತೆರಿಯೆರೆ ಉಲ್ಲೆರ್. ಅ.31 ಕ್ಕ್ ಸಮ್ಮೇಳನಾಧ್ಯಕ್ಷೆರ್ ಜನಾರ್ಧನ ಭಟ್ ಮೇರೆನೊಟ್ಟಿಗೆ ಸಂವಾದ ನಡಪರೆ ಉಂಡು. ಬದಲಾಯಿನ ಮನಸ್ಥಿತಿದ ಬಗ್ಗೆ ಡಾ.ಮೋಹನ ಆಳ್ವ, ಶಿಕ್ಷಣ ಪಂಡ ಇತೆ ಅತ್ತ್ ಗೋಷ್ಟಿಡ್ ಡಾ.ಗುರುರಾಜ ಕರ್ಜಗಿ, ಎನ್ನ ಪೆರ್ಮೆದ ಭಾರತದ ಬಗ್ಗೆ ಮುಮ್ತಾಸ್ ಅಬ್ದುಲ್ ನೆಲ್ಯಡ್ಕ ಪಾತೆರಿಯೆರೆ ಉಲ್ಲೆರ್.

ಜನಸಾಮಾನ್ಯ ಸಾಧಕೆರ್ ಗೋಷ್ಟಿಡ್ ನಿತ್ಯಾನಂದ ಒಳಕಾಡು, ಸುರೇಂದ್ರ ಕೋಟ್ಯಾನ್ ಉದ್ಯಾವರ, ಶಾನಾಡಿ ರಾಮಚಂದ್ರ ಭಟ್ಟ, ರಘುರಾಮ ಕುಲಾಲ್ ಆಲೂರು ಪಾಲ್ ಪಡೆಯೆರೆ ಉಲ್ಲೆರ್. ಬಹುಭಾಷೆ ಪ್ರೀತಿದ ಬಗ್ಗೆ ಡಾ. ಶಾಂತಾರಾಮ ಪ್ರಭು ಪಾತೆರಿಯೆರೆ ಉಲ್ಲೆರ್. ನ.1 ಐತಾರ ರಜನಿ ರಾವ್ ದಾಂಡೇಲಿ ಹಕ್ಕಿ ಹಾರುತಿದೆ ನೋಡಿದಿರಾ, ಪವನ್ ಕಿರಣ್‌ಕೆರೆ ಬೊಕ್ಕ ನಟೆ ಪೃಥ್ವಿ ಅಂಬರ್ ಸಾಧನೆದ ಹಾದಿಡ್ ಪನ್ಪಿನ ಬಗ್ಗೆ ಬೊಕ್ಕ ಪ್ರವೀಣ್ ಗುಡಿ ಹುಬ್ಬಳ್ಳಿ ವಿದ್ಯಾವಂತನೆರ್ದ್ ಪ್ರಜ್ಞಾವಂತನ ದಂಚಿ ಪನ್ಪಿನ ಬಗ್ಗೆ ಗೋಷ್ಟಿಡ್ ಉಪನ್ಯಾಸ ಕೊರಿಯೆರೆ ಉಲ್ಲೆರ್.

ನಮ್ಮ ಮಾತೆರ್ನಾಲ ಶಾಲೆ ಹಳೆವಿದ್ಯಾರ್ಥಿಲೆನ ಸಮ್ಮಿಲನಡ್ ಕಟೀಲ್ ಶಿಕ್ಷಣ ಸಂಸ್ಥೆಲೆನ ನಿವೃತ್ತ ಶಿಕ್ಷಕೆರಾಯಿನ ಕೇಶವ ಹೊಳ್ಳ, ಡಾ.ಜಯರಾಮ ಶೆಟ್ಟಿ, ವಾಸುದೇವ ಪ್ರಭು, ವೈ ಮಾಲತಿ, ಸತೀಶ್ ಭಟ್, ಸುಂದರ ಪೂಜಾರಿ ಮೊಕ್ಲೆಗ್ ಮಾನಾದಿಗೆ ನಡಪರೆ ಉಂಡು. ಸಮಾರೋಪ ಸಮಾರಂಭಡ್ ಮುರಳಿ ಕಡೇಕಾರ್ ಮಂಗಳ ನುಡಿನ್ ಪಾತೆರಿಯೆರೆ ಉಲ್ಲೆರ್.

ಕಟೀಲ್ ಶಾಲೆಗ್ 10 ಕಂಪ್ಯೂಟರ್ ಕೊರಿನ ಕುಡ್ಲದ ಪಾರಾದೀಪ್ ಪೋಸ್ಫೇಟ್ಸ್ ಕಂಪೆನಿ

ಕಟೀಲ್ : ಕುಡ್ಲ ಪಾರಾದೀಪ್ ಪೋಸ್ಫೇಟ್ಸ್ ಕಂಪೆನಿದಕುಲು ತನ್ನ ಸಿಎಸ್‌ಆರ್‌ ಫಂಡ್‌ ರ್ದ್ ಕಟೀಲ್ದ ಶ್ರೀ ದುರ್ಗಾಪರಮೇಶ್ವರಿ ಪ್ರಾಥಮಿಕ ಶಾಲೆಗ್ ಕೊರಿನ 10 ಕಂಪ್ಯೂಟರ್‌ ಲೆನ್ ದೇವಲ್ಯೊದ ಅನುವಂಶಿಕ ಅರ್ಚಕೆರ್ ಶ್ರೀಹರಿ ನಾರಾಯಣ ಅಸ್ರಣ್ಣೆರೆಗ್ ಕೈ ಕೈಪಗತೆರ್.
ಕಂಪೆನಿದ ಪಿ.ಷಣ್ಮುಗಂ, ಡಾ.ಕೆ.ಯೋಗೀಶ್ ಭಟ್, ವಿವೇಕ್ ಕೋಟ್ಯಾನ್ ಬೊಕ್ಕ ಪ್ರವೀಣ್‌ಕುಮಾರ್ ಕಟೀಲ್, ಶಿಕ್ಷಣ ಸಂಸ್ಥೆಲೆನ ಸಂಯೋಜನಾಧಿಕಾರಿ ದಯಾನಂದ ಮಾಡ ಉಪಸ್ಥಿತರಿತ್ತೆರ್

ರಘು ಇಡ್ಕಿದು ಬರೆತಿನ ತುಳು ಕಬಿತೆಲೆನ ಕೋಪೆ “ಎನ್ನ ನಲಿಕೆ”ದ ಇಂಗ್ಲಿಷ್ ಅನುವಾದ ಬೂಕು ಬಿಡುಗಡೆ

ಕುಡ್ಲ : ತುಳು ಕನ್ನಡ ಬರವುಗಾರೆರ್, ಉಪನ್ಯಾಸಕೆ ರಘು ಇಡ್ಕಿದು ಮೇರ್ ಬರೆತಿನ ತುಳು ಕಬಿತೆಲೆನ ಕೋಪೆ “ಎನ್ನ ನಲಿಕೆ” 2023ನೇ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿರ್ದ್ ಪುಸ್ತಕ ಪ್ರಶಸ್ತಿ ಪಡೆದಿತ್ತ್ಂಡ್. ಇತ್ತೆ ಈ ಕವನ ಸಂಕಲನನ್ Centre of Excellence in Indian knowledge Systems, Alliance University Bengaluru ಮೊಕುಲು ಇಂಗ್ಲೀಷ್ ಭಾಷೆಡ್ ಪ್ರಕಟ ಮಲ್ದೆರ್.
ಪ್ರೊಫೆಸರ್ ಎ.ಎಮ್ ಶ್ರೀಧರನ್ ಮೇರ್ “ಎನ್ನ ನಲಿಕೆ” ತುಳು ಕವನ ಸಂಕಲನನ್ ಇಂಗ್ಲೀಷ್ ಭಾಷೆಗ್ ಅನುವಾದ ಮಲ್ದೆರ್.
” From Voice to Vision” ಪನ್ಪಿನ ಪುದರ್‌ಡ್ ಪ್ರಕಟ ಆಯಿನ ಈ ಬೂಕು ಅ.29 ಗು ಕಾಂಡೆ 10 ಗಂಟೆಗ್ ಬೆಂಗಳೂರುದ ಚಂದಾಪುರಡ್ ಅಲಯನ್ಸ್ ಯುನಿವರ್ಸಿಟಿ ಸಭಾಂಗಣಡ್ ಬಿಡುಗಡೆ ಆವರೆ ಉಂಡು. ಅಲಯನ್ಸ್ ವಿಶ್ವವಿದ್ಯಾಲಯದ ಪ್ರೊ. ನಾಗೇಂದ್ರ ಅವರು ಕೃತಿ ಬಿಡುಗಡೆ ಮಲ್ಪುವೆರ್. ವಿಶ್ವವಿದ್ಯಾನಿಲಯದ ಕುಲಪತಿ ಡಾ. ಪ್ರಿಸ್ಟ್ಲಿ ಶಾನ್ ಮೆರೆನ ಗೌರವ ಉಪಸ್ಥಿತಿಡ್ ವಿಶ್ವವಿದ್ಯಾನಿಲಯದ ಅಂಗೀಕಾರ ಕೊರಿಯರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಡಾ. ಲಿಜು ಜಾಕೋಬ್ ಬೊಕ್ಕ ತುಳು ಕನ್ನಡ ಬರವುಗಾರೆರ್, ಉಪನ್ಯಾಸಕೆ ರಘು ಇಡ್ಕಿದು ಪಾಲ್ ಪಡೆಯರೆ ಉಲ್ಲೆರ್.

​ಅ.23 ಕ್ಕ್ “ಬನ” ತುಳು ಪಿಚ್ಚರ್ ಬುಡುಗಡೆ

ಕುಡ್ಲ : ಈಶಿ ಪ್ರೊಡಕ್ಷನ್ ಲಾಂಛನೊಡು, ಮನೋಹರ್ ರೈ ವೈಪಾಲ ನಿರ್ಮಾಣೊಡು ನಿತಿನ್ ರೈ ಕುಕ್ಕುವಳ್ಳಿ ನುಳಿಯಾಲು ಮೆರೆನ ನಿರ್ದೇಶನೊಡು ತಯಾರಾಯಿನ “ಬನ” ತುಳು ಸಿನೆಮಾ ಅ. 23 ಸುಕ್ರವಾರ ಕರಾವಳಿ ಜಿಲ್ಲೆಡ್ ರಿಲೀಸ್ ಆವರೆ ಉಂಡು ಪಂಡ್‌ದ್ ಸಿನೆಮಾದ ನಿರ್ಮಾಪಕೆರ್ ಮನೋಹರ್ ರೈ ಬೊಕ್ಕ ನಿರ್ದೇಶಕೆರ್ ನಿತಿನ್ ರೈ ಕುಕ್ಕುವಳ್ಳಿ ಪತ್ರಿಕಾಗೋಷ್ಠಿಡ್ ತೆರಿಪಾಯೆರ್.
​”ಬನ” ಸಿನೆಮಾ ಕುಡ್ಲ, ಸುರತ್ಕಲ್, ಪಡುಬಿದ್ರೆ, ಉಡುಪಿ, ಮಣಿಪಾಲ, ಕಾರ್ಕಳ, ದೇರಳಕಟ್ಟೆ, ಪುತ್ತೂರು, ಸುಳ್ಯ, ಬೆಳ್ತಂಗಡಿ ಬೊಕ್ಕ ಬೇತೆ ಬೇತೆ ಜಾಗೆಡ್ ಬಿಡುಗಡೆ ಆಪುಂಡು. ಸಿನೆಮಾದ ಪ್ರೀಮಿಯರ್ ಶೋ ತೂಯಿನ ಪ್ರೇಕ್ಷಕೆರ್ ಮಸ್ತ್ ಖುಷಿ ಪಟ್‌ದೆರ್.
​ಈ ಪಿಚ್ಚರ್‌ಡ್ ಖ್ಯಾತ ಪತ್ರಕರ್ತೆರ್ ಜಯಪ್ರಕಾಶ್ ಶೆಟ್ಟಿ ಬೊಕ್ಕ ರಾಷ್ಟ್ರ ಪ್ರಶಸ್ತಿ ಪುರಸ್ಕೃತೆ ರೂಪಾ ವರ್ಕಾಡಿ ಪ್ರಮುಖ ಪಾತ್ರೊಡು ನಟಿಸಾದೆರ್. ಜಯಪ್ರಕಾಶ್ ಶೆಟ್ಟಿ ಮೆರೆನ ಖಡಕ್ ಡೈಲಾಗ್‌ ಸಿನೆಮಾದ ಹೈಲೈಟ್ ಆತ್‌ಂಡ್.
ಹೀರೊ ನಿಹಾಲ್ ರೈ, ಹೀರೊಯಿನ್ ಕೃತಿ ಶ್ರೀನಿವಾಸ್ ಪೂಜಾರಿ ಸಿನೆಮಾರಂಗೊಗು ಪೊಸತಾದ್ ಪಾದಾರ್ಪಣೆ ಮಲ್ತ್‌ದೆರ್. ಶರತ್ ಆಳ್ವ, ಪ್ರಿಯಾ ಶೆಟ್ಟಿ, ವಿಜಯಹರಿ ರೈ, ವಿಕಾಸ್ ಪುತ್ರನ್, ನಿಜರೂಪ ಶೆಟ್ಟಿ, ಸವಿತಾ ಅಂಚನ್, ಧನ್ಯ ಪೂಜಾರಿ, ಪ್ರವೀಣ್ ಕೊಡಕ್ಕಲ್ ಸೇರ್ದ್ ಮಸ್ತಗ ಕಲಾವಿದೆರ್ ಅಣಬಿನಯ ಮಲ್ದೆರ್. ಅರುಣ್ ರೈ ಪುತ್ತೂರು ಛಾಯಾಗ್ರಹಣ ಮಲ್ತ್‌ದ್, ನವೀನ್ ನೇರಳ್ತೊಡಿ ಎಡಿಟಿಂಗ್ ಮಲ್ತ್‌ದೆರ್. ಖ್ಯಾತ ಸಂಗೀತ ನಿರ್ದೇಶಕೆರ್ ಜಯಕಾರ್ತಿ ಮೆರೆನ ಸಂಗೀತ ಈ ಚಿತ್ರೊಗು ಉಂಡು.
​”ಬನ” ಸಿನೆಮಾದ ಮಿತ್ತ್ ಪ್ರೇಕ್ಷಕರೆಗ್ ಮಸ್ತ್ ಕುತೂಹಲ ಉಂಡು. “ಬನ” ಸಿನೆಮಾದ ಟ್ರೇಲರ್ ತೂಯಿನ ಪ್ರೇಕ್ಷಕೆರ್ ಎಡ್ಡೆ ಅಭಿಪ್ರಾಯ ಕೊರ್ತೆರ್ ಸುರು. ಎಡ್ಡೆ ಕಥೆ-ಚಿತ್ರಕಥೆ ಇತ್ತಿನ ಈ ಸಿನೆಮಾಡ್ ಸಮಾಜೊಗು ಎಡ್ಡೆ ಸಂದೇಶದೊಟ್ಟುಗು ತಮಾಷೆ, ಮೋಕೆ, ಕೋಪ, ಸೆಂಟಿಮೆಂಟ್ ಮಾತಾ ಉಂಡು. ಪ್ರೇಕ್ಷಕರೆಗ್ ಇಷ್ಟ ಆಪಿನ ಲೆಕ್ಕೊಡೇ ಸಿನೆಮಾನ್ ಮಲ್ತ್‌ದ್ ಕೊರ್ತೊ ಪಂಡ್‌ದ್ ಸಿನೆಮಾದ ನಿರ್ದೇಶಕೆರ್ ಪಂಡೆರ್.
​ಪತ್ರಿಕಾಗೋಷ್ಠಿಡ್ ಜಯಪ್ರಕಾಶ್ ಶೆಟ್ಟಿ ಉಪ್ಪಳ, ಅರುಣ್ ರೈ ಪುತ್ತೂರು, ಕೃತಿ ಶ್ರೀನಿವಾಸ್ ಪೂಜಾರಿ, ನಿಹಾಲ್ ರೈ, ಸಬಿತಾ ಅಂಚನ್, ಭವ್ಯಶ್ರೀ ಪೂಜಾರಿ ಪಾಲ್ ಪಡೆದಿತ್ತೆರ್.

​ಆಕ್ಷನ್, ಥ್ರಿಲ್ಲರ್, ಸಸ್ಪೆನ್ಸ್, ರೋಮ್ಯಾನ್ಸ್!

​”ಬನ” ಸಿನೆಮಾದ ಟ್ರೇಲರ್ ಮಾತೆರೆಡಲ ಪೊಸ ಕುತೂಹಲ ಬೊಕ್ಕ ನಿರೀಕ್ಷೆನ್ ಪುಟ್ಟಾದ್ಂಡ್. ಕಾಡ್‌ಡ್ ತಿಕಿನ ಬಾಲೆದೊಟ್ಟುಗು ಇತ್ತಿನಕುಲು ಏರ್, ಇಲ್ಲ ಎದುರು ಉಚ್ಚು ದಾಯೆ ಪ್ರತ್ಯಕ್ಷ ಆಂಡ್, ಬನೊಕ್ಕು ಹಾಳು ಮಲ್ತಿನಕುಲೆಗ್ ಕಾಟ ಕೊರಿಯರೆ ನಾಗರಾಜೆ ಬತ್ತೆನಾ… ಇಂಚಿನ ಜಾಸ್ತಿ ಪ್ರಶ್ನೆದೊಟ್ಟುಗು, ಈ ಸಿನೆಮಾಡ್ ಆಕ್ಷನ್, ಥ್ರಿಲ್ಲರ್, ಸಸ್ಪೆನ್ಸ್, ರೋಮ್ಯಾನ್ಸ್ ಮಾತಾ ಉಂಡು. ಅತ್ತಂದೆ “ನಮ್ಮ ಮಣ್ಣ್‌ದ ಕಥೆ” ಪನ್ಪಿನ ಟ್ಯಾಗ್‌ಲೈನ್, ತುಳುನಾಡ್ದ ಸಂಸ್ಕೃತಿನ್ ತೋಜಾಪುನೆನ್ “ಬನ” ಸಿನೆಮಾ ಸ್ಪಷ್ಟಪಡಿಸಾವುಂಡು ಪಂದ್ ತೆರಿಪಾಯೆರ್.

ಅ.25 : ​ಉಡುಪಿಡ್ ಪ್ರಿಯದರ್ಶಿನಿ ಸೊಸೈಟಿದ ಶಾಖೆ ಸುರು

ಕುಡ್ಲ : ​ದಕ್ಷಿಣ ಕನ್ನಡ ಜಿಲ್ಲೆ ಮುಲ್ಕಿ ತಾಲೂಕುದ ಹಳೆಯಂಗಡಿಡ್ ಪ್ರಧಾನ ಕಚೇರಿ ಉಪ್ಪುನ ಪ್ರಿಯದರ್ಶಿನಿ ಕೋ ಆಪರೇಟಿವ್ ಸೊಸೈಟಿದ 5ನೇ ಶಾಖೆ ಉಡುಪಿದ ತಾಲೂಕು ಕಚೇರಿದ ಕೈತಲ್ದ ಸನಿಲ್ ಪ್ಲಾಜಾ ಕಟ್ವಾಣೊಡು ಅ.25 ಐತಾರ ಉದಿಪನ ಆವರೆ ಉಂಡು ಪಂದ್ ಸೊಸೈಟಿದ ಅಧ್ಯಕ್ಷೆರ್ ಎಚ್. ವಸಂತ್ ಬೆರ್ನಾರ್ಡ್ ತೆರಿಪಾಯೆರ್.

​ಸಹಕಾರಿ ರಂಗದ ಮಲ್ಲ ಪುದರ್‌ದ ದಿ. ಎಚ್. ನಾರಾಯಣ ಸನಿಲ್ ಬೊಕ್ಕ ದಿ. ಪಂಜದ ಗುತ್ತು ಶಾಂತರಾಮ ಶೆಟ್ಟಿ ಮೊಕ್ಲೆನ ಪ್ರೇರಣೆದಂಚ ಐನ್ ವರ್ಷದ ಪಿರವುಡು ಸುರು ಆಯಿನ ಪ್ರಿಯದರ್ಶಿನಿ ಕೋ ಆಪರೇಟಿವ್ ಸೊಸೈಟಿ ಇತ್ತೆ 45 ಕೋಟಿ ರೂ.ದ ಡಿಪಾಸಿಟ್, 484.78 ಕೋಟಿ ರೂ. ವಹಿವಾಟ್ ಮಲ್ತ್‌ದ್,3843 ಸದಸ್ಯರ್ ಉಲ್ಲೆರ್.
54 ಲಕ್ಷ ವಾರ್ಷಿಕ ಲಾಭ ಮಲ್ತ್‌ದ್ 4 ಶಾಖೆನ್ ಯಶಸ್ವಿಯಾದ್ ನಡಪಾವೊಂದು ಬತ್ತ್‌ದ್ ಇತ್ತೆ 5ನೇ ಶಾಖೆ ಉಡುಪಿಡ್ ಉದಿಪನ ಆವರೆ ಉಂಡು.
ಮಾಜಿ ಸಚಿವೆರ್ ವಿನಯ್ ಕುಮಾರ್ ಸೊರಕೆ ಉದಿಪನ ಮಲ್ಪುವೆರ್. ​ಅಧ್ಯಕ್ಷತೆನ್ ಮುಲ್ಕಿ ಸೀಮೆದ ಅರಸೆರಾಯಿನ ಎಂ. ದುಗ್ಗಣ್ಣ ಸಾವಂತೆರ್ ವಹಿಸೊನ್ವೆರ್. ದೀಪ ಪ್ರಜ್ವಲನೆನ್ ಮಾಜಿ ಸಚಿವೆರ್ ಕೆ. ಅಭಯಚಂದ್ರ, ಭದ್ರತಾ ಕೊಠಡಿದ ಉದ್ಘಾಟನೆನ್ ಐವನ್ ಡಿ’ಸೋಜ,ಕಂಪ್ಯೂಟರ್ ವ್ಯವಸ್ಥೆದ ಚಾಲನೆನ್ ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಮಿಥುನ್ ಎಮ್. ರೈ, ಪ್ರಿಯದರ್ಶಿನಿ ಸ್ವ-ಸಹಾಯ ಗುಂಪುಗು ಚಾಲನೆನ್ ಕರ್ನಾಟಕ ರಾಜ್ಯ ಹಾಲು ಉತ್ಪಾದಕರ ಒಕ್ಕೂಟ ಬೊಕ್ಕ ದ.ಕ. ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ ಲಿ. ಮಂಗಳೂರು ನಿರ್ದೇಶಕೆರ್ ಡಾ. ಐಕಳಬಾವ ದೇವಿ ಪ್ರಸಾದ್ ಶೆಟ್ಟಿ ಮಲ್ಪರೆ ಉಲ್ಲೆರ್.
​ಮಲ್ಲ ಬಿನ್ನೆರಾದ್ ಉಡುಪಿ ಜಿಲ್ಲೆದ ಸಹಕಾರ ಸಂಘಲೆನ ಉಪನಿಬಂಧಕೆರ್ ಲಾವಣ್ಯ ಕೆ. ಆರ್., ಉಡುಪಿ ಜಿಲ್ಲಾ ಕೇಂದ್ರ ಸಹಕಾರಿ ಯೂನಿಯನ್ ಬೊಕ್ಕ ಬಡಗಬೆಟ್ಟು ಕೋ ಆಪರೇಟಿವ್ ಸೊಸೈಟಿದ ಅಧ್ಯಕ್ಷೆರ್ ಇಂದ್ರಾಳಿ ಜಯಕರ ಶೆಟ್ಟಿ, ಶ್ರೀ ಸರಸ್ವತಿ ಕೋ ಆಪರೇಟಿವ್ ಸೊಸೈಟಿ, ಪಡುಕುತ್ಯಾರ್ ಉಡುಪಿ ನೆತ್ತ ಅಧ್ಯಕ್ಷೆರ್ ಬಿ. ಸುರ್ಯಕುಮಾರ್, ಲೊಂಬಾರ್ಡ್ ಮೆಮೋರಿಯಲ್ ಆಸ್ಪತ್ರೆ ಉಡುಪಿ ನಿರ್ದೇಶಕೆರಾಯಿನ ಡಾ| ಸುಶೀಲ್ ಜತ್ತನ್ನ, ಹೈಟೆಕ್ ಮೆಡಿಕೇರ್ ಆಸ್ಪತ್ರೆ ಉಡುಪಿದ ಎಂ.ಡಿ. ಡಾ| ಟಿ. ಎಸ್. ರಾವ್, ಕೊರಂಗ್ರಪಾಡಿ ಸಹಕಾರಿ ವ್ಯವಸಾಯಿಕ ಸಂಘ ಉಡುಪಿ ಅಧ್ಯಕ್ಷೆರ್ ಶ್ರೀಧರ್ ದೇವಾಡಿಗ, ಉಡುಪಿ ತಾಲೂಕು ಗ್ಯಾರಂಟಿ ಅನುಷ್ಠಾನ ಪ್ರಾಧಿಕಾರ ಅಧ್ಯಕ್ಷೆರ್ ರಮೇಶ್ ಕಾಂಚನ್, ಉಡುಪಿ ಹೋಮಿಯೋಪಥಿಕ್ ಫಿಸಿಷಿಯನ್ ಡಾ| ಬೆರಿಲ್ ಎ. ಬೆರ್ನಾರ್ಡ್, ಕಟ್ವಾಣದ ಯಜಮಾನೆರಾಯಿನ ಶಂಭು ಎ. ಸನಿಲ್ ಪಾಲ್ ಪಡೆಪೆರ್ ಪಂದ್ ವಸಂತ್ ಬೆರ್ನಾರ್ಡ್ ಪತ್ರಿಕಾಗೋಷ್ಠಿಡ್ ತೆರಿಪಾಯೆರ್.
​ಸೊಸೈಟಿ 2921 ಟ್ ಸುರು ಆದ್, ದಕ್ಷಿಣ ಕನ್ನಡ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ ಲಿ., ಮಂಗಳೂರು ಉಂದೆತ ಅಧ್ಯಕ್ಷೆರಾಯಿನ ಡಾ|| ಎಂ. ಎನ್. ರಾಜೇಂದ್ರ ಕುಮಾರ್ ಮೆರೆನ ಮಾರ್ಗದರ್ಶನೊಡು ಎಡ್ಡೆಡ್ ಕೆಲಸ ಮಲ್ತೊಂದುಂಡು.2025-26 ನೇ ಸಾಲ್‌ಡ್ 97 % ಸಾಲ ವಸೂಲಾತಿ ಮಲ್ತ್‌ದ್ ಲೆಕ್ಕ ಪರಿಶೋಧನಾ ವರದಿ (ಆಡಿಟ್ ವರದಿ) ಕುಡ “ಎ” ಶ್ರೇಣಿಡ್ ಉಪ್ಪುನವು ಪೆರ್ಮೆದ ವಿಷಯ.
​ಸೊಸೈಟಿಡ್ ಅಡಮಾನೊಗು ಬರ್ಪಿನ ಬಂಗಾರ್‌ದ ಪರಿಶುದ್ಧತೆ ಬೊಕ್ಕ ನಿಖರತೆಗಾದ್ ಪ್ರಧಾನ ಕಚೇರಿಡ್ ‘ಗೋಲ್ಡ್ ಪ್ಯೂರಿಟಿ ಟೆಸ್ಟಿಂಗ್ ಮೆಷಿನ್’, ಸೊಸೈಟಿದ 4 ಶಾಖೆಡ್‌ಲಾ ‘ಇ-ಮುದ್ರಾಂಕ ವ್ಯವಸ್ಥೆ’, ‘ಡಿಜಿಟಲ್ ಬ್ಯಾಂಕಿಂಗ್ ವ್ಯವಸ್ಥೆ’, ‘ಹವಾನಿಯಂತ್ರಿತ ಬ್ಯಾಂಕಿಂಗ್ ವಿಭಾಗ’ ಉಂಡು. ಸಂಘೊಡು 27 ಜನ ಸಿಬ್ಬಂದಿ ಕೆಲಸ ಮಲ್ತೊಂದುಲ್ಲೆರ್. ಬೊಕ್ಕ ಒಟ್ಟು 15 ಜನ ನಿರ್ದೇಶಕೆರೆನ ತಂಡ ಉಂಡು. ಮೊಕುಲೆನ ಮಾತ ಎಡ್ಡೆ ಬೇಲೆಡ್ 2023-24, 2024-25 ಬೊಕ್ಕ 2025-26 ನೇ ಸಾಲ್‌ಡ್ ದ.ಕ. ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್‌ರ್ದ್ “ವಿಶಿಷ್ಟ ಸಾಧನ ಪ್ರಶಸ್ತಿ” ಪಡೆತ್ಂಡ್. 72 ನೇ ಅಖಿಲ ಭಾರತ ಸಹಕಾರ ಸಪ್ತಾಹ 2025 ದ ಕರ್ನಾಟಕ ರಾಜ್ಯ ಸಹಕಾರ ಮಹಾಮಂಡಳ ನಿ. ಬೆಂಗಳೂರು, ಕರ್ನಾಟಕ ರಾಜ್ಯ ಸಹಕಾರ ಮಾರಾಟ ಮಹಾಮಂಡಳ ನಿ. ಬೆಂಗಳೂರು ಬೊಕ್ಕ ದ.ಕ. ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ ನಿ. ಮಂಗಳೂರು ಮೊಕುಲು “ಉತ್ತಮ ಪತ್ತಿನ ಸಹಕಾರಿ ಸಂಘ ಪ್ರಶಸ್ತಿ” ಕೊರ್ದು ಗೌರವ ಮಲ್ತ್‌ದೆರ್ ಪಂದ್ ವಸಂತ ಬೆರ್ನಾಡ್ ತೆರಿಪಾಯೆರ್.
​ಪತ್ರಿಕಾ ಗೋಷ್ಠಿಡ್ ಉಪಾಧ್ಯಕ್ಷೆರಾಯಿನ ವಿಜಯ ಕುಮಾರ್ ಸನಿಲ್, ನಿರ್ದೇಶಕೆರಾಯಿನ ಉಮಾನಾಥ್ ಜೆ. ಶೆಟ್ಟಿಗಾರ್, ಧನಂಜಯ ಮಟ್ಟು, ಗಣೇಶ್ ಪ್ರಸಾದ್ ದೇವಾಡಿಗ, ಅನಿಲ್ ಪೂಜಾರಿ ಸಸಿಹಿತ್ಲು, ಮುಖ್ಯಕಾರ್ಯನಿರ್ವಹಣಾಧಿಕಾರಿಯಾಯಿನ ಸುದರ್ಶನ್ ಪೂಜಾರಿ, ಉಡುಪಿ ಶಾಖೆದ ಪ್ರಬಂಧಕೆರಾಯಿನ ನಿಶಾ ಸುಹೈಲ್ ಡೇನಿಯಲ್ ಇತ್ತೆರ್.

ಮುಲ್ಕಿ ಪೊಲೀಸ್ ಠಾಣೆಡ್ ಆಯುಧ ಪೂಜೆ

ಮುಲ್ಕಿ: ಪೊಲೀಸ್ ಠಾಣೆಡ್ ಆಯುಧ ಪೂಜೆ ಗೌಜಿಡ್ ನಡತ್ಂಡ್.
ಈ ಪೊರ್ತುಡು ಮುಲ್ಕಿ ಪೊಲೀಸ್ ಠಾಣೆದ ಅಧಿಕಾರಿಲು ಸಿಬ್ಬಂದಿ ವರ್ಗ ಬೊಕ್ಕ ಗ್ರಾಮಸ್ಥೆರ್ ಉಪಸ್ಥಿತರಿತ್ತೆರ್.

ಬಪ್ಪನಾಡ್ ದೇವಲ್ಯೊಗು ಖ್ಯಾತ ಬಾಲಿವುಡ್ ನಟ ಸುನಿಲ್ ಶೆಟ್ಟಿ ಭೇಟಿ

ಮುಲ್ಕಿ: ಮಾರ್ನೆಮಿದ ಪೊರ್ತುಡು ಸೀಮೆda ಒರುಂಭ ಮಾಗಣೆದ ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯೊಗು ಖ್ಯಾತ ಬಾಲಿವುಡ್ ನಟ ಸುನಿಲ್ ಶೆಟ್ಟಿ ಭೇಟಿ ಕೊರಿಯೆರ್.
ದೇವಸ್ಥಾನದ ಅರ್ಚಕ ಪ್ರಸಾದ್ ಭಟ್ ಶ್ರೀದೇವಿನ ಶೇಷ ವಸ್ತ್ರ ಬೊಕ್ಕ ಪ್ರಸಾದ ಕೊರ್ದು ನಟ ಸುನಿಲ್ ಶೆಟ್ರೆನ್ ದೇವಸ್ಥಾನದ ವತಿರ್ದ್ ಗೌರವ ಮಲ್ತೆರ್.
ಬೊಕ್ಕ ನಟ ಸುನಿಲ್ ಶೆಟ್ರ್ ಶಿಮಂತೂರು ಶ್ರೀ ಆದಿ ಜನಾರ್ಧನ ದೇವಸ್ಥಾನಗ್ ಭೇಟಿ ಕೊರಿಯೆರ್.
ಮೂಲತಃ ಮುಲ್ಕಿದಾರ್ ಆದ್ ಇಪ್ಪುನ ಸುನಿಲ್ ಶೆಟ್ರ್ ಮುಂಬೈಡ್ ಇಪ್ಪುನು ಆಂಡ ಬಪ್ಪನಾಡ್ ದೇವಸ್ಥಾನಡ್ ನಡಪುನ ಜಾತ್ರಾ ಮಹೋತ್ಸವ ಬೊಕ್ಕ ಬೇತೆ ಬೇತೆ ಕಾರ್ಯಕ್ರಮಲೆಡ್ ಪಾಲ್ ಪಡೆಪೆರ್.
ಈ ಪೊರ್ತುಡು ದೇವಸ್ಥಾನದ ಅರ್ಚಕೆರ್ ಶ್ರೀಪತಿ ಉಪಾಧ್ಯಾಯ, ಅನುವಂಶಿಕ ಮೊಕ್ತೇಸೆರೆರ್ ದುಗ್ಗಣ್ಣ ಸಾವಂತ ಅರಸುಲು , ಕಾರ್ಯನಿರ್ವಹಣಾಧಿಕಾರಿ ಶ್ವೇತಾ ಪಳ್ಳಿ, ಗೋಪಾಲ ಕೃಷ್ಣ ಭಟ್, ನಾಗಸ್ವರ ವಾದಕ ನಾಗೇಶ್ ಬಪ್ಪನಾಡು ಅಕೌಂಟೆಂಟ್ ಶಿವಶಂಕರ್, ಅಶ್ವಿನ್ ಆಳ್ವ ಕುಬೆವೂರು,ಕಾರ್ತಿಕ್ ಕೋಟ್ಯಾನ್,ಅರ್ಚನಾ ಶೆಟ್ಟಿ ಬೊಕ್ಕ ಕೆಲವೆರ್ ಉಪಸ್ಥಿತರಿತ್ತೆರ್.

ತುಳು ರಂಗಭೂಮಿದ ಪ್ರಾಸ ಕವಿ ಗಡಿನಾಡ ಬೊಳ್ಳಿ – ಸುರೇಶ್ ಮಂಜೇಶ್ವರ

ಸಪ್ತ ಭಾಷಾ ಸಂಗಮ ಭೂಮಿ ಪಂಡ್ದ್ ಪುದರ್‌ ಪಡೆಯಿನ ನಮ್ಮ ತುಳುನಾಡ್ದ ಒಂಜಿ ಭಾಗ ಕಾಸರಗೋಡು, ಈ ಜಿಲ್ಲೆಡ್ ತುಳು ರಂಗಭೂಮಿ ಕಲಾವಿದೆರೆಗ್ ಬೊಕ್ಕ ಕಲಾ ಪೋಷಕೆರೆಗ್ ಒವ್ವೆ ರೀತಿದ ಕಮ್ಮಿ ಇಜ್ಜಿ. ಅಂಚಿತ್ತಿ ಊರುಡ್ದು ಕಲಾ ರಂಗೊಡು ಮಲ್ಲ ಪುದರ್ ಮಲ್ತಿನ ವ್ಯಕ್ತಿಯೇ ಗಡಿನಾಡ ಬೊಳ್ಳಿ ಸುರೇಶ್ ಮಂಜೇಶ್ವರ. ತಿಮ್ಮಪ್ಪ ಕಾಂಜ ಬೊಕ್ಕ ನಾಗಮ್ಮ ದಂಪತಿಲೆನ ಮಗೆಯಾದ್ ಕಾಸ್ರೋಡು ಜಿಲ್ಲೆದ ಮಂಜೇಶ್ವರದ ಪೊಸೊಟ್ಟು ಪನ್ಪಿನ ಗ್ರಾಮೊಡು ಪುಟ್ಟುದು ಬಲತಿನ ಇಂಬೆರ್ ಬಡಪತ್ತ್‌ದ ಕಾರಣ 8ನೇ ತರಗತಿಡ್ ವಿದ್ಯಾಭ್ಯಾಸೊನು ಉಂತಾವೆರ್.
ಕಲ್ಪುನ ಪ್ರಾಯೊಡು ಕಲಾ ರಂಗೊಡು ಮಲ್ಲ ಮಟ್ಟೊದ ಪ್ರೋತ್ಸಾಹ ತಿಕ್ಕಿಜಡಲ ತನ್ನುಲಾಯಿದ ಕಲಾವಿದೆ ಒಂಜಿ ಅವಕಾಶಗಾದ್ ಕಾತೊಂದೆ ಇತ್ತ್ಂಡ್. ಕಲ್ಪಾಟಿಕೆ ಉಂತಾದ್ ವೃತ್ತಿಗಾದ್ ಟೈಲರಿಂಗ್ ಆಯ್ಕೆ ಮಲ್ತಿನ ಇಂಬೆರ್ ದುಂಬಗ್ ಕುಡ್ಲದ ಹೀರೋ ಟೈಲರ್ಸ್ ಡ್ ಖಾಯಂ ನೌಕರೆಯಾದ್ ಬೆನಿಯೆರೆ ಸುರು ಮಲ್ಪುವೆರ್. ಆ ಪೊರ್ತುಡು ಕುಡ್ಲ ಪೇಂಟೆಡ್ ಬೇಲೆ ಮಲ್ಪುನ ಮಾತಾ ಜವನ್ಯೆರೆನ ಮನಸ್ಸ್‌ಡ್ ಕಲಾ ರಂಗದ ಆಸೆ ಪುಟ್ಟಾಯಿನ ರಡ್ಡ್‌ ಕೂಟೊಲು ಪಂಡ ಚಾ ಪರ್ಕ ಬೊಕ್ಕ ಕಲಾ ಸಂಗಮ. ಕುಡ್ಲದ ಪುರಭವನೊಡು ಈ ರಡ್ಡ್‌ ಕೂಟದ ನಾಟಕೊಲೆನ್ ತೂದು ತನ್ನುಲಾಯಿದ ಕಲಾ ಚಾತುರ್ಪುನು ವೇದಿಕೆಡ್ ಪ್ರದರ್ಶನ ಮಲ್ಪೊಡು ಪನ್ಪಿನ ಮಲ್ಲ ಕನೊನು ಮನಸ್ಸ್‌ಡ್ ದೀವೊಂದಿನ ಸುರೇಶ್ ಮಂಜೇಶ್ವರ ದುಂಬಗ್ 1997ನೇ ಇಸವಿದ ಫೆಬ್ರುವರಿ 17ನೇ ತಾರೀಕ್ದಾನಿ ಉಪ್ಪಳದ ರಚನಾ ಸಾಂಸ್ಕೃತಿಕ ಕಲಾ ಸಂಸ್ಥೆ ಪನ್ಪಿನ ಕೂಟೊಡು ಸುರುತ್ತ ಸರ್ತಿ ಕಿವುಡರಿಗೆ ವಾರ್ತೆ ಪನ್ಪಿನ ಹಾಸ್ಯ ಕಾರ್ಯಕ್ರಮದ ಪ್ರದರ್ಶನ ಕೊರ್ಪೆರ್.
ಕಲಾ ಚಾತುರ್ಪುನು ಪ್ರದರ್ಶನ ಮಲ್ಪೆರೆ ಅವಕಾಶ ಕೊರಿನ ರಚನಾ ಸಾಂಸ್ಕೃತಿಕ ಕಲಾ ಸಂಸ್ಥೆನೇ ತನ್ನ ರಂಗಭೂಮಿದ ಗುರುವಾದ್ ಸ್ವೀಕಾರ ಮಲ್ತಿನ ಸುರೇಶ್ ಮಂಜೇಶ್ವರ, ಶಂ.ನಾ ಅಡಿಗೆರ್ ಬರೆತಿನ “ರಾಜ ಹರಿಶ್ಚಂದ್ರ” ಪನ್ಪಿನ ನಾಟಕದ ಮುಖೇನ ದೇವತೆನ ಪಾತ್ರೊಡು ಸುರುತ್ತ ಸರ್ತಿ ಮೋನೆಗ್ ಬಣ್ಣ ಪೂಜುವೆರ್. ದುಂಬಗ್ ರಚನಾ ಸಾಂಸ್ಕೃತಿಕ ಕಲಾ ಸಂಸ್ಥೆಗಾದ್ “ಏರ್‍ಲಾ ಇಜ್ಜೆರ್” ಪನ್ಪಿನ ತನ್ನ ಸುರತ ನಾಟಕ ಕೃತಿನ್ ಬರೆಯಿನ ಸುರೇಶ್ ಮಂಜೇಶ್ವರ 2003ನೇ ಇಸವಿಡ್ ಕುಡ್ಲಡ್ ಕಿಶೋರ್ ಡಿ ಶೆಟ್ರೆನ ನೇತ್ರತ್ವಡ್ ಪೊಸ ನಾಟಕ ಕೂಟ ಆನಗ ತಾನ್ ಬರೆಯಿನ “ಏರ್‍ಲಾ ಇಜ್ಜೆರ್” ನಾಟಕೊನು ಒಂತೆ ಬದಲಾವಣೆ ಮಲ್ತ್ದ್ “ಕುಸೆಲ್ದ ಕುಸಲ್” ಪಂಡ್ದ್ ಮರು ನಾಮಕರಣ ಮಲ್ತ್ದ್ ಕುಸಲ್ದ ಕಲಾವಿದೆರ್ ಕುಡ್ಲ ಪನ್ಪಿನ ನಾಟಕ ಕೂಟದೊಟ್ಟು ಸೇರ್ದ್ ಅಭಿನಯ ಮಲ್ಪುವೆರ್. ದುಂಬಗ್ 2005ಟ್ ನವೀನ್ ಡಿ ಪಡೀಲ್ ಈ ಕೂಟೊನು ಸೇರೊಂದು ಲಕುಮಿ ತಂಡದ ಕುಸಲ್ದ ಕಲಾವಿದೆರ್ ಪಂಡ್ದ್ ಪುದರ್ ಬದಲಾವಣೆ ಮಲ್ಪುವೆರ್, ಅಂಚ ಲಕುಮಿ ತಂಡೊಗುಲಾ ಸುರುತ್ತ ನಾಟಕ ಬರೆದ್ ತನ್ನುಲಾಯಿದ ಬರಹಗಾರನ್ ರಂಗಭೂಮಿಗ್ ಪರಿಚಯ ಮಲ್ಪುವೆರ್.
ಸೂಪರ್ ಹಿಟ್ ನಾಟಕ “ಗಂಗುನ ಗಮ್ಮತ್ತ್”, “ಏರ್ಂದ್ ಏರೆಗೊತ್ತು”, “ಬುಡಿ ಬುಡಿ ಗಡಿಬಿಡಿ”, “ಎಲ್ಯ ವಿಷಯ ಮಲ್ಲ ಮಲ್ಪೊಡ್ಚಿ”, “ಮಂಗೆ ಮಲ್ಪೊಡ್ಚಿ”, “ಒರಿಯಾಂಡಲಾ ಸರಿ ಬೋಡು” ಪನ್ಪಿನ ಸುಮಾರ್ 8 ನಾಟಕ ಕೃತಿಕುಲೆನ್ ಬರೆದ್ ಲಕುಮಿ ತಂಡೊಡು ಕರಿನ 28 ವರ್ಷ ಒಂಜೇ ಒಂಜಿ ದಿನ ತನ್ನ ಅಭಿನಯದ ಪಾತ್ರನ್ ಬೇತೆ ಕಲಾವಿದೆರೆಡ ಮಲ್ಪಾಯೆರೆ ಅವಕಾಶ ಕೊರಂದೆ ಖುದ್ದು ಅಭಿನಯ ಮಲ್ತಿನವು ರಂಗಭೂಮಿದ ಇತಿಹಾಸೊಡೆ ಒಂಜಿ ದಾಖಲೆ ಪಂಡ ತಪ್ಪಾವಂದ್. ತಾನ್ ಬರೆಯಿನ 8 ನಾಟಕ ಸೇರ್ದ್ ಒಟ್ಟು 28 ನಾಟಕೊಲೆಡ್ ಲಕುಮಿ ಕೂಟಡ್ ಅಭಿನಯ ಚಾತುರ್ಪು ತೋಜಾದೆರ್.
“ನಮ್ ಒಯಿಕ್ಲಾ ಸೈ”, “ಆಪಿನ ಆವೊಡೆ”, “ಪೊರ್ಲು ದಾಯೆ”, “ಅಂಚಿಲತ್ತ್ ಇಂಚಿಲತ್ತ್”, “ನಂಬುನೆನೇ ನಂಬೊಡು”,
“ಬೆನ್ಪಿನೊರಿ ತಿನ್ಪಿನೊರಿ”, “ಎದುರುಡೊಂಜಿ ಪಿರವುಡೊಂಜಿ”, “ದಾನೆ ಆಪುಂಡು ತೂಕ”, “ಒಯಿಕ್ಕ್ಲಾ ಯೋಗ ಬೋಡು”, “ದಾದಾ ಮಲ್ಪೆರಾಂಪುಂಡು”, “ನಂಕ್ ಮಾತೆರ್ಲಾ ಬೋಡು”, “ರಡ್ಡೆಟ್ಟ್ ಏರ್ ಎಡ್ಡೆ”, “ಬದ್ಕೆರೆಗಾದ್ ಸೈಪುನಕುಲು”, “ದುಂಬೊರಿ ಪಂತೆಗೆ”, “ಒವುಲಾ ಒಂತೆ ದಿನನೇ”, “ಗುಟ್ಟು ಗೊತ್ತಾಂಡ್”, “ಎನ್ನ ಭಂಗ ಎಂಕೇ ಗೊತ್ತು “, “ಲೇಲೇ ಪಾಡಡೇ”, “ಅವು ದಾಲ ಆಪುಜಿ”, “ಮಗಲ್”, “ಆಂಟಿ ಬೊಕ್ಕ ಅಂಕಲ್” ಸುರೇಶ್ ಮಂಜೇಶ್ವರ ಅಭಿನಯ ಮಲ್ತಿನ ನಾಟಕೊಲು.
ರಂಗಭೂಮಿ ಅತ್ತಂದೆ ತುಳು ಸಿನೆಮಾರಂಗೊಡುಲಾ ತನ್ನ ಅಭಿನಯ ಚಾತುರ್ಪು ತೋಜಾಯಿನ ಇಂಬೆರ್ “ಬಿರ್ಸೆ”, “ಜಬರ್ದಸ್ತ್ ಶಂಕರ”, “2ಎಕ್ರೆ”, “ಮೈ ನೇಮ್ ಇಸ್ ಅಣ್ಣಪ್ಪ”, “ಏರೆಗ್ಲಾ ಪನೊಡ್ಚಿ” ಬೊಕ್ಕ “ಅಬತರ” ಪನ್ಪಿನ ಸಿನೆಮೊಲೆಡ್ ಅಭಿನಯ ಮಲ್ದೆರ್. ಬಲೆ ತೆಲಿಪಾಲೆ, ಸಿ ಪಿ ಎಲ್ ದಂಚಿನ ರಿಯಾಲಿಟ್ ಶೋಟ್ ಚಾತುರ್ಪು ತೋಜಾಯಿನ ಇಂಬೆರ್ ಕನ್ನಡದ ಚುಟುಕು ಕವಿ ದುಂಡಿರಾಜೆರೆನ ಅಪ್ಪಟ ಅಭಿಮಾನಿ. ದುಂಡಿರಾಜೆರೆನಲೆಕನೆ ಸುರೇಶ್ ಮಂಜೇಶ್ವರ ತುಳುಟು ಹನಿಗವನ ಬರೆದ್ ಪುಸ್ತಕ ಬುಡುಗಡೆ ಮಲ್ದೆರ್. ತನ್ನ ಸಂಭಾಷಣೆಡ್ ಪ್ರಾಸನ್ ಉಪಯೋಗಿಸೊಂದು ತುಳುನಾಡ್ದ ಪ್ರಾಸ ಕವಿಯಾದ್ ಪುಗರ್ತೆ ಪಡೆತೆರ್, ಪ್ರಾಸ ಬಧ್ದವಾದ್ ಊರ್‍ದ ಬೊಕ್ಕ ವ್ಯಕ್ತಿಲೆನ 90-100 ಪುದರ್ ತಪ್ಪಂದೆ ಪನ್ಪಿನವುಲಾ ಇಂಬೆರೆನ ಒಂಜಿ ಚಾತುರ್ಪು.
29 ವರ್ಷದ ರಂಗಭೂಮಿ ಪಯಣೊಡು 13 ಸರ್ತಿ ವಿದೇಶ ಪ್ರಯಾಣ ಮಲ್ತ್ದೆರ್, ದುಬೈ, ಮಸ್ಕತ್, ಬಹರೈನ್,ಕತಾರ್ ದೇಶೊಲೆಡ್ ನಾಟಕ ಪ್ರದರ್ಶನ ಕೊರಿನ ಇಂಬೆರೆಗ್ ಅವೆತೋ ಗೌರವ ಪ್ರಶಸ್ತಿ, ಬಿರ್ದುಲು ಒಲಿದ್ ಬೈದುಂಡು. ವಜ್ರದೇಹಿ ಮಠ ಗುರುಪುರ ಉಂದೆತ ವತಿಡ್ದ್ “ಕಲಾ ಸಾರ್ವಭೌಮ” ಬಿರ್ದ್‌ದ ಮಾನಾದಿಗೆ ಅಂಚೆನೆ ಶ್ರೀ ಶಾಸ್ತ ಕೃಪಾ ವೀರ ಮಾರುತಿ ವ್ಯಾಯಾಮ ಶಾಲೆ ಮಂಜೇಶ್ವರ ಮುಕುಲು “ಗಡಿನಾಡ ಬೊಳ್ಳಿ” ಪನ್ಪಿನ ಬಿರ್ದ್‌ ಕೊರ್ದು ಮಾನಾದಿಗೆ ಮಲ್ತ್ದೆರ್. ಸುರೇಶ್ ಮಂಜೇಶ್ವರರೆನ ಕಲಾ ರಂಗದ ಪಯಣೊಡು ಧರ್ಮಪತ್ನಿ ಸುಜಾತ, ಜೋಕುಲಾಯಿನ ಅಮನ್ ಬೊಕ್ಕ ಅಖಿಲ್ ಯಾಪಲಾ ಬೆರಿತಾಂಗಾದ್ ಉಂತುದೆರ್. ಕಲಾವಿದನ ಕಲಾ ಜೀವನ ಪರಪುನ ನೀರ್ದ ಲೆಕ ನಾಲೂರೊರ್ಮೆ ಪರಪಡ್ ಪಂಡ್ದ್ ಪನೊನ್ದು ಸುರೇಶ್ ಮಂಜೇಶ್ವರ ಕಲಾ ರಂಗದ ತನ್ನ ಸೆಕೆಂಡ್ ಇನ್ನಿಂಗ್ಸ್ ಶಾರದ ಆರ್ಟ್ಸ್ ಕೂಟದ ಐಸಿರಿ ಕಲಾವಿದೆರ್ ತಂಡದೊಟ್ಟು ಮುಂದುವರಿಸೆರೆ ಉಲ್ಲೆರ್. ಇಂಬೆರೆನ ದುಂಬುದ ರಂಗ ಪಯಣಡ್ ಕಲಾಮಾತೆ ಶಾರದೆ ಎಡ್ಡೆಡ್ಡೆ ಪಾತ್ರ ಮಲ್ಪುನ ಅವಕಾಶ ಕೊರಡ್ ಪಂಡ್ದ್ ಪ್ರಾರ್ಥನೆ ಮಲ್ಪುಗ.

✍️ಸಂದೇಶ್ ಕರ್ಕೇರ

ಕದ್ರಿದ ‘ಪಿಲಿ ಅಣ್ಣು’ ಗಂಗಾಧರ ದೇವಾಡಿಗೆರೆಗ್ ತುಳು ಅಕಾಡೆಮಿದ ಚಾವಡಿ ತಮ್ಮನ

ಕುಡ್ಲ : ಕರಿನ 55 ವರ್ಷರ್ದ್ ಪಿಲಿವೇಷ ಪಾಡ್ದ್ ಸೇವೆ ಮಲ್ದಿನ ಪರ ತಲೆಮಾರ್‌ದ ಪಿಲಿವೇಷ ಸಂಸ್ಕೃತಿದ ಸರದಾರೆ ಗಂಗಾಧರ ದೇವಾಡಿಗ ಕದ್ರಿ (ಪಿಲಿ ಅಣ್ಣು) ಮೆರೆಗ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಚಾವಡಿ ತಮ್ಮನ ಐತಾರ ನಡತ್ಂಡ್.
ಕುಡ್ಲ ಮಣ್ಣಗುಡ್ಡೆದ ದ.ಕ.ಜಿ. ಪಂ.ಹಿರಿಯ ಪ್ರಾಥಮಿಕ ಶಾಲೆದ ಹಳೆ ವಿದ್ಯಾರ್ಥಿ ಸಂಘದ ಸಹಯೋಗಡ್
ಚಾವಡಿ ತಮ್ಮನದ ಗೌರವ ಸಮರ್ಪಣೆ ನಡತ್ಂಡ್.
ಮಂಗಳೂರು ನಗರಾಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷೆರ್ ಸಂತೋಷ್‌ ಶೆಟ್ಟಿ ಚಾವಡಿ ತಮ್ಮನ ನಡಪಾದ್ ಕೊರಿಯೆರ್. “ತುಳು ಭಾಷೆನ್ ರಾಜ್ಯದ ರಡ್ಡನೇ ಆಡಳಿತ ಭಾಷೆ ಪಂದ್ ಘೋಷಣೆ ಮಲ್ಪುನ ಸಂದರ್ಭಡ್ ತುಳುನಾಡ್‌ದ ಸಂಸ್ಕೃತಿ, ಆಚಾರ ವಿಚಾರಡ್ ಇತ್ತೆ ನನಾತ್ ಸ್ಥಾನಮಾನ ತಿಕಿಲೆಕ ಆತ್ಂಡ್. ಹಿರಿಯ ಪಿಲಿ ವೇಷಧಾರಿ ಪಿಲಿ ಅಣ್ಣು ಮೆರೆನ್ ಸನ್ಮಾನ ಮಲ್ಪುನ ಮುಕೇನ ತುಳುನಾಡ್‌ದ ಸಾಂಪ್ರದಾಯಿಕ ಕಲೆಕ್ಕ್ ತುಳು ಅಕಾಡೆಮಿ ನಿಜವಾಯಿನ ಗೌರವ ಕೊರ್ತುಂಡು” ಪಂದ್ ಪಂಡೆರ್.

ತುಳು ಸಾಹಿತ್ಯ ಅಕಾಡೆಮಿ ಅಧ್ಯಕ್ಷ ತಾರಾನಾಥ್‌ ಗಟ್ಟಿ ಕಾಪಿಕಾಡ್‌ ಅಧ್ಯಕ್ಷತೆ ವಹಿಸ್‌ದಿತ್ತೆರ್.
ಕರ್ನಾಟಕ ಪರಿಸರ ಪ್ರವಾಸೋದ್ಯಮ ಅಭಿವೃದ್ಧಿ ಮಂಡಳಿ ಅಧ್ಯಕ್ಷೆರ್ ಶಾಲೆಟ್‌ ಪಿಂಟೋ, ಮಣ್ಣಗುಡ್ಡೆ ಶಾಲೆ ಹಳೆ ವಿದ್ಯಾರ್ಥಿ ಸಂಘದ ಅಧ್ಯಕ್ಷೆರ್ ಸುರೇಶ್ಚಂದ್ರ ಶೆಟ್ಟಿ ಎಡ್ಡೆಪ್ಪು ದ ಪಾತೆರ ಪಂಡೆರ್.
ಬರ್ಕೆ ಫ್ರೆಂಡ್ಸ್‌ ಸ್ಥಾಪಕಾಧ್ಯಕ್ಷೆರ್ ಯಜ್ಞೇಶ್ವರ ಬರ್ಕೆ , ಬಳ್ಳಾಲ್‌ ಭಾಗ್‌ ಫ್ರೆಂಡ್ಸ್‌ ಅಧ್ಯಕ್ಷೆರ್ ರಕ್ಷಿತ್‌ ಕೊಟ್ಟಾರಿ, ಮುಖ್ಯೋಪಾಧ್ಯಾಯೆರ್ ನಳಿನಿ ಪಿ. ಶೆಟ್ಟಿ, ಉರ್ವಾ ಕೊರಗತನಿಯ ಕ್ಷೇತ್ರದ ಅಧ್ಯಕ್ಷೆರ್ ರಾಜೇಶ್ ಉರ್ವ ಬಿನ್ನೆರಾದ್ ಇತ್ತೆರ್. ಸತೀಶ್‌ ಶೆಟ್ಟಿ ಕಾರ್ಯಕ್ರಮ ನಿರೂಪಣೆ ಮಲ್ತೆರ್. ಗಣೇಶ್ ಅದ್ಯಪಾಡಿ ಸನ್ಮಾನ ಪತ್ರ ವಾಚನ ಮಲ್ತೆರ್.ಗಣೇಶ್‌ ಕುಮಾರ್‌ ಸೊಲ್ಮೆ ಸಂದಾಯೆರ್.

You Missed