Sat. Nov 21st, 2026

ಕುಡ್ಲದ ಸುದ್ದಿ | Mangalore News

ಕರ್ನಾಟಕ ರಾಜ್ಯ ಲೆಕ್ಕ ಪರಿಶೋಧಕೆರ್‌ನ ಸಂಘದ ಅಧ್ಯಕ್ಷೆರಾದ್ ಸಿ.ಎ. ಸುನಿಲ್ ಭಂಡಾರಿ ಆಯ್ಕೆ

ಕುಡ್ಲ : ಕರ್ನಾಟಕ ರಾಜ್ಯ ಲೆಕ್ಕಪರಿಶೋಧಕರ ಸಂಘದ (KSCAA) 2026-27ನೇ ವರ್ಷದ ಅಧ್ಯಕ್ಷೆರಾದ್ ಸಿ.ಎ. ಸುನಿಲ್ ಭಂಡಾರಿ ಬೆಂಗಳೂರು ಆಯ್ಕೆ ಆತೆರ್.
ಸಿ ಎ ಸುನಿಲ್ ಭಂಡಾರಿ ಮೆರೆನ ನಾಯಕತ್ವ, ವೃತ್ತಿದ ಮಿತ್ತ್‌ದ ಬದ್ಧತೆ ಬೊಕ್ಕ ಮಾತೆರೆನ್ಲ ಒಟ್ಟು ಮಲ್ಪುನ ಸಾಮರ್ಥ್ಯಡ್ ಕರ್ನಾಟಕದ ಚಾರ್ಟರ್ಡ್ ಅಕೌಂಟೆಂಟ್ ಸಮುದಾಯಡ್ ಅರ್ಥಪೂರ್ಣ ಬದಲಾವಣೆ ಆಪುನ ಸಾಧ್ಯತೆ ಉಂಡು.”ಎಂಕ್ ತಿಕಿನ ಪೊಸ ಜವಾಬ್ದಾರಿಡ್ ಪ್ರಾಮಾಣಿಕವಾದ್ ಕೆಲಸ ಮಲ್ಪುವೆ” ಪಂದ್ ಆರ್ ತೆರಿಪಾದೆರ್.
ಸುನಿಲ್ ಭಂಡಾರಿ ಮೇರ್ ತಾರಿಪಾಡಿ ದಿ. ಕಾಂತಣ್ಣ ಭಂಡಾರಿ ಬೊಕ್ಕ ಪೆಲಪಾಡಿ ವಸಂತಿ ಕೆ ಭಂಡಾರಿ ಮೊಕ್ಲೆನ ಮಗೆ.

ಆ.23 : ತೀಯಾ ಸೇವಾ ಸಹಕಾರ ಸಂಘದ ಪತ್ತನೇ ವರ್ಸೊದ ಉಚ್ಚಯ

ಉಳ್ಳಾಲ : ತೀಯಾ ಸೇವಾ ಸಹಕಾರ ಸಂಘ(ನಿ)ದ ಪತ್ತನೇ ವರ್ಸೊದ ಉಚ್ಚಯ ಆ.23 ನೇ ಐತಾರ ಕಾಂಡೆ 10 ಗಂಟೆರ್ದ್ ಜೆಪ್ಪು ಮಹಾಕಾಳಿ ಪಡ್ಪು ಮಾಷ್ ಗಾರ್ಡನ್‌ಡ್ ನಡಪರೆ ಉಂಡು.
ಈ ಲೇಸ್‌ಡ್ ಬೇತೆ ಬೇತೆ ಕ್ಷೇತ್ರದ ಸ್ವಾಮೀಜಿನಕುಲು, ಸಚಿವೆರ್, ರಾಜ್ಯ ಬೊಕ್ಕ ರಾಷ್ಟ್ರೀಯ ರಾಜಕೀಯ ನಾಯಕೆರ್, ಗಣ್ಯೆರ್, ಬಿನ್ನೆರ್ ಪಾಲ್ ಪಡೆಯರೆ ಉಲ್ಲೆರ್.
ಮದ್ಯಾನ 12 ಗಂಟೆರ್ದ್ ತೀಯಾ ಕ್ರೀಡಾ ಸ್ಪರ್ಧೆ, ಧರ್ಮಾರ್ಥ ವೈದ್ಯಕೀಯ ಶಿಬಿರ, ರಾಜ್ಯ ಸರಕಾರದ ಗ್ಯಾರಂಟಿ ಅನುದಾನಗ್ ಅರ್ಜಿ ಪಾಡುನ ಶಿಬಿರ, ಅಸಂಘಟಿತ ಕಾರ್ಮಿಕೆರೆಗ್ ಸ್ಮಾರ್ಟ್ ಕಾರ್ಡ್ ನೋಂದಣಿ ಶಿಬಿರ ಅಂಚೆನೆ ಸಾಂಸ್ಕೃತಿಕ ಕಾರ್ಯಕ್ರಮ, ಎಲ್ಯ ಪೌರಾಣಿಕ ನಾಟಕ, ಮನೋರಂಜನ್ ಕಾರ್ಯಕ್ರಮ ನಡಪರೆ ಉಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ಪ್ರತಿಭಾವಂತ ಫೊಟೊಗ್ರಾಫರ್ ಕನ್ಯಾನ ಕುಮಾರಸ್ವಾಮಿ ಮೆರೆಗ್ “ಛಾಯಾ ರತ್ನ” ಪ್ರಶಸ್ತಿ

ಕುಡ್ಲ : ಸೌತ್ ಕೆನರಾ ಫೋಟೋಗ್ರಾಫರ್ಸ್ ಅಸೋಸಿಯೇಷನ್ ರಿ. ದ. ಕ. ಉಡುಪಿ ಜಿಲ್ಲೆ ಬ್ರಹ್ಮಾವರ ವಲಯ ಬೊಕ್ಕ ರೋಟರಿ ಕ್ಲಬ್ ಮೊಕ್ಲೆನ ಒಟ್ಟುಸೇರಿಗೆಡ್ ಇಂಚೊಗು ನಡತಿನ ವಿಶ್ವ ಛಾಯಾಗ್ರಹಣ ದಿನಾಚರಣೆದ ಲೇಸ್‌ಡ್ ಬಂಟ್ವಾಳ ವಲಯದ ಮಾಜಿ ಅಧ್ಯಕ್ಷೆರ್, ಪುಗರ್ತೆದ ಫೊಟೊಗ್ರಾಫರ್ ಕನ್ಯಾನ ಕುಮಾರಸ್ವಾಮಿ ಮೆರೆಗ್ “ಛಾಯಾ ರತ್ನ” ಪ್ರಶಸ್ತಿ ಕೊರ್ದು ಮಾನಾದಿಗೆ ಮಲ್ತೆರ್.

ದೇಶಭಕ್ತಿ ಗೀತೆದ ಒರುಟು ಉಡಲ್ ಗೆಂದಿನ ಕಟೀಲ್ದ ಎಲ್ಯ ಆನ್ ಸಮರ್ಥ್

ಕಿನ್ನಿಗೋಳಿ: ಸ್ವಾತಂತ್ರ್ಯ ದಿನಾಚರಣೆದ ಅಂಗವಾದ್ ಎಲ್ಯ ಆನ್ ಪಂಡಿನ ದೇಶಭಕ್ತಿ ಗೀತೆ ಇತ್ತೆ ಸಾಮಾಜಿಕ ಜಾಲತಾಣಡ್ ಸಕತ್ ವೈರಲ್ ಆದ್ , ಆನನ್ ಪದ್ಯ ಪುಗಾರ್ತೆ ಪಡೆತ್ಂಡ್.

ಕಟೀಲ್ ಅಂಗ್ಲ ಮಾಧ್ಯಮ ಶಾಲೆದ ಒಂಜನೇ ತರಗತಿಡ್ ಕಲ್ಪುನ ಕಿನ್ನಿಗೋಳಿ ಉಲ್ಲಂಜೆದ ಸಮರ್ಥ್ ಈ ಪದ್ಯನ್ ಪಂತಿನ ಎಲ್ಯ ಪ್ರತಿಭೆ. ವಿಜಯನರಸಿಂಹ ಆರ್ ರಚನೆ ಮಲ್ದಿನ ‘ಹಿಂದುಸ್ಥಾನವು ಎಂದೂ ಮರೆಯದ ಭಾರತ ರತ್ನವು ನೀನಾಗು’ ಪನ್ಪಿನ ಭಾವಗೀತೆನ್ ಸಮರ್ಥ್ ತನ್ನ ಪೊರ್ಲ ಸೊರಟ್ ಪಂತಿನವು , ಸ್ವಾತಂತ್ರ್ಯ ದಿನಾಚರಣೆದ ಪೊರ್ತುಡು ಬಾರಿ ಪುಗಾರ್ತೆ ಪಡೆತ್ಂಡ್.

ಪುಟ್ಟಣ್ಣ ಕಣಗಾಲ್ ನಿರ್ದೇಶನದ ‘ಅಮೃತ ಘಳಿಗೆ’ ಸಿನಿಮಾಡ್ ಇತ್ತಿನ ಈ ಪದ ಅಪಗ ಬಾರಿ ಪುಗಾರ್ತೆ ಪಡೆದ್ ಇತ್ತ್ಂಡ್. ಇತ್ತೆ ಅವೇ ಪದನ್ ಎಲ್ಯ ಆನ್ ಸಮರ್ಥ್ ಪಂಡಿನ ಸಾಮಾಜಿಕ ಜಾಲತಾಣಡ್ ವೈರಲ್ ಅತುಂಡ್ .

ಕಿನ್ನಿಗೋಳಿ ಪಟ್ಟಣ ಪಂಚಾಯತ್ ಸದಸ್ಯರಾದ್ ಇಪ್ಪುನ ಅಂಚೆನೆ ಪದ ಪನ್ಪುನಾರ್ ಪ್ರಕಾಶ್ ಆಚಾರ್ಯ ಬೊಕ್ಕ ಸೌಮ್ಯ ಪ್ರಕಾಶ್ ಆಚಾರ್ಯ ದಂಪತಿಲೆನ ಮಗೆ ಸಮರ್ಥ್‌ಗ್ ಒವೇ ರೀತಿದ ಸಂಗೀತ ತರಬೇತಿ ಇಜ್ಜಿ . ಆಂಡ ಅಮ್ಮೆರ್ ಪನ್ಪುನ ಪದ್ಯ ಕೇಂದ್, ಆರೆರ್ದ್ ಪದ ಕಲ್ತಿನ ಸಮರ್ಥ್ ಇತ್ತೆ ಈ ಪದ ಪಂದ್ ಮಾತೆರ್ನ ಉಡಲ್ ಗೆಂದುದೆರ್.

ಸಮರ್ಥ್ ಪಂಡಿನ ಈ ಎಲ್ಯ ವಿಡಿಯೋ ಇನ್‌ಸ್ಟಾಗ್ರಾಂಡ್ ಕಾಲಿ ರಡ್ಡ್ ದಿನಟ್ ರಡ್ಡ್ ಲಕ್ಷ ರ್ದ್ ಜಾಸ್ತಿ ಜನ ತೂತೆರ್. ಇತ್ತೆ ಸಾಮಾಜಿಕ ಜಾಲತಾಣದಲ್ಲಿ ಭಾರೀ ವೈರಲ್ ಅತುಂಡ್ .

ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನಡ್ ನಾಗರ ಪಂಚಮಿದ ವಿಶೇಷ ಪೂಜೆ

ಹಳೆಯಂಗಡಿ: ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನಡ್ ಆ.17 ತಾನಿ ಸೋಣ ಸಂಕ್ರಾಂತಿ ಬೊಕ್ಕ ನಾಗರ ಪಂಚಮಿ ಅಂಗವಾದ್ ಬೇತೆ ಬೇತೆ ಧಾರ್ಮಿಕ ಕಾರ್ಯಕ್ರಮ ನಡತ್ಂಡ್.
ಕಾಂಡೆ 9 ಗಂಟೆಗ್ ಶ್ರೀ ಸುಬ್ರಹ್ಮಣ್ಯ ದೇವೆರೆಗ್ ವಿಶೇಷ ಬೊಂಡಾಭಿಷೇಕ ನಡತ್ಂಡ್ . ನಾಗರ ಪಂಚಮಿ ಅಂಗವಾದ್ ನಾಗಬನಟ್ ಕಾಂಡೆ 6 ಗಂಟೆರ್ದ್ ಪಂಚಾಮೃತ ಅಭಿಷೇಕ ಬೊಕ್ಕ ನಾಗತಂಬಿಲ ಸೇವೆಲು ನಡತ್ಂಡ್. ಕಾಂಡೆ 11 ಗಂಟೆಗ್ ನಾಗದೇವೆರೆಗ್ ವಿಶೇಷ ಬೊಂಡಾಭಿಷೇಕ, ಮಧ್ಯಾಹ್ನ 12 ಗಂಟೆಗ್ ಮಹಾಪೂಜೆ ಬೊಕ್ಕ ನುಪ್ಪುಪುರ್ಸಾದ ನಡತ್ಂಡ್ .

ಈ ಪೊರ್ತುಡು ದೇವಸ್ಥಾನದ ಪ್ರಧಾನ ಅರ್ಚಕೆರ್ ಟಿ. ಮಧುಸೂದನ್ ಆಚಾರ್ಯ, ವ್ಯವಸ್ಥಾಪನ ಸಮಿತಿ ಗುರ್ಕಾರ್ಲು ಗುರುರಾಜ್ ಎಸ್. ಪೂಜಾರಿ, ಸದಸ್ಯರಾಯಿನ ಪುರುಷೋತ್ತಮ ಕೋಟ್ಯಾನ್, ಅಶೋಕ್ ಕುಂದರ್, ತೋಕೂರು ಗುತ್ತು ಸಂಪತ್ ಶೆಟ್ಟಿ, ಸವಿತಾ ಶರತ್ ಬೆಳ್ಳಾಯರ್, ಶೋಭಾ ಅಂಚನ್, ಭಾಸ್ಕರ್ ದೇವಾಡಿಗ, ವಿಶ್ವನಾಥ್, ದೇವಲ್ಯದ ನಿಕಟಪೂರ್ವ ಗುರ್ಕಾರ್ಲು ಹರಿದಾಸ್ ಭಟ್, ಪುರುಷೋತ್ತಮ್ ರಾವ್, ಅಂಚೆನೆ ಸ್ಥಳೀಯ ಸಂಘ-ಸಂಸ್ಥೆದ ಗುರ್ಕಾರ್ಲು, ಸದಸ್ಯೆರ್ ಭಕ್ತೆರ್ ಉಪಸ್ಥಿತರಿತ್ತೆರ್.

ಪಂಜ-ಕೊಯಿಕುಡೆ ಶ್ರೀ ವಿಠೋಭ ಭಜನಾ ಮಂದಿರಡ್ ಸ್ವಾತಂತ್ರೋತ್ಸವ ಲೇಸ್

ಪಕ್ಷಿಕೆರೆ: 80ನೇ ವರ್ಷದ ಸ್ವಾತಂತ್ರೋತ್ಸವ ಕಾರ್ಯಕ್ರಮನ್ ಪಂಜ-ಕೊಯಿಕುಡೆ ಶ್ರೀ ವಿಠೋಭ ಭಜನಾ ಮಂದಿರಡ್ ವಿಜೃಂಭಣೆಡ್ ಆಚರಿತೆರ್.
ರಘುರಾಮ ಶೆಟ್ಟಿ ಪಂಜ ಕೊಡಿ ರಾಪಾದ ಪಾತೆರಿಯೆರ್.
ಈ ಪೊರ್ತುಡು ಸುರೇಶ್ ಪಂಜ ಸದಾನಂದ ಶೆಟ್ಟಿ ಪಂಜ, ರಮೇಶ್ ಶೆಟ್ಟಿ ಪಂಜ ಮುಂಬೈ, ಚಂದ್ರಹಾಸ್ ಶೆಟ್ಟಿ ಮೊಗಪಾಡಿ, ಮಂಡಳಿ ಗುರ್ಕಾರ್ಲು ಭರತ್ ಶೆಟ್ಟಿ ಪಂಜ, ಸತೀಶ್ ಶೆಟ್ಟಿ ಬೈಲಗುತ್ತು ಉಪಸ್ಥಿತರಿತ್ತೆರ್. ದೇವೆರೆ ಪಾದ ಸಂದಿನ ರಮೇಶ್ ಶೆಟ್ಟಿ ಅಜೆಕಾರ್ ಮೇರೆಗ್ ನುಡಿ ನಮನ ಸಂದಾಯೆರ್ .
ಪಂಜ ಶಾಲಾ ಜೋಕುಲೆಗ್ ಕನ್ನಡ- ಇಂಗ್ಲಿಷ್ ನಿಗಂಟು ಬೊಕ್ಕ ಅಂಗನವಾಡಿ ಜೋಕುಲೆಗ್ ಕನ್ನಡ -ಇಂಗ್ಲಿಷ್ ಅಕ್ಷರ ಅಭ್ಯಾಸ ಪುಸ್ತಕನ್ ಮಂಡಳಿದ ವತಿರ್ದ್ ಕೊರಿಯೆರ್.
ಪದ್ಮನಾಭ ಪಂಜ ಕಾರ್ಯಕ್ರಮ ನಿರೂಪಣೆ ಮಲ್ತೆರ್ .
ಮಂಡಳಿ ಪದಾಧಿಕಾರಿಲು , ಪದುಕೆರ್ ಬೊಕ್ಕ ಊರುದಕುಲು, ಶಾಲಾ ಶಿಕ್ಷಕೆರ್ , ಈ ಲೇಸ್ ಗ್ ಸಾಕಾರ ಮಲ್ತೆರ್ .

ಕೋಟ ಬ್ಲಾಕ್ ಕಾಂಗ್ರೆಸ್ ಸಮಿತಿ ಸಂಯೋಜಕೆರಾದ್ ಎಚ್. ವಸಂತ ಬೆರ್ನಾಡ್ ನೇಮಕ

ಕುಡ್ಲ : ಕೆಪಿಸಿಸಿ ಸದಸ್ಯೆರ್, ಮುಲ್ಕಿದ ಉತ್ಸಾಹಿ ಲೀಡರ್ ಎಚ್. ವಸಂತ ಬೆರ್ನಾಡ್ ಮೆರೆನ್ ಉಡುಪಿ ಜಿಲ್ಲೆ ಕುಂದಾಪುರ ವಿಧಾನಸಭಾ ಕ್ಷೇತ್ರದ ಕೋಟ ಬ್ಲಾಕ್ ಕಾಂಗ್ರೆಸ್ ಸಮಿತಿದ ಸಂಯೋಜಕೆರಾದ್ ಕೆಪಿಸಿಸಿ ಅಧ್ಯಕ್ಷೆರ್ ಬಿ. ಕೆ ಹರಿಪ್ರಸಾದ್ ಮೇರ್ ನೇಮಕ ಮಲ್ತ್ ಆದೇಶ ಕೊರ್ತೆರ್.
ವಸಂತ ಬರ್ನಾಡ್ ಮೇರ್, 2021- 22 ನೇ ವರ್ಷಡ್‌ಲ ಕೋಟ ಬ್ಲಾಕ್ ಕಾಂಗ್ರೆಸ್ ಸಮಿತಿದ ವೀಕ್ಷಕೆರಾದ್ ಕರ್ತವ್ಯ ನಿರ್ವಹಣೆ ಮಲ್ದಿತ್ತೆರ್. ಇತ್ತೆ ಕುಡೊರ ಬಿ ಕೆ ಹರಿಪ್ರಸಾದ್ ಮೇರ್ ಈ ಜಬದಾರಿ ವಹಿಸಾದೆರ್.
ಕೆಪಿಸಿಸಿ ಸದಸ್ಯೆರಾದ್, ಕೆಪಿಸಿಸಿ ಸಂಯೋಜಕೆರಾದಿತ್ತಿನ ವಸಂತ ಬರ್ನಾಡ್ ಮೇರ್ ಪ್ರಸಕ್ತ ಮುಲ್ಕಿ ಮೂಡಬಿದ್ರೆ ವಿಧಾನಸಭಾ ಕ್ಷೇತ್ರದ ಕಾಂಗ್ರೆಸ್ ಪ್ರಚಾರ ಸಮಿತಿದ ಅಧ್ಯಕ್ಷೆರಾದ್ ಸೇವೆ ಮಲ್ತೊಂದುಲ್ಲೆರ್.

ಹಳೆಯಂಗಡಿ ಬಿಲ್ಲವ ಸಮಾಜ ಸೇವಾ ಸಂಘ (ರಿ), ಯುವವಾಹಿನಿ (ರಿ) ಹಳೆಯಂಗಡಿ ಘಟಕದ ನಿರೆಲ್‌ಡ್ “ಆಟಿದ ಗೇನ” ಲೇಸ್

ಹಳೆಯಂಗಡಿ: ಬಿಲ್ಲವ ಸಮಾಜ ಸೇವಾ ಸಂಘ (ರಿ) ಹಳೆಯಂಗಡಿ ಬೊಕ್ಕ ಯುವವಾಹಿನಿ (ರಿ) ಹಳೆಯಂಗಡಿ ಘಟಕದ ಒಟ್ಟುಸೇರಿಗೆಡ್ “ಆಟಿದ ಗೇನ ” ಲೇಸ್ ನಡತ್ಂಡ್.

ಯುವವಾಹಿನಿ ಕೇಂದ್ರ ಸಮಿತಿದ ಅಧ್ಯಕ್ಷೆರ್ ಅಶೋಕ್ ಕುಮಾರ್ ಪಡ್ಪು ಲೇಸ್ ಉದಿಪನ ಮಲ್ತ್‌ದ್ ಪಾತೆರಿಯೆರ್.


ಮಲ್ಲ ಬಿನ್ನೆರಾದ್ ಕರ್ಣಾಟಕ ಬ್ಯಾಂಕ್ ಡಿಜಿಎಂ ಬಿ. ಗೋಪಾಲಕೃಷ್ಣ ಸಾಮಗ ಪಾತೆರ್‌ದ್ ಭಾರತೀಯ ಸಂಸ್ಕೃತಿ, ಸಂಸ್ಕಾರ ಬೊಕ್ಕ ಪರಂಪರೆದ ಮೌಲ್ಯನ್ ಒರಿಪಾದ್ ಬುಲೆಪಾವುನ ಪ್ರತಿಯೊರಿಯನ ಜವಾಬ್ದಾರಿ ಪಂದ್ ಪಂಡೆರ್.
ಲೇಸ್‌ದ ಅಧ್ಯಕ್ಷತೆ ವಹಿಸ್‌ದಿತ್ತಿನ ಬಿಲ್ಲವ ಸಮಾಜ ಸೇವಾ ಸಂಘ (ರಿ) ಹಳೆಯಂಗಡಿ ಅಧ್ಯಕ್ಷೆರ್ ಚಂದ್ರಶೇಖರ್ ನಾನಿಲ್ ಪಾತೆರ್ದ್, ಸಮಾಜದ ಐಕ್ಯತೆ, ಸಂಸ್ಕೃತಿ ಬೊಕ್ಕ ಪರಂಪರೆನ್ ಒರಿಪಾವುನೆಟ್ಟ್ ಇಂಚಿನ ಕಾರ್ಯಕ್ರಮದ ಅಗತ್ಯ ಉಂಡು ಪಂದ್ ಪಂಡೆರ್.
ದಕ್ಷಿಣ ಕನ್ನಡ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತ ಸಮಾಜ ಸೇವಕೆರ್ ಜೈಕೃಷ್ಣ ಕೋಟ್ಯಾನ್ ಮೆರೆನ್ ಪ್ರಶಸ್ತಿ ಪುರಸ್ಕೃತ ನಮ್ಮ ಟಿವಿದ ಕಾರ್ಯಕ್ರಮ ನಿರೂಪಕೆ, ಕೃಷಿಕ ನವೀನ್ ಶೆಟ್ಟಿ ಎಡ್ಮೆಮಾರ್ ಮೆರೆಗ್ “ಆಟಿದ ತಮ್ಮನ” ಕೊರ್ದು ಸನ್ಮಾನ ಮಲ್ತೆರ್. ಈ ಪೊರ್ತುಡು ಕರಾಟೆಡ್ ರಾಷ್ಟ್ರ ಮಟ್ಟದ ಸಾಧನೆ ಮಲ್ದಿನ ಕು. ವಿನೀತ್ s ಸುವರ್ಣ ಮೆರೆನ್ ಗೌರವ ಮಲ್ತೆರ್. ದಿ. ಕೊಲ್ನಾಡ್ ಕಮಲಾ ಬೂಬ ಅಮೀನ್ ಬೊಕ್ಕ ದಿ. ಲೀಲಾ ಕರಿತೋಟ ಮೊಕ್ಲೆನ ಸ್ಮರಣಾರ್ಥ ಅರೆನ ಜೋಕುಲು ಕೊರ್ಪಿನಲ ವಿದ್ಯಾರ್ಥಿ ವೇತನ ಪಟ್ಟಿಯೆರ್. ಅಂಚೆನೆ ಇರ್ ವೆರ್ ಹಿರಿಯ ಕೃಷಿಕೆರೆನ್ ಗೌರವ ಮಲ್ತೆರ್.
ಬಿಲ್ಲವ ಸಮಾಜ ಸೇವಾ ಸಂಘದ ಖಜಾಂಚಿ ರಮೇಶ್ ಬಂಗೇರ ಸ್ವಾಗತ ಮಲ್ತೆರ್.ಸನ್ಮಾನ ಕಾರ್ಯಕ್ರಮಡ್ ಶ್ರೀ ಭಾಸ್ಕರ್ ಸಾಲ್ಯಾನ್ ಮೇರ್ ಸನ್ಮಾನಿತೆರ್‌ನ ಪರಿಚಯ ಬೊಕ್ಕ ಅಭಿನಂದನಾ ಭಾಷಣ ಮಲ್ತ್‌ದ್, ಸಮಾಜಗ್ ಆರ್ ಕೊರ್ತಿನ ಕೊಡುಗೆನ್ ನೆಂಪು ಮಲ್ತೆರ್.
ವೇದಿಕೆಡ್ ಜಗನ್ನಾಥ ಸನಿಲ್, ಮೋಹನ್ ಎಸ್. ಸುವರ್ಣ, ಗಣೇಶ್ ಜಿ. ಬಂಗೇರ, ರವಿ ಜಿ. ಅಮೀನ್, ಗೋಪಾಲ್ ಕೃಷ್ಣ ಕೋಟ್ಯಾನ್, ಶಶೀoದ್ರ ಸಾಲ್ಯಾನ್ ಸೇರ್ದ್ ಮಸ್ತ್ ಗಣ್ಯೆರ್ ಇತ್ತೆರ್.
ಕು. ಕಾತ್ಯಾಯಿನಿ ಸೊಲ್ಮೆ ಸಂದಾಯೆರ್. ಹಿಮಕರ್ ಟಿ ಸುವರ್ಣ ಕಾರ್ಯಕ್ರಮ ನಿರೂಪಣೆ ಮಲ್ತೆರ್.
ನಂತರ ನಡೆದ ಸಾಂಸ್ಕೃತಿಕ ಕಾರ್ಯಕ್ರಮನ್ ಯುವವಾಹಿನಿ ಬೊಕ್ಕ ಬಿಲ್ಲವ ಸಂಘದ ಸದಸ್ಯೆರ್ ನಡಪಾದ್ ಕೊರಿಯೆರ್. ಆಟಿದ ವಿವಿಧ ತೆನಸ್‌ಲೆನ್ ಸುಮಾರ್ 700 ಕ್ಕೆ ಜಾಸ್ತಿ ಕನ ಸೇವನೆ ಮಲ್ತೆರ್.

ತಿಗಲೆ ಬೇನೆಡ್ ತೀರ್ ಪೋಯಿನ ಸೂರಿಂಜೆದ ಕೋಟೆ ಸರಕಾರಿ ಶಾಲೆದ ವಿದ್ಯಾರ್ಥಿ

ಕಿನ್ನಿಗೋಳಿ: ಶಾಲೆಡ್ ವಾಲಿಬಾಲ್ ಗೊಬ್ಬೊಂದು ಇಪ್ಪುನಗ ವಿದ್ಯಾರ್ಥಿಯೊರಿ ತಿಗಲೆ ಬೇನೆಡ್ ಬುರ್ದು ತೀರ್ ಪೋಯಿನ ಘಟನೆ ಬುಧಾರ ಸುರತ್ಕಲ್ ಕೈತಲ್ದ ಸೂರಿಂಜೆದ ಕೋಟೆ ಸರಕಾರಿ ಶಾಲೆಡ್ ನಡತ್ಂಡ್.

ತೀರ್ ಪೋಯಿನ ವಿದ್ಯಾರ್ಥಿ ನಿಖಿತ್ ಎಂ ಅಮೀನ್ ಪಂದ್ ತೆರಿದ್ ಬೈದ್ಂಡ್. ಸೂರಿಂಜೆದ ಕೋಟೆ ಸರಕಾರಿ ಶಾಲೆಡ್ 10ನೇ ಕ್ಲಾಸ್ ಕಲ್ತೊಂದು ಇತ್ತಿನ ನಿಖಿತ್ ಬುಧಾರ ಬಯ್ಯಗ್ ಶಾಲೆದ ಎದುರುದ ಗ್ರೌಂಡ್ ಡ್ ವಾಲಿಬಾಲ್ ಗೊಬ್ಬುನಗ ಬುರ್ದೆರ್, ಕೂಡ್ಲೆ ಸುರತ್ಕಲ್ ದ ಖಾಸಗಿ ಅಸ್ಪತ್ರಗ್ ಲೆತೊಂದು ಪೊಂಡಲ ಚಿಕಿತ್ಸೆ ಫಲಕಾರಿ ಅವಂದೆ ನಿಖಿತ್ ತೀರ್ ಪೋತೆರ್.

ಸೂರಿಂಜೆ ಬೊಳ್ಳಾರು ನಿವಾಸಿ ಮಾಧವ ಅಮೀನ್ ಬೊಕ್ಕ ಶೀಲಾ ಮೊಕ್ಲೆನ ಮೂಜಿ ಜೋಕ್ಲೆನೆಟ್ಟ್ ನಿಖಿಲ್ ಎಲ್ಯ ಮಗೆ, ಪೊಪ್ಪ ಮಾಧವ ಅಮೀನ್ ರಿಕ್ಷಾದ ಡ್ರೈವರ್, ಅಮ್ಮ ಶೀಲಾ ಗೃಹಿಣಿ ಆತೆರ್

ಮೊಳವಳ್ಳಿ ಶಿವರಾಯೆರ್ ಸಹಕಾರಿ ಸಂಘದ ದಿಗ್ಗಜೆರ್ : ವಸಂತ ಬೆರ್ನಾಡ್

ಪ್ರಿಯದರ್ಶಿನಿ ಸೊಸೈಟಿ ವತಿರ್ದ್ ಮೊಳಹಳ್ಳಿ ಶಿವರಾಯೆರ್‌ನ ಪುಟ್ಟುದಿನತ್ತ ಆಚರಣೆ

ಹಳೆಯಂಗಡಿ : ತುಳುನಾಡ್‌ದ ಸಹಕಾರಿ ಕ್ಷೇತ್ರೊಡು ಮಲ್ಲ ಕ್ರಾಂತಿ ಮಲ್ತ್‌ದ್ ಸಹಕಾರಿ ಕ್ಷೇತ್ರ ಇನಿಕ್ಕ್ ಭಾರಿ ಮಲ್ಲ ಮಟ್ಟದ ಸಾಧನೆ ಮಲ್ಪರೆ ಮೊಳವಳ್ಳಿ ಶಿವರಾಯೆರೇ ಸ್ಪೂರ್ತಿ. ಇಂಚಿನ ದಿಗ್ಗಜೆರ್‌ನ ದೂರದೃಷ್ಟಿದ ಚಿಂತನೆರ್ದಾದ್ ಇನಿ ಸಾರ ಸಾರ ಸಹಕಾರಿ ಕೇಂದ್ರೊಲು ಸ್ಥಳೀಯವಾದ್ ಎಡ್ಡೆ ಸೇವೆನ್ ಕೊರೊಂದುಂಡು. ಜನಕುಲುಲ ಈ ಬಗೆಟ್ಟ್ ಮೆಚ್ಚಿದೆರ್ ಪಂದ್ ಪ್ರಿಯದರ್ಶಿನಿ ಕೋ ಆಪರೇಟಿವ್ ಸೊಸೈಟಿ ಅಧ್ಯಕ್ಷೆರ್ ಎಚ್. ವಸಂತ ಬೆರ್ನಾಡ್ ತೆರಿಪಾಯೆರ್.

ಆರ್ ಪ್ರಿಯದರ್ಶಿನಿ ಕೋ ಆಪರೇಟಿವ್ ಸೊಸೈಟಿದ ಪ್ರಧಾನ ಕಚೇರಿಡ್ ಮೊಳವಳ್ಳಿ ಶಿವರಾಯೆರ್‌ನ ಜನ್ಮದಿನದ ಕಾರ್ಯಕ್ರಮನ್ ಉದ್ದೇಶಿಸಾದ್ ಪಾತೆರಿಯೆರ್.

ಲೇಸ್‌ಡ್ ಹಳೆಯಂಗಡಿ ಗ್ರಾಮ ಪಂಚಾಯತ್ ಮಾಜಿ ಉಪಾಧ್ಯಕ್ಷೆರ್ ,ಪಿಸಿಎ ಬ್ಯಾಂಕ್ ಮಾಜಿ ನಿರ್ದೇಶಕೆರ್ ಅಬ್ದುಲ್ ಖಾದರ್ ಬೊಕ್ಕ ಮುಲ್ಕಿ ತಾಲೂಕು ಭೂ ನ್ಯಾಯ ಮಂಡಳಿ ಸದಸ್ಯೆರ್ ಶಂಕರ ಪಡಂಗ ಬಿನ್ನೆರಾದ್ ಪಾಲ್ ಪಡೆದ್ ಮೊಳ ಹಳ್ಳಿ ಶಿವರಾಯೆರ್‌ನ ಭಾವಚಿತ್ರಗ್ ಪುರ್ಪ ಪಾಡ್ದ್ ಗೌರವ ಮಲ್ತೆರ್.
ಮುಖ್ಯ ಕಾರ್ಯ ನಿರ್ವಹಣಾಧಿಕಾರಿ ಸುದರ್ಶನ್ ಪೂಜಾರಿ ಕಾರ್ಯಕ್ರಮ ನಿರೂಪಣೆ ಮಲ್ತೆರ್.
ಎಕೌಂಟೆಂಟ್ ಲೋಲಾಕ್ಷಿ ಸ್ವಾಗತ ಮಲ್ತ್‌ದ್ ,ಹಳೆಯಂಗಡಿ ಶಾಖೆದ ಪ್ರಬಂಧಕೆರಾಯಿನ ಪ್ರಜ್ಞಶ್ರೀ ಸೊಲ್ಮೆ ಸಂದಾಯೆರ್.
ಸಾಲ ವಿಭಾಗದ ಪ್ರಬಂಧಕೆರ್ ಮೋಹನ್ ಕುಮಾರ್ ಬೊಕ್ಕ ಸಿಬ್ಬಂದಿಲು ಇತ್ತೆರ್.

You Missed