ಕಾಸ್ರೋಡ್ ಸುದ್ದಿ | Kasargod News

ಮಂಜೇಶ್ವರ: ಪೊಯ್ಯತ್ತಬೈಲು ಶ್ರೀ ಮಹಾವಿಷ್ಣುಮೂರ್ತಿ ದೇವಲ್ಯಡ್ ಪುನರ್ ಪ್ರತಿಷ್ಠೆ ಅಷ್ಟಬಂಧ ಬ್ರಹ್ಮಕಲಶೋಚ್ಚಯ

ಮಂಜೇಶ್ವರದ ಪೊಯ್ಯತ್ತಬೈಲ್ ಶ್ರೀ ಮಹಾವಿಷ್ಣುಮೂರ್ತಿ ದೇವಲ್ಯಡ್ ಜನವರಿ 22 – 27 ಮುಟ್ಟ ಶ್ರೀ ಮಹಾಗಣಪತಿ ಬೊಕ್ಕ ಶ್ರೀ ಮಹಾವಿಷ್ಣುಮೂರ್ತಿ ದೇವೆರೆನ ನೂತನ ಬಿಂಬ ಪುನಃ ಪ್ರತಿಷ್ಠೆ, ಅಷ್ಟಬಂಧ ಬ್ರಹ್ಮಕಲಶಾಭಿಷೇಕ ಉಚ್ಚಯ ನಡಪರೆ ಉಂಡು.

ಬ್ರಹ್ಮಶ್ರೀ ನೀಲೇಶ್ವರ ಉಚ್ಚಿಲತ್ತಾಯ ಪದ್ಮನಾಭ ತಂತ್ರಿಲೆನ ಮುತಾಲಿಕೆಡ್ ಗ್ರಾಮದ ಕೂಡುಕಟ್ಟ್‌ದ ಯಜಮಾನೆರ್‍ನ ಒಟ್ಟು ಸೇರಿಗೆಡ್ ಈ ಉಚ್ಚಯ ನಡಪರೆ ಉಂಡು. ಅಂಚನೆ 7 ದಿನಲ ವೈದಿಕ, ಧಾರ್ಮಿಕ ಅಂಚನೆ ಸಾಂಸ್ಕೃತಿಕ ಕಾರ್ಯಕ್ರಮ ನಡಪರೆ ಉಂಡು.

ಜನವರಿ 22 ತಾರೀಕ್‌ಗ್ ಬಯ್ಯ 6 ಗಂಟೆಗ್ ಧಾರ್ಮಿಕ ಸಭಾ ಕಾರ್ಯಕ್ರಮ ಆದ್, 8.30 ಗ್ ನಾಟ್ಯನಿಲಯಂ ಶ್ರೀ ಬಾಲಕೃಷ್ಣ ಮಂಜೇಶ್ವರ ಶಿಷ್ಯ ವೃಂದರ್ದ್ ನೃತ್ಯ ಸಿಂಚನ, ರಾತ್ರೆ 10 ಗಂಟೆಗ್ ಶಾರದಾ ಆರ್ಟ್ಸ್ ಕಲಾವಿದೆರ್ (ರಿ.) ಮಂಜೇಶ್ವರ ಮೊಕುಲೆರ್ದ್ “ಯಾನ್ ಉಲ್ಲೆತ್ತ” ತುಳು ನಾಟಕ ನಡಪರೆ ಉಂಡು. ಅಂಚನೆ ಜನವರಿ 23 ತಾರೀಕ್‌ಗ್ ರಾತ್ರೆ 10 ಗಂಟೆಗ್ ಶಿವದೂತೆ ಗುಳಿಗೆ ಪೌರಾಣಿಕ ನಾಟಕ, ಜನವರಿ 24 ಕ್ಕ್ ಬಯ್ಯ 6.30 ಗಂಟೆಗ್ ಕಟೀಲು ಮೇಳರ್ದ್ ಶ್ರೀ ದೇವಿ ಮಹಾತ್ಮೆ ಯಕ್ಷಗಾನ, ಜನವರಿ 25 ಕ್ಕ್ ರಾತ್ರೆ 9 ಗಂಟೆಗ್ ಮಾಯೊದ ಮಾಯಂದಾಳ್ ತುಳು ನಾಟಕ, 26 ಕ್ಕ್ ರಾತ್ರೆ 10 ಗಂಟೆಗ್ ಶ್ರೀ ಬೆಂಕಿನಾಥೇಶ್ವರ ಕೃಪಾಪೋಷಿತ ದಶಾವತಾರ ಯಕ್ಷಗಾನ ಮಂಡಳಿರ್ದ್ ಸತ್ಯೊದ ಸ್ವಾಮಿ ಕೊರಗಜ್ಜ ಯಕ್ಷಗಾನ ನಡಪರೆ ಉಂಡು.

ಜನವರಿ 27 ತಾರೀಕ್‌ಗ್ ಕಾಂಡೆ 9.47 ರ್ದ್ 11.27 ತ್ತ ಮೀನ ಲಗ್ನಡ್ ಶ್ರೀ ಮಹಾವಿಷ್ಣು ದೇವೆರೆನ ಬಿಂಬ ಪ್ರತಿಷ್ಟೆ, ಅಷ್ಟಬಂಧ ಲೇಪನ, ಕುಂಭೇಶ ಕಲಶಾಭಿಷೇಕ, ಜೀವಕಲಶಾಭಿಷೇಕ, ಪರಿಕಲಶಾಭಿಷೇಕ ಬ್ರಹ್ಮಕಲಶ ಅಭಿಷೇಕ, ಪ್ರತಿಷ್ಠಾ ಬಲಿ ನಡಪರೆ ಉಂಡು.

ಜ.2-4 : ಕೋಳ್ಯೂರು ಶ್ರೀ ಶಂಕರನಾರಾಯಣ ದೇವಲ್ಯಡ್ ವರ್ಷಾಧಿದ ಜಾತ್ರೆ,ಮಂಡಲ ಪೂಜೆ

ಮಂಜೇಶ್ವರದ ಕೋಳ್ಯೂರು ಶ್ರೀ ಶಂಕರನಾರಾಯಣ ದೇವಲ್ಯಡ್ ಜನವರಿ 2 ತಾರೀಕ್‌ರ್ದ್ 4 ತಾರೀಕ್ ಮುಟ್ಟ ವರ್ಷಾವಧಿ ಜಾತ್ರೆ ಬೊಕ್ಕ ಮಂಡಲ ಪೂಜೆ ನಡಪರೆ ಉಂಡು.

ವೇದಮೂರ್ತಿ ವರ್ಕಾಡಿ ದಿನೇಶ ತಂತ್ರಿಲೆನ ಮುತಾಲಿಕೆಡ್ ಧಾರ್ಮಿಕ ಅಂಚನೆ ಸಾಂಸ್ಕೃತಿಕ ಕಾರ್ಯಕ್ರಮ ನಡಪರೆ ಉಂಡು. ಮಾತ ಭಕ್ತೆರ್ ಬತ್ತ್‌ದ್ ಶ್ರೀ ಮಹಾ ಗಣಪತಿ ಶಂಕರ-ನಾರಾಯಣ ದೇವೆರೆನ ಶ್ರೀ ಮುಡಿ ಗಂಧ ಪ್ರಸಾದನ್ ದೆತೊಂದು ಶ್ರೀಮೂರ್ತಿಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಅನುವಂಶಿಕ ಮೊಕ್ತೇಸರೆರ್ ವರ್ಕಾಡಿ ಹೊಸಮನೆ ರಾಜೇಶ್ ತಾಳಿತ್ತಾಯ, ಮೊಗಸಾಲೆ ಕೇಶವ ಭಟ್ಟ, ಉತ್ತಾರ ಕೊಡಂಗೆ ಕೃಷ್ಣ ಕುಮಾರ, ಚಕ್ರಕೋಡಿ ಕೃಷ್ಣ ಭಟ್ಟ ಬೊಕ್ಕ ಪ್ರಧಾನ ಅರ್ಚಕೆರ್ ವೇದಮೂರ್ತಿ ಕೆ. ರವಿಶಂಕರ ಹೊಳ್ಳ ಅಂಚನೆ ಶ್ರೀ ಶಂಕರನಾರಾಯಣ ಸೇವಾ ಸಮಿತಿ (ರಿ.) ಕೋಳ್ಯೂರು ಉಂದೆತ್ತ ಅಧ್ಯಕ್ಷೆರ್ ವೇದಮೂರ್ತಿ ಬೋಳಂತಕೋಡಿ ರಾಮ ಭಟ್ಟರು ಬೊಕ್ಕ ಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ರಡ್ಡ್ ತಿಂಗೊಲ್‌ದ ಉಲಯಿ ತೀರ್ ಪೋಯೆರ್ ಒಂಜೇ ಇಲ್ಲದ ಮೂಜಿ ಜನ ಮೆಗ್ಯೆ ಪಲಯೆ!!

ತಲಪಾಡಿ: ಕಾಲಿ ಪದಿನೈನ್ ದಿನತ್ತ ಉಲಯಿ ಒಂಜೇ ಇಲ್ಲದ ಮೂಜಿ ಜನ ತೀರ್ ಪೋಯಿನ ಸಂಗತಿ ತಲಪಾಡಿಡ್ ನಡದ್ಂಡ್.

ಮುಳ್ಳೇರಿಯಾದ ಆದೂರುದ ನಿವಾಸಿ ವಸಂತ್ ಕುಮಾರ್ ರೈ(55) ಸೋಮಾರ ಬಯ್ಯಡ್ ನಡತಿನ ಆಕ್ಸಿಡೆಂಟ್ ಡ್ ತೀರ್ ಪೋಯೆರ್. ಕೆಲವು ದಿನತ್ತ ಪಿರವುಡು ಅರೆನ ರಡ್ಡ್ ಜನ ಮೆಗ್ಗಿ ಪಲಯಲ್ಲು ಕ್ಯಾನ್ಸರ್ ಡ್ ತೀರ್ ಪೋದಿತ್ತೆರ್.

ವಸಂತ್ ಮೇರ್ ಸಂಬಂಧಿಕೆರೆನ ಸುದ್ದದ ಲೇಸ್‌ಗ್ ಪೋದು ಕೋಟೆಕಾರ್‌ಗ್ ಪೋಯರೆ ಟೋಲ್‌ಗೇಟ್ ಕೈತಲ್ ಮಾರ್ಗ ಕಡಪುನ ಪೊರ್ತುಡು ಕೇರಳದಂಚಿರ್ದ್ ಬರೊಂದಿತ್ತಿನ ಲಾರಿ ಗುದ್ದುದ್ಂಡ್. ಈ ಘಟನೆಡ್ ತರೆಕ್ಕ್ ಮಸ್ತ್ ಪೆಟ್ಟಾತಿನೆಡ್ದಾವರ ಮೆರೆನ್ ಆಸ್ಪತ್ರೆಗ್ ದಾಖಲ್ ಮಲ್ಪುನ ಪೊರ್ತುಡು ಸಾದಿದ ನಡುಟ್ಟ್ ತೀರ್ ಪೋಯೆರ್.ಕುಡ್ಲದ ಸಂಚಾರಿ ಠಾಣಾ ಪೊಲೀಸೆರ್ ಲಾರಿದ ಡ್ರೈವರ್‌ನ್ ವಶಕ್ಕ್ ಪಡೆಯೊಂದು, ಕೇಸ್ ದಾಖಲ್ ಮಲ್ತ್‌ದೆರ್.

2 ತಿಂಗೊಲ್ಡ್ ತೀರ್ ಪೋಯೆರ್ ಮೆಗ್ಯ ಪಲಯಲ್ಲು!!
ವಸಂತ್ ಕುಮಾರ್ ಕಾಸ್ರೋಡ್‌ದ ಕೆಎಸ್‌ಆರ್‌ಟಿಸಿ ಡಿಪೊಡ್ 10 ವರ್ಷರ್ದಿಂಚಿ ಬೇಲೆ ಮಲ್ತೊಂದಿತ್ತೆರ್. ಮೆರೆನ ಕುಟುಮದ ಮೂಜಿ ಜನ ರಡ್ಡ್ ತಿಂಗೊಲ್‌ದ ಉಲಯಿ ತೀರ್ ಪೋತೆರ್. ಬೊಂಬಾಯಿಡ್ ಇತ್ತಿನ ಮೆರೆನ ಅಣ್ಣೆ ಸದಾನಂದ ರೈ ಕ್ಯಾನ್ಸರ್‌ರ್ದ್ ತಿಂಗೊಲ್‌ದ ಪಿರವು ತೀರ್ ಪೋದಿತ್ತೆರ್. ಅರೆನ ಜೋಕುಲು ಸೋಮಾರ ರಾತ್ರೆ ರೈಲ್‌ಡ್ ಬೊಂಬಾಯಿಗ್ ಪೋಯರೆ ಇತ್ತೆರ್. ಅರೆನ್ ಭೇಟಿ ಆಪಿನ ಸಲುವಾದ್ ವಸಂತ್ ರೈ ಕೋಟೆಕಾರ್‌ಗ್ ಪೋವೊಂದಿತ್ತೆರ್. ನನೊಂಜಿ ಪಲಯೆ ಚಂದ್ರಹಾಸ್ ರೈ 17 ದಿನತ್ತ ಪಿರವು ಕ್ಯಾನ್ಸರ್‌ಡ್ ತೀರ್ ಪೋದಿತ್ತೆರ್. ಇಂಚಾದ್ ಇತ್ತೆ ವಸಂತ್ ಕುಮಾರ್‌ಲ ತೀರ್ ಪೋದಿತ್ತ್‌ದ್ ಒಂಜೇ ಕುಟುಮದ ಮೂಜಿ ಮೆಗ್ಯೆ ಪಲಯೆರ್‍ಲು ತೀರ್ ಪೋತೆರ್.

ವಸಂತ್ ಕುಮಾರ್ ಮೆರೆಗ್ ಬೊಡೆದಿ ಬೊಕ್ಕ ಮೂಜಿ ಪೊಣ್ಣು ಜೋಕುಲು ಅಂಚನೆ ಒರಿ ಆನ್ ಮಗೆ ಉಲ್ಲೆರ್.