ಕಾರ್ಲದ ಸುದ್ದಿ Karkala News

ಅತ್ತೂರು ಪರ್ಪಲೆ ಕಲ್ಕುಡ ದೈವಸ್ಥಾನದ ಶಿಲಾನ್ಯಾಸ ಕಜ್ಜ

ಕಾರ್ಲಡುಪ್ಪುನ ಪಿರಾಕ್ದ ಶ್ರೀ ಕ್ಷೇತ್ರ ಅತ್ತೂರು ಪರ್ಪಲೆಗಿರಿತ ಕಲ್ಕುಡ ಬೊಕ್ಕ ಪರಿವಾರ ದೈವೊಲೆನ ದೈವಸ್ಥಾನದ ಶಿಲಾನ್ಯಾಸ ಕಜ್ಜ ಫೆಬ್ರವರಿ 11, 2024ಕ್ಕ್ ಐತಾರ ಕಾಂಡೆ 9.30ಗು ನಡಪರೆ ಉಂಡು.

ಈ ಕಾರ್ಯಕ್ರಮಗ್‌ ಮಾತ ಭಕ್ತಾಧಿಲು ಎಚ್ಚಿನ ಸಂಖ್ಯೆಡ್‌ ಪಾಲ್‌ ಪಡೆಯೊಡು ಪಂದ್‌ ಲೆಪ್ಪೋಲೆಡ್‌ ತೆರಿಪಾದೆರ್.

ಮುಲ್ಕಿ ಯಶೋಧ ಜಯಶ್ರೀ ಸನಿಲ್ ದೇವೆರೆ ಪಾದ ಸೇರಿಯೆರ್

ಮುಲ್ಕಿ: ಪುಗರ್ತೆದ ಛಾಯಚಿತ್ರಗಾರೆರ್ ಚಿತ್ರಾಲಯ ಸ್ಟುಡಿಯೋದ ಧಣಿ ದಿ. ಜಯಶೀಲ ಸನಿಲ್ ಮೇರ್ನ ಬುಡೆದಿ, ಮುಲ್ಕಿ ಪಂಚಮಹಲ್ ರೋಡ್ ಲಕ್ಷ್ಮೀ ನಿವಾಸದ ಯಶೋಧ ಜಯಶ್ರೀ ಸನಿಲ್ (70) ಹುಷಾರ್ ದಾಂತೆ ಸನಿವಾರ ದೇವೆರೆ ಪಾದ ಸೇರಿಯೆರ್.

ಮೆರೆಗ್ ಪತ್ರಕರ್ತೆರಾಯಿನ ಭಾಗ್ಯವಾನ್ ಸನಿಲ್ ಸೇರ್ದ್ ರಡ್ಡ್ ಮಗನಕುಲು, ಒರ್ತಿ ಮಗಲ್ ಉಲ್ಲೆರ್.

ತುಳು ಮಣ್ಣ್ ಡ್ ಕನ್ನಡದ ಶಾಲೆನ್ ಒರಿಪಾವುನ ಕೆಲಸ ಆವೊಡು: ಹರಿಕೃಷ್ಣ ಪುನರೂರು

ಮುಲ್ಕಿ: ಕನ್ನಡ ಶಾಲೆಲೆಗ್ ಮಾಸ್ಟ್ರ್ ನಕುಲು ದಾಂತೆ, ಸರಿಯಾಯಿನ ಸೌಲಭ್ಯದಾಂತೆ, ಓದರೆ ಜೋಕುಲು ದಾಂತೆ ಮುಚ್ಚುನ ಪರಿಸ್ಥಿತಿ ಬೈದ್ಂಡ್. ಅವೆನ್ ಸರಕಾರ ಮಾತ್ರ ಅತ್ರ್ ತುಳು ಮಣ್ಣ್ ದ ಕನ್ನಡಾಭಿಮಾನಿಲು, ಸಂಘ ಸಂಸ್ಥೆಲು ಒರಿಪಾವೊಡು ಪಂದ್ ಕನ್ನಡ ಸಾಹಿತ್ಯ ಪರಿಷತ್ತ್ ದ ಮಾಜಿ ರಾಜ್ಯಾಧ್ಯಕ್ಷೆರ್ ಡಾ.ಹರಿಕೃಷ್ಣ ಪುನರೂರು ತೆರಿಪಾಯೆರ್.

ಆರ್ ಮುಲ್ಕಿ ತಾಲೂಕುದ ಕಡೀರ್ ದ ಕನ್ನಡ ಸಾಹಿತ್ಯ ಸಮ್ಮೇಳನನ್ ಕಾರ್ನಾಡ್ ಸರಕಾರಿ ಪದವಿ ಪೂರ್ವ ಕಾಲೇಜಿದ ಸಭಾಂಗಣಡ್ ಬುಧವಾರ ಉದಿಪನ ಮಲ್ತ್ ಪಾತೆರಿಯೆರ್.

ಕನ್ನಡ ಶಾಲೆಲು ಬಂದ್ ಆಪಿನ ಬಗೆಟ್ಟ್ ಎಚ್ಚೆರ್ಗೆ ಆದ್ ಅಯಿತ್ತ ರಕ್ಷಣೆಗ್ ನಮ ಮಾತೆರ್ಲ ದುಂಬು ಪೋವೊಡು. ಕನ್ನಡ ರಕ್ಷಣಾ ವೇದಿಕೆದಂಚಿನ ಸಂಘಟನೆಗ್ ನಮ ಬೆರಿಬಲ ಕೊರೊಡು. ನಮ್ಮ ಅಪ್ಪೆ ತುಳು ಅಪ್ಪೆ. ಕಲ್ಪಾದಿನ ಅಪ್ಪೆ ಕನ್ನಡ. ಅಂಚಾದ್ ತುಳು ಬಾಷೆದ ರಕ್ಷಣೆದ ಒಟ್ಟುಗು ಕನ್ನಡ ಭಾಷೆನ್ ಒರಿಪಾವೊಡು ಪಂದ್ ಆರ್ ಪಂಡೆರ್.

ಸಮ್ಮೇಳನಾಧ್ಯಕ್ಷೆರ್ ಡಾ.ಗಣೇಶ್ ಅಮೀನ್ ಸಂಕಮಾರ್ ಅಧ್ಯಕ್ಷೀಯ ಬಾಷಣೊಡು ಮುಲ್ಕಿ ತಾಲೂಕುದ ಸಮಗ್ರ ಇತಿಹಾಸ ತೆರಿಪಾಯೆರ್.
ಮತ್ತರ್ಮೆಡ್ ಮಲ್ಲ ಬಿನ್ನೆರಾದ್ ಬಪ್ಪನಾಡು ದೇವಸ್ಥಾನದ ಮೊಕ್ತೇಸರೆರ್ ಮನೋಹರ ಶೆಟ್ಟಿ, ಕನ್ನಡ ಸಾಹಿತ್ಯ ಪರಿಷತ್ ಕೇಂದ್ರೀಯ ಮಾರ್ಗದರ್ಶಕ ಸಮಿತಿ ಸದಸ್ಯೆರ್ ಡಾ.ಮುರಳಿ ಮೋಹನ ಚೂಂತಾರು, ಮೋಹನ್ ದಾಸ್ ಸುರತ್ಕಲ್, ಸರ್ವೋತ್ತಮ ಅಂಚನ್, ಮುಲ್ಕಿ ಬಂಟರ ಸಂಘದ ಅಧ್ಯಕ್ಷೆರ್ ಅಶೋಕ್ ಕುಮಾರ ಶೆಟ್ಟಿ, ನಿಶಾಂತ್ ಶೆಟ್ಟಿ ಕಿಲೆಂಜೂರು, ಮೊಗವೀರ ಸಂಪಾದಕೆರ್ ಅಶೋಕ್ ಸುವರ್ಣ , ಗುರುಶಾಂತಪ್ಪ, ಪ್ರಿನ್ಸಿಪಾಲ್ ಡಾ.ವಾಸುದೇವ ಬೆಳ್ಳೆ , ಮುಲ್ಕಿ ನಗರಪಂಚಾಯತ್ ಮುಖ್ಯಾಧಿಕಾರಿ ಇಂದು, ಮುಲ್ಕಿ ಸಾಹಿತ್ಯ ಪರಿಷತ್ ದ ಅಧ್ಯಕ್ಷೆರ್ ಮಿಥುನ್ ಉಡುಪ ಕೊಡೆತ್ತೂರು, ಮಂಜುನಾಥ ರೇವಣ್ಕರ್ ಇತ್ತೆರ್.

ಕಾಂಡೆ ಕಾರ್ನಾಡ್ ರ್ದ್ ಭುವನೇಶ್ವರಿ ದೇವಿನ ಭವ್ಯ ಮೆರವಣಿಗೆ ನಡತ್ಂಡ್. ತಹಶೀಲ್ದಾರ್ ಪ್ರದೀಪ್ ಕುರ್ಡೇಕರ್ ಧ್ವಜಾರೋಹಣ ಮಲ್ತೆರ್.ಉಂದುವೇ ಪೊರ್ತುಡು ಪರಿಷತ್ ಧ್ವಜ ಬೊಕ್ಕ ಕನ್ನಡ ಧ್ವಜ ರಾಪಾಯೆರ್.

ಪುಸ್ತಕ ಪ್ರದರ್ಶನನ್ ಡಾ.ಎಂ.ಪಿ. ಶ್ರೀನಾಥ್ ಸೇರ್ದ್ ಬಿನ್ನೆರ್ ಉದಿಪನ ಮಲ್ತೆರ್.bಕನ್ನಡ ತಂತ್ರಾಂಶ ನಾಡೋಜ ಕೆ.ಪಿ.ರಾವ್ ಪುಸ್ತಕ ಮರರ್ದ್ ಜೋಕುಲೆಗ್ ಪುಸ್ತಕ ಪಟ್ಟಿಯೆರ್.

ಕಾಲೇಜಿದ ವಿದ್ಯಾರ್ಥಿನಿಯೆರ್ ನಾಡಗೀತೆ ಪಂಡೆರ್.
ಸಮ್ಮೇಳನ ಸಮಿತಿದ ಅಧ್ಯಕ್ಷೆರ್ ಸುನಿಲ್ ಆಳ್ವ ಸ್ವಾಗತ ಮಲ್ತೆರ್.

ದ.ಕ. ಜಿಲ್ಲಾ ಸಾಹಿತ್ಯ ಪರಿಷತ್ ಅಧ್ಯಕ್ಷೆರ್ ಡಾ.ಎಂ.ಪಿ.ಶ್ರೀನಾಥ್ ಆಶಯದ ಮದಿಪು ಮದಿತೆರ್. ಸಮ್ಮೇಳನ ಸಮಿತಿದ ಪ್ರಧಾನ ಕಾರ್ಯದರ್ಶಿ
ದೇವಪ್ರಸಾದ ಪುನರೂರು ಸೊಲ್ಮೆ ಸಂದಾಯೆರ್. ಅರ್ಪಿತಾ ಶೆಟ್ಟಿ ನಿರೂಪಣೆ ಮಲ್ತೆರ್.

ಪುತ್ತೂರು ವಿವೇಕಾನಂದ ಎಂಜಿನಿಯರಿಂಗ್ ಕಾಲೇಜ್ ಡ್ ಭಾರತೀಯ ಭಾಷಾ ಉಚ್ಚಯ

ಪುತ್ತೂರು : ಪಂಚ ದ್ರಾವಿಡ ಭಾಷೆಡ್ ತುಳು ಬಾಷೆ ಪ್ರಾಚೀನವಾದ್, 12 ನೇ ಶತಮಾನದ ಶಿಲಾ ಶಾಸನಲೆನ್ ಅಧ್ಯಯನ ಮಲ್ಪುನಗ ನೆತ್ತ ಬಗೆಟ್ಟ್ ವಿವರ ತಿಕ್ಕುಂಡು ಪಂದ್ ಜೈ ತುಳುನಾಡು ಕಾಸ್ರೋಡು ವಿಭಾಗದ ಗುರ್ಕಾರ್ದಿ ಕುಶಾಲಾಕ್ಷಿ ವಿ ಕುಲಾಲ್ ಪಂಡೆರ್.

ಆರ್ ಪುತ್ತೂರುದ ವಿವೇಕಾನಂದ ಕಾಲೇಜ್ ಆಫ್ ಎಂಜಿನಿಯರಿಂಗ್ ಆಂಡ್ ಟೆಕ್ನಾಲಜಿ ಬೊಕ್ಕ ವಿದ್ಯಾಭಾರತಿ ಉಚ್ಚ ಶಿಕ್ಷಣ ಸಂಸ್ಥಾನ ನೆತ್ತ ಸಂಯುಕ್ತ ಆಶ್ರಯಡ್ ಕಾಲೇಜ್ ದ ಶ್ರೀರಾಮ ಸಭಾ ಭವನಡ್ ನಡತ್ತಿನ ಭಾರತೀಯ ಭಾಷಾ ಉತ್ಸವ ಕಾರ್ಯಕ್ರಮಡ್ ತುಳು ಭಾಷೆ ಬೊಕ್ಕ ಸಾಹಿತ್ಯ ಈ ವಿಷಯದ ಬಗ್ಗೆ ಪಾತೆರಿಯೆರ್. ಅಪ್ಪೆ ಭಾಷೆಡ್ ಪಾತೆರುನ ಭಾರಿ ಖುಷಿತ ವಿಚಾರ. ಅಂಚಾದ್ ಅಪ್ಪೆ ಭಾಷೆದ ಬಗ್ಗೆ ವಿಶೇಷ ಅಭಿಮಾನನ್ ಬುಲೆಪಾವೊಡು ಪಂದ್ ಪಂಡೆರ್.

ಪುರಾತನ ತುಳುವ ಆಚರಣೆಲು, ತರವಾಡು ಮನೆತನ, ದೇವಸ್ಥಾನ, ದೈವಾಲಯ, ನಾಗಾಲಯಡ್ ನಡಪುನ ಆಚರಣೆಡ್ ಪಾಲ್ ಪಡೆಯುನ ಮುಖೆನ ನೆತ್ತ ಬಗ್ಗೆ ಎಚ್ಚಿನ ತಿಳುವಳಿಕೆನ್ ಪಡೆಯೊನ್ನ ಪ್ರಯತ್ನನ್ ಯುವಜನತೆ ಮಲ್ಪೊಡು ಪಂದ್ ಪಂಡೆರ್. ತುಳು ಬ್ರಹ್ಮ ವೆಂಕಟ್ರಾಜ ಪುಣಿಂಚಿತ್ತಾಯೆರ್ ತುಳು ಲಿಪಿಗ್ ಒಂಜಿ ಚೌಕಟ್ಟ್ ನ್ ನಿರ್ಮಾಣ ಮಲ್ತ್ ಕೊರಿಯೆರ್. ಈ ಲಿಪಿನ್ ಕಲ್ತ್ ದ್ ಒರಿಪಾದ್ ಬುಲೆಪಾವುನ ನಡಪೊಡು ಪಂದ್ ಪಂಡೆರ್.

ಮಾನಾದಿಗೆ ಬಿನ್ನೆರಾದ್ ಪಾಲ್ ಪಡೆನ ವಿವೇಕಾನಂದ ಬಿ.ಎಡ್ ಕಾಲೇಜ್ ದ ಪ್ರಾಂಶುಪಾಲೆರ್ ಡಾ.ಶೋಭಿತಾ ಸತೀಶ್ ಪಾತೆರ್ದ್ ಮನಸ್ಸ್ ದ ಭಾವನೆಲೆನ್ ಬೆತಕ್ಲೆನ ಒಟ್ಟಿಗೆ ಪಟ್ಟೆರೆ, ಬರೆಯೆರೆ, ಓದಿಯೆರೆ, ಸಂವಹನಗ್ ಭಾಷೆ ಅಗತ್ಯ. ಭಾಷೆಡ್ ಪಕ್ವತೆ, ಸ್ಪಷ್ಟತೆ ಬೊಕ್ಕ ಶಬ್ದ ಭಂಡಾರನ್ ಹೊಂದುದು ಇಪ್ಪುನ ಆ ಭಾಷೆದ ಮಿತ್ತ್ ಹಿಡಿತ ಸಾಧಿಸಾವೆರ್ ಪಂದ್ ಪಂಡೆರ್. ಒವ್ವೇ ವಿಷಯದ ಬಗ್ಗೆ ಆಸಕ್ತಿ, ಏಕಾಗ್ರತೆ ಬೊಕ್ಜ ಸೃಜನಶೀಲತೆನ್ ಬೆಳೆಸಾವೊಂಡ ನಮಕ್ಕ್ ಅವೆಟ್ಟ್ ವಿಶ್ವಾಸ ಎಚ್ಚ ಆಪುಂಡು. ಆ ವಿಶ್ವಾಸ ಜೀವನಡ್ ನಮನ್ ದುಂಬು ಕನಪುಂಡು ಪಂದ್ ಪಂಡೆರ್.

ಪೊಂಜೊವ್‌ ಲೆನ ಸಬಲೀಕರಣ ಅಗತ್ಯ: ಉಮಾನಾಥ್ ಕೋಟ್ಯಾನ್

ಮುಲ್ಕಿ: ಸುಧಾಮ ಫೌಂಡೇಶನ್ ಸಂಯೋಜನೆಡ್ ನಡತ್ತಿನ ಕೌಶಲ್ಯಾಭಿವೃದ್ಧಿ ಕಾರ್ಯಗಾರಡ್ ಪರಿಸರ ಸ್ನೇಹಿ ಶಾಪಿಂಗ್ ಬ್ಯಾಗ್ ತಯಾರಿಕಾ ತರಬೇತಿಡ್‌ ಪಾಲ್‌ ಪಡೆನ ಅಭ್ಯರ್ಥಿಲೆಗ್ ಕೌಶಲ್ಯ ಪ್ರಮಾಣ ಪತ್ರ ವಿತರಣಾ ಕಾರ್ಯಕ್ರಮ ಕಾರ್ನಾಡ್ ದ ಲುಲು ಕಾಂಪ್ಲೆಕ್ಸ್ ದ ಸಭಾ ಭವನಡ್ ನಡತ್‌ಂಡ್.‌

ಶಾಸಕೆರ್ ಉಮಾನಾಥ ಕೋಟ್ಯಾನ್ ಲೇಸ್ ಉದಿಪನ ಮಲ್ತ್ ದ್ ಪಾತೆರ್ದ್, ಸುಧಾಮ ಫೌಂಡೇಶನ್ ಮುಕೇನ ರಾಷ್ಟ್ರೀಯತೆ ಒರಿಪುನ, ಏಕತೆ ಬುಳೆಪಾವುನ, ಬೊಕ್ಕ ಪೊಂಜೊವ್‌ ನಕ್ಲೆನ್ ಸಬಲೀಕರಣ ಮಲ್ಪುನ ಕಾರ್ಯ ಎಡ್ಡೆ. ಪೊಂಜೊವ್‌ ನಕುಲು ತನ್ನ ಪ್ರತಿಭೆನ್ ಗಲಸ್ ದ್ ರಾಷ್ಟ್ರದ ಎಡ್ಡೆಗಾದ್‌ ಎಡ್ಡೆ ಬೇಲೆ ಮಲ್ಪೊಡು ಪಂದ್‌ ಪಂಡೆರ್.‌ ಸುಧಾಮ ಫೌಂಡೇಶನ್ ಗುರ್ಕಾರೆ ಸುನಿಲ್ ಆಳ್ವ ಲೇಸ್ ದ ಗುರ್ಕಾರ್ಮೆ ವಹಿಸ್‌ದ್‌ ಇತ್ತೆರ್.

ಮಲ್ಲ ಬಿನ್ನೆರಾದ್ ಕರ್ನಾಟಕ ರಾಜ್ಯ ಮಾಲಿನ್ಯ ನಿಯಂತ್ರಣ ಮಂಡಳಿ ಕುಡ್ಲ ಪ್ರಾದೇಶಿಕ ಕಚೇರಿದ ಉಪ ಪರಿಸರ ಅಧಿಕಾರಿ ಡಾ ಮಹೇಶ್ವರಿ ಸಿಂಗ್ ಪಾತೆರ್ದ್ ಪ್ಲಾಸ್ಟಿಕ್ ನಿಷೇಧದ ಬಗ್ಗೆ ಸ್ವಯಂ ಜಾಗೃತಿ ಮುಖ್ಯ, ಪೊಂಜೊವ್‌ ನಕ್ಲೆನ ಸ್ವಾವಲಂಬನೆ ಬೊಕ್ಕ ಪರಿಸರ ಕಾಳಜಿ ಶ್ಲಾಘನೀಯ ಪಂದ್‌ ಪಂಡೆರ್.‌ ವೇದಿಕೆಡ್ ಪುನರೂರು ಪ್ರತಿಷ್ಠಾನದ ಗುರ್ಕಾರೆ ದೇವ ಪ್ರಸಾದ್ ಪುನರೂರು, ಮುಲ್ಕಿ ಪ್ರೆಸ್ ಕ್ಲಬ್‌ದ ಗುರ್ಕಾರೆ ನಿಶಾಂತ್ ಶೆಟ್ಟಿ ಕಿಲೆಂಜೂರು, ಫೌಂಡೇಶನ್ ಕಾರ್ಯದರ್ಶಿ ಶೈಲೇಶ್, ಮುಲ್ಕಿ ನ.ಪಂ ಮಾಜಿ ಗುರ್ಕಾರ್ಲು ಸುಭಾಷ್ ಶೆಟ್ಟಿ, ಉಪಾಧ್ಯಕ್ಷೆರ್ ಸತೀಶ್ ಅಂಚನ್ ಇತ್ತೆರ್.‌ ಬೇತೆ ಬೇತೆ ಸ್ವಸಹಾಯ ಗುಂಪುದ ಪ್ರಮುಖೆರಾಯಿನ ರಂಜಿತಾ, ಪೂರ್ಣಿಮಾ, ಸಂಮಿತ್ರ, ರೇಖಾ, ಸೌಮ್ಯ ಅಂಚನೆ ಪಾಲ್‌ ಪಡೆನ ಅಭ್ಯರ್ಥಿಲೆಗ್ ಕೌಶಲ್ಯ ಪ್ರಮಾಣ ಪತ್ರ ವಿತರಣೆ ಮಲ್ತೆರ್.

ತರಬೇತುದಾರೆರ್ ಶಿಕ್ಷಕಿ ಸನ್ನಿತಾ ಮೋಹನ್ ಕೋಟ್ಯಾನ್ ಮೇರೆನ್‌ ಈ ಪೊರ್ತುಡು ಮಾನಾದಿಗೆ ಮಲ್ತೆರ್. ದಿನೇಶ್ ಕೊಲ್ನಾಡು ಲೇಸ್‌ದ ಸುದಾರಿಕೆ ಮಲ್ತೆರ್.