ಮುಲ್ಕಿ: ತುಳು ಭಾಷೆ ಬುಲೆಯೆರೆ ಪ್ರೋತ್ಸಾಹ ಕೊರ್ಪಿನೆತ್ತೊಟ್ಟಿಗೆ ಜೋಕುಲು ಎಪಲದ ಜೀವನಡ್ ಸಂಸ್ಕಾರ ಸಂಸ್ಕೃತಿ ಒರಿಪಾದ್, ಬುಲೆಪಾವುನ ಅನಿವಾರ್ಯತೆ ಉಂಡು ಪಂದ್ ಕಟೀಲ್ ತುಳು ವರ್ಲ್ಡ್ ಫೌಂಡೇಶನ್ ದ ಅಧ್ಯಕ್ಷೆರ್ ಭಾನುಮತಿ ಶೆಟ್ಟಿ ಕಕ್ವಗುತ್ತು ಪಂಡೆರ್.
ಮೇರ್ ಕುಬೆವೂರು
ಶ್ರೀ ಜಾರಂದಾಯ ಸೇವಾ ಮಿತ್ರ ಮಂಡಳಿ ಬೊಕ್ಕ ಮಹಿಳಾ ಮಂಡಳಿದ ಮುತಾಲಿಕೆಡ್ ಶ್ರೀ ಜಾರಂದಾಯ ದೈವಸ್ಥಾನದ ಸಭಾಭವನಡ್ ಸೋಮಾರ ಬಯ್ಯಗ್ ಸಾಧಕೆರೆಗ್ ಸನ್ಮಾನ ಬೊಕ್ಕ ವಿದ್ಯಾರ್ಥಿಲೆಗ್ ಪ್ರತಿಭಾ ಪುರಸ್ಕಾರ ಲೇಸ್ ಡ್ ಪಾತೆರಿಯೆರ್.
ಲೇಸ್ ದ ಅಧ್ಯಕ್ಷತೆನ್ ಕ್ಷೇತ್ರದ ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಸತೀಶ್ ಶೆಟ್ಟಿ ಕೆಂಚನಕೆರೆ ಒಯಿಸೊಂದಿತ್ತೆರ್.
ಮಲ್ಲ ಬಿನ್ನೆರಾದ್ ಹಿರಿಯೆರಾಯಿನ ಶಂಭು ಶೆಟ್ಟಿ ಕುಬೆವೂರುಗುತ್ತು, ಸಮಿತಿದ ಗೌರವಾಧ್ಯಕ್ಷೆರ್ ಮುರಳೀಧರ ಭಂಡಾರಿ, ಸದಸ್ಯೆರ್ ಅಶ್ವಿನ್ ಆಳ್ವ, ಕೃಷ್ಣ ಶೆಟ್ಟಿ, ಜಯ ಕುಮಾರ್, ಚಂದ್ರಶೇಖರ್ ಶೆಟ್ಟಿ, ಪ್ರಕಾಶ್ ಶೆಟ್ಟಿ, ಸೇವಾ ಮಿತ್ರ ಮಂಡಳಿದ ಅಧ್ಯಕ್ಷೆರ್ ನಾಗೇಂದ್ರ, ಮಹಿಳಾ ಮಂಡಳಿದ ಅಧ್ಯಕ್ಷೆರ್ ವೇದಾವತಿ ಪಾಲ್ ಪಡೆದಿತ್ತೆರ್.
ಲೇಸ್ ಡ್ ನಿವೃತ್ತ ಯೋಧೆರ್ ನಾರಾಯಣ್ ರೈ ಕುಬೆವೂರು ಬೊಕ್ಕ ಯಕ್ಷಗಾನ ಕಲಾವಿದೆರ್, ಕೃಷಿಕೆರ್, ದೈವಾರಾಧಕೆರ್ ಸುರೇಶ್ ಕೊಲಕಾಡಿ ಮೊಕ್ಲೆಗ್ ಸನ್ಮಾನ ಮಲ್ತೆರ್. ಬೊಕ್ಕ ಸಾಧಕ ವಿದ್ಯಾರ್ಥಿಲೆಗ್ ಪ್ರತಿಭಾ ಪುರಸ್ಕಾರ ಕೊರ್ದು ಮಾನಾದಿಗೆ ಮಲ್ತೆರ್. ಸಮಿತಿದ ವಿಜಯಕುಮಾರ್ ಕುಬೆವೂರು ಲೇಸ್ ನ್ ಸುಧಾರಿಕೆ ಮಲ್ತೆರ್.