3,700ಡ್ದ್ ಜಾಸ್ತಿ ಬರವುಲೆದೊಟ್ಟುಗು ಜಾಗತಿಕ ಮಟ್ಟೊಡು ತುಳು ಗೇನ ಪಸರಿಗೆ; ಸೆಪ್ಟೆಂಬರ್ 12–13 ತೇದಿಗ್ ಇಸೇಸ 10ನೇ ವರ್ಸೊದ ಲೇಸ್
ವಿಶ್ವದಾದ್ಯಂತ ತುಳು ಬಾಸೆಡ್ ಗೇನೊನು ಪಟ್ಟುನ ತುಳು ವಿಕಿಪೀಡಿಯಗ್ ಅಗಸ್ಟ್ 6, 2026 ಗ್ ಪತ್ತ್ ವರ್ಸ ದಿಂಜಿಂಡ್. ಆಗಸ್ಟ್ 6,. 2016ಡ್ ಸುರು ಆಯಿನ ತುಳು ವಿಕಿಪೀಡಿಯ, ಪತ್ತ್ ವರ್ಸೊಡು ಸ್ವಯಂಸೇವಕೆರ್ನ ಬೇಲೆಡ್ದ್ ಪೆರ್ಮೆದ ಬುಲೆಚ್ಚಿಲ್ ಪಡೆತ್ದ್ ಉಂಡು.
ಇತ್ತೆ ತುಳು ವಿಕಿಪೀಡಿಯಡ್ 3,700ಡ್ದ್ಲಾ ಜಾಸ್ತಿ ಬರವುಲು ತಿಕುಂಡು. ಬಾಸೆ, ಇತಿಯಾಸೊ, ಸಂಸ್ಕೃತಿ, ಸಾಹಿತ್ಯೊ, ಬೂಗೋಲೊ, ಜೀವನಚರಿತ್ರೆ, ಆರೋಗ್ಯ ಸೇರ್ದ್ ಬೇತೆ-ಬೇತೆ ಇಸಯೊದ ಬಗೆಟ್ ಒಂಜಾತ್ ಮಾಹಿತಿನ್ ಒದಗಿಸಾವೊಂದಿತ್ತ್ದ್, ಸುಮಾರ್ 25 ಸಕ್ರಿಯೊ ಸಂಪಾದಕೆರ್ ಈ ಯೋಜನೆಡ್ ಎಪೊಲಾ ಬೇಲೆ ಮಲ್ತೊಂದು, ತುಳು ಬಾಸೆದ ಡಿಜಿಟಲ್ ಗೇನೊದ ಸಂಪೊತ್ತುನು ವಿಸ್ತಾರೊ ಮಲ್ಪುವೆರ್.
ಈ ಇತಿಯಾಸೊದ ಸಾಧನೆನ್ ಸ್ಮರಣೀಯೊ ಮಲ್ಪೆರೆ ಕರಾವಳಿ ವಿಕಿಮೀಡಿಯನ್ಸ್ ಯೂಸರ್ ಗ್ರೂಪ್ದ ವತಿಯಿಡ್ದ್ 2026 ಸೆಪ್ಟೆಂಬರ್ 12 ಬೊಕ್ಕ 13ಗ್ ವಿಸೇಸೊ ವರ್ಸೊದ ಪರ್ಬೊದ ಲೇಸ್ ನಡಪಿಯೆರೆ ಉಂಡು. ಈ ಲೇಸ್ಡ್ ವಿಕಿಮೀಡಿಯನ್ನೆರ್, ಬಾಸೆನ್ ಬೊಳೆಪಾಪುನಕ್ಲ್, ಕಲ್ಪುನ ಜೋಕ್ಲ್ ಬೊಕ್ಕ ಒಕ್ಕೂಟೊದ ಸದಸ್ಯೆರ್ ಪಾಲ್ ದೆತೊನುವೆರ್. ತುಳು ವಿಕಿಪೀಡಿಯದ ಪತ್ತ್ ವರ್ಸೊದ ಸಾದಿನ್ ನೆನೆಪು ಮಲ್ಪುನೊಟ್ಟುಗು ಸ್ವಯಂಸೇವಕೆರ್ನ ಬೇಲೆನ್ ಮಾನೊ ಮಲ್ಪುವೆರ್. ಅತ್ತಂದೆ, ತುಳು ಬಾಸೆದ ವಿಕಿಮೀಡಿಯಾ ಯೋಜನೆಲೆದ ದುಂಬುದ ಬುಲೆಚಿಲ್ದ ಬಗೆಟ್ ಪಾತೆರಕತೆಕುಲು ನಡಪಿಯೆರೆ ಉಂಡು.
ಕರಿ ಪತ್ತ್ ವರ್ಸೊಡು ತುಳು ವಿಕಿಪೀಡಿಯ, ತುಳುನಾಡ್ದ ಬಾಸೆ, ಸಂಸ್ಕೃತಿ ಬೊಕ್ಕ ಪಿರಾಕ್ದ ಆಚಾರೊಲೆನ್ ಜಾಗತಿಕೊ ಮಟ್ಟೊಡು ದಾಖಲೆ ಮಲ್ತ್ದ್, ಗೇನೊನು ಮಾತರೆಗ್ಲಾ ಮುಟ್ಟಾವುನ ಮಲ್ಲ ವೇದಿಕೆ ಆದ್ ಬುಲೆತ್ದ್ ಉಂಡು. ಈ ದಸಮಾನೋತ್ಸವೊ ನನಲಾ ಪೊಸ ಸ್ವಯಂಸೇವಕೆರೆನ್ ಸೆಪ್ಪುನಾ ಮುಖೇನ ತುಳು ಬಾಸೆದ ಡಿಜಿಟಲ್ ಗೇನೊದ ವಿಸ್ತಾರೊಗು ಪೊಸ ಉಮೇದ್ ಕೊರ್ಪುಂಡು.