ಮೇ 24 : ಸಸಿಹಿತ್ಲು ಶ್ರೀ ಭಗವತಿ ದೇವಸ್ಥಾನಡ್ ದೃಢ ಸಂಪ್ರೋಕ್ಷಣೆ

ಸಸಿಹಿತ್ಲು : ಇಂಚೊಗು ಬ್ರಹ್ಮಕಲಶೋತ್ಸವ ಆದ್ ಪೊಸ ಕಳೆ ದಿಂಜಿದಿನ ಸಸಿಹಿತ್ಲು ಶ್ರೀ ಭಗವತೀ ದೇವಸ್ಥಾನಡ್ ಮೇ 24 ಐತಾರ ಕಾಂಡೆ ದೃಢ ಕಲಶ ಸಂಪ್ರೋಕ್ಷಣೆ ಬೊಕ್ಕ ನಾಗದೇವೆರೆಗ್ ವಾರ್ಷಿಕ ಆಶ್ಲೇಷ ಬಲಿ ಸೇವೆ ನಡಪರೆ ಉಂಡು.
ಆ ಪ್ರಯುಕ್ತ ಮೇ 23 ಶನಿವಾರ ಬಯ್ಯಡ್ ವಾಸ್ತುಹೋಮ, ವಾಸ್ತು ಪೂಜೆ ನಡಪರೆ ಉಂಡು. ಮೇ 24 ಕಾಂಡೆ 8 ಗಂಟೆಗ್ ಶ್ರೀ ಭಗವತಿ ದೇವಿನ ನಡೆಟ್ಟ್ ಶಾಂತಿ ಹೋಮ,ಪ್ರಾಯಶ್ಚಿತ್ತ ಹೋಮ, ಪಂಚವಿಂಶತಿ ಕಲಶ,ಪ್ರಧಾನ ಹೋಮ, ಕಲಶಾಭಿಷೇಕ, ಪ್ರಸನ್ನ ಪೂಜೆ, ಮಹಾ ಮಂತ್ರಾಕ್ಷತೆ ನಡಪರೆ ಉಂಡು. ಅಂಚೆನೆ ನಾಗ ನಡೆಟ್ಟ್ ನವಕ ಕಲಶ, ಪ್ರಧಾನ ಹೋಮ,ಪಂಚಾಮೃತ ಅಭಿಷೇಕ,ಆಶ್ಲೇಷಾ ಬಲಿ, ಪ್ರಸನ್ನ ಪೂಜೆ ಆದ್ ಅನ್ನಸಂತರ್ಪಣೆ ನಡಪರೆ ಉಂಡು. ಈ ಪುಣ್ಯ ಕಾರ್ಯೊಡು ಭಕ್ತೆರ್ ಮಾತೆರ್ಲ ಪಾಲ್ ಪಡೆದ್ ಭಗವತೀ ಅಮ್ಮನ ಅನುಗ್ರಹ ಪಡೆಯೊಡು ಪಂದ್ ಶ್ರೀ ಕ್ಷೇತ್ರದ ಆಡಳಿತ ಮೊಕ್ತೇಸರೆರ್, ಅನುವಂಶಿಕ ಮೊಕ್ತೇಸರೆರ್, ಬ್ರಹ್ಮಕಲಶೋತ್ಸವ ಸಮಿತಿ, ಮುಂಬೈ ಸಮಿತಿ, ಆಡಳಿತ ಸಮಿತಿ, ಅಭಿವೃದ್ಧಿ ಸಮಿತಿ ಬೊಕ್ಕ ಮಹಿಳಾ ಸಮಿತಿಲೆನ ಅಧ್ಯಕ್ಷೆರ್ ಬೊಕ್ಕ ಸರ್ವ ಸದಸ್ಯೆರ್, ಆಚಾರಪಟ್ಟವರು, ಏಳೂರ ಗುರಿಕಾರೆರ್ ಬೊಕ್ಕ ಸಸಿಹಿತ್ಲು ಗ್ರಾಮಸ್ಥೆರ್ ಬಿನ್ನಾಪು ಮಲ್ದೆರ್.