ಧರ್ಮಸ್ಥಳಡ್ ಪತ್ತನಾಜೆ ಉತ್ಸವ ಮುಗಿತಲ
ವಿಶೇಷ ಪೂಜೆ, ಯಕ್ಷಗಾನ ಮೇಳದ ವಾರ್ಷಿಕ ತಿರುಗಾಟ ಬಂದ್
ಉಜಿರೆ : ಶ್ರೀ ಕ್ಷೇತ್ರ ಧರ್ಮಸ್ಥಳಡ್ ಪತ್ತನಾಜೆ ಪ್ರಯುಕ್ತ ಸೋಮವಾರ ಶ್ರೀ ಮಂಜುನಾಥ ಸ್ವಾಮಿ ಸನ್ನಿಧಿಡ್ ವಿಶೇಷ ರಂಗಪೂಜೆ ನಡತ್ಂಡ್. ಅವೆರ್ದ್ ಬೊಕ್ಕ ಶ್ರೀ ದೇವೆರ್ನ ಉತ್ಸವ ಮೂರ್ತಿದ ಬಲಿ ಉತ್ಸವ, ವಸಂತ ಪೂಜೆ, ಅಷ್ಟಾವಧಾನ ಸೇವೆ ಬೊಕ್ಕ ಧ್ವಜಮರ ಜಪುಡಾವಯನ ವಿಧಿವಿಧಾನ ಸಹಿತ ಉತ್ಸವಮೂರ್ತಿನ್ ಗರ್ಭಗುಡಿತ್ತ ಉಲಯಿ ಕೊನೊಪಿನ ಮುಕೇನ ಪ್ರಸಕ್ತ ವರ್ಷದ ವಾರ್ಷಿಕ ವಿಶೇಷ ಸೇವೆ ಬೊಕ್ಕ ಉತ್ಸವ ಸಮಾಪ್ತಿ ಆಂಡ್.
ಕಾರ್ತಿಕ ತಿಂಗೊಲ್ದ ದೀಪೋತ್ಸವದ ಒಟ್ಟುಗೆ ಏಪದಲೆಕನೆ ವಿಶೇಷ ಸೇವೆ ಬೊಕ್ಕ ಉತ್ಸವ ಪಿರ ಸುರು ಆವರೆ ಉಂಡು. ಸೋಮವಾರ ಆಯಿನೆರ್ದಾವರ ಕ್ಷೇತ್ರಡ್ ಭಕ್ತೆರ್ನ ದಟ್ಟಣೆ ಹೆಚ್ಚಾದಿತ್ತ್ದ್, ಊರು-ಪರ ಊರುರ್ದು ಬೈದಿನ ಸಾವಿರಾರು ಭಕ್ತೆರ್ ಉತ್ಸವಡ್ ಪಾಲ್ ಪಡೆಯೆರ್.
ಧರ್ಮಸ್ಥಳ ಮೇಳ ಉಲಾಯಿ ಆಂಡ್
ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಕೃಪಾಪೋಷಿತ ಯಕ್ಷಗಾನ ಮಂಡಳಿದ ಪ್ರಸಕ್ತ ವರ್ಷದ ವಾರ್ಷಿಕ ತಿರುಗಾಟಲ ಉಂದುವೇ ಸಂದರ್ಭಡ್ ಸಮಾಪ್ತಿ ಆಂಡ್. ಉಂದೆತ್ತ ಹಿನ್ನೆಲೆಡ್ ಮೇಳದ ಶ್ರೀ ಮಹಾಗಣಪತಿ ದೇವೆರೆಗ್ ಧರ್ಮಸ್ಥಳದ ಮಂಜುಕೃಪಾಡ್ ಮಧ್ಯಾಹ್ನ ಗಣಯಾಗ ಬೊಕ್ಕ ಮಹಾಪೂಜೆ ನಡತ್ಂಡ್.
ಬಯ್ಯಡ್ ಮಹಾಪೂಜೆರ್ದ್ ಬೊಕ್ಕ ಕ್ಷೇತ್ರದ ಸಕಲ ಗೌರವದ ಒಟ್ಟುಗು ಶ್ರೀ ಮಹಾಗಣಪತಿ ದೇವೆರೆನ ಭವ್ಯ ಶೋಭಾಯಾತ್ರೆ ಮುಕೇನ ಕ್ಷೇತ್ರಗ್ ಎದ್ಕೊಂಡೆರ್. ಕ್ಷೇತ್ರದ ಆನೆಲು, ಬಸವೆ, ಕೇರಳದ ಚೆಂಡೆ ವಾದ್ಯ ಬಳಗ, ಜಾಗಟೆ ಬೊಕ್ಕ ವಿವಿಧ ವಾದ್ಯಮೇಳದ ವೈಭವದ ಈ ಮೆರವಣಿಗೆಡ್ ಭಕ್ತೆರ್ ಭಕ್ತಿಭಾವಡ್ ಪಾಲ್ ಪಡೆಯೆರ್. ಬೊಕ್ಕ ಶ್ರೀ ದೇವೆರ್ನ ದರ್ಶನ ಸೇವೆ ನೆರವೇರಿಸಾದ್, ಛತ್ರ ಗಣಪತಿ ಗುಡಿಯಲ್ಲಿ ವಿಶೇಷ ಪೂಜೆ ಮಲ್ತೆರ್.
ಈ ಸಂದರ್ಭಡ್ ಧರ್ಮಾಧಿಕಾರಿ ಡಿ. ವೀರೇಂದ್ರ ಹೆಗ್ಗಡೆ, ಹೇಮಾವತಿ ವಿ. ಹೆಗ್ಗಡೆ, ಮೇಳದ ಯಜಮಾನೆರ್ ಡಿ. ಹರ್ಷೇಂದ್ರ ಕುಮಾರ್, ಸುಪ್ರಿಯಾ ಹರ್ಷೇಂದ್ರ ಕುಮಾರ್, ಪಾರುಪತ್ಯೆದಾರೆರ್ ಲಕ್ಷ್ಮೀನಾರಾಯಣ ರಾವ್, ಮೇಳದ ವ್ಯವಸ್ಥಾಪಕೆರ್ ಗಿರೀಶ್ ಹೆಗ್ಡೆ, ಯಕ್ಷಗಾನ ಕಲಾವಿದರು, ಕ್ಷೇತ್ರದ ಸಿಬ್ಬಂದಿ ವರ್ಗ ಬೊಕ್ಕ ಅಪಾರ ಸಂಖ್ಯೆದ ಭಕ್ತೆರ್ ಪಾಲ್ ಪಡೆದಿತ್ತೆರ್.
ಅಂಗಾರೆರ್ದ್ ಮೂಜಿ ದಿನ ಕ್ಷೇತ್ರದ ಅಮೃತವರ್ಷಿಣಿ ಸಭಾಭವನಡ್ ಸೇವೆಯಾಟ ನಡಪರೆ ಇತ್ತ್ದ್, ಕಲಾವಿದೆರ್ ಸಂಪ್ರದಾಯಬದ್ಧವಾದ್ ಗೆಜ್ಜೆ ಗಿರ್ಪುನ ಮುಕೇನ ಪ್ರಸಕ್ತ ವರ್ಷದ ವಾರ್ಷಿಕ ತಿರುಗಾಟಗ್ ಮಂಗಳ ಆವರೆ ಉಂಡು.