ಬಂಟ್ವಾಳ: ಸಜೀಪಮೂಡದ ಅನ್ನಪ್ಪಾಡಿ ಶ್ರೀ ಬಾಲಗಣಪತಿ ದೇವಸ್ಥಾನಡ್ ಶ್ರೀ ಬಾಲಗಣಪತಿ ಮೂಲ ಮಂತ್ರ ಲಕ್ಷ ಜಪ ಯಜ್ಞ- ದೂರ್ವ ಹೋಮ ಬೊಕ್ಕ ಚತುರ್ಥ ಪ್ರತಿಷ್ಠಾ ವರ್ಧಂತಿ, ವರ್ಷೊದ ಜಾತ್ರೆ ಡಿ.28 ಬೊಕ್ಕ 29ಕ್ಕ್ ನಡಪರೆ ಉಂಡು.
ಈ ಲೇಸ್ ಬ್ರಹ್ಮಶ್ರೀ ನೀಲೇಶ್ವರ ಕೆ ಉಚ್ಚಿಲತ್ತಾಯ ಪದ್ಮನಾಭ ತಂತ್ರಿಲೆನ ಮಾರ್ಗದರ್ಶನಡ್ ನಡಪುಂಡು.
ಡಿ.28 ಐತಾರ ಬೊಲ್ಪುಗು ಶ್ರೀ ಬಾಲಗಣಪತಿ ಹೋಮ, ತುಡರ್ ಅರ್ಲಾಯೆರೆ ಉಂಡು. ಬೊಕ್ಕ ಶ್ರೀ ಬಾಲಗಣಪತಿ ಮೂಲಮಂತ್ರ ಲಕ್ಷ ಜಪ ಯಜ್ಞ- ದೂರ್ವ ಹೋಮ ಸುರು ಆದ್ ಮಧ್ಯಾಹ್ನ ಮುಗಿಪುಂಡು. ಆವೆರ್ದ್ ಬೊಕ್ಕ ಮಹಾಪೂಜೆ, ಅನ್ನಸಂತರ್ಪಣೆ, ಭಜನೆ ನಡಪುಂಡು. ಬಯ್ಯಗ್ ರಂಗಪೂಜೆ, ಮಹಾಪೂಜೆ, ರಾತ್ರೆ ಸಭಾ ಲೇಸ್ ಬೊಕ್ಕ ಬಿತ್ತಿಲ್ದ ಉಳ್ಳಾಲ್ತಿ ಅಪ್ಪೆ ಭಗವತಿ ತುಳು ನಾಟಕ ನಡಪರೆ ಉಂಡು.
ಡಿ.29 ಸೋಮಾರ ಬೊಲ್ಪುಗು ಶ್ರೀ ಬಾಲಗಣಪತಿ ಹೋಮ, ಕಲಶಪೂಜೆ, ನಾಗತಂಬಿಲ, ಆಶ್ಲೇಷಾ ಬಲಿ, ಭಜನೆ, ಮಧ್ಯಾಹ್ನ ಕಲಶಾಭಿಷೇಕ, ಮಹಾಪೂಜೆ, ಅನ್ನಸಂತರ್ಪಣೆ ಆದ್ ಶ್ರೀ ಕೃಷ್ಣ ಸಂಧಾನ ಯಕ್ಷಗಾನ ತಾಳಮದ್ದಳೆ ನಡಪುಂಡು. ಬಯ್ಯಗ್ ರಂಗಪೂಜೆ, ಶ್ರೀ ದೇವೆರೆನ ಬಲಿ ಪಿದಡ್ ದ್ ನೃತ್ಯ ಬಲಿ, ವಸಂತಕಟ್ಟೆ ಪೂಜೆ, ರಾತ್ರೆ ಅನ್ನಸಂತರ್ಪಣೆ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್ ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಶ್ರೀ ಬಾಲಗಣಪತಿ ಮೂಲ ಮಂತ್ರ ಲಕ್ಷ ಜಪ ಯಜ್ಞ- ದೂರ್ವ ಹೋಮ ಸೇವಾ ಸಮಿತಿದ ಅಧ್ಯಕ್ಷೆರ್ ಶ್ರೀಕಾಂತ್ ಶೆಟ್ಟಿ ಸಂಕೇಶ, ಸಜೀಪ ಗುತ್ತುದ ತಂತ್ರಿಲು ಎಂ.ಸುಬ್ರಹ್ಮಣ್ಯ ಭಟ್, ಜೀರ್ಣೋದ್ಧಾರ ಸಮಿತಿದ ಕಾರ್ಯಾಧ್ಯಕ್ಷೆರ್ ಸಂತೋಷ್ ಜಿ ಶೆಟ್ಟಿ ದಳಂದಿಲ, ಶ್ರೀ ಬಾಲಗಣಪತಿ ಸೇವಾ ಟ್ರಸ್ಟ್ ದ ಅಧ್ಯಕ್ಷೆರ್ ಯಶವಂತ ದೇರಾಜೆಗುತ್ತು ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.