ಕಡಲಾಯೆರೆದ ದೂರದ ಅಮೆರಿಕೊಡು ಇತ್ತೊಂದು ಜಗತ್ತ್ ದ ಇರ್ವೋರ್ದ್ಲಾ ಜಾಸ್ತಿ ದೇಶೊದ ತುಳುತ ಬಗೆಟ್ ಒಲವು ತೋಜಾಯಿನ ಗುರ್ಕಾರ್ಲೆನ್ ಒಂಜಿ ರಾಶಿ ಮಲ್ತೊಂದು ತುಳುವ ಸಂಸ್ಕೃತಿ ಬೊಕ್ಕ ತುಳು ಭಾಸೆದ ಬುಲೆಚ್ಚಿಲ್ ಗ್ ನಿಸ್ವಾರ್ಥವಾದ್ ಪುಣೆವೊಂದುಪ್ಪುನ ಒಂಜಿ ಪುಗಾರ್ತೆದ ವಿಶಿಷ್ಟ ಒಕ್ಕೂಟ ಅವು -GATA. ಇಂಗ್ಲೀಷ್ ಡ್ ಗ್ಲೋಬಲ್ ಅಲಯೆನ್ಸ್ ಆಫ್ ತುಳು ಅಸೋಸಿಯೇಷನ್ (GATA ) ಪನ್ಪೆರ್ ,ಈ ಒಕ್ಕೂಟ ಇನಿಕಾನಗ ನಾಲ್ ದಿಕ್ಕ್ ಡ್ಲಾ ಪುಗಾರ್ತೆ ಪಡೆವೊಂದು ಬರ್ಪಿನವು ಪೆರ್ಮೆದ ಇಚಾರ, ಅಯಿಕ್ ಸಾಕ್ಷಿಯಾಯಿನವು ಮೊರಾನಿ ಇಂಚಪ್ಪ ಜಾರ್ದೆಡ್ 6 ಪೋಪಿನಾನಿ ಸನಿಯಾರ 22/11/2025 ಕ್ಕ್ ಜೂಮ್ ಅಂಗಣೊಡು ನಡತಿನ ಕಜ್ಜ ತುಳು ಲಿಪಿ ಬರವು ಕಲ್ತಿನ ಕೂಟದ ಮುಗಿತಲದ ಸಮಾರೋಪ ಸಮಾರಂಭ ಗೆಲ್ಮೆದ ಲೇಸ್.ದಕ್ಷಿಣ ಕನ್ನಡದ ಬೆಳ್ತಂಗಡಿದ ತಂಗಡಿ ಶ್ರೀಮತಿ ಶ್ರೀವಲ್ಲಿ ರೈ ಮಾರ್ಟೆಲ್ ಪನ್ಪಿನ ತುಳುವ ಮುತ್ತು ಅಮೇರಿಕಾದ ಫ್ಲೋರಿಡಾಡ್ ಇತ್ತೊಂದು ಸ್ಥಾಪನೆ ಮಲ್ದಿನ Global Alliance of Tulu Association (GATA) ಪನ್ಪಿನ ಸಂಸ್ಥೆ , ಜಾಗತಿಕವಾದ್ ತುಳುವೆರೆ ಸಂಸ್ಕೃತಿ,ಆಚಾರ ವಿಚಾರ, ತುಳು ಭಾಸೆದ ಇರ್ಲ್ ತಿರ್ಲ್ ನ್ ಒರಿಪಾದ್ ಬುಲೆಪಾದ್ ನನ ದುಂಬುದ ಪೀಳಿಗೆಗೆ ತೊಜಪಾದ್ ಕೊರ್ಪಿನೆತ್ತ ಬೆತ್ತಡಿ ಕೆಲಸ ಮಲ್ಪುನೆತ್ತ ಒಟ್ಟೊಟ್ಟಿಗೆ ತುಳು ಭಾಸೆನ್ ರಾಜ್ಯದ ರಡ್ಡನೇ ಅಧಿಕೃತ ಭಾಸೆ ಪಂಡ್ ದ್ ಒತ್ತೊನೊಡು ಪನ್ಪಿನ ದಿಟ್ಟಿಡ್ ಲಾ ಮಾಮಲ್ಲ ಪಿರತನ ಮಲ್ತೊಂದುಂಡು ಪನ್ಪಿನವು ನೆಗೆತ್ ತೋಜುಂಡು. ಉಂದುವೇ ರೀತಿಡ್ ತುಳುತ ಬುಲೆಚ್ಚಿಲ್ ಗ್ ಕೆಲಸ ಮಲ್ತೊಂದುಪ್ಪುನ ಅಮೇರಿಕಾದ ಕುಡೊಂಜಿ ಸಂಘಟನೆ All America Tulu Association(AATA) ಈ ಸಂಸ್ಥೆಡ್ಲಾ ಕರಿನ 3 ವರ್ಸೊರ್ದಿಂಚಿ ಶ್ರೀಮತಿ ಶ್ರೀವಲ್ಲಿ ರೈ ಮಾರ್ಟೆಲ್ ಗುರ್ಕಾರ್ಲು ಆದ್ ಜಬದಾರಿಕೆದ ಕೆಲಸ ಮಲ್ತೊಂದುಲ್ಲೆರ್.ಈ ಸಂದರ್ಭೊಡು ಲೇಸ್ ಗ್ ಮಾನಾದಿಗೆದ ಬಿನ್ನೆರಾದ್ ಓಲಗ ಆದಿತ್ತಿನ ನಿಟ್ಟೆ ವಿಶ್ವ ವಿದ್ಯಾಲಯದ ಒತ್ತು ಗುರ್ಕಾರೆರ್ ಅಂಚೆನೇ ಮಾಜಿ ಉಪ ಕುಲಪತಿಯಾದಿತ್ತಿನ ಮಾನ್ಯ ಡಾ. ಸತೀಶ್ ಕುಮಾರ್ ಭಂಡಾರಿಲು GATA ತ ಅಧಿಕೃತ ವೆಬ್ಸೈಟ್ www.globaltuluva.com ನ್ ಆರ್ನ ಕೈಟ್ ಉದ್ಘಾಟನೆ ಮಲ್ತ್ ಲೋಕಾರ್ಪಣೆ ಮಲ್ತ್ ಕೊರಿಯೆರ್.ಈ ವೆಬ್ಸೈಟ್ ತುಳು ಲಿಪ್ಯಂತರಣ , ಅರ್ಥಕೋಶ , ತುಳುವ ಸಂಸ್ಕೃತಿ ಪರತಿರಿ,ಪರಪೋಕು ಮಾತ್ರ ಅತ್ತಾವಂದೆ ಲೋಕೊರ್ಮೆ ಪಸೇರ್ದಿನ ತುಳುವ ಸಮುದಾಯೊಗು ಒಂಜೇ ಚಾವಡಿಡ್ ಒಟ್ಟು ಸೇರುನ ಒಂಜಿ ಅಂಗಣ ಒದಗಾದ್ ಕೊರ್ಪುಂಡು.
ಭಿನ್ಯೆರಾಯಿನ ಡಾ.ಸತೀಶ್ ಕುಮಾರ್ ಪಿರಾಕ್ ಡ್ ಬರೆತಿನ ಕಲ್ಲ ಶಾಸನ ,ತುಳು ಭಾಸೆಗಿತ್ತಿನ ದೈವೀಕವಾಯಿನ ನಂಟು, ತುಳು ಭಾಸೆದ ಪೊರ್ಲು ,ಲಿಪಿ ಈ ಬಗ್ಗೆ ಸವಿಸ್ತಾರವಾದ್ ಆರ್ನ ಅನುಭವೊನು ಪಟ್ಟೊಂದು , ನಮ್ಮ ಅಪ್ಪೆ ಭಾಸೆ ಅಂಚೆನೇ ಲಿಪಿತ ಒರಿಪು ಬೊಕ್ಕ ಏಳಿಗೆಗ್ ಎಂಕುಲು ನಿತ್ಯ ಕೆಲಸ ಮಲ್ತೊಂದೇ ಉಲ್ಲ ಅತ್ತಾವಂದೆ ಈ ವಿಷಯೊಡು ನಿಕಲ್ನೊಟ್ಟುಗು ಏಪೊಗುಲಾ ಯಾನ್ ಉಲ್ಲೆ ಪಂದ್ ಭಾರಿ ಮಾರ್ಮಿಕವಾದ್ ಭರವಸೆ ಕೊರಿಯೆರ್.ಡಾಕ್ಟರ್ ಸತೀಶ್ ಭಂಡಾರಿಲ್ನ ಅನುಭವದ ಪಾತೆರ ಕೇವಲ ಒಂಜಿ ಭಾಷಣ ಪಂದಾವಂದೆ ಒಂಜಿ ಸುಧೀರ್ಘ ಉಪನ್ಯಾಸ ಆದ್ ಪ್ರತಿಯೊರಿಯಗ್ಲಾ ಜ್ಞಾನ ದೀವಟಿಗೆದಂಚ ಇತ್ತ್ಂಡ್.
ತುಂಬಿದ ಕೊಡ ತುಳುಕದು ಪನ್ಪಿನೆಕ್ಕ್ ಒಂಜಿ ಎಲ್ಯ ಉದಾಹರಣೆ -ಪ್ರೊಫೆಸರ್ ಡಾ.ಸತೀಶ್ ಕುಮಾರ್ GATA ದ ಉಂದುವೇ ಬ್ಯಾಚ್ ದ ತುಳುಲಿಪಿ ತರಗತಿದ ಕಲ್ಪಾರ್ಥಿ ಆದ್,ಲಿಪಿ ಕಲ್ತ್ ದ್ ಸರ್ಟಿಫಿಕೇಟ್ ಲ ಪಡೆವೊಂಡೆರ್.
ಬೊಕ್ಕೊಂಜಿ ಮಲ್ಲ ಬಿನ್ಯೆರಾದ್ ಬರಿಯಾದಿತ್ತಿನ All America Tulu Association (AATA) ದ ಉದಿಪು ಗುರ್ಕಾರ್ಲು ಆಯಿನ ಬೋಸ್ಟನ್ ದ ಶ್ರೀ ಭಾಸ್ಕರ್ ಶೇರಿಗಾರ್ ಪಾತೆರ್ದ್ ತುಳುಲಿಪಿ ಕಲ್ಪಾರ್ಥಿಲ್ನ ಪ್ರಾಜೆಕ್ಟ್ ವರ್ಕ್ ದ ಮಸ್ತಿರೆ ಕಂಗಣ ನ್ ಬಿಡುಗಡೆ ಮಲ್ತೆರ್ ,ಅಲ್ತ್ ಬೊಕ್ಕ ಆರ್ನ ಭಾಷಣೊಡು ತುಳುತ ಪರತಿರಿ , ಆಳ ಅಳವು,ತುಳು ಭಾಸೆ ಸಾಗೊಂದು ಬೈದಿನ ಸಾದಿ ಬೊಕ್ಕ ರೀತಿನ್ ಪೊರ್ಲುಡೆ ತೆರಿಪಾದ್ ಕೊರಿಯೆರ್.
GATA ತ ಸ್ಥಾಪಕ ಅಧ್ಯಕ್ಷೆರ್ ಅಂಚೆನೇ ಲೇಸ್ ದ ಅಧ್ಯಕ್ಷೆರ್ಲ ,ಮುಖ್ಯ ಶಿಕ್ಷಕಿಲಾ ಆದಿತ್ತಿನ ಶ್ರೀಮತಿ ಶ್ರೀವಲ್ಲಿ ರೈ ಮಾರ್ಟೆಲ್ GATA ದ ಪೊಸ ವೆಬ್ಸೈಟ್ ದ ವಿಶಿಷ್ಟತೆನ್ ವರ್ಣಿಸಾದ್ ಕೊರ್ದು , ಕರಿನ ರಡ್ಡ್ ತಿಂಗೊಲುಡು ಶ್ರಮವಹಿಸಾದ್ ತುಳುಲಿಪಿ ಕಲ್ತ್ ದ್ ,ಕಲಿಕೆದ ಕಡೆತ ಅಂಗವಾಯಿನ ವಿಷಯಾಧಾರಿತ ಪ್ರಬಂಧೊನು ಬರೆದ್ ಒಪ್ಪಿಸಾದ್ ಸೈ ಪನ್ಪಾವೊಂದು ಸಾಧನೆ ಮಲ್ತ್ ದ್ ಗೆಲ್ಮೆದ ಲೇಸ್ ಡ್ ಮಾನಪತ್ರ ಪಡೆವೊನ್ಯಂಚಿನ ಕಲ್ಪಾರ್ಥಿನಕಲೆನ್ ಪುಗಾರ್ದ್ ಕೊಂಡಾಡ್ ದ್ ,ಅಂಚೆನೇ ಬಾಕಿ ಒರಿದಿನ ವಿದ್ಯಾರ್ಥಿಲುಲ ಬರವು ಉಂತಾವಂದೆ ಕಲ್ತ್ ದ್ ಸಂಪೂರ್ಣ ಮಲ್ಪೊಡು ಪಂಡ್ ದ್ ಬೆರಿಬೊಟ್ಟುದು ಉತ್ತೇಜನ ಕೊರ್ದು ಆರ್ನ ಉಡಲ ಗಾಂತ್ ದ ಪಾತೆರೊನು ಪಟೊಂಡೆರ್.
ಕಲ್ಪಾರ್ಥಿಲಾದಿತ್ತಿನ ರಚನಾ ವಿಶ್ವನಾಥ್ ಆಸ್ಟ್ರೇಲಿಯ, ಶಾಂತರಾಮ ವಿ ಶೆಟ್ಟಿ ಬೆಂಗಳೂರು, ರಶ್ಮಿ ಭಟ್ ಸಿಂಗಾಪುರ್,ಶೋಭಾ ಸುರೇಶ್ ಮೂಡಬಿದ್ರಿ ,ಸಬಿತಾ ಶೆಟ್ಟಿ ಬೆಂಗಳೂರು,ಯಶೋಧಾ ಹೊಸಬೆಟ್ಟು ಮತ್ತು ಭುಜಂಗ ದೇವಸ ದಂಪತಿ ಸಿಂಗಾಪುರ , ಶಾಲಿನಿ ಆನಂದ ಶೆಟ್ಟಿ ಬೆಂಗಳೂರು, ಉದಯ ಕುಮಾರ್ ಶೆಟ್ಟಿ ಬೆಂಗಳೂರು, ಆಕಾಶ್ ಮುಂಬಯಿ,ಮಾಸ್ಟರ್ ನೀಲ್ ಅರುಣ್ ಕುಮಾರ್ ಲಂಡನ್ , ಸರಸ್ವತಿ ಶೆಟ್ಟಿ ಮಂಗಳೂರು ಮೊಕುಲು ಚಾವಡಿಡ್ ಅಕಲಕಲೆನ ಚಾತುರ್ಪು ತೋಜಾದ್ ಸೇರ್ದಿನ ಗಣ್ಯಮಾನ್ಯೆರೆನ್ ತೆಲಿಪಾದ್ ಆನಂದಿಸಾಯೆರ್.
ಅಂಚೆನೇ ತುಳು ಲಿಪಿತ ಶಿಕ್ಷಕ ವರ್ಗೊಡಿತ್ತಿನ ತಂಡ ಲೇಸ್ ನ್ ಪೊರ್ಲುಡೆ ಮುಡೆದ್ ಕೊರ್ತೆರ್ ಪನ್ಪಿನೆಟ್ಟ್ ರಡ್ಡ್ ಪಾತೆರ ಇಜ್ಜಿ. ಬೆಂಗಳೂರುದ ಟೀಚರ್ ಶುಭಶ್ರೀ ಕೆ.ಎಮ್ ದೇವೆರೆನ ಸುಗಿಪು ಮಲ್ತ್ ದ್ ಪ್ರಾರ್ಥನೆ ಮಲ್ತೆರ್ಡ , ಲಂಡನ್ ದ ಡಾ.ಸರಿತಾ ಅರುಣ್ ಸ್ವಾಗತ ಭಾಷಣ ಮಲ್ತ್ ದ್ ಭಿನ್ಯೆರೆನ್ಲ ,ಸಭಿಕೆರೆನ್ಲಾ ಅರ್ತಿ ಪಿರ್ತಿಡ್ ಎದುಕೊನೊಂದು ಸೇರ್ದಿ ಸಭೆನ್ ಗಲ್ಕ್ ಮಲ್ತ್ ತೋಜಾಯೆರ್. ಅಂಚೆನೇ ಮುಂಬಯಿದ ಡಿ.ಕೆ.ಶೆಟ್ಟಿ , ಲಂಡನ್ ದ ಶ್ರುತಾ ಶೆಟ್ಟಿ , ಬೋಸ್ಟನ್ ದ ಪ್ರಭಾಕರ್ ಭಟ್ರ್ ಪೊರ್ಲುಡೆ ಭಿನ್ಯೆರೆನ ಪೊಲಬು ಮಲ್ತ್ ಕೊರಿಯೆರ್.ಮಸ್ಕತ್ ದ ಚಂದ್ರಹಾಸ್ ಕೆ.ಶೆಟ್ಟಿ ಆರ್ನನೇ ರೀತಿಡ್ ಕಾರ್ಯಕ್ರಮದ ಮಧ್ಯಸ್ಥಿಕೆ ಮಲ್ತೆರ್ಡ ಆಸ್ಟ್ರೇಲಿಯಾದ ಸುರೇಶ್ ಪೂಂಜೆರ್ ಪೊರ್ಲಗಂಟ್ ಡ್ ಕಾರ್ಯಕ್ರಮೊನು ನಡಪುಡಾದ್ ಕೊರಿಯೆರ್.
ಐಲೇಸಾದ ಮಾಧ್ಯಮ ಸಂಚಾಲೆಕೆರ್ ,ತುಳುವ ಸಂಸ್ಕೃತಿದ ಪ್ರತಿಪಾದಕೆರ್ ಸೂರಿ ಮಾರ್ನಾಡ್ ಬೊಕ್ಕ ಗೋಪಾಲ್ ಪಟ್ಟೆ GATA ದ ವೆಬ್ಸೈಟ್ ಉದ್ಘಾಟನೆಗ್ ಪೊರ್ಲುದ ಸೊರ , ಫ್ಲಯರ್ ಬೊಕ್ಕ ವಿಡಿಯೋ ಒದಗಿಸಾದ್ ಲೇಸ್ ನ್ ಪೊರ್ಲ್ ಮಲ್ತ್ ತೋಜಾಯೆರ್.
ಲೇಸ್ ದ ಅಖೇರಿಗ್ ಸಾಹಿತಿ ಶಾಂತರಾಮ ವಿ ಶೆಟ್ಟ್ರ್ ಮಾತೆರೆಗ್ಲಾ ಉಡಲರ್ತಿದ ಸೊಲ್ಮೆ ಸಂದಾಯಿತ ಮಲ್ಪುನೆತ್ತೊಟ್ಟುಗೆ ಗೆಲ್ಮೆದ ಲೇಸ್ ಗ್ ಮುಗಿತಲದ ಬೊಲ್ಲಿ ಕುಲ್ಲಾಯೆರ್.
ಅಖೇರಿದ ಪಾತೆರ ಪನ್ಪಿನಾಂಡ ಡಬಲ್ ಡಿಗ್ರಿ ಕಲ್ತ್ ದ್ , ಅಭಿವೃಧ್ಧಿ ಶೀಲ ದೇಶೊಲೆಡ್ ಎಡ್ಡೆಡ್ಡೆ ಉದ್ಯೋಗೊಡು ವ್ಯಸ್ತೆರಾದುಪ್ಪುನ ಮೊಕುಲು ಒವ್ವೇ ಲಾಭದಾಸೆದಾಂತಿನ ಸಂಘಟನೆನ್ ಕಟೊಂದು , ತುಳುನಾಡ್ದ ಭಾಸೆ ಸಂಸ್ಕೃತಿದ ಪರವಾದ್ ಅಕುಲು ತೋಜಾವುನ ಕಾಳಜಿ ಉಮೇದ್ ಮಾತೆರ್ಲಾ ಆತ್ಮಾವಲೋಕನ ಮಲ್ಪೊಡಾಯಿನ ವಿಚಾರ. ಮೊಕಲ್ನ ಉಮೇದ್ ಮೊಕಲ್ನ ನಿಸ್ವಾರ್ಥ ಸೇವೆ ಮಾತೆರೆಗ್ಲಾ ಒಂಜಿ ಮಾದರಿ ದಾರಿ ದೀಪ ಆವಡ್ ಪಂದ್ ಎಡ್ಡೆಪ್ಪುದ ಪನಿ ತುಳುನಾಡೊರ್ಮೆ ಪಸೇರ್ಗ.