ಜೋಕುಲೆಗ್ ಎಲ್ಯ ಪ್ರಾಯಡೇ ಸಂಸ್ಕಾರ ಕೊರೊಡು, ಸಂಸ್ಕೃತಿ ಒರಿಪಾವುನ ವಿಷಯನ್ ಪಂದ್ ಕೊರೊಡು:- ಸ್ವಾಮಿ ಜಿತಕಾಮಾನಂದಜಿ

ಕೊಡೆತ್ತೂರುಗುತ್ತು ಪ್ಯಾಮಿಲಿ ಟ್ರಸ್ಟ್ ವತಿರ್ದ್ ಕೊಡೆತ್ತೂರುಗುತ್ತು ದಿ. ರಾಮಣ್ಣ ಶೆಟ್ರೆನ ಸ್ಮರಣಾರ್ಥ ಕಟೀಲ್ ದೇವಲ್ಯ ದ ಎದುರು ರಾಜಾಂಗಣದ ಕಲಾಮಂಟಪದ ಉದಿಪನ

ದೇವಸ್ಥಾನಲು ಧರ್ಮ ಸಂಸ್ಕ್ರತಿದ ಕೇಂದ್ರ ಆವೊಡು, ದೇವಸ್ಥಾನಡ್ ಜೋಕುಲೆಗ್ ಪ್ರತೀ ಐತಾರ ಭಗವತ್ ಗೀತೆ ಶ್ಲೋಕ ಪಂದ್ ಕೊರ್ಪುನ ಕೆಲಸ ಆವಡ್ ಪಂದ್ ಕುಡ್ಲ ರಾಮಕೃಷ್ಣ ಮಠದ ಗುರ್ಕಾರ್ಲು ಸ್ವಾಮಿ ಜಿತಕಾಮಾನಂದಜಿ ಪಂಡೆರ್.
ಆರ್ ಕೊಡೆತ್ತೂರು ಗುತ್ತುದ ಹಿರಿಯರಾದ್ ಇತ್ತಿನ ಕಟೀಲ್ ದೇವಲ್ಯದ ಆಡಳಿತ ಮಂಡಳಿದ ಗುರ್ಕಾರ್ಲು ಬೊಕ್ಕ ಮುಕ್ತೇಸರರಾದ್ ಇತ್ತಿನ ದಿ. ಕೊಡೆತ್ತೂರುಗುತ್ತು ರಾಮಣ್ಣ ಶೆಟ್ರೆನ ಸ್ಮರಣಾರ್ಥ ಕೊಡೆತ್ತೂರುಗುತ್ತು ಪ್ಯಾಮಿಲಿ ಟ್ರಸ್ಟ್ ವತಿರ್ದ್
ದೇವಲ್ಯ ದ ಎದುರು ನಿರ್ಮಾಣ ಆಯಿನ ರಾಜಾಂಗಣದ ಕಲಾಮಂಟಪದ ಉದಿಪನ ನ್ ಮಲ್ತ್ ಪಾತೆರಿಯೆರ್. ಜೋಕುಲೆಗ್ ಎಲ್ಯ ಪ್ರಾಯಡೇ ಸಂಸ್ಕಾರ ಕೊರೊಡು, ಸಂಸ್ಕೃತಿ ಒರಿಪಾವುನ ವಿಷಯನ್ ಪಂದ್ ಕೊರೊಡು ಪಂಡೆರ್.
ಮಾಜಿ ಸಂಸದ ನಳಿನ್ ಕುಮಾರ್ ಕಟೀಲ್ ಪಾತೆರ್ದ್
ನಮ್ಮ ದೇವಿಗ್ ಪೂಜೆದಾತೆ ಮಸ್ತ್ ಪ್ರಿಯವಾಯಿನ ಸೇವೆ ಸಾಹಿತ್ಯ ಬೊಕ್ಕ ಸಂಗೀತ. ದೇವಿಗೆ ಕಲಾ ಸೇವೆ ಸಂತೃಪ್ತಿನ್ ಕೊರ್ಪುಂಡು. ಈ ಕಲಾಮಂಟಪಡ್ ಕಲಾಸೇವೆ ನಿರಂತರವಾದ್ ನಡಪಡ್ ದೇವೆರೆನ ಅನುಗ್ರಹ ಏಪಲಾ ಇಪ್ಪಡ್ ಪಂಡೆರ್.
ಈ ಪೊರ್ತುಡು ದೇವಲ್ಯದ ಮುಕ್ತೇಸೆರೆರ್ ವಾಸುದೇವ ಆಸ್ರಣ್ಣೆರ್, ಮುಕ್ತೇಸೆರೆರ್ ಬೊಕ್ಕ ಆಡಳಿತ ಮಂಡಳಿ ಗುರ್ಕಾರ್ಲು ಸನತ್ ಕುಮಾರ್ ಶೆಟ್ಟಿ ಕೊಡೆತ್ತೂರುಗುತ್ತು, ಮಾಜಿ ಸಂಸದ ನಳಿನ್ ಕುಮಾರ್, ಮಾಜಿ ಸಚಿವ ಅಭಯಚಂದ್ರ ಜೈನ್, ಉದ್ಯಮಿ ವಾಮಯ್ಯ ಶೆಟ್ಟಿ, ಅಜಿತ್ ಕುಮಾರ್ ರೈ‌ ಮಾಲಾಡಿ , ಲಕ್ಷೀನಾರಾಯಣ ಆಸ್ರಣ್ಣೆರ್, ವೆಂಕಟರಮಣ ಆಸ್ರಣ್ಣೆರ್, ಅನಂತಪದ್ಮನಾಭ ಆಸ್ರಣ್ಣೆರ್, ಕಮಲಾದೇವಿ ಪ್ರಸಾದ್ ಆಸ್ರಣ್ಣೆರ್, ಕಟೀಲ್ ಮೇಳದ ಸಂಚಾಲಕೆರ್ ಕಲ್ಲಾಡಿ ದೇವಿಪ್ರಸಾದ್ ಶೆಟ್ಟಿ, ಕೊಡೆತ್ತೂರುಗುತ್ತು ಪ್ಯಾಮಿಲಿ ವೆಲ್ ಪೇರ್ ಟ್ರಸ್ಟ್ ನ ಕಾರ್ಯಂತೆರ್ ಕಿಶೋರ್ ಶೆಟ್ಟಿ ಕೊಡೆತ್ತೂರುಗುತ್ತು, ಸಂಚಾಲಕೆರ್ ಪ್ರವೀಣ್ ದಾಸ್ ಭಂಡಾರಿ ಕೊಡೆತ್ತೂರುಗುತ್ತು, ಬಿಪಿನ್ ಚಂದ್ರಶೆಟ್ಟಿ ಕೊಡೆತ್ತೂರುಗುತ್ತು ಬೊಕ್ಕ ಕೆಲವೆರ್ ಉಪಸ್ಥಿತರಿತ್ತೆರ್.
ಹರಿನಾರಾಯಣದಾಸ ಆಸ್ರಣ್ಣೆರ್, ಪ್ರಸ್ತಾವನೆ ಮಲ್ತೆರ್, ನಿವೃತ್ತ ಶಿಕ್ಷಕ ಸಾಯಿನಾಥ ಶೆಟ್ಟಿ ನಿರೂಪಣೆ ಮಲ್ತೆರ್.