ಪುತ್ತೂರು ಮಯ್ ದೆ ದೇವುಸ್ ಚರ್ಚ್ ಡ್ ಈಸ್ಟರ್ ಪರ್ಬ ಆಚರಣೆ

ಪುತ್ತೂರುದ ಹೃದಯ ಭಾಗಡ್ ಇಪ್ಪುನ ಮಾಯ್ ದೆ ದೇವುಸ್ ಚರ್ಚ್ ಡ್ ಯೇಸುಕ್ರಿಸ್ತನ ಪುನರ್ಜನ್ಮನ್ ತೂಪಾವುನ ಈಸ್ಟರ್ ಪರ್ಬನ್ ಆಚರಣೆ ಮಲ್ತೆರ್.

ಚರ್ಚ್ ವಠಾರದ ಮಾತ ಕರೆಂಟ್ ಬೊಲ್ಪುನ್ ತೆಕ್ಕಾದ್ ಬೊಕ್ಕ ಒಂಜಿ ಮಲ್ಲ ಮೇಣದ ಬತ್ತಿಗ್, ಯೇಸುನ್ ಶಿಲುಬೆಗ್ ಏರಿಸಾನಗ ಹಾಕಿನಂಚಿನ ಆಣಿನ್ ಕುತ್ತುದು, ಬೊಕ್ಕ ಆಶೀರ್ವಾದ ಮಲ್ತಿನ ಪೊಸ ಸೂವುರ್ದ್ ಮೇಣದ ಬತ್ತಿನ್ ಪೊತ್ತಾವೆರ್. ಈ ಮೇಣದ ಬತ್ತಿನ್ ಪತ್ತಿನ ಯಾಜಕೆರ್ ಜನಕ್ಲೆನ ನಡುರ್ದ್ ಪೋನಗ ಉಂದು ಯೇಸಕ್ರಿಸ್ತನ ಜ್ಯೋತಿ ಪಂದ್ ಪನ್ಪೆರ್, ಆಪಗ ಮಾತ ಭಕ್ತೆರ್ ದೇವೆರೆಗ್ ಮಹಿಮೆ ಸಂದಾದ್ ಪಂದ್ ಜೈಕಾರ ಪಾಡೊಂದು ಆ ಜ್ಯೋತಿರ್ದ್ ತನಡ ಇಪ್ಪುನ ಮೇಣದ ಬತ್ತಿನ್ ಪೊತ್ತಾವೆರ್. ಧಾರ್ಮಿಕ ವಿಧಿವಿಧಾನಲು, ಬೈಬಲ್ ದ ಪರ ಒಡಂಬಡಿಕೆದ ಮೂಜಿ ವಚನಲು, ಸ್ತುತಿ ಗೀತೆಲು, ಆಯಿನ ಬೊಕ್ಕ ಪುನರುತ್ಥಾನ ಯೇಸುನ ಪ್ರತಿಮೆ ಅನಾವರಣ ಆಪುಂಡು.

ಅಶೋಕ್ ರಾಯನ್ ಕ್ರಾಸ್ತಾ ಮೇರ್ ತನ್ನ ಪ್ರವಚನಡ್ ಈ ದಿನ ಜಾಗರಣೆದ ರಾತ್ರೆ, ನಮಕ್ ಮಾತೆರೆಗ್ಲಾ ರಕ್ಷಣೆನ್ ಆರ್ ಕೊರ್ತೆರ್. ಪಂಡ ಯೇಸು ಕ್ರಿಸ್ತೆರ್ ಜೀವಂತ ಆದ್ ತನ್ನ ಪೊಪ್ಪನೊಟ್ಟಿಗೆ ಐಕ್ಯರಾಪುನೆತ್ತೊಟ್ಟಿಗೆ ಮಾತ ಕ್ರೈಸ್ತ ಅನುಯಾಯಿಲೆಗ್ ಪುನರುತ್ಥಾನ ಕರುಣಿಸಾಯಿನ ಪವಿತ್ರ ದಿನ ಉಂದು, ಪ್ರತಿಯೊರಿಲ ನೆತ್ತ ಭರವಸೆದೊಟ್ಟಿಗೆ ಜೀವಿಸಾಯೆರೆ ಪಂಡೆರ್.

ರೂಪೇಶ್ ತಾವ್ರೋ ಮೇರ್ ಪಾತ್ರೆಡ್ ದೀನ ನೀರಗ್ ಮೇಣದ ಬತ್ತಿನ್ ಮುರ್ಕಾವುನೆತ್ತೊಟ್ಟಿಗೆ ಆಶೀರ್ವಾದ ಮಲ್ತ್ ದ್ ಮೇಣದಬತ್ತಿರ್ದ್ ಮಾತ ಭಕ್ತೆರ್ ಯೇಸು ಕ್ರಿಸ್ತೆರ್ ನಮಕ್ ಕೊರ್ನ ಪುನರುತ್ಥಾನನ್ ವಿಶ್ವಾಸ ಮಲ್ಪುವೆ ಪನ್ಪುನ ವಾಗ್ದಾನನ್ ನವೀಕರಿಸಾಯಿನ ಬೊಕ್ಕ ಪವಿತ್ರ ನೀರನ್ ಭಕ್ತೆರೆಗ್ ಸಿಂಪಡಿಸಾದ್ ಮಾತೆರೆನ್ಲಾ ಪಾವನ ಮಲ್ತೆರ್.

ಬಲಿ ಪೂಜೆನ್ ಸ್ಟ್ಯಾನಿ ಪಿಂಟೋ ಮೇರ್ ಮಲ್ತೆರ್. ಈ ಪೊರ್ತುಡು ಲಾರೆನ್ಸ್ ಮಸ್ಕರೇನಸ್, ಲೋಹಿತ್ ಅಜಯ್ ಮಸ್ಕರೇನಸ್ ಪಾಲ್ ಪಡೆದಿತ್ತೆರ್. ಕ್ರಿಸ್ತನ ಪುನರ್ಜನ್ಮದ ಲೆಕ್ಕೊಡು ಸಾರರ್ದ್ ಎಚ್ಚ ಭಕ್ತೆರೆಗ್ ತಿಂಡಿ ಬೊಕ್ಕ ಪಾನೀಯನ್ ಕೊರಿಯೆರ್.