ಮುಲ್ಕಿ: ಜೇಸಿಐ ಮುಲ್ಕಿ ಶಾಂಭವಿ ನೆತ್ತ 40 ನೇ ವರ್ಷದ ಜೇಸಿ ಸಪ್ತಾಹ “ಯಶೋಗಾಥೆ” ದ ಮುಗಿತಲದ ಲೇಸ್, ಮಾಜಿ ಅಧ್ಯಕ್ಷೆರ್ನಕಲ್ನ ಸಮ್ಮಿಲನ, 40 ಸಮಾಜಸೇವಾ ಸಂಘ ಸಂಸ್ಥೆಲೆಗ್ ಗೌರವಾರ್ಪಣೆ, ಮುಲ್ಕಿ ಶಾಂಭವಿ ಜೇಸಿ ಟ್ರಸ್ಟ್ ಉದಿಪನ, ನೆಂಪುದ ಸಂಚಿ ಬುಡುಗಡೆ ಬೊಕ್ಕ ಪ್ರತಿಭಾ ಪುರಸ್ಕಾರ ಲೇಸ್ ಸೆ.16 ಶನಿವಾರ ಬಯ್ಯಗ್ 6 ಗಂಟೆಗ್ ಮುಲ್ಕಿ ಬಿಲ್ಲವ ಸಮಾಜಸೇವಾ ಸಂಘದ ಶ್ರೀ ನಾರಾಯಣಗುರು ಸಮುದಾಯ ಭವನಡ್ ನಡಪರೆ ಉಂಡು ಪಂದ್ ಜೇಸಿಐ ಮುಲ್ಕಿ ಶಾಂಭವಿ ದ ಅಧ್ಯಕ್ಷೆರ್ ಅನಿಲ್ ಕುಮಾರ್ ಪಂಡೆರ್.
ಆರ್ ಮುಲ್ಕಿದ ಪುನರೂರು ಹೋಟೆಲ್ ದ ಚಾವಡಿಡ್ ಗುರುವಾರ ನಡತಿನ ಸುದ್ದಿ ಗೋಷ್ಠಿಡ್ ಈ ವಿಷಯ ತೆರಿಪಾಯೆರ್.
ಜೇಸಿಐ ಭಾರತದ ವಲಯಾಧ್ಯಕ್ಷೆರ್ ಪುರುಷೋತ್ತಮ ಶೆಟ್ಟಿ ಲೇಸ್ ಉದಿಪನ ಮಲ್ಪುವೆರ್. ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಇನಾಯತ್ ಆಲಿ 40 ಸಂಘ ಸಂಸ್ಥೆಲೆಗ್ ಗೌರವಾರ್ಪಣೆ ಮಲ್ಪರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಪೂರ್ವ ವಲಯಾಧ್ಯಕ್ಷೆರ್ ವೈ.ಸುಕುಮಾರ್, ಕುಡ್ಲ ಪೊಲೀಸ್ ಉಪ ಆಯುಕ್ತೆರ್ ಮನೋಜ್ ಕುಮಾರ್, ಪುಳಿಮುಂಚಿ ಸಿನಿಮಾದ ನಟೆ ತ್ರಿಶೂಲ್ ಶೆಟ್ಟಿ, ನಟಿ ಸಮತ ಅಮೀನ್ ಬರ್ಪೆರ್ ಪಂದ್ ಆರ್ ತೆರಿಪಾಯೆರ್.
ಅವ್ವೇ ವೇದಿಕೆಡ್ ನಡಪುನ ಕುಡೊಂಜಿ ಲೇಸ್ ಡ್ 14 ಜನ ಸದಸ್ಯೆರ್ನ ಶಾಂಭವಿ ಜೇಸಿ ಟ್ರಸ್ಟ್ ನ್ ಶಾಸಕೆರ್ ಉಮಾನಾಥ ಕೋಟ್ಯಾನ್ ಉದಿಪನ ಮಲ್ಪುವೆರ್. ಬಿನ್ನೆರಾದ್ ಚಲನಚಿತ್ರೆ ನಟೆ ಸುರೇಶ್ ಕೋಟ್ಯಾನ್, ಪುರಂದರ ರೈ, ಲೋಕೇಶ್ ಅಮೀನ್, ಅಭಿಲಾಷ್ ಬಿ.ಎ. ಪಾಲ್ ಪಡೆವೆರ್ ಪಂದ್ 40ರ ಸಂಭ್ರಮ ಅಧ್ಯಕ್ಷೆರ್ ದಿನೇಶ್ ಕೆ. ಶೆಟ್ಟಿ ತೆರಿಪಾಯೆರ್.
ಪತ್ರಿಕಾಗೋಷ್ಠಿಡ್ ಟ್ರಸ್ಟ್ ದ ನಿಯೋಜಿತ ಅಧ್ಯಕ್ಷೆರ್ ಮೊಹಮ್ಮದ್ ಹಬೀಬುಲ್ಲಾ, ನಿಯೋಜಿತ ಕಾರ್ಯದರ್ಶಿ ಅಶೋಕ್ ಕುಮಾರ್ ಶೆಟ್ಟಿ, ಸಪ್ತಾಹದ ನಿರ್ದೇಶಕೆರ್ ವಿಶ್ವನಾಥ್ ಶೆಣೈ, ಕಾರ್ಯದರ್ಶಿ ಸತೀಶ್ ಕಿಲ್ಪಾಡಿ, ನಿಕಟಪೂರ್ವಾಧ್ಯಕ್ಷೆರ್ ಕಲ್ಲಪ್ಪ ತಡವಲಗ, ದೇವಪ್ರಸಾದ್ ಪುನರೂರು, ಸುರೇಶ್ ರಾವ್ ಇತ್ತೆರ್.
pallavi shetty