ಮುಲ್ಕಿ ಲಲಿತ್ ಮಹಲ್ ದ ಧಣಿ ಹರಿಶ್ಚಂದ್ರ ವಿ.ಕೋಟ್ಯಾನ್ ದೇವೆರೆ ಪಾದ ಸೇರಿಯೆರ್

ಮುಲ್ಕಿ: ಬಿಲ್ಲವ ಸಮಾಜದ ಮುಂದಾಳು, ಮುಲ್ಕಿ ಲಲಿತ್ ಮಹಲ್ ದ ಧಣಿ ಹರಿಶ್ಚಂದ್ರ ವಿ.ಕೋಟ್ಯಾನ್ (68) ಮೇರ್ ಐತಾರ ಬಯ್ಯಡ್ ದೇವೆರೆ ಪಾದ ಸೇರಿಯೆರ್.

ಅರೆಗ್ ಹೃದಯಾಘಾತ ಆದ್ ತೀರ್ ಪೋಯೆರ್ ಪಂದ್ ತೆರಿದ್ ಬೈದ್ಂಡ್. ಅರೆಗ್ ಬೊಡೆದಿ, ಮಗೆ ಬೊಕ್ಕ ಮಗಲ್ ಉಲ್ಲೆರ್.

ಮುಲ್ಕಿ ಬಿಲ್ಲವ ಸಮಾಜ ಸೇವಾ ಸಂಘದ ಮಾಜಿ ಅಧ್ಯಕ್ಷೆರಾದ್ ಸೇವೆ ಮಲ್ದಿನ ಆರ್, ಮುಲ್ಕಿ ಶ್ರೀ ನಾರಾಯಣ ಗುರು ಸಮೂಹ ಶಿಕ್ಷಣ ಸಂಸ್ಥೆಲೆನ ಸಂಚಾಲಕೆರಾದಿತ್ತೆರ್.
ರಾಷ್ಟ್ರೀಯ ಬಿಲ್ಲವ ಮಹಾಮಂಡಲದ ಕಾರ್ಯಕಾರಿ ಸಮಿತಿ ಸದಸ್ಯೆರಾದ್, ನಡಿಕುದ್ರು ಶ್ರೀ ಜಾರಂದಾಯ ಸೇವಾ ಸಮಿತಿದ ಅಧ್ಯಕ್ಷೆರಾದಿತ್ತೆರ್.

ಬಪ್ಪನಾಡ್ ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನದ ಜೀರ್ಣೋದ್ಧಾರ ಸಮಿತಿದ ಉಪಾಧ್ಯಕ್ಷೆರಾದ್ , ಮುಲ್ಕಿ ಲಯನ್ಸ್ ಕ್ಲಬ್ ಅಧ್ಯಕ್ಷೆರಾದ್ ಜನಸೇವೆ ಮಲ್ತ್ ದ್ ಪುಗರ್ತೆ ಪಡೆದೆರ್.

ಎಚ್. ವಿ.ಕೋಟ್ಯಾನ್ ಪಂದೇ ಪುಗರ್ತೆ ಪಡೆದಿನ ಮೆರೆನ ನಿಧನೊಗು ಶಾಸಕೆರ್ ಉಮಾನಾಥ ಕೋಟ್ಯಾನ್, ಮಾಜಿ ಸಚಿವೆರ್ ಅಭಯಚಂದ್ರ ಜೈನ್, ಮಿಥುನ್ ರೈ, ವಸಂತ ಬೆರ್ನಾಡ್, ಸುನಿಲ್ ಆಳ್ವ, ಮುಲ್ಕಿ ಬಿಲ್ಲವ ಸಮಾಜ ಸೇವಾ ಸಂಘದ ಅಧ್ಯಕ್ಷೆರ್ ಪ್ರಕಾಶ್ ಸುವರ್ಣ, ಮಾಜಿ ಅಧ್ಯಕ್ಷೆರ್ ರಮೇಶ್ ಅಮೀನ್ ಕೊಕ್ಕರಕಲ್, ರಾಘು ಸುವರ್ಣ, ಹರಿಶ್ಚಂದ್ರ ಸಾಲ್ಯಾನ್, ಕಿಶೋರ್ ಜೆ.ಸಾಲ್ಯಾನ್, ವಾಮನ ಕೋಟ್ಯಾನ್ ನಡಿಕುದ್ರು, ಚಂದ್ರಹಾಸ್ ನಡಿಕುದ್ರು ಮೊಕುಲು ಮಾತ ಸಂತಾಪ ತೆರಿಪಾದೆರ್.