ಕುಡ್ಲ: ಪೇಂಟೆದ ಕದ್ರಿಡ್ ಇಪ್ಪುನ ಜೋಗಿ ಮಠಟ್ಟ್ ಶ್ರೀ ಕಾಲ ಬೈರವ ದೇವೆರೆನ ಮೂಲಮೂರ್ತಿನ್ ಪ್ರತಿಷ್ಠಾಪನೆ ಮಲ್ಪೊಡು ಪಂದ್ ಐತಾರ ಜೋಗಿ ಸಮಾಜದ ಮುತಾಲಿಕೆಡ್ ಉಪವಾಸ ಸತ್ಯಾಗ್ರಹನ್ ಭಜನೆದ ಮುಖೇನ ಮಲ್ತೆರ್.
ಕದ್ರಿ ಜೋಗಿಮಠ ಹಿತರಕ್ಷಣಾ ಸಮಿತಿ, ದಕ್ಷಿಣ ಕನ್ನಡ ಜೋಗಿ ಸಮಾಜ ಸುಧಾರಕ ಸಂಘ, ಕದ್ರಿ ಶ್ರೀ ಜೋಗಿಮಠ ಜೀರ್ಣೋದ್ಧಾರ ಬೊಕ್ಕ ನಿರ್ವಹಣಾ ಸಮಿತಿದ ಮುತಾಲಿಕೆಡ್ ಈ ಪ್ರತಿಭಟನೆ ನಡತ್ಂಡ್.
ಕಾಲಭೈರವದೇವೆರೆಗ್ ಬ್ರಹ್ಮಕಲಶ ಉಚ್ಚಯ ಬೊಕ್ಕ ಮೂರ್ತಿ ಪುನರ್ ಪ್ರತಿಷ್ಠಾಪನೆ ಕರಿನ ಫೆಬ್ರವರಿಡ್ ಆತ್ಂಡ್. ಸಾರರ್ದ್ ಎಚ್ಚ ವರ್ಷ ಇತಿಹಾಸ ಇಪ್ಪುನ ಮೂಲ ಮೂರ್ತಿನ್ ಬುಡ್ದು ಏರೋ ಮಾರ್ವಾಡಿಲು ಕೊರಿನ ಅಮೃತ ಶಿಲೆನ್ ದೀದ್ ಬ್ರಹ್ಮಕಲಶ ಮಲ್ತಿನವು ಭಾರೀಮಲ್ಲ ಅಪಚಾರ ಆತ್ಂಡ್. ಕೂಡ್ಲೆ ಈ ಬಗೆಟ್ಟ್ ಪುರಾತತ್ವ ಇಲಾಖೆ ಕೊರಿನ ಆದೇಶ ಜಾರಿ ಮಲ್ತ್ ದ್ ಶ್ರೀ ಕಾಲಬೈರವ ದೇವೆರೆನ ಮೂಲ ಮೂರ್ತಿ ಪ್ರತಿಷ್ಠಾಪನೆ ಆವೊಡು ಪಂದ್ ಹರಿನಾಥ್ ಜೋಗಿ ಒತ್ತಾಯ ಮಲ್ತೆರ್.
ಇತ್ತೆದ ನಿರ್ಮಲನಾಥ ಸ್ವಾಮೀಜಿ ಮಠಾಧಿಪತಿಲು ಕಾಲಬೈರವನ ಆರಾಧಕೆರ್, ಕೈತಲ್ ದ ಜೋಗಿ ಸಮಾಜದ ಬಂಧುಲೆನ ಮನಸ್ಸ್ಗ್ ಬೇನೆ ಕೊರೊಂದು ಉಲ್ಲೆರ್. ರಾಜಸ್ಥಾನದ ಭಕ್ತೆರ್ ಬೊಕ್ಕ ಕೆಲವೆರ್ ಸೇರೊಂದು ಪುರಾತನ ಕಾಲರ್ದ್ ಆರಾಧನೆ ಮಲ್ತೊಂದು ಬರೊಂದು ಇಪ್ಪುನ ಕಾಲಭೈರವ ದೇವೆರೆನ ವಿಗ್ರಹನ್ ಕುಂಟುಡು ಸುತ್ತುದು ದಕ್ಕ್ದೆರ್. ಒವ್ವೇ ವಿಧಿವಿಧಾನನ್ ಮಲ್ಪಂದೆ ಚೀಲರ್ದ್ ದೆತ್ತ್ದ್ ಪೊಸ ವಿಗ್ರಹನ್ ಕುಲ್ಲದೆರ್. ಮಠ ಜೋಗಿ ಸಮುದಾಯಗ್ ಸೇರಿನ ಮಠಾಧೀಶೆರೆನ ನಿರ್ದೇಶನಡ್ ಜೋಗಿಲೇ ಪ್ರತಿ ದಿನೊಲ ಪೂಜೆ ಮಲ್ಪೊಡು ಪಂದ್ ಪಂಡೆರ್.
ಈ ಪೊರ್ತುಡು ಕದ್ರಿ ಜೋಗಿ ಮಠ ಹಿತರಕ್ಷಣಾ ಸಮಿತಿ ಅಧ್ಯಕ್ಷೆರ್ ಶರತ್ ಕುಮಾರ್, ಜೀರ್ಣೋದ್ದಾರ ಬೊಕ್ಕ ಕಾರ್ಯ ನಿರ್ವಹಣ ಸಮಿತಿ ಕಾರ್ಯದರ್ಶಿ ಹರೀಶ್ ಎಸ್.ಜೋಗಿ, ಸಮಾಜದ ಪ್ರಮುಖೆರ್ ಕೆ. ದಯಾನಂದ ಜೋಗಿ, ಬಾಲಕೃಷ್ಣಕದ್ರಿ, ನಾಗೇಂದ್ರ ಚಿಲಿಂಬಿ, ಸತೀಶ್ ಜೋಗಿ ಮಾಲೆಮಾರ್, ವಿದ್ಯಾ ಗಣೇಶ್, ಶರತ್ ಕುಮಾರ್, ಜಗಜೀವನ್ ದಾಸ್, ಸುರೇಶ್ ಕುಮಾರ್, ನಾಗೇಶ್, ಗಣೇಶ್, ಕಾನೂನು ಸಲಹೆಗಾರೆ ಹರೀಶ್ ಎಸ್., ಮೋಹನ್, ಜಯಂತ್ ಜೋಗಿ, ದಯಾನಂದ ಜೋಗಿ, ಪ್ರಮಿತ್ ಜೋಗಿ ಬೊಕ್ಕ ಪದಾಧಿಕಾರಿಲು ಪಾಲ್ ಪಡೆದಿತ್ತೆರ್.
pallavi shetty