ಆಟಿ ನಮ್ಮ ಹಿರಿಯೆರೆಗ್ ಮಸ್ತ್ ಕಷ್ಟವಾಯಿನ ತಿಂಗೊಲ್ ಆದಿತ್ತ್ಂಡ್: ಸುಷ್ಮಾ ಡಿ.ಶೆಟ್ಟಿ
ಥಾಣೆ: ಆಟಿ ಪನ್ಪುನವು ಚಾಂದ್ರಮಾನ ಲೆಕ್ಕಡ್ ನಾಲ್ ನೇ ತಿಂಗೊಲು. ಆಟಿಡ್ ಎಡ್ಡೆ ಮೂರ್ತ ಇಪ್ಪುಜಿ ಪನ್ಪುನವು ತುಳುವೆರೆನ ನಂಬಿಕೆ. ಈ ತಿಂಗೊಲ್ ನಮ್ಮ ಪೂರ್ವಜೆರೆಗ್ ಮಸ್ತ್ ಕಷ್ಟದ ದಿನ ಆದಿತ್ತ್ಂಡ್. ಆ ಪೊರ್ತುಡು ಬರೊಂದು ಬತ್ತಿನ ಬರ್ಸದಾವೆರ ಪಿದಯಿ ಕಾರ್ ದೀಯೆರೆ ಆವೊಂದು ಇಜ್ಜಾಂಡ್. ಆ ಪೊರ್ತುಡು ಅರೆಗಾಲಡ್ ತಯಾರ್ ಮಲ್ತ್ ದ್ ದೀದಿತ್ತಿನ ಪೆಲತ್ತರಿ, ಕೆರೆಂಗ್, ಹಪ್ಪಳ, ಸಂಡಿಗೆ ಉಂದೆನ್ ಮಾತ ತಿಂದ್ ದ್ ಜೀವನ ಸಾಗವೊನ ಅನಿರ್ವಾಯತೆ ಇತ್ತ್ಂಡ್. ಪ್ರಕೃತಿಡ್ ತಿಕುನ ತೊಪ್ಪು ತರಕಾರಿ, ಕೇನೆ ಕೆರೆಂಗ್ ತಿಂದ್ ದ್ ಬಡವು ಕಮ್ಮಿ ಮಲ್ತೊಂದು ಇತ್ತೆರ್. ಪ್ರಕೃತಿಡ್ ತಿಕ್ಕುನ ಪ್ರತಿಯೊಂಜಿ ಸೊಪ್ಪು, ತರಕಾರಿಲೆಡ್ ಮರ್ದ್ ದ ಗುಣ ಇಪ್ಪೆದ್ಂಡ್ ಪಂದ್ ಡೊಂಬಿವಲಿ ಕರ್ನಾಟಕ ಸಂಘದ ಮಹಿಳಾ ವಿಭಾಗದ ಕಾರ್ಯಾಧ್ಯಕ್ಷೆರ್ ಸುಷ್ಮಾ ದಿವಾಕರ್ ಶೆಟ್ಟಿ ಇಂದ್ರಾಳಿ ಪಂಡೆರ್.
ಮೇರ್ ಆ.5 ಸನಿಯಾರ ಹೋಟೆಲ್ ವಿನ್ಯಾಸ, ಸಾವರ್ಕರ್ ನಗರಡ್ ಕನ್ನಡ ಸಂಘ ವರ್ತಕ ನಗರ (ರಿ.) ಥಾಣೆ ನೆತ್ತ ಪೊಂಜೋವ್ ಲೆನ ಕೂಟ ಬೊಕ್ಕ ಕಾರ್ಯಕಾರಿ ಸಮಿತಿ ಆಯೋಜನೆ ಮಲ್ತಿನ ಆಟಿದ ಕೂಟ ಲೇಸ್ ಗ್ ಮಲ್ಲ ಬಿನ್ನೆರಾದ್ ಬತ್ತ್ ದ್ ಪಾತೆರಿಯೆರ್.
ಅಯ್ಯಪ್ಪ ಸೇವಾ ಸಮಿತಿ ಕಿಶನ್ ನಗರ ನೆತ್ತ ಗುರ್ಕಾರ್ಲು ಜಯರಾಮ ಪೂಜಾರಿ ಪಾತೆರ್ದ್, ಬೊಂಬೈಡ್ ಸುಮಾರ್ ವರ್ಷೊರ್ದಿಂಚ ತುಳುನಾಡ್ ದ ಸಂಸ್ಕೃತಿನ್ ಆಚರಣೆ ಮಲ್ತೊಂದು ಬರೊಂದು ಇಪ್ಪುನ ಪೆರ್ಮೆದ ಇಸಯ, ಆಯಿಟ್ಟ್ ಲ ಇಂಚಿಪ್ಪದ ಕೆಲವು ವರ್ಷೊಲೆಡ್ ಆಟಿದ ಕೂಟನ್ ಪಿದಯಿ ಊರುಡುಲ ಆಚರಣೆ ಮಲ್ತ್ ದ್ ತುಳುನಾಡ್ ದ ಪೆರ್ಮೆನ್ ಪಸರುನೆ ಅತ್ತಂದೆ ಅಯಿತ್ತೊಟ್ಟಿಗೆ ನಮ್ಮ ಪೂರ್ವಜೆರ್ನ ಆಟಿ ತಿಂಗೊಲ್ದ ಕಷ್ಟಲೆನ್ ನೆಂಪು ಮಲ್ತೆರ್.
ದಿವ್ಯ ದರ್ಶಕ್ ಉಚ್ಚಿಲ್ ಮೇರ್ ಜೆನೆಟಿಕ್ ಕ್ಯಾನ್ಸರ್ ಕೌನ್ಸಿಲರಾದ್ ಲೇಸ್ ಗ್ ಬತ್ತಿನ ತುಳು ಕನ್ನಡಿಗೆರೆಗ್ ಕ್ಯಾನ್ಸರ್ ಸೀಕ್ ದ ಬಗೆಟ್ಟ್ ಇಸೇಸವಾಯಿನ ಪೊಲಬುನ್ ಕೊರಿಯೆರ್. ತನ್ನ ಸಂಬಂಧಿಕೆರೆಗ್ ಏರೆಗಾಂಡಲ ಕ್ಯಾನ್ಸರ್ ಸೀಕ್ ದುಂಬೇ ಬತ್ತ್ ದ್ ಇತ್ತ್ಂಡ ಆ ಕುಟುಂಬದ ಸದಸ್ಯೆರ್ ವರ್ಷಗೊರ ಆಂಡಲ ನೆತ್ತೆರ್ ತಪಾಸಣೆ ಮಲ್ತೊಂದು ಇತ್ತ್ಂಡ ಸುರುತ್ತ ಹಂತಡೇ ನೆತ್ತ ಲಕ್ಷಣಲೆನ್ ನಾಡ್ ಪತ್ತ್ ದ್ ಆಯಿನಾತ್ ಬೇಗ ಹುಷಾರ್ ಮಲ್ಪರೆ ಸಾಧ್ಯ ಉಂಡು. ಆಂಡ ಕಾಲ ಮೀರ್ಂಡ ದಾಲ ಮಲ್ಪರೆ ಆಪುಜಿ. ಕ್ಯಾನ್ಸರ್ ಸೀಕ್ ದ ಬಗೆಟ್ಟ್ ಪೋಡಿಪ್ಪೆರೆ ಬಲ್ಲಿ. ನೆತ್ತ ಮರ್ದ್ ಲು ಇತ್ತೆದ ಪೊರ್ತುಡು ಮಸ್ತ್ ಅಭಿವೃದ್ಧಿ ಆತ್ಂಡ್. ಸೀಕ್ ನ್ ನಿರ್ಮೂಲನೆ ಮಲ್ಪರೆ ಯಶಸ್ವಿ ಆತ್ಂಡ್. ಆಂಡ ಒವ್ವೇ ಸೀಕ್ ಲಕ್ಷಣಲು ತೋಜಿದ್ ಬತ್ತ್ಂಡ ಕೂಡ್ಲೆ ತಪಾಸಣೆ ಮಲ್ಪುನೆ ಎಡ್ಡೆ. ಪೊಂಜೋವ್ ನಕುಲು ಸ್ತನ ಕ್ಯಾನ್ಸರ್ ನ್ ಇಲ್ಲ್ ರ್ದೆ ಸ್ವ ಪರೀಕ್ಷೆ ಮಲ್ಪವುನೆ ಭಾರೀ ಎಡ್ಡೆ. ಸುರುಕ್ಕೆ ನಾಡ್ ಪತ್ತ್ಂಡ ಬೇಗನೇ ಕಮ್ಮಿ ಆಪುನ ಅವಕಾಶಲು ಜಾಸ್ತಿ ಉಂಡು. ಪೊಂಜೋವ್ ನಕುಲು ಪ್ಯಾಪ್ ಸ್ಮಿಯರ್‌ ಬೊಕ್ಕ ಮೆಮೋಗ್ರಾಫಿನ್ 40 ವರ್ಷದ ಬೊಕ್ಕ ವರ್ಷಗೊರ ಆಂಡಲ ಮಲ್ಪವೊಡು ಪಂದ್ ಎಡ್ಡೆ ಸಲಹೆನ್ ಕೊರ್ದು, ಕ್ಯಾನ್ಸರ್ ಸೀಕ್ ದ ಬಗೆಟ್ಟ್ ಎಡ್ಡೆ ಪೊಲಬು ಕೊರಿಯೆರ್.
ಸಭಾಲೇಸ್ ರ್ದ್ ಸುರುಕ್ಕೆ ದುಂಬುದ ಕಾಲದ ಆಟಿನ್ ನೆಂಪು ಮಲ್ಪುನ ಗೊಬ್ಬುಲು ನಡತ್ಂಡ್. ನೆನ್ ಮಹಿಳಾ ವಿಭಾಗದ ಮಾಜಿ ಕಾರ್ಯಾಧ್ಯಕ್ಷೆರ್ ಶರ್ಮಿಳಾ ಎಸ್ ಶೆಟ್ಟಿ ನಡಪಾದ್ ಕೊರಿಯೆರ್. ರಸಪ್ರಶ್ನೆ ಲೇಸ್ ನ್ ಸಾಂಸ್ಕೃತಿಕ ಮುಖ್ಯಸ್ಥೆರ್ ಶೋಭಾ ಎಸ್ ಶೆಟ್ಟಿ ನೆಲ್ಲಿದಡಿಗುತ್ತು ನಡಪಾದ್ ಕೊರಿಯೆರ್. ಆಟಿ ಕಳೆಂಜನ ಇಸೇಸ ಡ್ಯಾನ್ಸ್ ನ್ ಲತಾ ಆರ್ ಶೆಟ್ಟಿ ಬೊಕ್ಕ ತಕ್ಷ್ ಮಲ್ತೆರ್. ಕಾರ್ಯಕಾರಿ ಸಮಿತಿ ಸದಸ್ಯೆರ್ ಸುರೇಖಾ ಪೂಜಾರಿ ಪ್ರಾರ್ತನೆ ಮಲ್ತೆರ್. ಚಾವಡಿಡ್ ಇತ್ತಿನ ಮಲ್ಲ ಬಿನ್ನೆರ್, ಪದಾಧಿಕಾರಿಲು ತುಡರ್ ಅರ್ಲಾದ್ ಉದಿಪನ ಮಲ್ತೆರ್.
ಮಹಿಳಾ ವಿಭಾಗದ ಕಾರ್ಯಾಧ್ಯಕ್ಷೆರ್ ವಿದ್ಯಾ ಆರ್ ಶೆಟ್ಟಿ ಬತ್ತಿ ಬಿನ್ನೆರೆನ್ ಎದ್ಕೊಂದು ತನ್ನ ಈ ಆಟಿದ ಕೂಟ ಪೊರ್ಲುಡೇ ನೆರವೇರಿಯೆರೆ ಮಹಿಳಾ ವಿಭಾಗದ ಕಾರ್ಯಕಾರಿ ಸದಸ್ಯೆರೆನ ಸಹಕಾರರ್ದ್ ಸಾಧ್ಯ ಆತ್ಂಡ್ ಪಂದ್ ಪಂಡೆರ್.
ಸಭಾ ಲೇಸ್ ನ್ ಸುಗಂಧಿ ಎಸ್ ಶೆಟ್ಟಿ ಸುಧಾರಿಕೆ ಮಲ್ತೆರ್. ಬಿನ್ನೆರೆನ್ ಮಹಿಳಾ ವಿಭಾಗದ ಮಾಜಿ ಕಾರ್ಯಾಧ್ಯಕ್ಷೆರ್ ಡಾ.ವಾಣಿ ಉಚ್ಚಿಲ್ಕರ್, ಸಂಧ್ಯಾ ಶೆಟ್ಟಿ ಪರಿಚಯ ಮಲ್ತೆರ್. ಶೋಭಾ ಎಸ್ ಶೆಟ್ಟಿ ಮೇರ್ ಬಿನ್ನೆರೆನ್ ಪರಿಚಯ ಮಲ್ಪೊನೆತ್ತೊಟ್ಟಿಗೆ ತುಳುನಾಡ್ ದ ಇಸೇಸತೆನ್ ತೊಜಪಾವುನ ಒಂಜಿ ಕವನನ್ ಓದಿಯೆರ್. ಕಾರ್ಯದರ್ಶಿ ಸಂಧ್ಯಾ ಶೆಟ್ಟಿ, ಗೀತಾ ಮೆಂಡನ್, ಸುರೇಖಾ ಪೂಜಾರಿ, ಶರ್ಮಿಳಾ ಶೆಟ್ಟಿ ಪದ ಪಂಡೆರ್.
ರುಚಿ ರುಚಿಯಾಯಿನ ಅಟಿಲ್ ನ್ ಮಲ್ತ್ ದ್ ಕನತಿನ ಪೊಂಜೋವ್ ಲೆಗ್ ನೆಂಪುದ ಕಾಣಿಕೆನ್ ಕೊರ್ದು ಪ್ರೋತ್ಸಾಹ ಮಲ್ತೆರ್. ನೆತ್ತ ಪಟ್ಟಿನ್ ರೇಖಾ ಶೆಟ್ಟಿ ಓದುದು ಪಂಡೆರ್. ಬೇತೆ ಬೇತೆ ಸಂಘ ಸಂಸ್ಥೆಲೆರ್ದ್ ಬತ್ತಿನ ಪದಾಧಿಕಾರಿಲೆನ್ ಪೂತ್ತ ಗೊಂಚಿಲ್ ಕೊರ್ದು ಮಾನಾದಿಗೆ ಮಲ್ತೆರ್. ನೆನ್ ಲತಾ ಆರ್ ಶೆಟ್ಟಿ ಸುಧಾರಿಕೆ ಮಲ್ತೆರ್.
ಗೊಬ್ಬುಡು ಗೆಂದಿನಕ್ಲೆಗ್ ಚಾವಡಿಡ್ ಇತ್ತಿನ ಬಿನ್ನೆರ್, ಗುರ್ಕಾರ್ಲು ಜಯಂತ್ ಎನ್ ಶೆಟ್ಟಿ ಬೊಕ್ಕ ಮಹಿಳಾ ವಿಭಾಗದ ಕಾರ್ಯಾಧ್ಯಕ್ಷೆರ್ ವಿದ್ಯಾ ಆರ್ ಶೆಟ್ಟಿ ಇನಾಮು ಕೊರ್ದು ಮಾನಾದಿಗೆ ಮಲ್ತೆರ್. ಕನ್ನಡ ಸಂಘದ ಜತೆ ಕಾರ್ಯದರ್ಶಿ ಸಕಿತಾ ಎಸ್ ಶೆಟ್ಟಿ ಸೊಲ್ಮೆ ಸಂದಾಯೆರ್. ಸಂಘದ ಕಾರ್ಯದರ್ಶಿ ಶೇಖರ್ ಆರ್ ಶೆಟ್ಟಿ ಮೇರ್ ಈ ಲೇಸ್ ನ್ ಪೊರ್ಲುಡೇ ನಡಪಾಯೆರೆ ಸಹಕಾರ ಕೊರಿಯೆರ್.
ಬಾಲಕೃಷ್ಣ ರೈ, ಸಿಎಂ ಶೆಟ್ಟಿ ಮೋಹನ್ ಹೆಗ್ಡೆ, ಸುಕುಮಾರ್ ಶೆಟ್ಟಿ ಬೊಕ್ಕ ಕಾರ್ಯಕಾರಿ ಸಮಿತಿದ ಮಾತ ಸದಸ್ಯೆರ್ ಲೇಸ್ ಗ್ ಪಾಲ್ ಪಡೆದಿತ್ತೆರ್. ಮೊಕ್ಲೆಗ್ ಪೂತ್ತ ಗೊಂಚಿಲ್ ಕೊರ್ದು ಮಾನಾದಿಗೆ ಮಲ್ತೆರ್. ಮಹಿಳಾ ವಿಭಾಗದ ಕಾರ್ಯಕಾರಿ ಸಮಿತಿದ ಸದಸ್ಯೆರ್ ಮೋಹಿನಿ ಶೆಟ್ಟಿ, ವಿಜಯ ಶೆಟ್ಟಿ, ಕುಶಲಾ ಹೆಗ್ಡೆ, ರವಿಕಲಾ ಶೆಟ್ಟಿ, ಶಶಕಲಾ ಶೆಟ್ಟಿ, ಚೇತನಾ ಶೆಟ್ಟಿ, ಚಂದ್ರಕಲಾ ಬಂಗೇರಾ, ಶಕುಂತಳ ಪೂಜಾರಿ ಈ ಲೇಸ್ ದ ಯಶಸ್ಸ್ ಗ್ ಸಹಕಾರ ಮಲ್ತೆರ್. ಲೇಸ್ ದ ಅಕೇರಿಡ್ ಆಟಿದ ಇಸೇಸ ಅಟಿಲ್ ದ ವನಸ್ ಇತ್ತ್ಂಡ್. ಈ ಲೇಸ್ ಡ್ ಎಚ್ಚದ ಸಂಖ್ಯೆಡ್ ತುಳು ಕನ್ನಡಿಗೆರ್ ಪಾಲ್ ಪಡೆದಿತ್ತೆರ್.
ವರದಿ: ಯೋಗೀಶ್ ಪುತ್ರನ್ ಬೊಂಬೈ
Editorial