ಬರ್ಸ, ಬೊಲ್ಲದ ನಷ್ಟ ಪರಿಹಾರವಾದ್ 721 ಕೋಟಿ ರೂ.: ಸಚಿವೆರ್ ದಿನೇಶ್ ಗುಂಡೂರಾವ್

ಕುಡ್ಲ: ರಾಷ್ಟ್ರೀಯ ವಿಪತ್ತು ಉಪ ಶಮನ ನಿಧಿರ್ದ್ ಗುಡ್ಡೆ ಜರಿನೆಕ್ಕ್ ಬೊಕ್ಕ ಬರ್ಸರ್ದ್ ತೊಂದರೆ ಆಯಿನಕ್ಲೆಗ್ ದಕ್ಷಿಣ ಕನ್ನಡ ಜಿಲ್ಲೆ ಸೇರ್ದ್ 5 ಜಿಲ್ಲೆಗ್, 721 ಕೋಟಿ ರೂ. ಪರಿಹಾರ ಕೊರ್ಪ ಪಂದ್ ಜಿಲ್ಲಾ ಉಸ್ತುವಾರಿ ಸಚಿವೆರ್ ದಿನೇಶ್ ಗುಂಡೂರಾವ್ ಪಂಡೆರ್.

ಮೇರ್ ಕುಡ್ಲದ ನೆಹರೂ ಮೈದಾನಡ್ ಜಿಲ್ಲಾಡಳಿತದ ಮುತಾಲಿಕೆಡ್ ನಡತಿನ 77ನೇ ಸ್ವಾತಂತ್ರ್ಯ ದಿನಾಚರಣೆಡ್ ರಾಷ್ಟ್ರ ಕೊಡಿನ್ ರಾಪಾದ್, ಮಾನಾದಿಗೆ ಸ್ವೀಕಾರ ಮಲ್ತ್ ದ್ ಪಾತೆರಿಯೆರ್.

ಸುರತ್ಕಲ್ ಕೈತಲ್ದ ಸಸಿಹಿತ್ಲು ಬೀಚ್ ನ್ ಅಂತಾರಾಷ್ಟ್ರೀಯ ಸರ್ಫಿಂಗ್ ತಾಣ ಮಲ್ಪೆರೆ ಪಿಪಿಪಿ ಮಾದರಿಡ್ ಯೋಜನೆ ರೂಪಿಸಾಯೆರೆ ಕ್ರಮ ದೆತೊನಿಯೆರೆ ಉಂಡು. ದಕ್ಷಿಣ ಕನ್ನಡ, ಒಡಿಪು, ಉತ್ತರ ಕನ್ನಡ ಜಿಲ್ಲೆಡ್ ಬೀಚ್ ಟೂರಿಸಂ ಅಭಿವೃದ್ಧಿಗ್ ಕಾರ್ಯಪಡೆ ರಚನೆ ಆವರೆ ಉಂಡು. ದಕ್ಷಿಣ ಕನ್ನಡ ಜಿಲ್ಲೆದ ಜಿಲ್ಲಾಧಿಕಾರಿ ಕಚೇರಿ ಸಂಕೀರ್ಣದ ಬೇಲೆ ಈ ವರ್ಷ ಮುಗಿದ್, ಮಾತ ಸೇವೆನ್ ಒಂಜೇ ಕುಬಲ್ದಡಿಟ್ಟ್ ಕೊರ್ತುಂಡು ಪಂದ್ ಪಂಡೆರ್.

ನಮ್ಮ ಜಿಲ್ಲೆದ ಪ್ರಮುಖ ಬೇಲೆ ಮೀನುಗಾರಿಕೆ ಆತ್ಂಡ್. ಒಟ್ಟು 42 ಕಿ.ಮೀ. ಕಡಲ್ ದ ಬರಿಟ್ಟ್ ಇಪ್ಪುನ ಜಿಲ್ಲೆಡ್ 66 ಸಾರರ್ದ್ ಎಚ್ಚದ ಮೀನುಗಾರೆರ್ ಉಲ್ಲೆರ್. ಅಕ್ಲೆನ ಅನುಕೂಲಗಾದ್ ವೋಟುದ ಪ್ರಣಾಳಿಕೆಡ್ ಕೊರಿನ ಗ್ಯಾರಂಟಿಲೆಡ್ ಈ ಸರ್ತಿದ ಆಯವ್ಯಯಡ್ ಸುಮಾರ್ ಕ್ರಮನ್ ದೆತೊನಿಯೆರೆ ಉಂಡು. ಮೀನುಗಾರ ಪೊಂಜೋವ್ ಲೆನ ಆರ್ಥಿಕ ಸ್ವಾವಲಂಬನೆ ಬೊಕ್ಕ ವೈವಾಟ್ ವಿಸ್ತರಣೆಗ್ ಸಕಾಯ ಆಯೆರೆ ಬ್ಯಾಂಕ್‍ಡ್ 3 ಲಕ್ಷ ರೂ. ಮುಟ್ಟ ಬಡ್ಡಿದೊಟ್ಟಿಗೆ ಸಾಲ ಕೊರ್ಪೆರ್. ಮೀನುಗಾರೆರೆನ ಓಡಲೆಗ್ ರಿಯಾಯಿತಿ ದರಟ್ಟ್ ಕೊರೊಂದು ಇಪ್ಪುನ ಚಿಮಿನಿದೆಣ್ಣೆನ್ 1.50 ಲಕ್ಷ ಕಿಲೋ ಲೀಟರ್ ರ್ದ್ 2 ಲಕ್ಷ ಕಿಲೋ ಲೀಟರ್ ಮುಟ್ಟ ಎಚ್ಚ ಮಲ್ಪುನ ರಾಜ್ಯ ಸರ್ಕಾರದ ಪ್ರಸ್ತಾವನೆ ಮೀನುಗಾರೆರೆಗ್ ಮಸ್ತ್ ಅನುಕೂಲ ಆತ್ಂಡ್. ನೆಕ್ಕಾದ್ 250 ಕೋಟಿ ರೂ.ನ್ ಮೀಸಲ್ ದೀತ್ಂಡ್. ಇತ್ತೆದ ಚಿಮಿನಿದೆಣ್ಣೆದ ಎಂಜಿನ್‍ ದ ಬೋಟ್‍ನ್ ಪೆಟ್ರೋಲ್ ಅತ್ತಂಡ ಡೀಸೆಲ್ ಎಂಜಿನಾದ್ ಬದಲ್ ಮಲ್ತ್ಂಡ ತಲಾ 50 ಸಾರ ರೂ. ಮುಟ್ಟ ಪನವುದ ಕೊರಿಯೆರೆ ಉಂಡು. ಈ ವರ್ಷಡ್ ಇಂಚಿನ ನಾಲ್ ಸಾರ ಮೀನುಗಾರಿಕಾ ಓಡಲೆಡ್ ಎಂಜಿನ್‍ನ್ ಬದಲ್ ಮಲ್ಪರೆ 20 ಕೋಟಿನ್ ಒದಗಿಸಾಯೆರೆ ಕ್ರಮ ದೆತೊನಿಯೆರೆ ಉಂಡು ಪಂದ್ ಪಂಡೆರ್.

ಮೀನುಗಾರಿಕೆ ಇಲಾಖೆ ಮೀನು ಉತ್ಪಾದನೆನ್ ಎಚ್ಚ ಮಲ್ಪುಂಡು. ಮೀನುಗಾರೆರೆನ್ ಆರ್ಥಿಕ-ಸಾಮಾಜಿಕವಾದ್ ಅಭಿವೃದ್ದಿ ಮಲ್ಪರೆ ಉಂಡು ಬೊಕ್ಕ ತಾಂತ್ರಿಕ, ವೈಜ್ಞಾನಿಕ ಪೊಲಬು ಕೊರ್ಪುನ ಮುಖ್ಯ ಧ್ಯೇಯೋದ್ದೇಶರ್ದ್ 1967 ಟ್ಟ್ ಮೀನುಗಾರಿಕೆ ಇಲಾಖೆ ಅಸ್ತಿತ್ವಗ್ ಬೈದ್ಂಡ್. ಜಿಲ್ಲೆಡ್ 23 ಮೀನುಗಾರೆರೆನ ಸಹಕಾರಿ ಸಂಘಲು ಬೊಕ್ಕ ಮೀನುಗಾರಿಕಾ ಫೆಡರೇಶನ್ ಉಂಡು. ಆಯಿಟ್ಟ್ ಒಟ್ಟು 35,970 ಸದಸ್ಯೆರ್ ಉಲ್ಲೆರ್. ನೆಟ್ಟ್ 4 ಮೀನುಗಾರೆರೆನ ಪೊಂಜೋವ್ ಲೆನ ಸಹಕಾರಿ ಸಂಘಲು ಉಂಡು. ಇತ್ತೆ ಜಿಲ್ಲೆಡ್ ಸುಮಾರ್ 102 ಪರ್ಸೀನ್ ಬೋಟ್ 1,354 ಟ್ರಾಲ್‍ ಬೋಟ್, 1,674 ಯಾಂತ್ರೀಕೃತ ನಾಡದೋಣಿ ಬೊಕ್ಕ 318 ನಾಡದೋಣಿಲು ಉಂಡು. 2022-23ನೇ ಸಾಲ್ ಡ್ 4,154 ಕೋಟಿ ರೂ. ಬಿಲೆತ್ತ 3.33 ಲಕ್ಷ ಮೆಟ್ರಿಕ್ ಟನ್ ಮೀನು ಉತ್ಪಾದನೆ ಆತ್ಂಡ್ ಪಂದ್ ಸಚಿವೆರ್ ತೆರಿಪಾದೆರ್.

ಈ ಪೊರ್ತುಡು ವಿಧಾನ ಪರಿಷತ್ ಶಾಸಕೆರ್ ಹರೀಶ್ ಕುಮಾರ್, ಜಿಲ್ಲಾಧಿಕಾರಿ ಮುಲ್ಲೈ ಮುಗಿಲನ್ ಎಂ.ಪಿ., ನಗರ ಪೊಲೀಸ್ ಆಯುಕ್ತೆರ್ ಕುಲದೀಪ್ ಕುಮಾರ್ ಜೈನ್, ಎಸ್ಪಿ ರಿಷ್ಯಂತ್ ಸೇರಿನಂಚೆನೆ ಅಧಿಕಾರಿಲು, ಜನಪ್ರತಿನಿಧಿಲು ಇತ್ತೆರ್.