ಕುಂದಾಪುರ: ಅಂತಾರಾಜ್ಯದ ರಡ್ಡ್ ಕಲ್ವೆರ್ ಬೊಕ್ಕ 16 ಲಕ್ಷ ಬಿಲೆತ್ತ ಸೊತ್ತುಲು ಪೊಲೀಸ್ ವಶಕ್ಕ್

ಕುಂದಾಪುರ: ಕರಿನ ಮೂಜಿ ತಿಂಗೊಲ್ದ ಪಿರವು ಕೋಟೇಶ್ವರದ ಒಂಜಿ ಇಲ್ಲಡ್ ಬಾಕಿಲ್ ಪುಡಾತ್ ದ್ ಬಂಗಾರ್ ಕಂಡಿನ ಕೇಸ್ ದ ಬಗೆಟ್ ರಡ್ಡ್ ಆರೋಪಿಲೆನ್ ಕುಂದಾಪುರ ವೃತ್ತನಿರೀಕ್ಷಕೆರ್, ಉಪನಿರೀಕ್ಷಕರೆನ ಮುತಾಲಿಕೆಡ್ ಪೊಲೀಸೆರೆನ ಕೂಟ ಅರೆಸ್ಟ್ ಮಲ್ದ್ಂಡ್.

ಈ ಬಗೆಟ್ ತನಿಖಾಧಿಕಾರಿ ವೃತ್ತನಿರೀಕ್ಷಕೆರ್ ಗೋಪಿಕೃಷ್ಣ ಕೆ.ಆರ್. ತನಿಖೆ ಮಲ್ತೊಂದು ಉಲ್ಲೆರ್. ಕಾಸ್ರೋಡು ಹೊಸದುರ್ಗ ಪೆರಿಯಾಟಡುಕಂ ನಿವಾಸಿ ಹಾಶಿಮ್ ಎ.ಎಚ್ (42) ನ್ ಕೇರಳದ ಕಾಸ್ರೋಡುಡ್ ಬೊಕ್ಕ ಕುಂಬಳೆ ಮಂಜೇಶ್ವರದ ಅಬೂಬಕ್ಕರ್ ಸಿದ್ದಿಕ್ (48)ನ್ ಮಡಿಕೇರಿಡ್ ವಶಕ್ಕ್ ಪಡೆತೆರ್. ಮೊಕುಲು ಜಿಲ್ಲೆದ ಒಡಿಪು ಪೇಂಟೆದ ಪೊಲೀಸ್ ಠಾಣೆ, ಮಲ್ಪೆ, ಕುಂದಾಪುರ ಪೊಲೀಸ್ ಠಾಣೆ ವ್ಯಾಪ್ತಿದ ಇಲ್ಲಡ್ ಕಂಡ್ ದ್, ಬಂಗಾರ್ ನ್ ಕೇರಳ ಮಂಜೇಶ್ವರ ತಾಲೂಕ್ ದ ಜುವೆಲ್ಸರ್ಸ್ ಒಂಜೇಕ್ ಮಾರ್ದೆರ್. ಮಾರಿನ ಜುವೆಲ್ಲರಿರ್ದ್ 15 ಲಕ್ಷ ಬಿಲೆತ 300 ಗ್ರಾಂ ಬಂಗಾರ್, 1 ಲಕ್ಷ ಬಿಲೆತ 1481 ಗ್ರಾಂ ಬೊಳ್ಳಿ, ಒಟ್ಟು 16 ಲಕ್ಷ ಬಿಲೆತ ಸೊತ್ತುಲೆನ್ ವಶಕ್ಕ್ ಪಡೆತೆರ್. ಮೊಕ್ಲೆನ್ ಜ.6 ಕ್ ಕೋರ್ಟ್ ಗ್ ಹಾಜರ್ ಮಲ್ದೆರ್. ಕುಂದಾಪುರ ವೃತ್ತ ನಿರೀಕ್ಷಕ ಗೋಪಿಕೃಷ್ಣ ಕೆ.ಆರ್ ಮುತಾಲಿಕೆಡ್, ಕುಂದಾಪುರ ಪೊಲೀಸ್ ಠಾಣೆದ ಉಪನಿರೀಕ್ಷಕೆರಾಯಿನ ಸದಾಶಿವ ಗವರೋಜಿ, ಪ್ರಸಾದ್ ಕುಮಾರ್ ಕೆ., ಎಎಸ್‌ಐ ಸುದಾಕರ, ಸಿಬ್ಬಂದಿಲಾಯಿನ ಸಂತೋಷ ಕುಮಾರ್, ಕೆ.ಯು ಸಂತೋಷ ಕುಮಾರ್, ರಾಮಪೂಜಾರಿ ಈ ಕೇಸ್ ದ ಆರೋಪಿಲೆನ್ ಪತ್ತೆರೆ ಸಕಾಯ ಮಲ್ದೆರ್.