ಕಾಸ್ರೋಡುದ ಪೈವಳಿಕೆಡ್ ಜ.8 ಕ್ ಬಿರುವೆರ್ ಕುಡ್ಲ ಪೈವಳಿಕೆ ಘಟಕದ ಉದಿಪನ ಲೇಸ್ ಬಾಯಿಕಟ್ಟೆದ ಶ್ರೀ ಅಯ್ಯಪ್ಪ ಭಜನಾ ಮಂದಿರಡ್ ನಡಪರೆ ಉಂಡು.
ನೆತ್ತ ಅಂಗವಾದ್ ಅವ್ವೇ ದಿನ 10 ಗಂಟೆಗ್ ಇಸೇಸ ಆಕರ್ಷಣೆದೊಟ್ಟಿಗೆ ಜೋಡುಕಲ್ಲ್ ರ್ದ್ ಬಾಯಿಕಟ್ಟೆ ಮುಟ್ಟ ಬೇತೆ ಬೇತೆ ವಾದ್ಯಘೋಷ ಬೊಕ್ಕ ಪಿಲಿನಲಿಕೆದೊಟ್ಟಿಗೆ ಮೆರವಣಿಗೆ ನಡಪರೆ ಉಂಡು. ಬೊಕ್ಕ ಮಧ್ಯಾಹ್ನ 1 ಗಂಟೆಗ್ ಸರಿಯಾದ್ ಕಾಸ್ರೋಡುಡ್ ಸುರುತ ಸರ್ತಿ ಕುಡ್ಲದ ಪಿಲಿಲೆನ ಪಿಲಿ ಗೊಬ್ಬು ಲೇಸ್ ನಡಪುಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಮಣಿಪಾಲ: ರೇಡಿಯೋ ಮಣಿಪಾಲ್ 90.4 mhz, ಡ್ ಗ್ರಾಮೀಣ ಪರ್ಪಿನ ನೀರ್ ಬೊಕ್ಕ ನೈರ್ಮಲ್ಯ ಇಲಾಖೆ ಬೆಂಗ್ಲೂರ್ ನೆತ್ತ ಮುತಾಲಿಕೆಡ್ ಶುದ್ಧ ಜಲ, ಸ್ವಚ್ಛ ನೆಲ ಆರೋಗ್ಯವಾಗಿರಲಿ ಜೀವಸಂಕುಲ ಸರಣಿ ಲೇಸ್ ಜ.6 ಶುಕ್ರಾರ ಬಯ್ಯಗ್ 6 ಗಂಟೆಗ್ ಬೂದುನೀರ್ ದ ನಿರ್ವಹಣೆಡ್ ಇಂಗುಗುಂಡಿಲೆನ ಪ್ರಾಮುಖ್ಯತೆದ ಬಗೆಟ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಕುತ್ವಾಡಿ ಕಡೆಕಾರ್ ಗ್ರಾಮ ಪಂಚಾಯತ್ ದ ಪಂಚಾಯತ್ ಅಭಿವೃದ್ಧಿ ಅಧಿಕಾರಿ ಸಿದ್ದೇಶ ಎಸ್ ಪಾಲ್ ಪಡೆಯೆರೆ ಉಲ್ಲೆರ್. ಜ.7ಕ್ ಮಧ್ಯಾಹ್ನ 2 ಕ್ ಮರುಪ್ರಸಾರ ಆಪುಂಡು.
ಕುಡ್ಲ: ದಕ್ಷಿಣ ಕನ್ನಡ ಜಿಲ್ಲೆದ 8 ವಿಧಾನಸಭಾ ಕ್ಷೇತ್ರದ ಕಡೆತ್ತ ಮತದಾರೆರ್ನ ಪಟ್ಟಿನ್ ಪ್ರಕಟಣೆ ಮಲ್ತ್ದ ಪಂದ್ ದ.ಕ.ಜಿಲ್ಲಾಧಿಕಾರಿ ರವಿಕುಮಾರ್ ಎಂ.ಆರ್ ತೆರಿಪಾಯೆರ್.
ಪೇಂಟೆದ ಜಿಲ್ಲಾಧಿಕಾರಿ ಕಚೇರಿಡ್ ಪಾತೆರಿನ ಆರ್, ಜಿಲ್ಲೆಡ್ 23,57,852 ಜನಸಂಖ್ಯೆ ಇತ್ತ್ದ್ ಅವೆಟ್ಟ್ 17,37,688 ಮತದಾರೆರ್ ಉಲ್ಲೆರ್. ಉಂದೆಟ್ಟ್ 8,50,552 ಆಂಜೋವುಲು ಬೊಕ್ಕ 8,87,060 ಪೊಂಜೋವುಲು ಅಂಚನೆ 76 ಮಂಗಳಮುಖಿಯೆರ್ ಉಲ್ಲೆರ್ ಪಂದ್ ಪಂಡೆರ್.
ಕುಡ್ಲ ಉತ್ತರ ವಿಧಾನಸಭಾ ಕ್ಷೇತ್ರಡ್ 2,42,186 ಬೊಕ್ಕ ಸುಳ್ಯ ವಿಧಾನಸಭಾ ಕ್ಷೇತ್ರಡ್ 2,01,976 ಮತದಾರೆರ್ ಉಲ್ಲೆರ್. 18,441 ಮತದಾರೆರೆನ್ ಪಟ್ಟಿರ್ದ್ ಬುಡ್ತ. ಒಟ್ಟು 1860 ಮತಗಟ್ಟೆಲು ಉಂಡು.
ಪೆಜಮಾಡಿದ ಬಿಲ್ಲವರ ಸಂಘಡ್ ಜ.15ಕ್ ನಡಪರೆ ಇತ್ತಿನ ರಾಷ್ಟ್ರೀಯ ಬಿಲ್ಲವರ ಮಹಾಮಂಡಲದ ಬೊಳ್ಳಿ ಪರ್ಬ ಲೇಸ್ ನ್ ದುಂಬು ಪೋತುಂಡು ಪಂದ್ ರಾಷ್ಟ್ರೀಯ ಬಿಲ್ಲವರ ಮಹಾಮಂಡಲದ ಅಧ್ಯಕ್ಷೆರ್ ಡಾ.ರಾಜ್ ಶೇಖರ್ ಕೋಟ್ಯಾನ್ ತೆರಿಪಾಯೆರ್.
ಗುಲ್ಬರ್ಗದ ಚಿತ್ತಾಪುರ ಕರದಾಳ ಗ್ರಾಮದ ಬ್ರಹ್ಮಶ್ರೀ ನಾರಾಯಣಗುರು ಶಕ್ತಿ ಪೀಠದ ಪರಮ ಪೂಜ್ಯ ಡಾ.ಶ್ರೀ ಪ್ರಣಾವಾನಂದ ಸ್ವಾಮೀಜಿ ಬೊಕ್ಕ ಸಮಸ್ತ ಬಿಲ್ಲವ, ಈಡಿಗ, ನಾಮಧಾರಿ ಕುಲಬಾಂಧವರೆನ ಮುತಾಲಿಕೆಡ್ ಜ.6 ರ್ದ್ ಕುಡ್ಲದ ಕುದ್ರೋಳಿ ಕ್ಷೇತ್ರರ್ದ್ ಬೆಂಗ್ಲೂರ್ ದ ವಿಧಾನ ಸೌಧ ಮುಟ್ಟ ಐತಿಹಾಸಿಕ ಪಾದಯಾತ್ರೆ ನಡಪರೆ ಉಂಡು. ನೆಟ್ಟ್ ಸಮಾಜದ ಕುಲ ಬಾಂಧವೆರ್ ಎಚ್ಚದ ಸಂಖ್ಯೆಡ್ ಪಡೆವೊಂದುಲ್ಲೆರ್.ಅವ್ವತ್ತಂದೆ ಜ.14ಕ್ ಮಕರ ಸಂಕ್ರಾಂದಿ ಇಪ್ಪುನೆರ್ದಾವರ ಅಯ್ಯಪ್ಪ ಮಾಲೆ ಪಾಡಿನ ಸಮಾಜದ ಎಚ್ಚ ಭಾಂದವೆರ್ ಶಬರಿಮಲೆಕ್ ಪೋಪಿನೆರ್ದಾವರ ಈ ಲೇಸ್ ನ್ ಫೆಬ್ರವರಿ ತಿಂಗೊಲ್ದ ಅಕೇರಿಡ್ ಇಜ್ಜಿಂಡ ಮಾರ್ಚ್ಡ್ ಮಲ್ಪುನೇ ಪಂದ್ ನಿರ್ಧಾರ ಮಲ್ತ್ ದ ಪಂದ್ ಪಂಡೆರ್. ಈ ಪೊರ್ತುಡು ಮಹಾಮಂಡಲದ ಉಪಾಧ್ಯಕ್ಷೆರಾಯಿನ ಪೀತಾಂಬರ ಹೆರಾಜೆ, ಸೂರ್ಯಕಾಂತ್ ಜೆ. ಸುವರ್ಣ, ಪ್ರಧಾನ ಕಾರ್ಯದರ್ಶಿ ವಿಜಯ ಕುಮಾರ್ ಕುಬೆವೂರು, ಬೊಕ್ಕ ಬೇತೆ ಬೇತೆ ಸಂಘದ ಅಧ್ಯಕ್ಷೆರ್, ಪದಾಧಿಕಾರಿಲು ಇತ್ತೆರ್. ಫೆ.15 ಕ್ಕ್ ಪೆಜಮಾಡಿ ಬಿಲ್ಲವ ಸಂಘದ ಚಾವಡಿಡ್ ಬೊಳ್ಳಿ ಪರ್ಬದ ಲೇಸ್ ಮಲ್ಪರೆ ಅಟ್ಟಣೆ ಆದಿತ್ತ್ಂಡ್.
ಕಾರ್ಲ ನವೋದಯ ಗ್ರಾಮ ವಿಕಾಸ ಚಾರಿಟೇಬಲ್ ಟ್ರಸ್ಟ್ ನೆತ್ತ ಮುತಾಲಿಕೆಡ್ ಜ.8ಕ್ 19ನೇ ವರ್ಷದ ಮಿಯ್ಯಾರು ಲವಕುಶ ಜೋಡುಕರೆ ಕಂಬುಲ ನಡಪರೆ ಉಂಡು ಪಂದ್ ಇಂಧನ, ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಸಚಿವೆರ್ ಸುನಿಲ್ ಕುಮಾರ್ ತೆರಿಪಾದೆರ್.
ಇತ್ತೆ ಜಿಲ್ಲಾ ಕಂಬುಲ ಸಮಿತಿದ ಮುತಾಲಿಕೆಡ್ ಆಜೆರ್ದ್ ಏಳ್ ಜೋಡುಕರೆ ಕಂಬುಲ ಕೂಟಲು ನಡತ್ ದ್ಂಡ್. ಮಿಯ್ಯಾರ್ ಡ್ಲಾ ಸುಮಾರ್ 250 ಜತೆರ್ದ್ ಎಚ್ಚ ಎರ್ಲುಲು ಬೇತೆ ಬೇತೆ ವಿಭಾಗರ್ದ್ ಪಾಲ್ ಪಡೆಪುನ ನಿರೀಕ್ಷೆ ಉಂಡು ಪಂದ್ ಪಂಡೆರ್. ಬೊಕ್ಕ ಜಿಲ್ಲಾ ಕಂಬುಲ ಸಮಿತಿದ ಮಾರ್ಗದರ್ಶನದೊಟ್ಟಿಗೆ ಕಂಬುಲದ ಪೆರಿಯ ಅನುಭವಿ ಭಾಸ್ಕರ್ ಎಸ್ ಕೋಟ್ಯಾನ್, ಗುಣಪಾಲ ಕಡಂಬ, ಕಾರ್ಯಾಧ್ಯಕ್ಷೆರ್ ಜೀವನದಾಸ್ ಅಡ್ಯಂತಾಯ ಮೊಕ್ಲೆನ ಸಲಹೆ ಸೂಚನೆದೊಟ್ಟಿಗೆ ಈ ಕಂಬುಲನ್ ಆಯೋಜನೆ ಮಲ್ದ್ಂಡ್. ಅಂಚನೆ ಕರಾವಳಿ ಅಭಿವೃದ್ಧಿ ಪ್ರಾಧಿಕಾರರ್ದ್ ಸುಮಾರ್ 25 ಲಕ್ಷ ರೂ ಅನುದಾನದ ಪೊಸ ಸಭಾ ವೇದಿಕೆ ನಿರ್ಮಾಣ ಆವೊಂದು ಉಂಡು. ನೆತ್ತ ಉದಿಪನ ಲೇಸ್ ಆನಿ ಬಯ್ಯಗ್ ನಡಪುಂಡು. ಬಯ್ಯಗ್ ನಡಪುನ ಸಭಾ ಲೇಸ್ ಡ್ ಪೊಸ ಸಭಾ ವೇದಿಕೆದ ಉದಿಪನನ್ ಪ್ರವಾಸೋದ್ಯಮ, ಜೀವವೈವಿಧ್ಯ ಬೊಕ್ಕ ಪರಿಸರ ಇಲಾಖೆದ ಸಚಿವೆರ್ ಆನಂದ್ ಸಿಂಗ್ ಮಲ್ಪುವೆರ್.
ಈ ಲೇಸ್ ಡ್ ಮಲ್ಲ ಬಿನ್ನೆರಾದ್ ಕೇಂದ್ರ ಸಚಿವೆ ಶೋಭಾ ಕರಂದ್ಲಾಜೆ ಮೀನುಗಾರಿಕೆ ಇಲಾಖೆ, ಬಂದರು ಬೊಕ್ಕ ಒಳನಾಡಿನ ಸಾರಿಗೆ ಇಲಾಖೆ ಸಚಿವೆರ್ ಎಸ್ ಅಂಗಾರ, ಸಮಾಜ ಕಲ್ಯಾಣ ಇಲಾಖೆ ಸಚಿವೆರ್ ಕೋಟ ಶ್ರೀನಿವಾಸ್ ಪೂಜಾರಿ, ಮಾಜಿ ಸಿಎಂ ವೀರಪ್ಪ ಮೊಯ್ಲಿ, ಡಿಸಿಸಿ ಬ್ಯಾಂಕ್ ಅಧ್ಯಕ್ಷೆರ್ ಎಂ. ಎನ್ ರಾಜೇಂದ್ರ ಕುಮಾರ್ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಪ್ರಕಟಣೆಡ್ ತೆರಿಪಾದೆರ್.
ವಿರಾರ್ : ಬೊಂಬೈದ ವಿರಾರ್ ಈಸ್ಟ್ ದ ಮೋರಿಯಾ ನಗರದ ಶ್ರೀ ಕಡಲ್ದ ಅಪ್ಪೆ ಲಕ್ಷ್ಮೀ ಮಂತ್ರದೇವತೆ ಕೊರಗಜ್ಜ ಸಾನಿಧ್ಯಡ್ ಮಂತ್ರದೇವತೆ ದರ್ಶನ ಸೇವೆ ಜ.8 ಐತಾರ ಮಧ್ಯಾಹ್ನ 3 ಗಂಟೆಗ್ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್ ಸಿರಿಮುಡಿ ಗಂಧ ಪ್ರಸಾದ ದೆತೊಂದು ಮಂತ್ರದೇವತೆನ ಕೃಪೆಗ್ ಪಾತ್ರರಾವೊಡು ಪಂದ್ ಪ್ರಶಾಂತ್ ಶೆಟ್ಟಿ ಲೆಪ್ಪೋಲೆಡ್ ತೆರಿಪಾದೆರ್.
January 8th: Virar East- Dharshan Seva at Sri Lakshmi Mantradevathe Koragajja Sanidya
Virar: Moriya Nagar- Sri Lakshmi Mantradevathe Koragajja Sanidya dharshan seva will be held on Sunday the 8 th of January at 3 noon
All devotees are requested to participate in the divine event
Invite from Prashant Shetty
ಒಡಿಪು: ಚುನಾವಣಾ ಆಯೋಗದ ನಿರ್ದೇಶನದ ಬಗೆಟ್ ಜಿಲ್ಲೆದ 5 ವಿಧಾನಸಭಾ ಕ್ಷೇತ್ರದ ಕಡೆತ್ತ ಮತದಾರೆರ್ನ ಪಟ್ಟಿನ್ ಪ್ರಕಟಣೆ ಮಲ್ತ್ದ ಪಂದ್ ಜಿಲ್ಲಾಧಿಕಾರಿ ಕೂರ್ಮರಾವ್ ಎಂ ತೆರಿಪಾಯೆರ್.
ಆರ್ ಇನಿ ಜಿಲ್ಲಾಧಿಕಾರಿ ಕಚೇರಿದ ಚಾವಡಿಡ್ ನಡತಿನ ಬೇತೆ ಬೇತೆ ರಾಜಕೀಯ ಪಕ್ಷದ ಸಭೆತ್ತ ಅಧ್ಯಕ್ಷತೆ ವಹಿಸೊಂದು ಪಾತೆರಿಯೆರ್.
ಬೈಂದೂರು ವಿಧಾನಸಭಾ ಕ್ಷೇತ್ರಡ್ ಒಟ್ಟುಗು 2,29,550 ಮತದಾರೆರ್, ಕುಂದಾಪುರ ವಿಧಾನಸಭಾ ಕ್ಷೇತ್ರಡ್ 2,04,525 ಮತದಾರೆರ್, ಒಡಿಪು ವಿಧಾನಸಭಾ ಕ್ಷೇತ್ರಡ್ 2,11,631 ಮತದಾರೆರ್, ಕಾಪು ವಿಧಾನಸಭಾ ಕ್ಷೇತ್ರಡ್ 1,85,088 ಮತದಾರೆರ್, ಕಾರ್ಲ ವಿಧಾನಸಭಾ ಕ್ಷೇತ್ರಡ್ 1,86,451 ಮತದಾರೆರ್ ಉಲ್ಲೆರ್. ಜಿಲ್ಲೆದ ಒಟ್ಟು ವಿಧಾನಸಭಾ ಕ್ಷೇತ್ರರ್ದ್ 490,060 ಆoಜೋವುಲು, 5,26173 ಪೊಂಜೋವುಲು, 12 ಅಲ್ಪಸಂಖ್ಯಾತೆರ್ ಸೇರಿನಂಚನೆ ಒಟ್ಟು 10,16,245 ಮತದಾರೆರ್ ಉಲ್ಲೆರ್.
ಕಾಸ್ರೋಡು: ಬಿರುವೆರ್ ಕುಡ್ಲ ಪೈವಳಿಕೆ ಘಟಕದ ಸಾಮೂಹಿಕ ಸತ್ಯನಾರಾಯಣ ಪೂಜೆ, ಉದಿಪನ ಬೊಕ್ಕ ಪದಗ್ರಹಣ ಲೇಸ್ ಜ.8 ಐತಾರ ಬಾಯಿಕಟ್ಟೆ ಶ್ರೀ ಅಯ್ಯಪ್ಪ ಭಜನಾ ಮಂದಿರಡ್ ನಡಪರೆ ಉಂಡು.
ಬೊಲ್ಪುಗು ದೇವೆರೆನ ಪ್ರಾರ್ತನೆ ಗಣಹೋಮ, ಸಾಮೂಹಿಕ ಸತ್ಯನಾರಾಯಣ ಪೂಜೆ, ಮಂಗಳಾರತಿ ಆದ್ ಸಭಾ ಲೇಸ್ ನಡಪುಂಡು. ಈ ಲೇಸ್ ಡ್ ಸ್ಫೂರ್ತಿ, ಅತುಲ್ ಸುವರ್ಣ, ದಿಶಾ ಬೊಕ್ಕ ಸಾನ್ವಿ ಮೊಕ್ಲೆರ್ದ್ ಸ್ವಾಗತ ನೃತ್ಯ ನಡಪರೆ ಉಂಡು. ಪೃಥ್ವಿನ್, ದೃಶಾ, ಚರಿತ್ ಕನಿಹಿತ್ತಿಲು ಪ್ರಾರ್ತನೆ ಮಲ್ಪುವೆರ್. ಶ್ರೀಧರ ಅಮ್ಮೇರಿ ಎದ್ಕೊನುವೆರ್. ಗುರ್ಕಾರ್ಮೆನ್ ಬಿರುವೆರ್ ಕುಡ್ಲ ಪೈವಳಿಕೆ ಘಟಕದ ಅಧ್ಯಕ್ಷೆರ್ ಗಣೇಶ್ ಪೂಜಾರಿ ಸ್ಥಾನದ ಮನೆ ಒಯಿಸೊನ್ವೆರ್. ಕಾಸ್ರೋಡು ಜಿಲ್ಲಾ ಸಂಘಟನೆದ ಕಾರ್ಯದರ್ಶಿ ಉದಯ ಕುಮಾರ್ ಅಮ್ಮೇರಿ ಪ್ರಾಸ್ತಾವಿಕ ಪಾತೆರ್ರೆ ಉಲ್ಲೆರ್. ವಕೀಲೆರ್ ಚಂದ್ರಶೇಖರ ಎಂ ಅಮೀನ್ ಮುಖ್ಯ ಭಾಷಣ ಮಲ್ಪುವೆರ್. ಫ್ರೆಂಡ್ಸ್ ಬಳ್ಳಾಲ್ ಬಾಗ್ ಬಿರುವೆರ್ ಕುಡ್ಲ ಸ್ಥಾಪಕಾಧ್ಯಕ್ಷೆರ್ ಉದಯ ಪೂಜಾರಿ ಬಳ್ಳಾಲಬಾಗ್ ಉದಿಪನ ಮಲ್ಪುವೆರ್. ಮಲ್ಲ ಬಿನ್ನೆರಾದ್ ಶ್ರೀ ಕ್ಷೇತ್ರ ಗೆಜ್ಜೆಗಿರಿತ್ತ ಗೌರವಾಧ್ಯಕ್ಷೆರ್ ಜಯಂತ್ ನಡುಬೈಲು, ಮುಕ್ಕ ಶೀನಿವಾಸ ಕಾಲೇಜ್ ದ ಪ್ರೊ. ಎಮ್. ಎಸ್ ಕೋಟ್ಯಾನ್, ಕೇರಳ ನಿವೃತ್ತ ಸಬ್ ಇನ್ಸ್ ಪೆಕ್ಟರ್ ಶೀನಪ್ಪ ಪೂಜಾರಿ ಅಲಾರು, ಮಾಜಿ ರಣಜಿ ಕ್ರಿಕೆಟ್ ಆಟಗಾರೆ ಚಂದ್ರಶೇಖರ್ ಕೆ, ಬಿರುವೆರ್ ಕುಡ್ಲ ಫ್ರೆಂಡ್ಸ್ ಬಳ್ಳಾಲ್ ಬಾಗ್ ದ ಅಧ್ಯಕ್ಷೆರ್ ರಾಜೇಶ್ ಪೂಜಾರಿ, ಮಹಿಳಾ ವೇದಿಕೆದ ಅಧ್ಯಕ್ಷೆರ್ ವಿದ್ಯಾರಾಕೇಶ್ ಬರಿಯೆರೆ ಉಲ್ಲೆರ್. ಬೊಕ್ಕ ತರವಾಡ್ ದ ಇಲ್ಲದಕ್ಲೆಗ್ ಮಾನಾದಿಗೆ ಮಲ್ಪರೆ ಉಂಡು. ರಿತೇಶ್ ಅಂಚನ್ ಕುಲಶೇಖರ, ಜಯಂತಿ ಕೆ. ಪೈವಳಿಕೆ ಲೇಸ್ ದ ಸುಧಾರಿಕೆ ಮಲ್ಪುವೆರ್. ಬಿರುವೆರ್ ಕುಡ್ಲದ ಪ್ರಧಾನ ಕಾರ್ಯದರ್ಶಿ ಜಿತೇಶ್ ಕುಮಾರ್ ಚಕ್ಕರಗುಲಿ ಸೊಲ್ಮೆ ಸಂದಾವೆರ್. ಬೊಕ್ಕ ಮಧ್ಯಾಹ್ನ ಅನ್ನಸಂತರ್ಪಣೆ ನಡಪರೆ ಉಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ದೇಶಡ್ ಕೊರೊನಾದ ಪೊಸ ಸೀಕ್ ಪೋಡಿಗೆ ಕಟ್ಟಾಂಡ, ಉತ್ತರ ಪ್ರದೇಶದ ಉನ್ನಾವೊದ ಹಳ್ಳಿಡ್ ದಡಾರ ಸೀಕ್ ಬೈದ್ಂಡ್.
ಮೂಜಿ ವಾರಡ್ ಒಂಜೇ ಕುಟುಂಬದ ಮೂಜಿ ಜೋಕುಲು ದಡಾರರ್ದ್ ತೀರ್ ಪೋತೆರ್ ಪಂದ್ ವೈದ್ಯಾಧಿಕಾರಿ ಸತ್ಯ ಪ್ರಕಾಶ್ ತೆರಿಪಾದೆರ್. ಅತ್ತಂದೆ ಉಂದುವೇ ಗ್ರಾಮಡ್ ನನ 35 ಜೋಕುಲು ಈ ಸೀಕ್ ಡ್ ನರೆಲೊಂದು ಉಲ್ಲೆರ್ ಪಂದ್ ತೆರಿದ್ ಬೈದ್ಂಡ್.
ಮಂಜೇಶ್ವರ: ಪಯ್ಯತ್ತೋಡು ಶ್ರೀ ರಾಮ ಸೇವಾ ಭಜನಾ ಮಂದಿರದ ಅಮೃತ ಉಚ್ಚಯದ ಲೆಕ್ಕೊಡು ಅಖಂಡ ಭಜನಾ ಸಪ್ತಾಹ ಬೊಕ್ಕ ಸಾಂಸ್ಕೃತಿಕ ಲೇಸ್ ಪೇಜಾವರ ಶ್ರೀ ವಿಶ್ವಪ್ರಸನ್ನ ತೀರ್ಥ ಸಾಮೀಜಿಲೆನ ಆಶೀರ್ವಾದದೊಟ್ಟಿಗೆ ಜ.21 ರ್ದ್ 29ಮುಟ್ಟ ನಡಪರೆ ಉಂಡು.
ವೇದಮೂರ್ತಿ ಮರಿಭಟ್ ಕಣ್ಣತೀರ್ಥ ಮೇರ್ ದೀಪ ಪ್ರತಿಷ್ಠೆ ಮಲ್ಪುವೆರ್. ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಅಧ್ಯಕ್ಷೆರ್ ವಿಜಯ ಕುಮಾರ್ ಕಣ್ವತೀರ್ಥ, ಗೌರವಾಧ್ಯಕ್ಷೆರ್ ಪ್ರದೀಪ್ ಕುಮಾರ್ ಕಲ್ಕೂರು, ಉಪಾಧ್ಯಕ್ಷೆರ್ ಸಚ್ಚೀಂದ್ರ ದೇವಾಡಿಗ ಟಿ.ಪಿ ಹೌಸ್, ಸುಕನ್ಯಾ ನವೀನ್ ಕಾಂತೊಚ್ಚಿಲ್, ಕೋಶಾಧಿಕಾರಿ ನಿತಿನ್ ಕಾಡಬಳಿ, ಕಾರ್ಯದರ್ಶಿ ಹರೀಶ್ ಕುಮಾರ್ ಮಜಲ್ ಕಣ್ವತೀರ್ಥ, ಅಕ್ಷಯ್ ಮುಗುಲ್ಯ, ಜತೆ ಕಾರ್ಯದರ್ಶಿ ಅಶ್ವಥ್ ಪಯ್ಯತ್ತೋಡು, ಅಕ್ಷಯ್ ಕಾಡಬಳಿ, ಸಲಹೆಗಾರೆರ್ ಮಧುಸೂದನ ಆಚಾರ್ಯ, ಲೆಕ್ಕ ಪರಿಶೋಧಕೆರ್ ತಾರಾನಾಥ ಕಜೆಕೋಡಿ, ಭಜನಾ ಸಂಚಾಲಕೆರ್ ಸುನಿಲ್ ಕುಮಾರ್ ಮಜಲ್ ಕಣ್ವತೀರ್ಥ ಲೆಪ್ಪೋಲೆಡ್ ತೆರಿಪಾದೆರ್.
