ಕುಡ್ಲ: ರಾಹುಲ್ ಅಮೀನ್ ನಿರ್ದೇಶನದ ತುಳು ಚಿತ್ರ ರಾಜ್ ಸೌಂಡ್ಸ್ & ಲೈಟ್ಸ್ ತನ್ನ 100 ದಿನತ್ತ ಸಂಭ್ರಮನ್ ಸೆ.8 ತಾರೀಕ್ ಗ್ ಬಯ್ಯ 5 ಗಂಟೆಗ್ ಕುಡ್ಲದ ಟೌನ್ಹಾಲ್ಡ್ ಭಾರೀ ಗೌಜಿಡ್ ನಡಪರೆ ಉಂಡು. ಅಂಚನೆ ಆನಿ ಪೊಸ ಪಿಚ್ಚರ್ದ ಪುದರ್ನ್ಲ ಘೋಷಣೆ ಮಲ್ಪರೆ ಉಲ್ಲ ಪಂದ್ ರಾಜ್ ಸೌಂಡ್ಸ್ ಆಂಡ್ ಲೈಟ್ಸ್ ಪಿಚ್ಚರ್ದ ನಾಯಕೆ ನಟೆ ವಿನಿತ್ ಕುಮಾರ್ ಪಂಡೆರ್.
ಪತ್ರಿಕಾಗೋಷ್ಠಿಡ್ ಪಾತೆರಿನ ಆರ್, ರಾಜ್ ಸೌಂಡ್ಸ್ & ಲೈಟ್ಸ್ ಪಿಚ್ಚರ್ದ ಯಶಸ್ಸ್ಗ್ ಕಾರಣ ಆತಿನ ಮಸ್ತ್ ಜನಕ್ಕ ಆನಿ ಮಾನಾದಿಗೆ ಮಲ್ಪರೆ ಉಂಡು. ಈ ಪಿಚ್ಚರ್ ಒಂಜಿ ಸಂಪೂರ್ಣವಾದ್ ಕಾಮಿಡಿ ಅಂಚನೆ ಕುಟುಂಬದಕುಲು ಕುಲ್ದು ತೂಪಿನ ಪಿಚ್ಚರ್ ಆತ್ಂಡ್. ಆನಂದ್ ಎನ್ ಕುಂಪಲ ಈ ಪಿಚ್ಚರ್ ನ್ ನಿರ್ಮಾಣ ಮಲ್ತ್ ದೆರ್. ಅಂಚನೆ ಬಿ ಅಶೋಕ್ ಕುಮಾರ್, ಸೀತಾರಾಮ್ ಶೆಟ್ಟಿ, ಅಜಯ್ ಬಾಳಿಗ, ಸುಹಾನ್ ಪ್ರಸಾದ್, ಪವನ್ ಕುಮಾರ್, ನಿತಿನ್ ರಾಜ್ ಶೆಟ್ಟಿ ಬೊಕ್ಕ ಅರ್ಪಿತ್ ಅಡ್ಯಾರ್ ಸಹ-ನಿರ್ಮಾಣ ಮಲ್ತ್ ದೆರ್ ಪಂದ್ ಪಂಡೆರ್.
ಈ ಪಿಚ್ಚರ್ ದ ನಿರ್ದೇಶಕೆರ್ ಆಯಿನ ರಾಹುಲ್ ಅಮೀನ್ ಪಾತೆರ್ದ್, ಈ ಪಿಚ್ಚರ್ 100 ದಿನ ಬಲ್ತ್ದ್ಂಡ್. ಉಂದೆಕ್ಕಾದ್ ಯಂಕುಲೆಗ್ ಸಕಾರ ಮಲ್ತಿನ ಮಾತೆರೆಗ್ಲಾ ಸೊಲ್ಮೆ ಸಂದೈತ ಮಲ್ಪುವ. ನನ ದುಂಬು ಬರ್ಪಿನ ನಮ್ಮ ಪೊಸ ಪಿಚ್ಚರ್ ಗ್ ಇಂಚನೆ ಸಾಕಾರ ಕೊರ್ಲೆ ಪಂದ್ ಪಂಡೆರ್.
ಪಿಚ್ಚರ್ ಡ್ ವಿನೀತ್ ಕುಮಾರ್, ಯಶ ಶಿವಕುಮಾರ್, ಅರವಿಂದ್ ಬೋಳಾರ್, ಕರಿಷ್ಮಾ ಅಮೀನ್, ಭೋಜರಾಜ್ ವಾಮಂಜೂರು, ನವೀನ್ ಡಿ ಪಡೀಲ್, ಪ್ರಸನ್ನ ಶೆಟ್ಟಿ ಬೈಲೂರು, ಚೈತ್ರಾ ಶೆಟ್ಟಿ, ಸಂದೀಪ್ ಶೆಟ್ಟಿ ಮಾಣಿಬೆಟ್ಟು, ರೂಪ ವರ್ಕಾಡಿ, ಮೆರ್ವಿನ್ ಶಿರ್ವ, ನಮಿತ್ ಕುಳೂರ್ ಅಂಚನೆ ಮಸ್ತ್ ಜನ ನಟನೆ ಮಲ್ತ್ದೆರ್.
ರಾಜ್ ಸೌಂಡ್ಸ್ & ಲೈಟ್ಸ್ ಆಸ್ಟ್ರೇಲಿಯಾ, ಕೆನಡಾ, ಒಮನ್, ಕುವೈತ್, ಬಹ್ರೇನ್ ಬೊಕ್ಕ ಸೌದಿ ಅರೇಬಿಯಾಡ್ಲ ಬುಡುಗಡೆ ಆತ್ಂಡ್.
pallavi shetty