ದೇಶ ಪರ್ಯಟನೆಗ್ ಪಿದಾಡಿಯೆರ್ ಕುಡ್ಲದ ಜವಣ್ಯೆರ್ : ” NoMad People ” ಕೂಟದ ಆಲ್ ಇಂಡಿಯಾ ರೈಡ್
ನಾಲ್ ಗಾಲಿ ದೇಹನ್ ದುಂಬು ಕೊನೊಂಡ, ರಡ್ಡ್ ಗಾಲಿ ಆತ್ಮನ್ ದುಂಬು ಕೊನೊಪುಂಡು ಪನ್ಪಿ ಪಾತೆರ ಉಂಡು. ಮೂಲೊಂಜಿ ಕುಡ್ಲದ ಬೆಚ್ಚ ನೆತ್ತೆರ್ದ ಲತ್ತ್ ಜವಣ್ಯೆರ್ನ ಕೂಟ ಒಂಜಿ ದೇಶ ಪರ್ಯಟನೆಗ್ ಪೋದು ಅಲ್ಪದ ಜನಕ್ಲೆನ ಆಚಾರ ಇಚಾರ, ಸಂಸ್ಕೃತಿ ಸಂಪ್ರದಾಯ, ತೆನಸ್ ವನಸ್ ದ ಬಗ್ಗೆ ತೆರಿಯೊನೆರೆ ಪೋತಿನ ಕುಡ್ಲದ ಜನಕ್ಲೆಗ್ ಪೆರ್ಮೆ ಪಂಡ ತಪ್ಪಾವಂದ್.
ಒಂಜತ್ತ್ ರಡ್ಡತ್ತ್ ಬರೋಬ್ಬರಿ 13 ರಾಜ್ಯ 11 ಸಾರರ್ದ್ ಲಾ ಜಾಸ್ತಿ ಕಿಮೀ ಬೊಕ್ಕ ಒಂಜರೆ ತಿಂಗೊಲ್ದ ಪಯಣ ಮುಖೇನ ‘ಆಲ್ ಇಂಡಿಯಾ ರೈಡ್ ಗ್ ‘ ಕುಡ್ಲದ ಜವಣ್ಯೆರ್ ತನ್ನ ತನ್ನ ಬೈಕ್ ಏರೊಂದು ಪಿದಾಡ್ದೆರ್ .
ದೇಶೊದ ಬೇತೆ ಬೇತೆ ರಾಜ್ಯೊದ ಸಂಸ್ಕೃತಿ, ಆಚಾರ-ವಿಚಾರದ ಪೊಲಬು ಮಲ್ತೊಂದು ಅವೆನ್ “ನೋ ಮ್ಯಾಡ್ ಪೀಪಲ್ “ ಪನ್ಪಿನ ಯೂಟ್ಯೂಬ್ ಚಾನೆಲ್ ದ ಮುಖೇನ ಜನಕ್ಲೆಗ್ ಪಟ್ಟೊಂದು ಉಲ್ಲೆರ್.
ಅಂದ್ ಈ ಜವಣ್ಯೆರ್ ಮೂಲತಃ ಕುಡ್ಲದಕುಲು. ಶಿಶಿರ್ ಶೆಟ್ಟಿ, ಮೋಕ್ಷಿತ್ ಪೂಜಾರಿ, ಆದಿತ್ಯ ನಾಯಕ್ ಧನುಷ್ ಶೆಟ್ಟಿ, ಪವನ್ ಶೆಟ್ಟಿ, ಗಗನ್ ದೀಪ್ ಗೌಡ, ದೀಕ್ಷಿತ್ ಕುಮಾರ್ ಪುದರ್ ದ ಜವಣ್ಯೆರ್ನ ಕೂಟ, ಒಟ್ಟುಗು ಬೆನ್ನಿ ಬೆನೊಂದು ತನ್ನ ಕಸುಬುದೊಟ್ಟುಗು ದೂರದ ಊರುಗು ಬೈಕ್ಡ್ ಪೋಪಿನಿ ಪಂಡ ಬಾರಿ ಪ್ರೀತಿ. ಇತ್ತೆ ದೇಶದ 13 ರಾಜ್ಯ ಸುತ್ತುನ ಕನ ಮೇ 24 ಕ್ಕ್ ನಂಬಿನಕ್ಲೆಗ್ ಇಂಬು ಕೊರ್ಪಿನ ಕೊರಗಜ್ಜನ ಸಾನಿಧ್ಯೊಡು ಸುರು ಆತುಂಡು.
ಈ ಜವಣ್ಯೆರ್ ತನ್ನ ಬೈಕ್ ಡ್ ಪ್ರಯಾಣ ಸುರು ಮಲ್ದೆರ್ . ಬೈಕ್ದ ನಾಲ್ ಕಡೆಟ್ ದಿನ ನಿತ್ಯ ಗಲಸುನ ವಸ್ತು ಅಂಚನೆ ಕ್ಯಾಮರಾ ಪಾಡೊಂದು ಪ್ರತಿದಿನ ಪೋಪುನಂಚಿನ ರಾಜ್ಯೊದ ಸಂಸ್ಕೃತಿ, ತೆನಸ್ ದ ಪದ್ದತಿ, ಆಚಾರದ ಬಗ್ಗೆ ಮಾಹಿತಿನ್ ಪಡೆಯೊಂದು ತನ್ನ ಯೌಟ್ಯೂಬ್ ಚಾನೆಲ್ ಡ್ ಜನಕ್ಲೆಗ್ ಪಟ್ಟುನ ಕಜ್ಜ ಮಲ್ತೊಂದು ಉಲ್ಲೆರ್.
ಈ ರೈಡ್ ಗಾದ್ ಈ ಜವಣ್ಯೆರ್ ತನ್ನ ಬೈಕ್ನ್ ವಿಶೇಷ ರೀತಿಡ್ ತಯಾರ್ ಮಲ್ದೆರ್ . ಬೈಕ್ಡ್ ಟೂಲ್ಕಿಟ್ರ್ದ್ ಪತ್ತ್ ದ್ ಅಂಗಿ ಕುಂಟು, ತೆನಸ್ ಇಂಚ ಮಾತಲ ಬಾಕ್ಸ್ ಮಾದರಿಡ್ ಬೈಕ್ ನ್ ಮೋಡಿಫೈ ಮಲ್ದೆರ್ . ನೆತ್ತ ಒಟ್ಟುಗು ಹೆಲ್ಮೆಟ್ಡ್ ವಿಶೇಷವಾಯಿನ ಕ್ಯಾಮೆರಾ, ಮೈಕ್ರೋಫೋನ್ ದ ಮುಖೇನ ನಿರಂತರ ಪೋವೊಂದು ಉಪ್ಪುನ ಬೈಕ್ರ್ದ್ ಪಾತೆರ ಸುರು ಮಲ್ಪುವೆರ್.ಇಂಚ ನನಲ 1 ತಿಂಗೊಲು ಬೇತೆ ಬೇತೆ ಸಂಸ್ಕೃತಿ ,ಸಂಪ್ರದಾಯದ ಪೊಲಬು ಪಟ್ಟೆರೆ ಈ ಜವಣ್ಯೆರ್ ತಯಾರ್ ಆದ್ ಉಲ್ಲೆರ್.
“ಕನಸೆಂಬ ಕುದುರೆಯನ್ನೇರಿ ನಾ ಹೊರಟಿರುವೆ ” ಪನ್ಪಿನ ಪಾತೆರದಲಕ ತನ್ನ ಕಸುಬುನು ಬುರ್ದು ಬೇತೆ ಜಾಗೆದ ಅನುಭವ ಪಡೆಯೆರೆ ಪಿದಾಡ್ದೆರ್ ಈ ಜವಣ್ಯೆರ್. ಜಗತ್ತ್ ದ ಮೂಜನೆ ಕಣ್ಣ್ ಕೆಮರಾ, ಕೆಮರಾ ಪತ್ತೆರೆ ಮಾತೆರೆಗ್ಲಾ ಬರ್ಪುಂಡು ಆಂಡ ಅವೆನ್ ಪತ್ತ್ ದ್ ಪೊರ್ಲುದ ಪೋಟೋ ಕ್ಲಿಕ್ ಮಲ್ಪರೆ ಹವ್ಯಾಸಿ ಪೋಟೋಗ್ರಾಪರ್ ಗಾತೆ ಸಾಧ್ಯ . ಈ ಹವ್ಯಾಸ ಮಾತೆರೆಗ್ಲಾ ಬರ್ಪುಜಿ. ಪೊರ್ತು ಸಂದರ್ಭ ಸನ್ನಿವೇಶದ ಶಾಶ್ವತ ನೆಂಪುನು ನೆಂಪು ಮಲ್ಪುನಲ್ಪ ಇಂಚಿನ ಜವಣ್ಯೆರ್ನ ಪಾತ್ರ ಬಾರಿ ಮುಖ್ಯ. ಪೊಲಬು ದಾoತಿ ಜಾಗೆದ ಪೊಲಬುನು ಜನಕ್ಲೆನ ಕಾರ ಮುದೆಲ್ಗ್ ಮುಟ್ಟಾವುನ ಬೇಲೆ ಮಲ್ತೊಂದು ಉಪ್ಪುನ ” No Mad People “ ಕೂಟದ ಜವಣ್ಯೆರ್ನ ಈ ಕಜ್ಜ ಲೊಕೊರ್ಮೆ ಪಸರಡ್ ಪನ್ಪಿನವು ಟೈಮ್ಸ್ ಆಫ್ ಕುಡ್ಲ ಪತ್ರಿಕೆದ ಆಶಯ.
ಇತ್ತೆದ ಯುವ ಸಮುದಾಯ ಎಲ್ಯ ಎಲ್ಯ ಕಾರಣೊಗು ಜೀವ ದೆತ್ತೊನುನ ನಿರ್ಧಾರ ಮಲ್ಪುವೆರ್ ಉಂದೆನ್ ತಪ್ಪಾಯೆರೆ ಜವಣ್ಯೆರ್ ಇಲ್ಲ್ ಬುಡ್ದು ಪಿದಾಯಿ ಬಲೆ , ದೇಶ ಸುತ್ತುದು ಹಳ್ಳಿ ಹಳ್ಳಿಗ್ ಪೋದು ಜನಕ್ಲೆನ ಒಟ್ಟುಗು ಪಾತೆರ್ಲೆ .ಪ್ರಕೃತಿದ ರುಚಿ ಪಡೆದ್ ಮನಸ್ ಬದಲ್ ಮಲ್ಪೊಲಿ ಅಲ್ಪದ ಆಚಾರ ಇಚಾರನ್ ನಾಲ್ ಜನಕ್ ಪಟ್ಟುನ ಕಿನ್ಯ ಪ್ರಯತ್ನ ಈ ಕೂಟದವು ಪಂದ್ ಕೂಟದ ಸದಸ್ಯೆರಾಯಿನ ಶಿಶಿರ್ ಶೆಟ್ಟಿ ಪನ್ಪೆರ್.
ಬರವು : ಶ್ರೀನಿಧಿ ಶೆಟ್ಟಿ
pallavi shetty