ಕುಡ್ಲ : ಪೇಂಟೆದ ಡೊಂಗರಕೇರಿ ವಾರ್ಡ್ ದ ಕೆನರಾ ಹೈಸ್ಕೂಲ್ ಮಾರ್ಗಡ್ ಉಪ್ಪುನ ಡೊಂಗರಕೇರಿ ಕಟ್ಟೆದ ಕೈತಲ್ ಫ್ಲಾಟ್ ದಕುಲು ವಾರಗಟ್ಟಲೆ ಗಾಡಿ ಪಾರ್ಕಿಂಗ್ ಮಲ್ತೊಂದು ಉಪ್ಪುನ ಬಗ್ಗೆ ಕೈತಲ್ ದಕುಲು ಆಕ್ರೋಶ ವ್ಯಕ್ತ ಮಲ್ದೆರ್ , ಶಾಸಕ ವೇದವ್ಯಾಸ ಕಾಮತ್, ಮೇಯರ್ ಪ್ರೇಮಾನಂದ ಶೆಟ್ಟಿ, ಕುಡ್ಲ ಪೊಲೀಸ್ ಕಮೀಷನರ್ ಎನ್. ಶಶಿಕುಮಾರ್, ಕೈತಲ್ ದ ಕಾರ್ಪೊರೇಟರ್ ಜಯಶ್ರೀ ಕುಡ್ವ ಮೆರೆಗ್ ಸೂಕ್ತ ಕ್ರಮ ಕೋರ್ದು ಮುಲ್ಪ ಪವಿತ್ರತೆ ಕಾಪೋಡು ಬೊಕ್ಕ ಪೇ ಪಾರ್ಕಿಂಗ್ ವ್ಯವಸ್ಥೆ ಮಲ್ತ್ ಇಜ್ಜಿoಡ ಮುಲ್ಪದ ಒಂಜಿ ಕಾಲದ ಅಭಿವೃದ್ಧಿ ಹರಿಕಾರ ಅಮ್ಮೆಂಬಳ ಸುಬ್ಬರಾವ್ ಪೈ ಜಾಗೆಡ್ ಸರ್ಕಲ್ ಮಲ್ಪೋಡು ಪಂದ್ ಕೈತಲ್ ದಕುಲು ಆಗ್ರಹ ಮಲ್ದೆರ್.
ಡೊಂಗರಕೇರಿಕಟ್ಟೆಡ್ ಕೆಲವು ಪ್ರಭಾವೀ ಜನಕುಲು ಗಾಡಿನ್ ಅಕ್ಲೆಗ್ ಬೋಡಾಯಿಲಕ ಪಾರ್ಕಿಂಗ್ ಮಲ್ತ್ ವಾರಗಟ್ಟಲೆ ದೆಪ್ಪoದೆ ಭಕ್ತಾದಿಲೆಗ್ ಉಪದ್ರ ಮಲ್ತೊಂದು ಉಲ್ಲೆರ್. ಕೈತಲ್ ದ ಕಟ್ಟೆದ ಪವಿತ್ರತೆಗ್ ಧಕ್ಕೆ ಮಳ್ತೊಂದುಲ್ಲೆರ್ ಪಂದ್ ಭಕ್ತಾದಿಲು ದೂರು ಕೊರ್ತೆರ್ .
ಕೆಲವೆರ್ ರಾತ್ರಿ ಪೊರ್ತುಡು ಪರ್ದ್ ಬೊಬ್ಬೆ ಪಾಡೊಂದು, ಪದ್ಯ ಪನೊಂದು ಕಟ್ಟೆದ ಶಾಂತ ಪರಿಸರನ್ ಹಾಳ್ ಮಲ್ತೊಂದು ಉಲ್ಲೆರ್ ಈ ಬಗ್ಗೆಲಾ ದೂರು ಕೊರ್ತೆರ್.ಈ ಕಟ್ಟೆ ಬಾರಿ ಪಿರಾಕ್ ರ್ದ್ ಲಾ ನಾಗದೇವೆರ್ನ ಬೊಕ್ಕ ಬ್ರಹ್ಮದೇವರ ಆರಾಧನಾ ಜಾಗೆ ಆದ್ ಉಂಡು.. ಪ್ರತೀ ತಿಂಗೊಲು ಪಂಚಮಿದಾನಿ ಬೊಕ್ಕ ಅಮವಾಸ್ಯೆದಾನಿ ಮುಲ್ಪ ಗಣಪತಿ ಮಠದ ಭಟ್ರ್ ಪೂಜೆ ಮಲ್ಪುವೆರ್ . ಈ ಧಾರ್ಮಿಕ ಉಚ್ಚಯಗ್ ಜಾಗೆದ ಬೊಕ್ಕ ದೂರದ ಭಕ್ತೆರ್ ಬರ್ಪೆರ್ ಆಂಡ ಮುಲ್ಪ ಕೆಲವು ಪ್ರಭಾವೀ ಜನಕ್ಲೆನ ಗಾಡಿ ರ್ದಾವರ ಭಕ್ತೆರೆಗ್ ವಾಹನಗಳ ಬಂಗ ಆವೊಂದು ಉಂಡು.
ಕಟ್ಟೆ ದ ಬರಿಟ್ ಉಪ್ಪುನ ಜಾಗೆಡ್ ಕುಡ್ಲ ಮಹಾನಗರ ಪಾಲಿಕೆದಕುಲು ನಿರ್ಮಲ ಮಲ್ಪುನ ಬೇಲೆ ಮಲ್ಪೋಡು ಪಂದ್ ಜನಕುಲು ಅಗ್ರಹ ಮಲ್ದೆರ್. ಈ ಬಗ್ಗೆ ಶಾಸಕ ವೇದವ್ಯಾಸ ಕಾಮತ್ ಆಯಿನಾತ್ ಬೇಗ ಗಮನ ಕೊರ್ದು ಸೂಕ್ತಕ್ರಮ ದೆತೊನೆರೆ ಅಧಿಕಾರಿಲೆಗ್ ಆದೇಶ ಕೊರೊಡು..
ಕಾರ್‌ಸ್ಟ್ರೀಟ್ ವೆಂಕಟರಮಣ ದೇವಸ್ಥಾನ, ಮಹಮ್ಮಾಯಿ ದೇವಸ್ಥಾನ, ವೆಂಕಟರಮಣ ದೇವಸ್ಥಾನ-ಡೊಂಗರಕೇರಿ-ವೈಶ್ಯ ಸಮಾಜಡ್ ಡೊಂಗರಕೇರಿಕಟ್ಟೆಡ್ ಕೆಲವು ಉಚ್ಚಯ ಪೂಜೆ ನಡತೊಂದು ಉಂಡು. . ಇಂಚಿನ ಪವಿತ್ರ ಕಟ್ಟೆದ ಪವಿತ್ರತೆನ್ ಒರಿಪಾವುನವು ಜನಕ್ಲೆನ ಆದ್ಯ ಕರ್ತವ್ಯ ಆದ್ ಉಂಡು.
Editorial