ಫ್ಲೋರಿಡಾ ತುಳುಕೂಟದ ಬಿಸುಪರ್ಬ, ವರ್ಷಾಚರಣೆ

ಐಲೇಸಾದ ರಡ್ಡ್ ತುಳು ಪದ ಉಂದು ಮಣ್ಣ್ ದಾ ಬಾಜನ ಬೊಕ್ಕ ಕಬಿತೆ ಪುಟ್ಟು೦ಡೊ ಬುಡುಗಡೆ 

ಅಮೆರಿಕಾಡ್ ನಿಲೆಯಾತಿ ತುಳುವೆದಿ ಶ್ರೀಮತಿ ಶ್ರೀವಲ್ಲಿರೈ ಮಾರ್ಟೆಲ್ ಮೆರೆನ ಮುತಾಲಿಕೆಡ್ ಪೋಯಿ ವರ್ಷ ಬಿಸುತಾನಿ ಉಂಡಾಯಿನ ಸಂಸ್ಥೆ ಫ್ಲೋರಿಡಾ ತುಳುಕೂಟೊಗು ಇತ್ತೇ ಒಂಜಿ ವರ್ಷದ ಖುಷಿ . ಈ ನೆಂಪುಗಾದ್ ಮೇ 7ನೇ ತಾರೀಖ್ ಶನಿವಾರ ಬೈಯ್ಯಗ್ ಭಾರತದ 7 ಗಂಟೆಗ್ ಸರಿಯಾದ್ ಯೂ ಟ್ಯೂಬುದ ವೇದಿಕೆಡ್ ವರ್ಷದ ದಿನ ಬೊಕ್ಕ ಬಿಸು ಪರ್ಬ ದ ಮಿನದನ ನಡಪರೆ ಉಂಡು.

ವಿಶ್ವದ ಮಾತಾ ತುಳುವೆರ್ ಸೇರ್ದ್ ತುಳು ಆಚಾರ ವಿಚಾರ , ಪದ ಕುಣಿತ ಪ್ರತಿಭಾ ಪ್ರದರ್ಶನ ಮಲ್ಪುನ ಮುಕಾಂತ್ರ ಆನಿದ ಬಿಸು ಪರ್ಬದ ಆಚರಣೆ ಗೌಜಿ ಗಮ್ಮತ್ತ್ ಡ್ ನಡಪ ಕೊರ್ಪೆರ್.

ಈತ್ ಮಾತಾ ಅತ್ತಾವಂದೆ ಆನಿ ಐಲೇಸಾ – ದಿ ವಾಯ್ಸ್ ಆಫ್ ಓಷನ್ (ರಿ) ತುಳು ಸಾಹಿತ್ಯ ಲೋಕೊಗು ಕೊರಂದುಪ್ಪುನ ಪದ ಗೊಂಚಿಲ್ದ ರಡ್ಡ್ ಪದೊಕುಲು ಬುಡುಗಡೆ ಆದ್ ತುಳುವೆರೆ ಮಟ್ಟೆಲ್ಲ್ ಸೇರರೆ ಉಂಡು .

ಮುಂಬೈದ ತುಳು ಸಾಹಿತ್ಯದ ಮಲ್ಲ ದಾರಗೆ ಡಾ. ಸುನೀತಾ ಶೆಟ್ರು ಬರೆತಿನ ”ಕಬಿತೆ ಪುಟ್ಟು೦ಡೊ” ಪದೊನು ನಮ್ಮ ತುಳುನಾಡುದ ಕೋಗಿಲೆ ಕಲಾವತಿ ದಯಾನಂದ್ ಸ್ವರ ಕೊರ್ದು ಅಬುದಾಭಿದ ತುಳು ವಿಶ್ವ ಸಮ್ಮೇಳನ ಪುಗಾರ್ತೆದ ಸರ್ವೋತಮ ಶೆಟ್ರು ಲೋಕಾರ್ಪಣೆ ಮಲ್ಪುವೆರ್ .

ನನೊಂಜಿ ಪದ ಶಾಂತಾರಾಮ್ ಶೆಟ್ಟಿ ಬೆಂಗಳೂರು , ಬರೆತಿನ ”ಉಂದು ಮಣ್ಣ್ ದಾ ಬಾಜನ” ಪನ್ಪಿನ ಮಣ್ಣ ಬಾಜನದ ಸತು ಗುಣ ತೆರಿಪಾವುನ ಪದ ಆಲ್ ಅಮೇರಿಕ ತುಳು ಅಸೋಸಿಯೇಷನ್ ದ ಗುರ್ಕಾರ್ಲು ಆಯಿನ ಶ್ರೀ ಭಾಸ್ಕರ್ ಶೇರಿಗಾರ್ ಬುಡುಗಡೆ ಮಲ್ಪರೆ ಉಲ್ಲೆರ್ .

ಮುಂಬೈ ವಿಶ್ವವಿದ್ಯಾಲಯದ ಕನ್ನಡ ವಿಭಾಗದ ಸಹಾಯಕ ಅಧ್ಯಾಪಕಿ ಡಾ. ಪೂರ್ಣಿಮಾ ಸುಧಾಕರ್ ಶೆಟ್ಟಿ ಮೇರ್ ಬಿಸು ಪರ್ಬದ ಪೊಲಬು ಮಲ್ತು ಕೊರೊಂದುಲ್ಲೆರ್ . ಕನಾದ ತುಳು ಲಿಪಿಕೀಲಿ ಮಣೆತ ಡಾ. ಗುರುಪ್ರಸಾದ್ ತುಳು ಲಿಪಿ ತಾ ಬಗೆಟ್ ತಾಂತ್ರಿಕ ಮಾಹಿತಿ ಕೊರ್ಪೆರ್ .
ಅಂಚನೆ ಪುಗರ್ತೆದ ಗಾಯಕೆರಾಯಿನ ಡಾ. ರಮೇಶ್ಚಂದ್ರ , ಡಾ. ರಾಧಿಕಾ ಕಲ್ಲೂರಾಯ , ಹೇಮಾ ಕುಮಾರಿ ಎಂ , ಧನ್ಯ ರಾವ್ ಫ್ಲೋರಿಡಾ , ಜಿತೇಶ್ ಸುವರ್ಣ ಫ್ಲೋರಿಡಾ , ನಿಯತಿ ಯು ಶೆಟ್ಟಿ, ರವಿರಾಜ್ ಶೆಟ್ಟಿ , ಸುವಿದ್ ಮಾರ್ನಾಡ್ , ಅಂಶಿಕಾ ಬೊಕ್ಕ ಐನಿ ಗಾಯನ, ಅಭಿನಯ , ನಲಿಕೆದೊಟ್ಟುಗು ತುಳುವೆರೆನ ಉಡಲ್ ಗೆಂದೆರೆ ಉಲ್ಲೆರ್.

ಅನುಜ್ಞಾ ರಾವ್ ಫ್ಲೋರಿಡಾ , ರಜನಿ ಶರಣ್ ಫ್ಲೋರಿಡಾ, ರಾಧಿಕಾ ಅರ್ಪಣ್ ಫ್ಲೋರಿಡಾ, ಅರ್ಪಣ್ ನಾಯಕ್ ಫ್ಲೋರಿಡಾ ಮೊಕುಲು ಕಾರ್ಯಕ್ರಮೊನು ನಡಪಾ ಕೋರ್ಪೆರ್
ತುಳುವೆರ್ ಈ ಕಾರ್ಯಕ್ರಮೊನು Florida Tulukoota ಯೂ ಟ್ಯೂಬ್ ಚಾನೆಲ್ ಡ್ ತೂದು ಫ್ಲೋರಿಡಾ ತುಳುಕೂಟದ ವರ್ಷಾಚರಣೆ ಬೊಕ್ಕ ಬಿಸು ಪರ್ಬೊನು ಬೆರಿಸಾಯ ಕೊರೊಡುಂದು ಕೂಟದ ಅಧ್ಯಕ್ಷೆ ಶ್ರೀವಲ್ಲಿ ರೈ ಮಾರ್ಟೆಲ್ ಬೊಕ್ಕ ಪದಾಧಿಕಾರಿಲು ಟೈಮ್ಸ್ ಆಫ್ ಕುಡ್ಲ ಮುಕಾಂತ್ರ ಮೋಕೆದ ಬಿನ್ನಾಪು ಮಲ್ತೊ೦ದೆರ್ .