ಒಡಿಪು: ಕಾಪು ತಾಲೂಕ್ ದ ಮಟ್ಟು ಶ್ರೀ ನಾರಾಯಣ ಗುರು ಭಜನಾ ಮಂದಿರಡ್ 78ನೇ ವಾರ್ಷಿಕ ಮಂಗಲೋತ್ಸವ, ಗಣಹೋಮ, ಶ್ರೀ ಸತ್ಯನಾರಾಯಣ ಪೂಜೆ ಬೊಕ್ಕ ಜನಕುಲೆಗ್ ನುಪ್ಪು ಸೇವೆ ಏಪ್ರಿಲ್ 14 ತಾರೀಕ್ ಗ್ ಭಾರೀ ಗೌಜಿಡ್ ನಡಪರೆ ಉಂಡು.
ಕಾಂಡೆ 9 ಗಂಟೆಗ್ ಸಾಮೂಹಿಕ ಪ್ರಾರ್ಥನೆ ಬೊಕ್ಕ ಗಣಹೋಮ, 10 ಗಂಟೆಗ್ ಶ್ರೀ ಸತ್ಯನಾರಾಯಣ ಪೂಜೆ, 12 ಗಂಟೆಗ್ ಮಹಾಪೂಜೆ, ತೀರ್ಥಪ್ರಸಾದ, ವಿಶೇಷ ಭಜನಾ ಕಾರ್ಯಕ್ರಮ, 12.30 ಗ್ ಜನಕುಲೆಗ್ ನುಪ್ಪು ಸೇವೆ, ಬಯ್ಯ 6.45ಕ್ ಕಲಶ ಪ್ರತಿಷ್ಠೆ, ಭಜನಾ ಕಾರ್ಯಕ್ರಮ, ರಾತ್ರಿ 12 ಗಂಟೆಗ್ ಭಜನಾ ಮಹಾಮಂಗಲ, ಪ್ರಸಾದ ವಿತರಣೆ. ಎ.15 ತಾರೀಕ್ ಗ್ ಬಯ್ಯ 6.30 ಗ್ ಗುರುಪೂಜೆ, ರಾತ್ರಿ 7.30 ಗ್ ಸಾಂಸ್ಕೃತಿಕ ಕಾರ್ಯಕ್ರಮ, ರಾತ್ರಿ 8.30 ಗ್ ಪರಮ ಪದ್ಮ ಕಲಾವಿದೆರ್ ತುಳು ಜಾನಪದ ಐತಿಹಾಸಿಕ ನಾಟಕ ಚಲನಚಿತ್ರ ನಟೆ ಚೇತನ್ ರೈ ಮಾಣಿ ಅಭಿನಯ ಬಿರ್ಸೆ ಅನಿಕುಮಾರ್ ಸಸಿಹಿತ್ಲು ಬೊಕ್ಕ ಬೇತೆ ಪುಗರ್ತೆದ ಕಲಾವಿದೆರೆಡ್ದ್ ಶಿವ ಪುರ್ಸಾದ ಬಬ್ಬರ್ಯೆ ಪನ್ಪಿನ ತುಳು ನಾಟಕ ನಡಪರೆ ಉಂಡು.
ಒಡಿಪುದ ಶ್ರೀ ಕೃಷ್ಣನ ನಾಡ್ ದ ಶ್ರೀ ವಾದಿರಾಜ ಸ್ವಾಮಿಲೆನ ವರಪ್ರಸಾದ ಅಂಚನೆ ವಿಶ್ವ ವಿಖ್ಯಾತಿ ಪಡೆಯಿನ ಮಟ್ಟು ಗುಳ್ಳದ ಗ್ರಾಮ ಪಂದೇ ಪುಗರ್ತೆ ಪಡೆಯಿನ ಮಟ್ಟು ಗ್ರಾಮದ ಕಡಲತಡಿಟ್ಟ್ ಆರಾಧನೆ ಮಲ್ತೊಂದ್ ಬತ್ತಿನ ಮಂದಿರ ಶ್ರೀ ನಾರಾಯಣ ಗುರು ಭಜನಾ ಮಂದಿರ, ಮಟ್ಟು ತೆಂಕು ಕೊಪ್ಲ.
ಒಂಜೇ ಜಾತಿ ಒಂಜೇ ಮತ ಒಂಜೇ ದೇವೆರ್ ಪನ್ಪಿನ ಅಮರ ತತ್ವದ ಮುಖೇನ ಮುರ್ಕೊಂದಿತ್ತಿನ ಹಿಂದೂ ಧರ್ಮಗ್ ಪುನರ್ ಚೈತನ್ಯ ಕೊರಿನ ಮಹಾನ್ ಸಂತೆರ್ ಬ್ರಹ್ಮಶ್ರೀ ನಾರಾಯಣ ಗುರುಕುಲು. ಆರ್ನ ವಿದ್ಯೆರ್ದ್ ಸ್ವತಂತ್ರರಾಲೆ, ಸಂಘಟನೆರ್ದ್ ನನಲ ಗಟ್ಟಿ ಆಲೆ. ಬದುಕ್ ಉಂತಿನ ನೀರ್ ಆಯರೇ ಬಲ್ಲಿ. ಜಾತಿ ಒವ್ ಆಂಡಲ ದಾನೆ..? ಮನುಷ್ಯೇ ಎಡ್ಡೆ ಇಪ್ಪೊಡ್. ಇಂಚಿತ್ತಿನ ಅಮರ ಸಂದೇಶನ್ ಲೋಕಗ್ ಸಾರಿನ ಗುರುಕ್ಲೆನ ತತ್ವದಡಿಟ್ಟ್ 77 ವರ್ಷದ ಪಿರ ಮಂದಿರ ಉದಯ ಆಂಡ್.
1944 ಟ್ ದಿ| ಐತಪ್ಪ ಅಂಚನ್ ಮುತಾಲಿಕೆಡ್ ಸ್ಥಾಪನೆ ಆದ್, 1977 ಟ್ ಪುನರ್ ನಿರ್ಮಾಣ ಆಂಡ್. ಕರೀನ 77 ವರ್ಷಲೆಡ್ದ್ ಏಪಲ ಶನಿವಾರ ಭಜನಾ ಸಂಕೀರ್ತನೆ, ಶ್ರೀ ನಾರಾಯಣ ಗುರು ಜಯಂತಿ, ಶ್ರೀ ಸತ್ಯನಾರಾಯಣ ಪೂಜೆ, ವಾರ್ಷಿಕ ಭಜನಾ ಮಂಗಲೋಚ್ಚಯನ್ ಆಚರಣೆ ಮಲ್ತೊಂದ್ ಶ್ರದ್ಧಾ ಭಕ್ತಿದ ಕೇಂದ್ರವಾದ್ ಮೂಡ್ ದ್ ಬರೊಂದ್ಂಡ್.
ಭಕ್ತಾದಿ ಸದಸ್ಯೆರ್ನ ಆಶಯದಂಚನೆ, 43 ವರ್ಷರ್ದ್ ಪರ ಇತ್ತಿನ ಮಂದಿರನ್ 54 ಲಕ್ಷ ಖರ್ಚ್ ಮಲ್ತ್ ದ್ ಪುನರ್ ನಿರ್ಮಾಣ ಮಲ್ತ್ ದೆರ್. ಈ ಸಮಿತಿಡ್ ಇತ್ತೆ 52 ಜನ ಸದಸ್ಯೆರ್ ಉಲ್ಲೆರ್. ಸರ್ಕಾರರ್ದ್ 10 ಲಕ್ಷ ಅಂಚನೇ ರಾಜಕಾರಣಿರ್ದ್ 5 ಲಕ್ಷದ ಪಣವುದ ಸಾಕಾಯ ಈ ಮಂದಿರಗ್ ತಿಕ್ಕ್ ದ್ಂಡ್.
ಕೊರೊನಾದಂಚಿನ ಬಂಗದ ಪರಿಸ್ಥಿತಿಡುಲ ಊರುದ ಜನಕುಲು ಸಾಕಾಯ ಕೊರ್ತೆರ್. ಗ್ರಾಮೀಣ ಬದ್ ಕ್ ಗೊಂಜಿ ಶ್ರದ್ಧಾ ಭಕ್ತಿದ ಆಯಾಮನ್ ಕೊರ್ಪಿನ ಈ ಮಂದಿರ ನಾನಾತ್ ಎಡ್ಡೆ ಆವಡ್ ಪಂದ್ ಶ್ರೀ ನಾರಾಯಣ ಗುರು ಭಜನಾ ಮಂದಿರ, ಮಟ್ಟು, ತೆಂಕು ಕೊಪ್ಲದ ಗೌರವಾಧ್ಯಕ್ಷೆರ್, ಅಧ್ಯಕ್ಷೆರ್ ಬೊಕ್ಕ ಪದಾಧಿಕಾರಿಲು ಅಂಚನೇ ಸರ್ವ ಸದಸ್ಯೆರ್ ಎಡ್ಡೆಪ್ಪುನ್ ಬಯಕ್ ದೆರ್.
pallavi shetty