ಕುಡ್ಲ : ಅವ್ವೆತೋ ವರ್ಷ ಬದ್ಕ್ ದ್ ಇಲ್ಲದಕ್ಲೆನ್ ತೂವೊಡಾಯಿನ ಜವಣ್ಯೆ ಒರಿ ಎಲ್ಯ ಪ್ರಾಯೋಡೆ ದೇವೆರೆ ಪಾದೋ ಸೇರ್ದ್ ತನ್ನ ಬದ್ಕ್ ಮುಗಿತ್ ದೆರ್ ಆಂಡ ಪೋಪುನ ದುಂಬು ನಾನೊರಿಯನ ಬದ್ಕ್ ಗ್ ಬೊಲ್ಪಾದ್ ಪೋತೆರ್.
ಬೊಲ್ತೆರ್ ಪೇಂಟೆದ ಕೊಕ್ರಾಡಿ ಗ್ರಾಮದ ಆದರ್ಶ ನಗರ ನಿವಾಸಿ ಶಶಾಂಕ್ ಕುಡ್ಲಡ್ ಖಾಸಗಿ ಕಂಪನಿಡ್ ಬೇಲೆ ಮಲ್ತೊಂದು ಇತ್ತೆರ್ . 10ನೇ ತರಗತಿ ಕಲ್ತಿನ ಬೊಕ್ಕ ಶಿಕ್ಷಣ ಉಂತಾದ್ ಇಲ್ಲಡ್ ಕಾಸ್ ದ ಸಮಸ್ಯೆ ಇತ್ತಿನೆರ್ದಾವರ ಕುಡ್ಲದ ಖಾಸಗಿ ಕಂಪನಿಡ್ ಬೇಲೆ ಮಲ್ತೊಂದು ಇತ್ತೆರ್.
ಬೆಂದ್ ಇಲ್ಲ್ ತೂವೊಂದು ಇತ್ತಿನ ಶಶಾಂಕ್ ಗ್ ಕರಿನ ಒಂಜಿ ವರ್ಷರ್ದ್ ಕಾರ್ ಊತದ ಸಮಸ್ಯೆ ಇತ್ತುಂಡು . ಕಿಡ್ನಿ ಸಮಸ್ಯೆ ಪಂದ್ ತೋಜಾದ್ ಇತ್ತೆರ್ . ಮಾತಾ ಸ್ಕ್ಯಾನ್ ಮಲ್ದೆರ್ , ಮರ್ದ್ ಮಲ್ತುಂಡಲ ಸಮಸ್ಯೆ ಪರಿಹಾರ ಆದ್ ಇತ್ತುಜಿ . ಕರಿನ ಮೂಜಿ ದಿನರ್ದ್ ಶಶಾಂಕ್ ಜ್ವರ ಬತ್ತ್ ದ್ ಇಲ್ಲಡೆ ಇತ್ತೇ . ಕೋಡೆ ಬೈಯ್ಯಡ್ ಜ್ವರ ಜೋರ್ ಆಯಿನ ನೆಲೆಟ್ಟ್ ನಾರಾವಿಗ್ ಲೆತೊಂದು ಬತ್ತಿತ್ತೆರ್ , ಇಸಿಜಿ ಮಲ್ಪುನಗ ಹೃದಯ ಬಡಿತ ಜಾಸ್ತಿ ಆದ್ ಇತ್ತುಂಡು . ಐರ್ದ್ ಬೊಕ್ಕ ಕುಡ್ಲಗ್ ಲೆತೊಂದು ಬತ್ತ್ ದ್ ಸಿಟಿ ಸ್ಕ್ಯಾನ್ ಮಲ್ಪುನಗ ಹಾರ್ಟ್‌ಡ್ ಹೋಲ್ ತೊಜೀದ್ ಬತ್ತಿತ್ತುಂಡು . ಇನಿ ಕಾಂಡೆ ಶಶಾಂಕ್ ತೀರ್ ಪೋತೆರ್ . ಆಂಡ ಶಶಾಂಕ್ ಸಾವುಡ್ ಲಾ ಸಾರ್ಥಕತೆ ಮೆರೆತೆರ್ . ಆರ್ಥಿಕ ಸಮಸ್ಯೆ ಉಪ್ಪುನೆರ್ದಾವರ ಶಶಾಂಕ್ನ ಕಣ್ಣ್ ನ್ ದಾನ ಮಲ್ಪುನ ಮುಖೇನ ನನೊರಿಯನ ಬಾಳ್ ಗ್ ಬೊಲ್ಪಾತೆರ್ .
ಇತ್ತೇ ಆತೆ ಶಶಾಂಕ್ ನ ಮರ್ದ್ ದ ಖರ್ಚ್ ಗ್ ಲಕ್ಷಾಂತರ ಸಾಲ ಮಲ್ತ್ ಸೋತು ಪೋಟಿನ ಕುಟುಂಬಗ್ ಶಶಾಂಕ್ನ ಸಾವು ಮಲ್ಲ ಪೆಟ್ಟ್ ಆತುಂಡು . ಇಂಚಾದ್ ಸರ್ಕಾರದ ಒಂಜಾತ್ ಪಣವುದ ಸಾಕರಾದ ನಿರೀಕ್ಷೆ ಈ ಕುಟುಂಬಗ್ ಉಂಡು.
Editorial