ಬಂಟ್ವಾಳ ತಾಲೂಕ್ ದ ಅನಂತಾಡಿ ಗ್ರಾಮ ದೈವ ದೇವರ್ನ ಬೀಡಾತ್ಂಡ್. ಸಾರಮಾನ್ಯ ದೈವಲು ನೆಲೆಯಾಯಿನ ಜಾಗೆ. ಅನಂತಾಡಿ ಪಂಡ ನಮಕ್ ಸುರುಕ್ಕ್ ನೆಂಪು ಆಪಿನವ್ ಅನಂತಾಡಿದ ಮೆಚ್ಚಿ. ಉಂದು ಇಡೀ ತುಳುನಾಡ್ ಗೆ ಈ ಮೆಚ್ಚಿ ಪ್ರಧಾನವಾದುಂಡ್. ಅನಂತಾಡಿ ಗ್ರಾಮ ಕೆಲವೊಂಜಿ ವೈಶಿಷ್ಟ್ಯಲ್ ಇತ್ತಿನಂಚಿನ ಗ್ರಾಮ. ಮುಲ್ಪ ವೈದ್ಯ ಪದ್ದತಿನ್ ರೂಢಿಸಾಯಿನ ಪಂಡಿತೆರ್ ಮಸ್ತ್ ಜನ ಉಲ್ಲೆರ್. ಅಕುಲೆಡ್ದ್ ಪುಗರ್ತೆಗ್ ಬತ್ತಿನಾರ್ ದೇರ ಬೈದ್ಯ ಕುಟುಂಬಸ್ಥೆರ್. ಅವ್ವೆ ರೀತಿ ಮುಲ್ಪ ಉಳ್ಳಾಲ್ತಿ ನೆಲೆಯಾಂಡಲ ಗ್ರಾಮ ದೈವೊಲಾದ್ ಮಲರಾಯ, ಪಿಲ್ಚಂಡಿ, ಜುಮಾದಿ ಬೊಕ್ಕ ಕಲ್ಕುಡ ಕಲ್ಲುರ್ಟಿ ದೈವೊದ ಆರಾಧನೆನ್ ಪಡೆಯೊಂದ್ ಉಲ್ಲೆರ್. 12 ವರ್ಷಗೊರ ಉಳ್ಳಾಲ್ತಿಗ್ ಧರ್ಮ ಮೆಚ್ಚಿ ನಡಪುಂಡ್. ಉಂದುವೇ ರೀತಿಡ್ ಮುಲ್ಪ ಬನ್ನಿಂತಾಯ ಬ್ರಾಹ್ಮಣೆರ್ನ ಕೊಬ್ರಿ ಮಠದ ವೆಂಕಟ್ರಮಣ ದೇವೆರ್ ಅಂಚನೆ ಕರಿಂಕ ಶ್ರೀ ದುರ್ಗಾಪರಮೇಶ್ವರಿ ದೇವೆರೆನ್ಲ ಗ್ರಾಮ ದೇವೆರಾದ್ ಆರಾಧನೆ ಮಲ್ತೊಂದುಲ್ಲೆರ್.
ಅಪ್ಪೆ ಉಳ್ಳಾಲ್ತಿನ ಸುರುತ್ತ ಜಾಗೆ ಆಯಿನೆಡ್ದಾವರ ಬಾಕಿಲ ಉಳ್ಳಾಲ್ತಿನ ಮೂಲ ಸ್ಥಾನ ಆತ್ಂಡ್. ಉಳ್ಳಾಲ್ತಿಗ್ ಅನಂತಾಡಿದ ಸಂಕೇಷಡ್ ಇಪ್ಪುನ ಒಂಜಿ ಇಲ್ಲ್ ಅಕ್ಲೆನ ಇಲ್ಲಡ್ ಉಳ್ಳಾಲ್ತಿನ್ ನಂಬುದ್ ಧರ್ಮ ಮೆಚ್ಚಿ ಕೊರ್ಪಿನ ಬಗೆಟ್ ಉಲ್ಲೇಖ ಉಂಡು.
ಇತ್ತೆ ಧರ್ಮಚಾವಡಿದ ನಡುಟ್ಟ್ ಉತ್ತರ ದಿಕ್ಕ್ ಗ್ ಪೊಸಪ್ಪೆನ್ ಪ್ರತಿಷ್ಠಾಪನೆ ಮಲ್ಪೊಡ್ಂದ್ ತೀರ್ಮಾನ ಮಲ್ತ್ ದೆರ್. ಈ ಪಿರವು ಅಪ್ಪೆ ಉಳ್ಳಾಲ್ತಿ ಬಾಕಿಲ ಗುತ್ತ್ ಗ್ ಬತ್ತ್ ಪೋಯಿನಂಚಿನ ಪೊರ್ತುಡ್ ಇಲ್ಲದ ಧನಿಕುಲು ಆಯಿನ ಶ್ರೀ ತಿಮ್ಮ ಬೈದ್ಯರೆಡ್ದ್ ಆರ್ನ ಬೊಡೆದಿ ಬಾಕಿಲ ಗುತ್ತ್ ಗ್ ಬತ್ತಿನವ್ ಏರ್ ಪಂದ್ ಕೆನ್ನಗ “ಅವು ಏರಾ ಒಂಜಿ ಪೊಸ ಅಪ್ಪೆ” ಪಂದ್ ಪಾತೆರುನ ಬಾಸೆಡ್ ಪಂದ್ ಅವ್ ‘ಪೊಸಪ್ಪೆ’ ಆದ್ ಕಾಲ ಕ್ರಮೇಣ ಕನ್ನಡಡ್ ಹೊಸಮ್ಮ ಪಂದ್ ಲೆಪ್ಪುನವ್ ರೂಢಿಯಾದ್ ಪೋಂಡ್. ಇತ್ತೆ ಉಳ್ಳಾಲ್ತಿ ಅಪ್ಪೆ ನನೊಂಜಿ ರೂಪಡ್ ಹೊಸಮ್ಮ ಪಂದ್ ಬಾಕಿಲ ಗುತ್ತುಡ್ ಆರಾಧನೆ ಮಲ್ತೊಂದು ಉಲ್ಲೆರ್.
ಬಾಕಿಲ ಗುತ್ತುಡ್ ಅಪ್ಪೆ ಉಳ್ಳಾಲ್ತಿ ಜತ್ತ್ ದ್ ಪೋಯಿನ ದ್ವಾರನ್ ಪವಿತ್ರವಾಯಿನ ಉಳ್ಳಾಲ್ತಿನ ನಡೆಯಾದ್ ಪರಿವರ್ತಿಸಾದ್ ಸತ್ಯ ಪ್ರಮಾಣದ ಸಾದಿಯಾದ್ ಪ್ರತಿ ದಿನಲ ತುಡರ್ ಆರ್ಲಾದ್ ಪೂಜೆನ್ ಮಲ್ಪು ವೆರ್. ಶ್ರೀ ತಿಮ್ಮ ಬೈದ್ಯೆರ್ ಧರ್ಮನಡೆನ್ ಮೆಚ್ಚಿ ದೈವ ಇತ್ತೆಲ ಬಾಕಿಲ ಗುತ್ತು ಸಂಸಾರನ್ ‘ತಿಮ್ಮ ಬೈದ್ಯ ಸಂಸಾರ’ ಪಂದ್ ನೇಮದೆಚ್ಚಿಡ್ ಲೆಪ್ಪುವೆರ್.
ಕಾರಣಿಕ ಪುರುಷೆರ್ ಆಯಿನ ಕೋಟಿ ಚೆನ್ನಯರ್ ಕಾಯ ಬುಡ್ದ್ ಮಾಯ ಸೇರಿನಡ್ದ್ ಬೊಕ್ಕ ಅಕ್ಲೆನ ಕಾರ್ಣಿಕನ್ ತೋಜ್ ಪಾಯರೆ ಸಾರ ಮೊಗರ್ನಾಡು ಸೀಮೆಗ್ ಬತ್ತ್ ದ್ ಅಲ್ಪ ಮಾಣಿ ಉಳ್ಳಾಲ್ತಿನ ಕ್ಷೇತ್ರಗ್ ಬರ್ಪೆರ್. ಅಲ್ಪ ಅಕ್ಲೆನ ಸಾನಿಧ್ಯನ್ ಸ್ಥಾಪನೆ ಮಲ್ಪರೆ ಜಾಗೆ ಕೆನ್ನಗ ನಿಕ್ಲೆಗ್ ಮುಲ್ಪ ಜಾಗೆ ಇಜ್ಜಿ. ಅವೆರ್ದ್ ಬದಲಾದ್ ನಿಕ್ಲೆನ ಕುಲದೇವೆರಾಯಿನ ಬೆರ್ಮೆರೆಗ್ ಯನ್ನ ಉಚ್ಚಯಡ್ ಒಂಜಿ ಸುತ್ತು ಸುರುತ್ತ ಬಲಿ ಕೊರ್ಪ ಪಂದ್ ಪಂಡೆರ್. ಅಲ್ಪರ್ದ್ ಪಿದಡ್ ದಿನ ಬೈದೆರ್ಲು ಅನಂತಾಡಿ ಉಳ್ಳಾಲ್ತಿನ ಕ್ಷೇತ್ರಗ್ ಬತ್ತ್ ದ್, ಅಲ್ಪ ಸಾನಿಧ್ಯನ್ ಬಯಕೆ ಮಲ್ಪುವೆರ್. ಅಪ್ಪೆ ಉಳ್ಳಾಲ್ತಿನ ಬಂಟ ಪಿಲ್ಚಂಡಿ ನೆಲೆಯಾಯೆರ್ ಜಾಗೆನ್ ತೋಜ್ ಪಾವೆರ್ ಪಂದ್ ಲೆತ್ತೊಂದ್ ಕಲ್ಲಾಪುಗ್ ಬನ್ನಗ ಕಲ್ಲ್ ದ ಪಾಪುನ್ ಒಯಿತುದ್ ಗಡಿನ್ ಬದಲ್ ಮಲ್ತ್ ದ್, ಮೋಸ ಮಲ್ಪುವೆ. ಅಲ್ಪರ್ದ್ ಪಿದಡ್ದಿನ ಬೈದೆರ್ಲ್ ಸುಲ್ಲಮಲೆ ಬಲ್ಲಮಲೆಗ್ ಬತ್ತ್ ದ್, ತೀರ್ಥ ಸ್ನಾನನ್ ಮಲ್ತ್ ದ್ ಬನ್ನಗ ಗುಡ್ಡಡ್ ಸಾರಾಳಪಟ್ಟ ಬಾಕಿಲ ಗುತ್ತು ತೋಜುಂಡ್. ವಿಶಾಲವಾಯಿನ ಖಂಡಗ್ ಅಕ್ಲೆನ ದೃಷ್ಟಿ ಬೂರ್ನಗ ಬಾರ್ ದ ಪಜೀರ್ ಬಂಗಾರ್ ದ ಪಜೀರ್ ಆದ್ ಬದಲ್ ಆಪುಂಡ್.
ಈ ಗ್ರಾಮ ಪುತ್ತೂರ್ ಸೀಮೆ ಬೊಕ್ಕ ವಿಟ್ಲ ಡೊಂಬರಸರ ಸೀಮೆ ಕರೆತ್ತ್ ಮೊಗರ್ನಾಡು ಸಾರ ಸೀಮೆದ ವ್ಯಾಪ್ತಿಗ್ ಬರ್ಪುಂಡ್. ಈ ಅನಂತಾಡಿ ಗ್ರಾಮಡ್ ಉಪ್ಪುನವ್ ಯೆ ಸಾವಿರಾಳ ಪಟ್ಟ ಬಾಕಿಲ ಗುತ್ತು. ಪಚ್ಚೆ ಪಜೀರ್ ದ ಕಂಡದ ನಡುಟ್ಟ್ ಇಪ್ಪುನ ಬಾಕಿಲ ಗುತ್ತು ಸುಲ್ಲಮಲೆ ಬಲ್ಲಮಲೆ ಗುಡ್ಡದ ತಡಿಟ್ಟ್ ವಿರಾಜಮಾನವಾದ್ ಇಪ್ಪುನ ವಿಶೇಷ ಕ್ಷೇತ್ರ. ಬಾಕಿಲ ಪನ್ಪಿನ ಪುದರ್ ಯೆ ಒಂಜಿ ಗೌಜಿನ್ ಗುರ್ತಿಸಾವುಂಡ್. ಅನಂತಾಡಿ ಪನ್ಪಿನ ಗ್ರಾಮಗ್ ಈ ಬಾಕಿಲ ಗುತ್ತು ಪನ್ಪಿನವ್ ಒಂಜಿ ಮಲ್ಲ ಹೆಬ್ಬಾಗಿಲು ಇತ್ತಿಲೆಕ್ಕ. ದುಂಬುಡ್ ಜನಕ್ಲಲೆನ ಬೂಡುದ ದಳವಾಯಿಯಾದ್ ಅಧಿಕಾರ ಪಡೆತಿನಕುಲ್ ಉಂದುವೇ ಬಾಕಿಲ ಗುತ್ತುದಕುಲ್. ಅಂಚಾದ್ ಏರೆ ಆವಡ್ ಈ ಊರುಗ್ ಬರ್ಪಿನ ದುಂಬು ಉಂದುವೇ ಬಾಕಿಲ ಗುತ್ತುದ ಮುಖೇನ ಬತ್ತ್ ದ್ ಬಾಕಿಲ ಗುತ್ತುದಕುಲೆಡ್ದ್ ಆತಿಥ್ಯನ್ ಪಡೆಯೊಂದ್ ಅಕ್ಲೆನ ಇಲ್ಲಗ್ ಪೊವೊಡ್ ಪನ್ಪಿನವ್ ಒಂಜಿ ರೂಢಿಯಿತ್ತುಂಡ್. ಅಂಚಾದ್ ಉಳ್ಳಾಲ್ತಿದ ಬಾಕಿಲ ಗುತ್ತುದ ಮುಖೇನ ಅನಂತಾಡಿ ಗ್ರಾಮಗ್ ಪೋಯೆರ್ ಪನ್ಪಿನವ್ ಯೇ ಒಂಜಿ ಸ್ಪಷ್ಟ ದೃಷ್ಟಾಂತ.
ಬರವು: ಶ್ರುತಿ ದಾಸ್
pallavi shetty