ಸುರತ್ಕಲ್ : ಕರಿನ ಅಜಿಪತ್ತೈನ್ ವರ್ಸೊರ್ದಿಂಚಿ ಕೈತಲ್ದಕ್ಲೆಗ್ ಉದ್ಯೋಗ ಕೊರ್ದು ಮಸ್ತ್ ಕುಟುಂಬೊಲೆಗ್ ಆಧಾರವಾದುಪ್ಪುನ ಮುಕ್ಕ ಸೀಫುಡ್ ಇಂಡಸ್ಟ್ರೀಸ್ ದ ವಿರುದ್ಧ ಕೆಲವೆರ್ ಮಲ್ದಿನ ಆರೋಪ ನಿರಾಧಾರ ಆದುಂಡು. ಅಂಚಾದ್ ಅವೆನ್ ಎಂಕುಲು ಖಂಡಿಸಾವ ಪಂಡ್ ದ್ ಕೈತಲ್ದ ನಿವಾಸಿಲೆನ ಪರವಾದ್ ಮಿತ್ರಪಟ್ಣ ಮೀನುಗಾರೆರ್ನ ಸಹಕಾರ ಸಂಘದ ಅಧ್ಯಕ್ಷೆರ್ ವಸಂತ್ ಸುವರ್ಣ ಪಂಡೆರ್.
ಈ ಕಂಪನಿದ ಫಲಾನುಭವಿಲು ಬೊಕ್ಕ ಸುತ್ತಮುತ್ತ ಉಪ್ಪುನ ನಾಗರಿಕೆರ್ ಆಯಿನ ಎಂಕುಲು ವಾಸ್ತವ ಸ್ಥಿತಿನ್ ಪನೊಂದುಲ್ಲ ಅತ್ತಾಂದೆ ಕಂಪನಿದ ಪರವಾದ್ ಪಾತೆರುನ್ ಅತ್ತ್ ಪಂಡ್ ದ್ ಆರ್ ಸುರತ್ಕಲ್ ಡ್ ಶನಿಯಾರ ನಡತಿನ ಸುದ್ದಿಗೋಷ್ಠಿಡ್ ಪಂಡೆರ್.
ಮೀನ್ದ ಫ್ಯಾಕ್ಟರಿ ಪಂಡ ವಾಸನೆ ಉಪ್ಪುನು ಸಹಜ. ಆಂಡ ದೂರು ಕೊರ್ತಿನಕುಲು ಆರೋಪ ಮಲ್ದಿನಂಚ ಅವು ಆರೋಗ್ಯ ಗು ಅಪಾಯಕಾರಿ ಅತ್ತ್. ಪ್ರತಿ ತಿಂಗೊಲು ಪರಿಸರ ತಜ್ಞೆರ್, ಇಲಾಖೆದ ಅಧಿಕಾರಿಲು ಇಡೆಗ್ ಭೇಟಿ ಕೊರ್ದು ತಪಾಸಣೆ ಮಲ್ಪುವೆರ್ ಪಂಡ್ ದ್ ಮೀನುಗಾರೆರ್ನ ನಾಯಕೆರ್, ಸಮಾಜಸೇವಕೆರ್ ಅನಿಲ್ ಕುಮಾರ್ ಸಸಿಹಿತ್ಲು ಪಂಡೆರ್.
ಮುಕ್ಕ ಸೀಫುಡ್ ಕಂಪನಿದ ಸುಮಾರ್ ೨೦೦ ಕೆಲಸದಕಲ್ನ ಪೈಕಿ ಶೇ.೮೦ ದಾತ್ ಸ್ಥಳೀಯೆರೇ ಉಲ್ಲೆರ್. ಕೈತಲ್ದ ಪೂರ ಮೀನುಗಾರೆರ್ ಕಡಲಡ್ ಪತಿನ ಮೀನ್ ಲೆಡ್ ತಿನರೆ ಆವಂದಿನೆನ್ ಈ ಕಂಪನಿದಕುಲೇ ಮಾರ್ಕೆಟ್ ರೇಟ್ ಡ್ ಖರೀದಿ ಮಲ್ತ್ ದ್ ಮೀನುಗಾರೆರೆಗ್ ಪ್ರೋತ್ಸಾಹ ಕೊರೊಂದುಂಡು. ಕಂಪನಿಗ್ ಸಮಸ್ಯೆ ಆಂಡ ಮಾತಾ ಮೀನುಗಾರೆರ್ಲ ಪ್ರತಿಭಟನೆ ಮಲ್ಪರೆ ಲಾ ತಯಾರುಲ್ಲ ಪಂಡೆರ್ ಹಿರಿಯೆರಾಯಿನ ವಿಠಲ ಶ್ರೀ ಯಾನ್.
ಮುಕ್ಕ ಸೀ ಫುಡ್ ಕಂಪನಿ ಪರಿಸರ ಇಲಾಖೆ ಬೊಕ್ಕ ಜಿಲ್ಲಾಡಳಿತ ದ ನಿಯಮದಂಚೆನೆ ನಿರ್ವಹಣೆ ಮಲ್ತೊಂದುಂಡು. ರಾಷ್ಟ್ರ ಪುರಸ್ಕಾರ ಅಂಚೆನೇ ಬೇತೆ ಪ್ರಶಸ್ತಿಲು ತಿಕ್ ದ್ಂಡ್. ಸಮಾಜ ಸೇವೆ ಗ್ ಮಲ್ಲ ಕೊಡುಗೆ ಕೊರೊಂದುಂಡು. ೬೫ ವರ್ಷ ದಿಂಚಿ ಇತ್ತಿನ ಕಂಪನಿಗ್ ದಾಂತಿನ ಆಕ್ಷೇಪ ಇತ್ತೆ ದಾಯೆ ಬತ್ತ್ಂಡ್. ಇಂಚೊಗು ಸುರತ್ಕಲ್ ಪೊಲೀಸ್ದಕುಲು ಭೇಟಿ ಕೊರ್ದು ತಪಾಸಣೆ ಮಲ್ದೆರ್. ಶಬ್ದ ಮಾಲಿನ್ಯ ಬೊಕ್ಕ ಕಪ್ಪು ಪುಗೆತ್ತ ಬಗ್ಗೆ ತಪ್ಪು ಕಲ್ಪನೆಗ್ ಇಲಾಖೆದ ಮೂಲಕ ಉತ್ತರ ಕೊರ್ತ ಪಂಡೆರ್ ಕಂಪೆನಿದ ಮ್ಯಾನೇಜರ್ ಜಗನ್ನಾಥ್ ಕೋಟ್ಯಾನ್.
ಮೀನ್ ದ ವಾಸನೆನ್ ಶೇ.೯೫ ಭಾಗ ಕಡಿಮೆ ಮಲ್ಪುನ ಬೊಕ್ಕ ಕಪ್ಪು ಪುಗೆನ್ ಪರಿಸರೊಗು ಪೋವಂದಿಲೆಕ್ಕ ತಡೆಪುನ ತಂತ್ರಜ್ಞಾನದ ದ ಇಸಯೊಡು ಇಂಜಿನಿಯರ್ ಕಂಪನಿದ ಸುಮನ್ ಶೆಟ್ಟಿ ತೆರಿಪಾಯೆರ್.
ಸುದ್ದಿಗೋಷ್ಠಿಡ್ ಪ್ರಶಾಂತ್ ಸುವರ್ಣ ಮಿತ್ರಪಟ್ಣ , ವಿನೋದ್ ಸಾಲ್ಯಾನ್ ಸಸಿಹಿತ್ಲು, ಕಿಶೋರ್, ಹೇಮನಾಥ ಸಾಲ್ಯಾನ್, ರೂಪೇಶ್ ಸಾಲ್ಯಾನ್ ಸಸಿಹಿತ್ಲು ಇತ್ತೆರ್.
pallavi shetty