January 29, 2021

ಬಲೆ ತುಳು ಲಿಪಿಟ್ ಪುದರ್ ಬರೆಲೆ.ಇನಾಮು ಗೆಂದುಲೆ

ಕೊಡವೂರು ಶ್ರೀ ಶಂಕರನಾರಾಯಣ ದೇವಸ್ಥಾನದ ಆಶ್ರಯೊಡ್‌,ಜೈ ತುಳುನಾಡ್ ಸಂಘಟನೆ(ರಿ), ಹಳೆವಿದ್ಯಾರ್ಥಿ ಸಂಘ ಬೊಕ್ಕ ಯುವಕ‌ ಸಂಘ (ರಿ.) ಕೊಡವೂರು ಮೊಕ್ಲೆನ ಒತ್ತು ಸೇರಿಗೆಡ್ “ಬಲೆ ತುಳು ಲಿಪಿಟ್ ಪುದರ್ ಬರೆಲೆ ಇನಾಮು ಗೆಂದುಲೆ” ಕಜ್ಜೊ ಕೊಡವೂರು ಶಂಕರನಾರಾಯಣ ದೇವಸ್ಥಾನದ ಅಂಗಣೊಡ್ ನಡಪರೆಗುಂಡ್.

ತುಳು ಲಿಪಿ ಕಲ್ತುದ್ ಅಪ್ಪೆ ಬಾಸೆನ್ ಒರಿಪಾವೊಡ್ ಪನ್ಪಿನ ಧ್ಯೇಯೋದ್ಧೇಶ ದೀಯೊಂದ್ ಈ ಕಜ್ಜೊನ್‌ ಮಲ್ತೊಂದುಂಡ್.ಈ ಕಜ್ಜೊಡ್ ತುಳುನಾಡುದ ಬಂದುಲ್ ಪಾಲ್ ಪಡೆದ್ ತುಳು ಲಿಪಿಟ್ ಪುದರ್ ಬರೆಯೆರೆಗ್ ಕಲ್ತುದ್ ತುಳು ಬಾಸೆಗ್ ಮಾನಾದಿಗೆ ಸಂದಾವೊಡ್ ಪಂಡುದ್ ಜೈ ತುಳುನಾಡ್ ಸಂಘಟನೆ ಕೊಡವೂರುದ ಸಂಘಟಕೆರ್ ತುಳುವೆರೆಡ ಬಿನ್ನಪ ಮಲ್ತೊಂದೆರ್.

ಜನ ಸಾಮಾನ್ಯಯೆರೆಗ್ ಕಣ್ಣ ನೀರ್ ಬರ್ಪಾಯಿನ ” ಅಪ್ಪೆ ಎನ್ನ ಅಪ್ಪೆ “

ಮುದ್ರಾಡಿದ ಮಣ್ಣ್ ಡ್ ನಿರಂತರವಾದ್ ರಂಗ ತಪಸ್ಸು ನಡತೊಂದು ಉಂಡು ಪನ್ಪಿನೆಕ್ಕ್ ವಿಶಾಲವಾಯಿನ ಸುಸಜ್ಜಿತ ಬಯಲು ರಂಗಸ್ಥಳ ಬೊಕ್ಕ ಮಾನವೀಯ ಮೌಲ್ಯದ ನಾಟಕನ್ ಸಮಾಜಗ್ ಕೊರೊಂದು ಉಪ್ಪುನವೇ ಸಾಕ್ಷಿ . ಅಪ್ಪೆ ಎನ್ನ ಅಪ್ಪೆ ತುಳು ನಾಟಕ ಇತ್ತೆದ ಸಮಾಜಗ್ ದಾರಿದೀಪ, ಕೊರೋನಾರ್ದ್ ಬೊಕ್ಕ ಜೀವನ ದರ್ಶನನ್ ನಾಟಕ ಕಟ್ಟ್ ದ್ ಕೊರ್ತುಂಡು . ಸಾಮಾನ್ಯ ಪ್ರೇಕ್ಷಕೆರ್ನ ಮನಸ್ ಸೆಳೆಯುನ ಶಕ್ತಿ ಈ ನಾಟಕಗ್ ಉಂಡು ಪಂದ್ ಪೆರಿಯ ರಂಗ ನಿರ್ದೇಶಕ ಡಾ.ಭರತ್‌ ಕುಮಾರ್‌ ಪೊಲಿಪು ಪಂಡೆರ್.

ಮೇರ್ ಮುದ್ರಾಡಿ ನಾಟ್ಕದೂರು ಆರೂರು ಕೃಷ್ಣಮೂರ್ತಿ ರಾವ್‌ ಬಯಲು ರಂಗಸ್ಥಳಡ್ ಬುಧವಾರ ಬೈಯ್ಯ ಮುದ್ರಾಡಿ ನಮತುಳುವೆರ್‌ ಕಲಾ ಸಂಘಟನೆ ಪೊಸ ನಾಟಕ ” ಅಪ್ಪೆ ಎನ್ನ ಅಪ್ಪೆ ” ತುಳು ನಾಟಕದ ಲೋಕಾರ್ಪಣೆ ಬೊಕ್ಕ ಸುರುತ್ತ ಪ್ರದರ್ಶನನ್ ಉದಿಪನ ಮಲ್ತೆರ್. ಆನಿ ಕಾಲೋಡು ಕಾಸ್ ಇಜ್ಜಿ ಸಂಬಂಧ ಇತ್ತುಂಡು . ಇನಿ ಕಾಸುಂಡು ಸಂಬಂಧ ಇಜ್ಜಿ ಪನ್ಪಿನೆನ್ ಅಪ್ಪೆ ಎನ್ನ ಅಪ್ಪೆ ಸಾಭೀತು ಮಲ್ದುಂಡು , ಅತ್ಯುತ್ತಮ ರಚನೆ, ನಿರ್ದೇಶಕ, ಪರಿಕಲ್ಪನೆ ಬೊಕ್ಕ ನಟನೆದ ಮುಖೇನ ಮಾನವೀಯ ಕಲ್ಪನೆ ಜೀವನ ಮೌಲ್ಯ ಬೊಕ್ಕ ಪ್ರೀತಿನ್ ಅದ್ಬುತ ನಾಟಕ ತೋಜಾವುಂಡು . ಇನಿ  ಯುವ ಸಮುದಾಯಗ್ಲಾ ಒಂಜಿ ಮಾರ್ಗಸೂಚಿ, ಸಾರ ಸಾರ ಪ್ರದರ್ಶನ ಆದ್ ಸಮಾಜ ಬದಲಾವಡ್ ಪಂದ್ ಭರತ್‌ ಕುಮಾರ್‌ ಪೊಲಿಪು ಪಂಡೆರ್.

ಪೆರಿಯ ರಂಗ ನಿರ್ದೇಶಕ ಉಡುಪಿದ ನಾಗೇಶ್‌ ಕುಮಾರ್‌ ಉದ್ಯಾವರ ಪಾತೆರ್ದ್ ಕೊರೋನೋತ್ತರ ರಂಗ ಚಟುವಟಿಕೆ ಪೊಸ ನಾಟಕ ಜೀವನ ದರ್ಶನ ಕೊರ್ತುಂಡು , ರಂಗ ಭೂಮಿ ಬೊಕ್ಕ ರಂಗ ಸಂಬಂಧ ಗ್ ಮಲ್ಲ ಶಕ್ತಿ ಉಪ್ಪುನೆರ್ದಾವರ ನಮ ಮುದ್ರಾಡಿಗ್ ನಿರಂತರವಾದ್ ಬರಿಯರೆ ಆವೊಂದು ಉಂಡು ಪಂದ್ ಅದ್ಬುತ ಕಲಾವಿದರಾಯಿನ ವಾಣಿ ಸುಕುಮಾರ್‌ ಬೊಕ್ಕ ಸುಗಂಧಿ ಉಮೇಶ್‌ ಕಲ್ಮಾಡಿ ಮೆರೆರ್ದ್ ಅಪ್ಪೆ ಎನ್ನ ಅಪ್ಪೆ ಜನಮನಡ್ ನೆಲೆಯಾವಡ್ ಪಂದ್ ಆಶಿಸಾಯೆರ್ .
ಹೆಬ್ರಿ ತಾಲ್ಲೂಕು ಕನ್ನಡ ಸಾಹಿತ್ಯ ಪರಿಷತ್‌ ಗುರ್ಕಾರ್ಲಾಯಿನ ಪಿ.ವಿ.ಆನಂದ ಸಾಲಿಗ್ರಾಮ ಪಾತೆರ್ದ್ ಪೊಸ ಬದುಕುದ ಕಲ್ಪನೆನ್ ನಾಟಕ ಕಟ್ಟೊಂದು ಸೋಲು ಬದುಕುದ ಅಂತ್ಯ ಅತ್ತ್ ಪನ್ಪಿನ ನಿದರ್ಶನಗ್  ಪೊಸ ನಾಟಕನೇ ಸಾಕ್ಷಿ ಪಂಡೆರ್ .ಉದ್ಯಮಿಯಾದ್ ಕಲಾಪ್ರೋತ್ಸಾಹಕ ಹೆಬ್ರಿ ಯೋಗೀಶ್‌ ಭಟ್‌ ಪಾತೆರ್ದ್ ನಮ ತುಳುವೆರ್‌ ಕಲಾ ಸಂಘಟನೆದ  ನಿರಂತರ ಪರಿಶ್ರಮಗ್ ಇಂಚಿನ ನಾಟಕದ ಮುಖೇನ ಫಲ ತಿಕ್ಕುಂಡು . ಸಾಮಾನ್ಯ ಪ್ರೇಕ್ಷಕಗ್ ಲಾ ಕಣ್ಣ ನೀರ್ ಬರ್ಪಾವುನ ಅಪ್ಪೆ ಎನ್ನ ಅಪ್ಪೆ ನಾಟಕ ವಾಸ್ತಾವಿಕವಾದ್ ಚಿಂತನೆಗ್ ಕೈತಲ್ ಆತುಂಡು.

ಅಪ್ಪೆ ಬೊಕ್ಕ ಅಪ್ಪೆ ಮಣ್ಣ್ ದ ಪ್ರೀತಿಯೇ – ಅಪ್ಪೆ ಎನ್ನ ಅಪ್ಪೆ : ಗುರುರಾಜ್‌ ಮಾರ್ಪಳ್ಳಿ
ನಾಟಕದ ರಚನೆಕಾರೆರಾಯಿನ ನಿರ್ದೇಶಕೆರಾಯಿನ ಗುರುರಾಜ್‌ ಮಾರ್ಪಳ್ಳಿ ಪಾತೆರ್ದ್ ಅಪ್ಪೆ ತನ್ನ ಜೋಕ್ಲೆಗಾದ್ ಮೈಮರೆತ್ ತನ್ನ ಕರ್ತವ್ಯನ್ ದಯನೀಯ ಸ್ಥಿತಿ ಟ್ ಲಾ ಮಲ್ಪುವಲ್ . ಅಪ್ಪೆನ ಮಲ್ಲ ಗುಣ , ಜೋಕ್ಲೆನ ಸೇವೆ, ಅಪ್ಪೆ ಬೊಕ್ಕ ಅಪ್ಪೆ ಮಣ್ಣ್ ದ ಪ್ರೀತಿನ್ ಎನ್ನ ಈ ಪೊಸ ನಾಟಕ ” ಅಪ್ಪೆ ಎನ್ನ ಅಪ್ಪೆ “ತೋಜಾವುಂಡು. ಅದ್ಬುತವಾಯಿನ ಪ್ರದರ್ಶನ ಕೊರ್ಪಿನ ಶಕ್ತಿ ಇಪ್ಪುನ ರಂಗ ನಟ ನಿರ್ದೇಶಕ ಸುಕುಮಾರ್‌ ಮೋಹನ್‌ ನೇತ್ರತ್ವದ ಮುದ್ರಾಡಿ ನಮತುಳುವೆರ್‌ ಕಲಾ ಸಂಘಟನೆಗ್ ಉಪ್ಪುನೆರ್ದಾವರ ಅಪ್ಪೆ ಬಾಲೆದ ಪ್ರೀತಿ ನನಾತ್ ಎತ್ತರಗ್ ಏರುಂಡು ಪಂಡೆರ್.
ಮುದ್ರಾಡಿ ಆದಿಶಕ್ತಿ ಬೊಕ್ಕ ನಂದಿಕೇಶ್ವರ ದೇವಸ್ಥಾನದ ಧರ್ಮದರ್ಶಿ ಧರ್ಮಯೋಗಿ ಮೋಹನ್‌, ಮುದ್ರಾಡಿ ನಮತುಳುವೆರ್‌ ಕಲಾ ಸಂಘಟನೆದ ಗುರ್ಕಾರ್ಲು ಸುಕುಮಾರ್‌ ಮೋಹನ್‌, ಕಮಲಾ ಮೋಹನ್‌, ಸುಗಂಧಿ ಉಮೇಶ್‌ ಕಲ್ಮಾಡಿ, ವಾಣಿ ಸುಕುಮಾರ್‌ , ಉಮೇಶ್ ಕಲ್ಮಾಡಿ ಪಾಲ್ ಪಡೆದಿತ್ತೆರ್. ನಾಟಕಗ್ ಗೀತಂ ಗಿರೀಶ್‌ ಸಂಗೀತ ಧ್ವನಿ ಕೊರ್ತೆರ್ . ಬೆಳಕು ಪ್ರಥ್ವಿನ್ ಬೊಕ್ಕ ಸೌಂಡ್ಸ್‌ ಶರಣ್‌ ಕೊರ್ತೆರ್ .

ಹೆಬ್ರಿ ಲಯನ್ಸ್ ಕ್ಲಬ್ ಗುರ್ಕಾರ್ಲಾಯಿನ ಡಾ. ಭಾರ್ಗವಿ ಆರ್ ಐತಾಳ್, ಹೆಬ್ರಿ ಜೇಸಿಐ ಗುರ್ಕಾರ್ಲಾಯಿನ ಸುನೀತಾ ಅರುಣ್ ಕುಮಾರ್ ಹೆಗ್ಡೆ,ಹೆಬ್ರಿ ತುಳಸಿ ಗ್ರೂಪ್ ನ ಸುಜಾತ ಹರೀಶ್ , ಉಡುಪಿಯ ಡಾ.ಕಾತ್ಯಯಿನಿ ಕುಂಜಿಬೆಟ್ಟು, ರಂಗ ನಿರ್ದೇಶಕ ಚಂದ್ರನಾಥ್ ಬಜಗೋಳಿ, ಉಡುಪಿಯ ಉರಗ ತಜ್ಞ ಗುರುರಾಜ್ ಸನೀಲ್ ಸಹಿತ ನನಾತ್ ಜನ ಅಪ್ಪೆ ಮಗಲ್ ನ ಪ್ರೀತಿಗ್ ಸಾಕ್ಷಿಯಾಯೆರ್.

– ಸುಕುಮಾರ್‌ ಮುನಿಯಾಲ್.

ಕೊಡವೂರು ಶಂಕರನಾರಾಯಣ ದೇವೆರೆಗ್ ಸಾನಿಧ್ಯ ಕಲಶಾಭಿಷೇಕ

ಕೋಡೆ ಶ್ರೀ ದೇವಳಡ್ ಶಂಕರನಾರಾಯಣ ಸ್ವಾಮಿಗ್ ಸಾನಿಧ್ಯ ಕಲಶಾಭಿಷೇಕ ಪುತ್ತೂರು ಹಯವದನ ತಂತ್ರಿಲೆನ ಮುತಾಲಿಕೆಡ್ ಋತ್ವಿಜರಾಯಿನ ಪಂಜ ಭಾಸ್ಕರ ಭಟ್, ಮಧುಸೂದನ ಭಟ್,ಪಾಡಿಗಾರು ಶ್ರೀನಿವಾಸ ತಂತ್ರಿ,ವಾದಿರಾಜ ತಂತ್ರಿನಕ್ಲೆನ ಒಟ್ಟು ಸೇರಿಗೆಡ್ ನಡತುಂಡು.

ದೇವಳದ ವ್ಯವಸ್ಥಾಪನಾ ಸಮಿತಿದ ಗುರ್ಕಾರ್ಲಾಯಿನ ಪ್ರಕಾಶ್ ಜಿ ಕೊಡವೂರು, ಸದಸ್ಯರಾಯಿನ  ಜನಾರ್ದನ್ ಕೊಡವೂರು, ರಾಜ ಎ ಶೇರಿಗಾರ್, ಭಾಸ್ಕರ ಬಾಚನಬೈಲು, ಸುಧಾ ಎನ್ ಶೆಟ್ಟಿ, ಬಾಬ ,ಲಕ್ಷ್ಮೀ‌ನಾರಾಯಣ ಭಟ್ ,ಶ್ಯಾಮ ಸುಂದರ ಭಟ್,ಉಮೇಶ್ ರಾವ್,ಸಂಧ್ಯಾ ಪ್ರಕಾಶ್,ಪೂರ್ಣಿಮಾ‌ ಜನಾರ್ದನ್, ವಿಜಯಶ್ರೀ, ಸತೀಶ್ ಕೊಡವೂರ್, ಬಾಲಕೃಷ್ಣ, ಕಾಂತಪ್ಪ ಕರ್ಕೇರ, ಶಿವಪ್ಪ ಟಿ ಕಾಂಚನ್, ಹಿರಿಯಣ್ಣ, ಹರೀಶ್ ಕೋಟ್ಯಾನ್, ರಂಜಿತ್ ಕೊಡವೂರು ಅರುಣ್ ಕುಮಾರ್, ಪ್ರವೀಣ್ ಕೊಡವೂರ್ ಪಾಲ್ ಪಡೆದಿತ್ತೆರ್ .