ಕುಡ್ಲ : ‘ ಸಮಾಜಡ್ ಪ್ರಭಾವಿನಕ್ಕುಲು ಒಂಜತ್ತ್ ಒಂಜಿ ಮಾರ್ಗಡ್ ತನ್ಕುಲೆ ಕಾರ್ಯಸಾಧನೆ ಮಲ್ಪುವೆರ್ . ಆಂಡ ಅಲಕ್ಷಿತೆರ್ನ ಕಡೆ ಮಾನವೀಯ ದೃಷ್ಟಿ ದೀಪಿನಕುಲು ಕಮ್ಮಿ . ಅಂಚಿನಕ್ಲೆನ್ ನಾಡ್ ಪತ್ತ್ ದ್ ನಿಗಮದ ಮುಖೇನ ಅಕ್ಲೆಗ್ ಆಪಿನ ಸೇವೆ ಮಲ್ಪುನ ಅವಕಾಶನ್ ಮುಖ್ಯಮಂತ್ರಿಲು ಓದಗಾದ್ ಕೊರ್ತೆರ್ ಪಂದ್ ‘ ಕರ್ನಾಟಕ ರಾಜ್ಯ ಅಲೆಮಾರಿ ಅರೆ ಅಲೆಮಾರಿ ಅಭಿವೃದ್ಧಿ ನಿಗಮದ ಗುರ್ಕಾರ್ಲಾಯಿನ ಕೆ.ರವೀಂದ್ರ ಶೆಟ್ಟಿ ಉಳಿದೊಟ್ಟು ಪಂತೆರ್ . ಕೊಲ್ಯ ಸೌಭಾಗ್ಯ ಭವನಡ್ ವೀರರಾಣಿ ಅಬ್ಬಕ್ಕ ರಾಷ್ಟ್ರೀಯ ಪ್ರತಿಷ್ಠಾನ (ವಿರಾಂಟ್) ಅಟ್ಟನೆ ಮಲ್ದಿನ ‘ಅಭಿನಂದನಾ ಸಮಾರಂಭ’ ಡ್ ಸನ್ಮಾನಗ್ ಉತ್ತರ ಕೊರ್ದು ಆರ್ ಪಾತೆರಿಯೆರ್.
‘ ರಾಜ್ಯಡ್ ಪೊಸತ್ ಸುರು ಆತಿನ ನಿಗಮಗ್ ಸ್ಪಷ್ಟ ಕಾರ್ಯಯೋಜನೆನ್ ರೂಪಿಸಾದ್ , ಕರ್ನಾಟಕಡ್ ಮಾತಾ ಜಿಲ್ಲೆಡ್ ಪ್ರವಾಸ ಪೋದು ಆಯಾ ಭಾಗದ ಜನಪ್ರತಿನಿಧಿಲು ಬೊಕ್ಕ ಜಿಲ್ಲಾ ಮಟ್ಟದ ಅಧಿಕಾರಿನೊಟ್ಟಿಗೆ ಪಾತೆರ ಕಥೆ ನಡಪಾದ್ ಸುಮಾರ್ 46 ಜಾತಿ ಜನಾಂಗದಕುಲು ಇತ್ತಿನ ಅಲೆಮಾರಿ ಸಮುದಾಯಗ್ ಡೇರೆ ಮುಕ್ತ ಸ್ವಾಭಿಮಾನದ ಬದುಕು ಕೊರ್ಪಿನ ಬಗ್ಗೆ ಇಚಾರ ಮಲ್ದ ಪಂದ್ ಪಂಡೆರ್. ಕಾರ್ಯಕ್ರಮದ ಗುರ್ಕಾರ್ಮೆ ವಯಿಸೊಂದಿನ ವಿರಾಂಟ್ ಗೌರವಾಧ್ಯಕ್ಷ ಹರಿಕೃಷ್ಣ ಪುನರೂರು ಪ್ರತಿಷ್ಠಾನದ ವತಿರ್ದ್ ರವೀಂದ್ರ ಶೆಟ್ರೆಗ್ ಮಾನದಿಗೆ ಮಲ್ತೆರ್.
ಲೇಸ್ ಡ್ ಪ್ರಾಸ್ತಾವಿಕವಾದ್ ಪಾತೆರಿನ ವೀರರಾಣಿ ಅಬ್ಬಕ್ಕ ರಾಷ್ಟ್ರೀಯ ಪ್ರತಿಷ್ಠಾನದ ಪ್ರಧಾನ ಕಾರ್ಯದರ್ಶಿ ಭಾಸ್ಕರ ರೈ ಕುಕ್ಕುವಳ್ಳಿ ‘ ಉಳ್ಳಾಲ ರಾಣಿ ಅಬ್ಬಕ್ಕನ ಬಗ್ಗೆ ಐತಿಹಾಸಿಕ ದಾಖಲೆನ್ ಕಲೆ ಪಾರ್ದ್ ನಾಡೊರ್ಮೆ ಸಾಂಸ್ಕೃತಿಕ ಜಾಗೃತಿ ಮೂಡಿಸಾವುನ ಸಲುವಾದ್ ಪುಟ್ಟಿನ ವಿರಾಂಟ್ ಸಮಿತಿಯ ಪ್ರಧಾನ ಸಂಚಾಲಕೆರ್ ಆತಿನ ರವೀಂದ್ರ ಶೆಟ್ರೆನ ಮಿತ್ತ್ ಸರಕಾರ ವಿಶೇಷ ಜಬದಾರಿಕೆ ಕೊರ್ತುಂಡು . ಈ ಪೊರ್ತುಡು ಬೇತೆ ಬೇತೆ ಜಿಲ್ಲೆಡ್ ಉಪ್ಪುನ ಸರಕಾರಿ ಬೊಕ್ಕ ಸರಕಾರೇತರ ಸಂಸ್ಥೆಲು ಅಕ್ಲೆಗ್ ಮಾತಾ ರೀತಿದ ಸಾಕಾಯ ಕೊರೊಡು ಪಂದ್ ಪಂಡೆರ್. ಕೊಲ್ಯ ಶ್ರೀ ನಾಗಬ್ರಹ್ಮ ಅನ್ನಪೂರ್ಣೇಶ್ವರಿ ಕ್ಷೇತ್ರದ ಧರ್ಮದರ್ಶಿ ಭಾಸ್ಕರ ಐತಾಳ್, ಪೆರಿಯ ಸಮಾಜಸೇವಕ ಸೀತಾರಾಮ ಬಂಗೇರ , ರಾಗತರಂಗ ಕುಡ್ಲ ನೆತ್ತ ಗುರ್ಕಾರ್ಲಾಯಿನ ವಾಮನ್ ಬಿ.ಮೈಂದನ್ ಮಲ್ಲ ಬಿನ್ನೆರ್ ಆದ್ ಪಾತೆರಿಯೆರ್.
ವೀರರಾಣಿ ಅಬ್ಬಕ್ಕ ರಾಷ್ಟ್ರೀಯ ಪ್ರತಿಷ್ಠಾನದ ಉಪಾಧ್ಯಕ್ಷ ಕೆ.ತಾರಾನಾಥ ರೈ ಎದುಕೊಂಡೆರ್ . ಸಂಘಟನಾ ಕಾರ್ಯದರ್ಶಿ ತೋನ್ಸೆ ಪುಷ್ಕಳ ಕುಮಾರ್ ಕಾರ್ಯಕ್ರಮ ನಿರೂಪಣೆ ಮಲ್ತೆರ್ . ಸುಮಾ ಪ್ರಸಾದ್ ಸನ್ಮಾನ ಪತ್ರ ವಾಚಿಸಾಯೆರ್ . ಸಂಚಾಲಕರಾಯಿನ ತ್ಯಾಗಂ ಹರೇಕಳ ಸೊಲ್ಮೆ ಸಂದೈಯ್ತ ಮಲ್ತೆರ್ . ವಿಜಯಲಕ್ಷ್ಮಿ ಕಟೀಲ್ ಬೊಕ್ಕ ಗೀತಾ ಜ್ಯುಡಿತ್ ಸಲ್ದಾನ ಶುಭಾಶಂಸನೆ ಮಲ್ತೆರ್ . ಲೋಕನಾಥ ರೈ, ಜಗದೀಶ್ ಶೆಣೈ, ಆನಂದ ಶೆಟ್ಟಿ, ಬಿ.ಸಿ.ರಾವ್, ಮೋಹನದಾಸ್ ರೈ , ರೋಹಿತ್ ಕುಮಾರ್ ಪಾಲ್ ಪಡೆದಿತ್ತೆರ್ .
pallavi shetty