ಸುರತ್ಕಲ್ : ಸೂರಿಂಜೆ ಮೂಲದ ಉದ್ಯಮಿ ಡಿ. ಕೆ. ಶೆಟ್ಟಿ ಮೆರೆನ ಮಾಲಕತ್ವದ ಇನ್ನಾ ಹಾಸ್ಪಿಟಲಿಟಿ ಸಂಸ್ಥೆ ಮುಂಬೈಡ್ ಪ್ರಧಾನ ಕಚೇರಿ ಇತ್ತ್ದ್, ದೇಶದ ಬೇತೆ ಬೇತೆ ಕಡೆ್ಟ್ ತನ್ನ ಸೇವೆನ್ ವಿಸ್ತರಣೆ ಮಲ್ಪುನ ಪ್ರಮುಖ ಹಾಸ್ಪಿಟಲಿಟಿ ಸಂಸ್ಥೆಯಾದ್ ಗುರುತಿಸಾದ್ಂಡ್. ಪ್ರಸ್ತುತ ಸಂಸ್ಥೆಡ್ 500ರ್ದ್ಲ ಹೆಚ್ಚ ಸಿಬ್ಬಂದಿಲು ಬೇಲೆ ಮಲ್ತೊಂದಿತ್ತ್ದ್ ಗುಣಮಟ್ಟದ ಸೇವೆ ಬೊಕ್ಕ ವೃತ್ತಿಪರ ನಿರ್ವಹಣೆದ ಮುಕೇನ ವಿಶಿಷ್ಟ ಸ್ಥಾನ ಪಡೆತ್ಂಡ್.
ವ್ಯವಹಾರ ವಿಸ್ತರಣೆದ ಉದ್ದೇಶಡ್ ಅಂಚೆನೆ ದಕ್ಷಿಣ ಕನ್ನಡ ಜಿಲ್ಲೆಡ್ ವೇಗವಾದ್ ಬುಲೆಪಿನ ವ್ಯಾಪಾರ ಕೇಂದ್ರವಾದುಪ್ಪುನ ಸುರತ್ಕಲ್ ಪೇಂಟೆಡ್ ಇನ್ನಾ ಹಾಸ್ಪಿಟಲಿಟಿ ಸಂಸ್ಥೆದ ಪೊಸ ಶಾಖೆ ಆರಂಭ ಮಲ್ದೆರ್. ನೆತ್ತ ಅಂಗವಾದ್ ಜನವರಿ 1, 2026 ಗುರುವಾರ ಬಯ್ಯಡ್ 4 ಗಂಟೆಗೆ, ಸುರತ್ಕಲ್ದ ಅಭಿಷ್ ಬಿಸಿನೆಸ್ ಸೆಂಟರ್ ಕಟ್ವಾಣಡ್ ಉದಿಪನದ ಲೇಸ್ ನಡತ್ಂಡ್.
ಈ ಪೊಸ ಶಾಖೆನ್ ವಿಶ್ವಕಪ್ ಮಹಿಳಾ ಕಬಡ್ಡಿ ವಿಜೇತ ತಂಡದ ಸದಸ್ಯೆ ಕುಮಾರಿ ಧನಲಕ್ಷ್ಮಿ ಉದಿಪನ ಮಲ್ತೆರ್. ಕ್ರೀಡಾ ಕ್ಷೇತ್ರಡ್ ರಾಷ್ಟ್ರಮಟ್ಟದ ಸಾಧನೆ ಮಲ್ದಿನ ಯುವ ಪ್ರತಿಭೆದ ಕೈಟ್ ಶಾಖೆ ಉದಿಪನ ಆಯಿನವು ವಿಶೇಷ ಆದಿತ್ತ್ಂಡ್.
ಲೇಸ್ಡ್ ಶಾಸಕೆರ್ ವೈ. ಭರತ್ ಶೆಟ್ಟಿ, ತುಳುನಾಡ ರಕ್ಷಣಾ ವೇದಿಕೆದ ಕೇಂದ್ರಿಯ ಮಂಡಳಿ ಅಧ್ಯಕ್ಷೆರ್ ಯೋಗಿಶ್ ಶೆಟ್ಟಿ ಜಪ್ಪು, ಅಭಿಷ್ ಬಿಲ್ಡರ್ಸ್ ಅಧ್ಯಕ್ಷೆರ್ ಪುಷ್ಪರಾಜ್ ಜೈನ್, ಮಹಾಬಲ ಪೂಜಾರಿ ಕಡಂಬೋಡಿ, ಕೇಸರಿ ಸುಧಾಕರ್ ಪೂಂಜಾ, ಮಹಾನಗರ ಪಾಲಿಕೆ ಸದಸ್ಯೆ ನಯನ ,ರೋಹಿತ್ ಶೆಟ್ಟಿ, ಎಸ್ ಜಿ ಸೂರಿಂಜೆ, ನಾರಾಯಣ ಪೂಜಾರಿ, ಸೇನಾನಿ ಶಶಿಧರ್ ಸೇರ್ದ್ ಮಸ್ತ್ ಜನ ಗಣ್ಯೆರ್ ಪಾಲ್ ಪಡೆದ್ ಸಂಸ್ಥೆದ ಬೆಳವಣಿಗೆಗ್ ಎಡ್ಡೆಪ್ಪು ಬಯಕಿಯೆರ್.
ಈ ಪೊರ್ತುಡು ಕೃಷ್ಣಾಪುರದ ನಾರಾಯಣ ಗುರು ಶಾಲೆದ ಜೋಕುಲೆನ ಎದುರುಡು ಮಹಿಳಾ ವಿಶ್ವಕಪ್ ವಿಜೇತ ತಂಡದ ಸದಸ್ಯೆ ಕು. ಧನಲಕ್ಷ್ಮಿ ಮೆರೆನ್ ಸನ್ಮಾನ ಮಲ್ತೆರ್. ಅಂಚೆನೆ ಶಾಲೆದ ಜೋಕುಲೆಗ್ ಭಾರತದ ದೇಶದ ವಿವಿಧ ರಾಜ್ಯಲೆನ್ ಗೋಡ್ಯಾವುನ ಚಿತ್ರದ ಸೀಟ್ ಕೊರ್ದು ಜೋಕ್ಲೆಗ್ ದೇಶಪ್ರೇಮದ ಬಗೆಟ್ಟ್ ಜಾಗೃತಿ ಪುಟ್ಟಾಯೆರ್. ಈ ಪೊರ್ತುಡು ಇನ್ನ ಹಾಸ್ಪಿಟಲಿಟಿ ಸಂಸ್ಥೆದ ಮಾಲೀಕೆರಾಯಿನ ಡಿ. ಕೆ. ಶೆಟ್ಟಿ ಮೇರ್, ಅಭಿಷ್ ಬ್ಯುಸಿನೆಸ್ ಸೆಂಟರ್ ಮಾಲಕರ ಸಂಘದ ಸಹಕಾರದೊಟ್ಟುಗು ಧನಲಕ್ಷ್ಮಿ ಮೆರೆಗ್ ರೂ. 50,000 ಗೌರವ ಧನ ಕೊರ್ದು ಸನ್ಮಾನ ಮಲ್ತೆರ್. ಈ ಸಂದರ್ಭ ಧನಲಕ್ಷ್ಮಿ ಮೆರೆನ ಪೋಷಕೆರಾಯಿನ ನಾರಾಯಣ ಪೂಜಾರಿ ಬೊಕ್ಕ ಶಶಿಕಲಾ ಇತ್ತೆರ್.