ನಂದಳಿಕೆ ಇಂಚರ ಸೇವಾ ಬಳಗದಕ್ಲೆರ್ದ್ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯ

ಕಾರ್ಲ: ಇಂಚರ ಸೇವಾ ಬಳಗ (ರಿ.) ನಂದಳಿಕೆದ ಮುತಾಲಿಕೆಡ್ 16ನೇ ಸೇವಾ ಯೋಜನೆದ ಮುಖೇನ ಒಂಜಿ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯ ಮಲ್ತೆರ್.

ಬೊಲ್ತೇರ್ ತಾಲೂಕ್ ದ ನಾವರ ಗ್ರಾಮದ ಗಿರಿಯಪ್ಪ ನಾಯ್ಕ ಮೆರೆನ ಮಗೆ ವಿಘ್ನೇಶ್ ಮೇರ್ ಕರಿನ ಆಗಸ್ಟ್ ತಿಂಗೊಲ್ಡ್ ಗಾಡಿ ಆಕ್ಸಿಡೆಂಟ್ ಡ್ ಮಸ್ತ್ ಪೆಟ್ಟಾದ್ ಕುಡ್ಲದ ಕೆ.ಎಸ್. ಹೆಗ್ಡೆ ಆಸ್ಪತ್ರೆಡ್ ಚಿಕಿತ್ಸೆ ಪಡೆವೊಂದು ಉಲ್ಲೆರ್. ಇತ್ತೆ ICU ಡ್ ಕೋಮಾ ಸ್ಥಿತಿಡ್ ಸಾವು ಬದ್ ಕ್ ದ ನಡುಟ್ ಉಲ್ಲೆರ್. ಮೆರೆನ ಚಿಕಿತ್ಸೆದ ಆಸ್ಪತ್ರೆದ ಖರ್ಚಿಗಾದ್ ಸೆ.19 ಕ್ಕ್ ಭವತಿ ಭಿಕ್ಷಾಂ ದೇಹಿ ಯಾತ್ರೆದ ಮುಖೇನ ಪನವು ಸಂಗ್ರಹ ಮಲ್ತೆರ್. ಸಹೃದಯಿ ದಾನಿಲೆರ್ದ್ ವಿಘ್ನೇಶ್ ಮೆರೆನ ಚಿಕಿತ್ಸೆಗ್ ಒಟ್ಟಾಯಿನ 43,750/- ರೂ.ದ ಚೆಕ್ ನ್ ಸರಿತಾ ರವೀಂದ್ರ ಶೆಟ್ಟಿ ಮೆರೆನ ಮುಖೇನ ಕೊರಿಯೆರ್.

ಈ ಪೊರ್ತುಡು ಕೂಟದ ಮಾನಾದಿಗೆದ ಗುರ್ಕಾರೆ ಶೈಲೇಶ್ ಕೋಟ್ಯಾನ್ ಸೂಡ, ಗುರ್ಕಾರೆ ದೀಕ್ಷಿತ್ ದೇವಾಡಿಗ ನಂದಳಿಕೆ, ಸಾಂಸ್ಕೃತಿಕ ಕಾರ್ಯದರ್ಶಿ ಸುಶ್ಮಿತಾ ರಾಕೇಶ್, ಜತೆ ಕಾರ್ಯದರ್ಶಿ ಜಯಪ್ರಕಾಶ್ ಕಿನ್ನಿಗೋಳಿ, ಸದಸ್ಯೆರ್ ರಕ್ಷಿತ್ ಬಂಗೇರ ಅಂಡಿಂಜೆ, ಕೃಷ್ಣ ಸುವರ್ಣ ವೇಣೂರು, ಸಂತೋಷ್ ಪೂಜಾರಿ ಹೊಕ್ಕಾಡಿಗೋಳಿ, ಪ್ರಸನ್ನ ಆಚಾರ್ಯ ನಂದಳಿಕೆ ಪಾಲ್ ಪಡೆದಿತ್ತೆರ್.