“ಸಿರಿ ದೇವಿ ಮೈಮೆ” ತುಳು ಆಟದ ಲೆಪ್ಪೋಲೆ ಬುಡುಗಡೆ

ತುಳು ಭಾಷೆಡ್ ಸುರುತ್ತ ಸರ್ತಿ ಶ್ರೀದೇವಿ ಮಹಾತ್ಮೆ ಆಟ ತುಳು ಭಾಗವತಿಕೆದೊಟ್ಟಿಗೆ ತುಳು ಭಾಷೆಡ್ ಸಿರಿ ದೇವಿ ಮೈಮೆ ಪನ್ಪುನ ಪ್ರಸಂಗದೊಟ್ಟಿಗೆ ಪೊಸ ಪ್ರಯೋಗ ನಡಪರೆ ಉಂಡು.

ಸೆ.30 ಕ್ಕ್ ಕುಡ್ಲ ಪುರಭವನಡ್ ಮಧ್ಯಾಹ್ನ 3 ಗಂಟೆರ್ದ್ ರಾತ್ರೆ 11 ಗಂಟೆ ಮುಟ್ಟ ನಡಪರೆ ಇಪ್ಪುನ ಈ ಲೇಸ್ ದ ಲೆಪ್ಪೋಲೆನ್ ಕನ್ಯಾನ ಸದಾಶಿವ ಶೆಟ್ಟಿ ಮೆರೆನ ಅಮ್ಮ ಲಲಿತಾ ಶೆಟ್ಟಿ ಮೇರ್ ಕನ್ಯಾನ ಸದಾಶಿವ ಶೆಟ್ರೆಗ್ ಕೊರ್ದು ಬುಡುಗಡೆ ಮಲ್ತೆರ್.

ತುಳುವೆರೆ ಆಯನೊ ಕೂಟ ಕುಡ್ಲ ಈ ಲೇಸ್ ನ್ ಆಯೋಜನೆ ಮಲ್ದ್ಂಡ್. ಈ ಪೊರ್ತುಡು ಸಂಸ್ಥೆದ ಅಧ್ಯಕ್ಷೆರಾಯಿನ ಶಮಿನಾ ಆಳ್ವ, ಕಾರ್ಯದರ್ಶಿ ರಾಜೇಶ್ ಹೆಗ್ಡೆ ಪೊಳಲಿ, ಗೋಪಾಡ್ಕರ್, ಆಶಾ ಶೆಟ್ಟಿ ಅತ್ತಾವರ, ಗೀತಾ ಹೆಗ್ಡೆ, ಭಾರತಿ ಶೆಟ್ಟಿ ಮುಲ್ಕಿ, ಭೂಷಣ್ ಕುಲಾಲ್ ಪಾಲ್ ಪಡೆದಿತ್ತೆರ್. ಡಾ. ರಾಜೇಶ್ ಆಳ್ವ ಮೇರ್ ಲೇಸ್ ದ ಸುಧಾರಿಕೆ ಮಲ್ತೆರ್.

ಲೇಸ್ ಡ್ ಕನ್ಯಾನ ಸದಾಶಿವ ಶೆಟ್ಟಿ ಮೆರೆಗ್ “ತುಳುವೆರೆ ಕರ್ಣೆ” ಪನ್ಪುನ ಬಿರುದು ಪ್ರಧಾನ ಮಲ್ಪರೆ ಉಂಡು. ಅಂಚೆನೆ ಸಿರಿ ದೇವಿ ಮೈಮೆ ಬೂಕು ಬುಡುಗಡೆ ಬೊಕ್ಕ ವಾಯ್ಸ್ ಆಫ್ ಆರಾಧನ ಜೋಕುಲೆರ್ದ್ ಜೋಕ್ಲೆ ಮಿನದನ ಲೇಸ್ ನಡಪರೆ ಉಂಡು. ತುಳುವೆರೆನ ಸುಮಾರ್ ದಿನತ್ತ ನಿರೀಕ್ಷೆ ಆಯಿನ ಶ್ರೀ ದೇವಿ ಮಹಾತ್ಮೆ ಆಟನ್ ತುಳು ಭಾಷೆಡ್ ಗೊಬ್ಬುದು ತೂಪಾವೊಡು ಪನ್ಪುನ ಕನ ನನಸಾಯೆರೆ ಉಂಡು. ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಗೆಂದಿನ ಸರಪಾಡಿ ಅಶೋಕ್ ಶೆಟ್ಟಿ ಮೆರೆನ ಸಂಯೋಜನೆಡ್ ಈ ಆಟ ನಡಪರೆ ಉಂಡು. ನಾಲ್ ರಾಜ್ಯೋತ್ಸವ ಪ್ರಶಸ್ತಿ ಗೆಂದಿನ ಆಟದ ಕಲಾವಿದೆರೆನ ಪಾಲ್ವಿಕೆ ಇಸೇಸ ಮೆರುಗು ಕೊರ್ಪುಂಡು.