ಸುಬ್ರಹ್ಮಣ್ಯ: ನಮ್ಮ ದೇಶದ ಗ್ರಾಮೀಣ ಮಣ್ಣ್ ದ ಕ್ರೀಡೆ ಆಯಿನ ಕಬ್ಬಡಿ ಯುವ ಜನಾಂಗಗ್ ಎಚ್ಚದ ಸ್ಪೂರ್ತಿನ್ ಕೊರ್ಪುಂಡು. ಸುಸಮೃದ್ಧ ಆರೋಗ್ಯನ್ ಕೊರ್ಪುನೆಟ್ಟ್ ಗ್ರಾಮೀಣ ಮಣ್ಣ್ ದ ಕ್ರೀಡೆದ ಪಾತ್ರ ಮಲ್ಲ. ಅಂಚಾದ್ ಯುವ ಕಲ್ಪಾರ್ಥಿಲು ಕಬಡ್ಡಿದಂಚಿ ಎಚ್ಚದ ಒತ್ತು ಕೊರೊಡು. ಆಧುನಿಕ ಯುಗಡ್ ಮೊಬೈಲ್ನ್ ಬುಡ್ದು ಕ್ರೀಡಾ ಕ್ಷೇತ್ರದಂಚಿ ಕಲ್ಪಾರ್ಥಿಲು ಒತ್ತು ಕೊರ್ಂಡ ಬದ್ ಕ್ ಎಡ್ಡೆ ಆಪುಂಡು ಪಂದ್ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ವ್ಯವಸ್ಥಾಪನಾ ಸಮಿತಿದ ಸದಸ್ಯೆರ್ ಶ್ರೀವತ್ಸ ಬೆಂಗ್ಲೂರ್ ಪಂಡೆರ್.
ದೇವಲ್ಯದ ಆಡಳಿತದ ಎಸ್ಎಸ್ಪಿಯು ಕಾಲೇಜ್ ದ ಮುತಾಲಿಕೆಡ್ ಬುಧಾರ ಕಾಲೇಜ್ ದ ಕ್ರೀಡಾಂಗಣಡ್ ನಡತಿನ ತಾಲೂಕ್ ಮಟ್ಟದ ಪದವಿಪೂರ್ವ ಕಾಲೇಜ್ ವಿಭಾಗದ ಬಾಲಕ ಬೊಕ್ಕ ಬಾಲಕಿಯೆರೆನ ಕಬಡ್ಡಿ ಪಂತೊನ್ ಉದಿಪನ ಮಲ್ತ್ ದ್ ಪಾತೆರಿಯೆರ್.
ಎಸ್ಎಸ್ಪಿಯು ಕಾಲೇಜ್ ದ ಪ್ರಾಂಶುಪಾಲೆರ್ ಸೋಮಶೇಖ ನಾಯಕ್ ಲೇಸ್ ದ ಗುರ್ಕಾರ್ಮೆನ್ ಒಯಿಸೊಂದಿತ್ತೆರ್. ದ.ಕ ಜಿಲ್ಲಾ ರೆಫ್ರಿ ಅಸೋಸಿಯೇಶನ್ದ ಗುರ್ಕಾರೆ ಶಿವರಾಮ ಯೇನೆಕಲ್ಲು, ಕೋಣಾಲು ಪದವಿಪೂರ್ವ ಕಾಲೇಜ್ ದ ಪ್ರಾಚಾರ್ಯ ಶಿವರಾಮ್ ಮಲ್ಲ ಬಿನ್ನೆರಾದ್ ಪಾಲ್ ಪಡೆದಿತ್ತೆರ್.
ಚಾವಡಿಡ್ ಎಸ್ಎಸ್ಪಿಯು ಕಾಲೇಜ್ ದ ಹಿರಿಯ ವಿದ್ಯಾರ್ಥಿ ಸಂಘದ ಗುರ್ಕಾರೆ ರಾಜೇಶ್ ಎನ್.ಎಸ್, ಶಿಕ್ಷಕ ರಕ್ಷಕ ಸಂಘದ ಗುರ್ಕಾರೆ ರಾಜೇಶ್ ಮಾವಿನಕಟ್ಟೆ, ಕಾಲೇಜ್ ದ ದೈಹಿಕ ಶಿಕ್ಷಣ ಉಪನ್ಯಾಸಕೆರ್ ರಾಧಾಕೃಷ್ಣ ಚಿದ್ಗಲ್, ವಿದ್ಯಾರ್ಥಿ ಸಂಘದ ಸಂಚಾಲಕೆರ್ ಜಯಪ್ರಕಾಶ್.ಆರ್ ಇತ್ತೆರ್.
ಉಪನ್ಯಾಸಕಿ ಶ್ಯಾಮಿಲಿ ಎದ್ಕೊನಿಯೆರ್. ಇತಿಹಾಸ ಉಪನ್ಯಾಸಕೆರ್ ರತ್ನಾಕರ ಸುಬ್ರಹ್ಮಣ್ಯ ಸೊಲ್ಮೆ ಸಂದಾಯೆರ್. ಉಪನ್ಯಾಸಕಿ ಶ್ರುತಿ ಯಾಲದಾಳು ಲೇಸ್ ದ ಸುಧಾರಿಕೆ ಮಲ್ತೆರ್. ಪಂತೊಡು ಒಟ್ಟು 8 ಕೂಟಲು ಚಾಂಪಿನ್ಷಿಪ್ಗಾದ್ ಗೊಬ್ಬೆರೆ ಉಂಡು.
ವರದಿ: ಗೋಪಿಚಂದನ್ ಕೆಎಸ್
pallavi shetty