ಸುಬ್ರಹ್ಮಣ್ಯ: ದಾನಲೆಡ್ ಸುಮಾರ್ ಬಗೆತ್ತ ದಾನಲು ಉಂಡು. ಅವು ಅನ್ನದಾನ, ವಸ್ತ್ರದಾನ, ವಿದ್ಯಾದಾನ ಪಂದ್. ನೆರ್ದ್ ಮಾತೆರ್ದ್ ಲ ಮುಖ್ಯವಾಯಿನ ದಾನ ನೆತ್ತೆರ್ ದಾನ. ಉಂದು ಶ್ರೇಷ್ಠವಾಯಿನ ದಾನ. ನೆತ್ತೆರ್ ಗ್ ಪರ್ಯಾಯ ವ್ಯವಸ್ಥೆ ಇಜ್ಜಿ. ತುರ್ತು ಸಂದರ್ಭೊಡು ನೆತ್ತೆರ್ ಬೋಡಾಂಡ ಬದಲಿ ವ್ಯವಸ್ಥೆಯಾದ್ ಒರಿಯನ ದೇಹರ್ದ್ ದೆತ್ತಿನ ನೆತ್ತೆರ್ ನೇ ಕುಡೊರಿಯಗ್ ಕೊರೊಡಾಪುಂಡು ಪಂದ್ ಕುಕ್ಕೆ ಶ್ರೀ ಸುಬ್ರಹ್ಮಣ್ಯೇಶ್ವರ ಕಾಲೇಜ್ ದ ಪ್ರಭಾರ ಪ್ರಾಚಾರ್ಯ ಕೆ ದಿನೇಶ್ ಪಂಡೆರ್.
ಮೇರ್ ಲಯನ್ಸ್ ಕ್ಲಬ್ ಕುಕ್ಕೆ ಸುಬ್ರಹ್ಮಣ್ಯ, ಕೆ. ಎಸ್. ಎಸ್. ಕಾಲೇಜ್ ಸುಬ್ರಹ್ಮಣ್ಯ, ಆಂತರಿಕ ಗುಣಮಟ್ಟ ಭರವಸೆ ಕೋಶದ ಮುತಾಲಿಕೆಡ್ ರಾಷ್ಟ್ರೀಯ ಸೇವಾ ಯೋಜನೆ ಘಟಕ, ಭಾರತ ಬೊಕ್ಕ ರೇಂಜರ್ಸ್ ಘಟಕ, ಯುವ ರೆಡ್ ಕ್ರಾಸ್ ಘಟಕ, ಕುಕ್ಕೆ ಶ್ರೀ ಸುಬ್ರಹ್ಮಣ್ಯೇಶ್ವರ ಮಹಾವಿದ್ಯಾಲಯ ಸುಬ್ರಮಣ್ಯ, ಕುಕ್ಕೆ ಶ್ರೀ ಆಟೋ ಚಾಲಕ ಮಾಲಕರ ಸಂಘ ಬೊಕ್ಕ ಎ.ಜೆ. ಆಸ್ಪತ್ರೆ ಬೊಕ್ಕ ಸಂಶೋಧನಾ ಕೇಂದ್ರ ಬ್ಲಡ್ ಬ್ಯಾಂಕ್ ಕುಡ್ಲ ನೆತ್ತ ಒಟ್ಟುಸೇರಿಗೆಡ್, ಸುಬ್ರಹ್ಮಣ್ಯದ ಕೆ.ಎಸ್.ಎಸ್. ಕಾಲೇಜ್ ಡ್ ನಡತಿನ ನೆತ್ತೆರ್ ಉಂಬೊಲಿ ಶಿಬಿರನ್ ಉದಿಪನ ಮಲ್ತ್ ದ್ ಪಾತೆರಿಯೆರ್.
ಲೇಸ್ ದ ಗುರ್ಕಾರ್ಮೆನ್ ಸುಬ್ರಹ್ಮಣ್ಯ ಲಯನ್ಸ್ ಕ್ಲಬ್ ದ ಅಧ್ಯಕ್ಷೆರ್ ರಾಮಚಂದ್ರ ಪಳಂಗಾಯ ಒಯಿಸೊಂದಿತ್ತೆರ್.
ಮಲ್ಲ ಬಿನ್ನೆರಾದ್ ಕಾಲೇಜ್ ದ ಆಂತರಿಕ ಗುಣಮಟ್ಟ ಕೋಶದ ಸಂಯೋಜಕಿ ಲತಾ ಬಿ.ಟಿ, ಏ.ಜೆ .ಬ್ಲಡ್ ಬ್ಯಾಂಕ್ ಕುಡ್ಲ ಗುಣಮಟ್ಟ ಬೊಕ್ಕ ತಾಂತ್ರಿಕ ಅಧಿಕಾರಿ ಪಿ .ಆರ್. ಗೋಪಾಲಕೃಷ್ಣ, ಕುಕ್ಕೆ ಶ್ರೀ ಆಟೋ ಚಾಲಕ ಮಾಲಕರ ಸಂಘ ಸುಬ್ರಹ್ಮಣ್ಯ ಅಧ್ಯಕ್ಷೆರ್ ವಿವೇಕಾನಂದ ದೇವರಗದ್ದೆ, ಸುಬ್ರಮಣ್ಯ ಲಯನ್ಸ್ ಕ್ಲಬ್ ಸ್ಥಾಪಕಾಧ್ಯಕ್ಷೆರ್ ರಂಗಯ್ಯ ಶೆಟ್ಟಿಗಾರ್, ಕೋಶಾಧಿಕಾರಿ ಚಂದ್ರಶೇಖರ ಪಾಣತ್ತಿಲ್ಲ, ರೋವರ್ಸ್ ಅಂಡ್ ರೆಂಜರ್ಸ್ ಘಟಕದ ಸಂಯೋಜಕಿ ಪ್ರಮೀಳಾ, ಯೂತ್ ರೆಡ್ ಕ್ರಾಸ್ ಸಂಯೋಜಕೆರ್ ಸೃಜನ್ ಮುಂಡೋಡಿ ಚಾವಡಿಡ್ ಇತ್ತೆರ್. ಉಪನ್ಯಾಸಕಿ ಆರತಿ ಎದ್ಕೊನಿಯೆರ್. ಲಯನ್ಸ್ ಕ್ಲಬ್ ದ ಕಾರ್ಯದರ್ಶಿ ಸತೀಶ ಕೂಜುಗೋಡು ಸೊಲ್ಮೆ ಸಂದಾಯೆರ್.
ವರದಿ: ಗೋಪಿಚಂದನ್ ಕೆಎಸ್
pallavi shetty